Gẹnẹsis 29
29
Jekọb Se Owa Leban
1Jekọb keghi deyan okhian, ọ na mu uhunmwu da otọ avbe iran ni rre odẹ ahọ. 2Vbe udomwurri, ọ na bẹghe uhae vbe uwu oha, oghẹn ohuan eha keghi rhu ye ọkpẹn ọnrẹn. Uhae na ọre iran ke sa amẹ ne avbe oghẹn ohuan nii wọn, iran keghi mu okuta nọkhua gue unu ẹnrẹn. 3Avbe oghẹn ohuan hia ghẹ ghi si koko ye evba nẹ, avbe ọsuohuan ghi werriẹ okuta hiẹn unu ẹnrẹn rre, iran ghi sa amẹ ne iran wọn, iran ghi vbe dọlegbe mu okuta ye ihe ẹre.
4E Jekọb keghi nọ iran wẹẹ, “Ihomwa, de ehe ne uwa ke rre yi?” Iran keghi wanniẹn wẹẹ, “Haran ma ke rre.” 5Ọ keghi nọ iran wẹẹ, “Wa rẹn Leban ne ovbi Nahọ ra?” Iran wanniẹn wẹẹ, “Ẹn, ma rẹn ọnrẹn.” 6Ọ keghi nọ iran wẹẹ, “Deghẹ egbe rran rẹn?” Iran wanniẹn wẹẹ, “Egbe rran rẹn, wa ghe ovbi ẹre ighẹ Rekiẹl viọ ohuan rẹn dee.”
7E Jekọb keghi kha wẹẹ, “Ugbẹn vbe a miẹn wẹ ẹdẹ ma he mu ne a ya viọ ohuan la owa, vbọzẹ ne uwa ma na sa amẹ ne iran wọn ne uwa dọlegbe viọ iran la oha ya rri irunmwu?” 8Iran keghi wanniẹn wẹẹ, “Ma i sẹtin ru vberriọ vbe ẹ i re te oghẹn ohuan hia rre nẹ ne a werriẹ okuta nii hin rre, ẹghẹ nii, ma ghi sa amẹ ne avbe oghẹn ohuan wọn.” 9Ehe ne Jekọb na ye gu iran guan ni, e Rekiẹl keghi rre kẹe kevbe oghẹn ohuan erha ẹe. 10Ugbẹn vbe Jekọb ghi miẹn Rekiẹl kẹe kevbe ohuan Leban ne ọtẹn irẹn, ọ kegha rrie uhae, ọ werriẹ okuta hin rre, ọ keghi sa amẹ ne avbe ohuan wọn. 11Ọ keghi ye unu Soso ọmọ okhuo nii unu, ọ na gha viẹ. 12Ọ tama rẹn wẹẹ, “Ovbi e Ribẹka ọre I khin, ọtẹn erhaa.” Rẹn keghi rhulẹ ya tama erha ẹe. 13Ugbẹn vbe ọ ghi họn ẹmwẹ Jekọb ne ọtiọnrẹn, ọ rhulẹ ya vba ẹre, ọ gbae ginna egbe, ọ keghi ya unu soso ẹre unu, ọ na rhie ẹre gha die owa. Jekọb na na iyẹn emwi ni sunu hia ma e Leban. 14E Leban keghi tama rẹn wẹẹ, “Erriọ nọ vbe ẹmwata ma i zẹdẹ re ehiyo.” E Jekọb keghi tota vbe evba la uki ọkpa.
Jekọb Ga Ye Rekiẹl Kevbe Lia Vbe Obọ Leban
15E Leban keghi tama Jekọb wẹẹ, “Ẹ i re ne u wa gha ga mwẹ kẹkan rhunmwuda ighẹ ọtẹn mwẹ u khin. Inu igho u ho ne u gha miẹn?” 16E Leban kegha mwẹ emọ ikhuo eva; a keghi tie nọdiọn nọ rrọọ Lia, a kegha tie nekherhe Rekiẹl. 17Aro e Lia mose sokpan Rekiẹl keghi zọ ẹse, ọ kevbe mose. 18E Jekọb kegha ho ẹmwẹ Rekiẹl, ọ keghi kha wẹẹ, “I gha ya ukpo ihinrọn ga ye Rekiẹl, adeghẹ ugha rhie mẹ.” 19E Leban keghi kha wẹẹ, “I ya ẹe nuẹn ọre ọ ma sẹ ne I yae ne ọmwa ọvbehe, tota ke mwẹ.” 20E Jekọb keghi ya ukpo ihinrọn ga ye Rekiẹl, ọ keghi yevbe ikpẹdẹ eso vbe aro ẹre rhunmwuda ọ ho ẹmwẹ ọnrẹn.
21E Jekọb keghi khama e Leban wẹẹ, “Ẹghẹ gba nẹ rhie ovbuẹ mẹ rhie rọnmwẹ.” 22Ẹre Leban na le evbare irhiọha, ọ na tie emwa hia sẹ owa. 23Sokpan, asọn ghi rre, ne ọ gha na te rhie Rekiẹl gha khian, ọ keghi rhie Lia gie Jekọb, e Jekọb keghi guẹe ru emwi. ( 24E Leban keghi rhie Zilpa ne ọviẹn ọnrẹn nokhuo zẹvbe ne ọ gha guẹ dia ne Lia ne ovbi ẹre.) 25Ẹdẹ ghi gbe nẹ e Jekọb keghi do rẹn wẹ e Lia nọ. Rẹn keghi bu e Leban gha khian, ọ tama rẹn wẹẹ, “Vbua na ru mwẹ vberriọ hẹ yi? E Rekiẹl ọre I ga yi. Vbua na fi mwẹ hẹ.”
26E Leban keghi khama rẹn wẹẹ, “Ma i ruẹe vberriọ vbe edinran, ne a ka rhie ọvbokhan rrie khẹ ọdiọn. 27Zin egbe ne u gie izọla ọkpa oghọghọ irhiọha gba nẹ, I gha vbe rhie Rekiẹl nuẹn a deghẹ u gha ga mwẹ la ukpo ihinrọn ọvbehe.”
28E Jekọb ke kue yọ, izọla oghọghọ irhiọha ni ghi gba nẹ, e Leban keghi rhie Rekiẹl ne ovbi ẹre nẹẹn rhie rọnmwẹ. ( 29E Leban keghi rhie ọviẹn ọnrẹn ighẹ Bilha ne Rekiẹl ne ọ gha guẹe dia.) 30E Jekọb kevbe gu e Rekiẹl ru emwi, ọ keghi ho ẹmwẹ Rekiẹl sẹ Lia. Ọ keghi dọlegbe ya ukpo ihinrọn winna ne Leban.
Emọ Ne A Biẹlẹ Ne Jekọb
31E Nọyaẹnmwa ghi miẹn wẹ a ma ho ẹmwẹ e Lia vba Rekiẹl, ọ keghi ruẹe ne ọ biẹlẹ, sokpan, e Rekiẹl ma biẹ. 32E Lia keghi hanmwa, ọ na biẹ ọmọ okpia ọ keghi kha wẹẹ, “E Nọyaẹnmwa rẹn ọlọghọmwa ne I mwẹ, te ọdọ mwẹ ghẹ ghi ho ẹmwẹ mwẹ nian”; ọ keghi he ẹre Riubẹn. 33Ọ kevbe dọlegbe hanmwa, ọ na biẹ ọmọ okpia ọvbehe, ọ keghi kha wẹẹ, “E Nọyaẹnmwa rhie ọmọ okpia na mẹ; rhunmwuda, ọ rẹnrẹn wẹ a i ho ẹmwẹ ẹmwẹ”; ọ kegha tie ẹre Simiọn. 34Ọ keghi vbe dọlegbe hanmwa, ọ kevbe biẹ ọmọ okpia ọvbehe. Rẹn keghi kha wẹẹ, “Banbanna nian, te ọdọ mwẹ ghẹ ghi ya obọ mu mwẹ ẹse rhunmwuda, emọ ikpia eha ọre I he biẹlẹ nẹẹn,” ọ keghi he ẹre Livai. 35Ọ kevbe dọlegbe hanmwa, ọna vbe biẹ ọmọ okpia ọvbehe, rẹn keghi kha wẹẹ, “Vbe ẹghẹ na, I gha rho E Nọyaẹnmwa.” Rhunmwuda ọnii; ọ keghi he ẹre Juda. Ọ re ọ na fiọnmọ.
Currently Selected:
Gẹnẹsis 29: EDO96
Highlight
Share
Copy
Want to have your highlights saved across all your devices? Sign up or sign in
@ The Bible Society of Nigeria, 1996
