Gẹnẹsis 30
30
1Sokpan, e Rekiẹl, ma he biẹ ne Jekọb, ọ keghi gha gbọvo ọtiọnrẹn, ọ keghi khama e Jekọb wẹẹ, “Rhie ọmọ mẹ biẹ, deghẹ ẹ ire erriọ, I gha wu.” 2Ohu e Rekiẹl keghi mu e Jekọb, ọ na wẹẹ, “Mẹ ira sẹtin mudia ye ihe Osanobua. Rẹn ọre ọ ma guẹ biẹ.” 3Ọ keghi kha wẹẹ, “Ghe ọviẹn mwẹ nokhuo ighẹ Bilha vbe emwa na, ya guẹe ru emwi ne ọ biẹ mẹ, odẹ vbe nian mẹ ghi la ekpa ẹre do gha re iye ọmọ.” 4Ọ keghi rhunmwuda ọnii rhie Bilha ne ọviẹn ọnrẹn ne ọdọ ẹre, ọ keghi guẹe ru emwi ọdọ vbe amwẹ. 5E Bilha keghi hanmwa, ọ na biẹ ọmọ okpia ọkpa ne Jekọb. 6E Rekiẹl keghi kha wẹẹ, “Osanobua bu ohiẹn nẹ, ọ họn erhunmwu mwẹ, ọ na rhie ọmọ okpia mẹ”; ọ keghi he ẹre Dan. 7E Bilha ne ọviẹn Rekiẹl dọlegbe hanmwa, ọ na biẹ ọmọ okpia ne ogieva ne Jekọb. 8E Rekiẹl ke kha wẹẹ, “I gu ọtẹn mwẹ gbinna igbinna nọ wegbe sokpan, obọ mwẹ keghi ke ukhunmwu”; ọ keghi rhunmwuda ọnii he ẹre Naftali. 9Ugbẹn vbe Lia ghi miẹn wẹ ọ fiọnmọ, ọ keghi rhie Zilpa ne ọviẹn ọnrẹn ne Jekọb rhie rọnmwẹ. 10E Zilpa keghi biẹ ọmọ okpia ne Jekọb. 11E Lia keghi kha wẹẹ, “Uhunmwu mwẹ ma nẹ”; ọ keghi he ẹre Gad. 12E Zilpa ne ọviẹn Lia keghi biẹ ọmọ okpia ne ogieva ne Jekọb. 13E Lia keghi kha wẹẹ, “U miẹn ọyẹnmwẹ ne ọ sẹ mwẹ banbanna nian, te avbe ikhuo ghi ra gha tie mwẹ ne ọyẹnmwẹ sẹ.” Ọ keghi he ẹre Asia.
14Vbe ẹghẹ ne a ya fian ọka, e Riubẹn keghi yo uwu oha, ọ ke miẹn ebe ukhunmwu ẹwẹre, ọ ke viọ ẹre gie Lia ne iyẹe. E Rekiẹl keghi tama Lia wẹẹ, “Lahọ ya mẹ vbe ebe ukhumwu ẹwẹre ọghe ovbuẹ.” 15E Lia keghi wanniẹn wẹẹ, “Ọdọ ne u miẹn mwẹ re ma he ye suẹ, ebe ukhunmwu ẹwẹre ovbi mwẹ ọre u ghi vbe ra viọ.” Rekiẹl keghi kha wẹẹ, “U gha viọ ebe ukhunmwu ẹwẹre ovbuẹ mẹ, u sẹtin ya lovbiẹ ke Jekọb asọn nẹ rẹ.” 16E Jekọb ghi ke oha rre vbe ota nii e Lia ke khian bu ẹre yo, ọ wẹẹ, “Te u lovbiẹ ke mwẹ asọn na rhunmwuda, ebe ukhunmwu ẹwẹre ovbi mwẹ ọre I ya ha osa yuẹ.” Ọ keghi gele guẹe vbiẹ asọn nii. 17Osanobua keghi họn erhunmwu Lia, ọ kegha hanmwa, ọ na biẹ ọmọ okpia ukpogisẹn ne Jekọb. 18E Lia keghi kha wẹẹ, “Osanobua sanmwẹ ẹse nẹ, rhunmwuda, I rhie ọviẹn mwẹ ne ọdọ mwẹ.” Ọ keghi he ovbi ẹre Isaaka. 19E Lia kevbe dọlegbe hanmwa, ọ na vbe biẹ ọmọ okpia ogiehan ne Jekọb. 20-21Ọ keghi kha wẹẹ, “Osanobua ru mwẹ ẹse ne ọ gbe otiti, eban nian ọdọ mwẹ gha rhan obọ miẹn mwẹ rhunmwuda emọ ehan ọre I he biẹlẹ ne ọdọ mwẹ”; ọ keghi he ẹre Zebulọn. Vbe okiekie ọ keghi biẹ ọmọ okhuo ọkpa ne ọ he ẹre Dina.
22Ẹghẹ nii Osanobua keghi ye Rekiẹl rre, ọ keghi họn erhunmwu ẹnrẹn, ọ keghi giẹe biẹlẹ emọ. 23Ọ keghi hanmwa, ọ na biẹ ọmọ okpia, ọ keghi kha wẹẹ, “Osanobua mu ozan ọghe agan hin mwẹ uhunmwu rre. 24Te Nọyaẹnmwa gha ye rhie ọmọ okpia ọvbehe me”; ọ keghi he ẹre Josẹf.
Ẹki Ne Jekọb Vbe Leban Gu Egbe Do
25A ghi biẹ Josẹf nẹ, e Jekọb kegbi khama e Leban wẹẹ, “Gunmwẹ kpao ne I gha rrie owa. 26Viọ avbe ọvbokhan mwẹ mẹ ne I ga yi vbe obọ ruẹ, kevbe ivbimwẹ, ne I kpao. U rẹn vbe ne I ga ẹsẹse hẹ.”
27E Leban keghi tama rẹn wẹẹ, “Gun mwẹ tama ruẹn, I ghe emwi yọ, I keghi miẹn wẹ rhunmwuda ruẹ ọre Nọyaẹnmwa na fiangbe mwẹ. 28Ta inu igho ne u gha miẹn, I gha ha ẹre nuẹn.” 29E Jekọb keghi wanniẹn wẹẹ, “U rẹn vbene I winna nuẹn hẹ kevbe vbene ohuan ruẹn do muan yọ hẹ vbe obọ mwẹ. 30Ekherhe ne u te mwẹ vbe I te rre keghi do khian ọrhẹnrhẹn, e Nọyaẹnmwa keghi rhunmwuda mwẹ fiangbuẹ vbe ehe ne I rhirhi a yo. Eban nian, ọ sẹe ne I gha ru Ọghe ne egbe mwẹ.”
31E Leban nọ rẹn wẹẹ, “Vbia gha ha ruẹ re?” E Jekọb wanniẹn wẹẹ, “I i gualọ igho rhọkpa. I gha ye gha su ohuan ruẹn a deghẹ u ru vbene I kha re. 32Ẹdẹ nẹrẹ na, I gha la oghẹn ohuan ruẹn gaa. I ghi hannọ ivbi ohuan nekhui, ni gbẹnnẹ ekẹnnẹkẹnnẹ kevbe ni hannọ igho vbe ivbi ẹwe ruẹ ya ye efẹn ọkpa. Igho ne I ho ne u hae mẹ fo nẹ. 33Ẹdẹ nakhuẹ, ẹ i ra lọghọ nuẹn rẹn deghẹ I gbe emwi rhu. Ugha rre do ghe emwi ne a hae mẹ ghe, a deghẹ I mwẹ ẹwe ne ọ ma gbẹnnẹ ekẹnnẹkẹnnẹ ra ne ọ ma hannọ igho ra ohuan ne ẹ i khuikhui vbe ọghomwẹ, u ghi rẹn wẹ, te a duẹe mu.” 34E Leban keghi wanniẹn wẹẹ, “Ọ maa. Ma gha ruẹe vbene u kha re.” 35Sokpan ẹdẹnẹdẹrriọ, E Leban keghi viọ avbe ovbukhọ ni hannọ igho ra ni gbẹnnẹ ekẹnnẹkẹnnẹ kevbe ẹwe amwẹ hia ni gbẹnnẹ ekẹnnẹkẹnnẹ, ni hannọ igho, kevbe ni mwẹ ehe nọfua vbe egbe, ọ kevbe viọ avbe ohuan nekhui hin rre, ọ na viọ enii ne ovbi ẹre gha su. 36Ọ keghi viọ oghẹn na kpao vbe ehe ne Jekọb ye rre la okhian ikpẹdẹ eha. E Jekọb ke gha gbe aro ghe oghẹn ohuan e Leban ni de kẹe.
37E Jekọb keghi viọ abọ erhan ẹwae, amẹmẹ, kevbe erhan kẹkan ọvbehe eso ne ọ ma he wu, ọ keghi kpalọ ikpakpa ẹre eso hin rre, vbe ne avbe abọ ni ghi na do gha mwẹ uviẹn nọfua vbe egbe. 38Ọ keghi viọ abọ erhan ye odaro uvun ne avbe ohuan na wọn amẹ. Emwi ne o yae viọ ẹre ye evba ọrọre wẹ evba iran na mu vbe iran a do wọn amẹ. 39Avbe ẹwe ghi biẹlẹ vbe ehe ne avbe abọ erhan na ye, iran keghi biẹlẹ emọ ni gbẹnnẹ ekẹnnẹkẹnnẹ, ni hannọ igho kevbe ni mwẹ ama ughughan vbe egbe. 40E Jekọb keghi hannọ avbe ohuan ni ye ihọkpa, ọ na viọ iran aro da emwirri e Leban nekhui kevbe ni gbẹnnẹ. Erriọ ọre ọ ya hẹko koko oghẹn ohuan ọghọe. Ọ ma vbe hẹ ọre ba ọghe Leban.
41Avbe emwirri ne egbe gba na ni rrọọ gha mu, e Jekọb ghi viọ abọ erhan na ye odaro iran vbe ehe ne iran na wọn amẹ, ne iran miẹn ehe na biẹlẹ vbe ehe ne avbe abọ erhan ni ye. 42Sokpan ẹ i viọ abọ erhan nii ye ehe ne emwirri ne ẹ i ma ni rrọọ ye. A keghi do miẹn wẹ, emwirri ne ẹ i ma ni rrọọ kegha re ọghe Leban, ne egbe gba na ni rrọọ kegha re ọghe Jekọb. 43Banbanna, Jekọb ke wa do khian ọmwa ne ọ fe, ọ kegha mwẹ oghẹn ohuan nibun, avbe eviẹn, ekẹtẹkẹtẹ ke ẹsin.
Currently Selected:
Gẹnẹsis 30: EDO96
Highlight
Share
Copy
Want to have your highlights saved across all your devices? Sign up or sign in
@ The Bible Society of Nigeria, 1996
