Gẹnẹsis 31
31
E Jekọb Lẹ Kpao Sẹ Leban Ra ee
1E Jekọb ghi họn wẹ ivbi e Leban ta ee khian wẹẹ, “Jekọb viọ emwi erha ima fo. Emwi erhamwa ọre ọ ya họn ẹfe ne ọ mwẹ hia.” 2Rẹn kevbe miẹn wẹ ekhọe Leban fiwerriẹ ghe irẹn lahin vbene ọ te ka ye de yi. 3Ẹre Nọyaẹnmwa na tama rẹn wẹẹ, “Werriegbe gha rrie ẹvbo erhaa kevbe avbe etuẹn, I gha ya ba ruẹ.”
4Ẹre Jekọb na gie na khama Rekiẹl kevbe Lia ne iran do miẹn irẹn vbe oha ne ohuan irẹn ye. 5Ọ keghi tama iran wẹẹ, “I do miẹn wẹẹ ẹ i re aro ne erha uwa te ka ya ghe mwẹ de usin, ọ re ọ ghi ya ghe mwẹ na. Sokpan Osanobua avbe erhamwẹ ọre ọ mudia mẹ. 6Wa eveva rẹnrẹn wẹẹ, ẹtin mwẹ hia ọre I ya ga erha uwa. 7Sevba, ọ rhu mwẹ re, ọ na fi igho ne ọ hae mẹ yo fi ẹe rre igba igbe. Sokpan Osanobua ma gie obọ ẹre gba mwẹ. 8Ẹghẹ ne Leban a rhirhi ya kha wẹẹ, ‘Ẹwe ahannọ ọre ọ gha re ne a ya ha ruẹ osa.’ Oghẹn nii hia ghi gha biẹlẹ ọghe ahannọ. Ọ gha vbe kha wẹẹ, ‘Ne ọ gbẹnnẹ vbe ẹwe ọre ọ gha re osa ne a ha ruẹ re,’ oghẹn ni hia ghi biẹlẹ ne ọ gbẹnnẹ. 9Osanobua miẹn erha uwa oghẹn emwirri, ọ keghi hẹ mẹ.”
10“Vbe ẹghẹ ne emwirri ya mu, I keghi mina miẹn ọẹn wẹẹ avbe ovbukhọ ni mu iran kegha re ni gbẹnnẹ, ni hannigho kevbe ni mwẹ egbe ughughan. 11Odibo Osanobua keghi tama mwẹ vbe imina wẹẹ, ‘Jekọb’ I keghi wanniẹn wẹẹ, ‘Ghe mwẹ’. 12Rẹn keghi kha wẹẹ, ‘Ghe, avbe ovbukhọ ni mu hia kegha re ni gbẹnnẹ, ni hannigho kevbe ni mwẹ egbe ughughan. Mẹ ọ ruẹe vberriọ rhunmwuda I miẹn emwi ne Leban ruẹ re. 13Mẹ ọrọre Osanobua ne ọ rhiegbe ma ruẹn vbe Bẹtẹl ehe ne u na tue ofigbọn yan okuta ya zẹ ayere, ne u na vbe yan. Banbanna nian, mu egbe ne u gha rrie ẹvbo ruẹ ehe ne a na biọ.’ ”
14E Rekiẹl kevbe Lia keghi wanniẹn tama e Jekọb wẹẹ, “Ma I mwẹ ukhu ne ima ra re vbe obọ erha mwa. 15Ẹre aro ne a ya ghe orhunmwuyẹn ọre ọ ya ghe ima? Te ọ khiẹnnẹ ima. Eban nian, ọ vbe lo igho ne ọ miẹn vbe uhunmwu ima nẹ. 16Ẹfe hia ne Osanobua miẹn erha ima re, ọghe ima nọ, ọghe ivbima nọ. Ru emwi ne Osanobua a rhirhi tama ruẹn.” 17-18Ẹre Jekọb na mu egbe ne ọ do bu erha ẹe vbe otọ Kenan. Ọ keghi viọ avbe amwẹ ọnrẹn kevbe ivbi ẹre yan ekẹtẹkẹtẹ, ọ na viọ emwirri ẹnrẹn hia ke odaro kẹe kevbe okhuaẹn hia ne ọ khuaẹn vbe Mẹsopotamia. 19E Leban kpao gha rrie ehe ne ọ na gbẹn avbe ohuan rẹn eto, vbe iyeke ẹre, e Rekiẹl keghi do avbe ukhurhẹ ọghe erha ẹe hẹ. 20E Jekọb keghi fi Leban ne ọmwa Aremia vbene ọ ma na tama rẹn wẹẹ rẹn ra kpao. 21Ọ keghi rhie emwi ni re ọghọe hia, ọ na kpao, ọ ghi kpao, ọ keghi fian ẹzẹ Yufretes rra, ọ na mu uhunmwu da oke Giliad.
E Leban Khu E Jekọb
22Ọ ghi rre ikpẹdẹ eha, a keghi do khama e Leban wẹẹ Jekọb lẹ rrie. 23Rẹn keghi viọ emwa rẹn mwẹ obọ, ọ na ye ikpẹ ẹdẹ ihinrọn khu e Jekọb, ọ keghi ya vba ẹre vbe Giliad ne ẹvbo oke. 24Vbe asọn nii, Osanobua keghi bu e Leban gha dee vbe imina, ọ khama rẹn wẹẹ, “Ghẹ ru emwi rhọkpa ne ọ gha kpokpo e Jekọb orhiọn.” 25E Leban keghi bu agọ ọghọe ye oke Giliad.
26E Leban keghi khama e Jekọb wẹẹ, “Vbua na rẹrẹ mwẹ hẹ yi ne u na silo ivbimwẹ gha rrie vbe ne a silo ikhuo ne a munọ ẹn vbe okuo rrie? 27Vbua na rẹrẹ mwẹ hẹẹ, ne u na vin fua vbe ne a ma na tama mwẹ? Akpawẹ te u tama mwẹ, te I gha ya oghọghọ vbe ihuan suẹ sẹ odẹ ba ukusẹ kevbe akpata. 28U ma kue gunmwẹ ya isoso unu gbe ọ khian ẹdẹ hia ne avbe eyẹ mwẹ kevbe ivbimwẹ nikhuo. U miẹn emwi ukọnmwẹ ne u ru! 29I wa mwẹ ẹtin ne I ya ruẹ emwi nian sokpan, vbe nasọn, Osanobua erhaa keghi tama mwẹ wẹẹ, ‘Ghẹ ru emwi rhọkpa ne ọ gha mu e Jekọb orhiọn rueghe hiehie.’ 30I rẹnrẹn wẹẹ ẹmwẹ owa ọ re ọ fian re ọ re u na kpao sokpan vbua ghi na vbe do ẹbọ mwẹ viọ hẹ?”
31Jekọb keghi wanniẹn wẹẹ, “Ohan Ọ re ọ mu mwẹ wẹẹ u gha miẹn mwẹ ivbuẹ nikhuo. 32Sokpan u gha miẹn ẹbọ ruẹ vbe obọ ọmwaikọmwa vbe emwa, a ghi gbe ọmwa ni uan. Emwa ima ni rre emwa ọrọre osẹe, gualọ emwi ni re ọwuẹ ne u rhie emwi ruẹn gha khian.” E Jekọb ma rẹn wẹẹ e Rekiẹl ọ re ọ do ẹbọ e Leban hẹẹ.
33E Leban keghi la uwu owa ukpọn ọghe Jekọb, ọ keghi gualọe, ọ keghi la owa ukpọn ọghe Lia kevbe owa ukpọn ọghe avbe eviẹn nikhuo ne eva, sokpan ọ ma miẹn avbe ẹbọ ẹre, ọ keghi la uwu owa ukpọn e Rekiẹl. 34E Rekiẹl viọ avbe nene ukhurhẹ, ọ keghi viọ iran lẹre ye ẹkpo ne ọ rre emwi ne a ya hin ekẹtẹkẹtẹ, ọ na tota yan iran. E Leban keghi gualọ owa nii hia sokpan ọ ma miẹn iran. 35E Rekiẹl keghi tama erhae wẹẹ, “Lahọ ghẹ gun mwẹ gui wẹẹ I ma kpaegbe nuẹn, rhunmwuda te I mu obọ mwẹ.” E Leban keghi gualọe sokpan ọ ma miẹn avbe ukhurhẹ ọre.
36Ẹghẹ nii, ohu na kparhu e Jekọb aro, ọ na ye ohu gu e Leban guan, “De a i ghẹru ne I ru? De uhi ne I rra re ne u rhie owẹ yan gha ru ọbafi mwẹ dee? 37Vbene u ghi na zanzan emwi ne I mwẹ nẹ nian, de emwi obọ ruẹ ne u ghi miẹn vbọ? Viọ ehia ladian vbe emwa na ne emwa ruẹn kevbe emwa mwẹ sẹtin bẹghe ẹre, ne iran miẹn ehe na bu ase ne ne ọ rria ase. 38Nẹkpugie ọre I kegha guẹ, ke ohuan kevbe ẹwe ruẹ, ne ọ dobọ ubiẹmwẹ yi, ẹ i rrọọ. I ma vbe gbe ogho re vbe oghẹn ohuan ruẹn. 39Aranmwẹ akọn gha gbe ohuan ruẹn re, I ma vbe mu ikun ẹnrẹn guẹ ne I ya rhie ma wẹẹ ẹ i re ẹmwẹ mwẹ, I ghi tobọ mwẹ miẹn yegbe. Emwi ne a do hẹ vbe avan ra vbe asọn, u na wẹẹ ne I mu ehia hae. 40Ẹghẹ nibun, ovẹn gha gbe mwẹ nẹ vbe avan, oni ghi gbe mwẹ vbe asọn. I i miẹn ovbe. 41Erriọ ọre a wa duọ ee la ukpo ugie ne I gbe vbe obọ ruẹ. I ye ukpo iwenẹ ga ye ivbuẹ nikhuo eveva, ke ukpo ehan ye oghẹn ohuan ruẹn, levba sevba, te u ye fi igho ne a hae mẹ werriẹ igba igbe. 42Akpawẹ ẹ i re ne Osanobua avbe erhamwẹ, Osanobua Ebraham, Osanobua ne Aizik gae, na ya ba mwẹ, u gha we mwẹ fiabọ gha rrie nẹ. Sokpan Osanobua bẹghe ọlọghọmwa ne I ye kevbe ẹsọn ne I he miẹn, ọ re a na miẹn wẹẹ vbe nasọn ọ keghi bu ohiẹn.”
Vbe Ne Jekọb Kevbe Leban Mwamwa Emwi Ne Egbe Hẹ
43E Leban keghi wanniẹn tama e Jekọb wẹẹ, “Emọ ikhuo na, mẹ ọ yan iran, ivbi iran, mẹ ọ yan iran, oghẹn ohuan, mẹ ọ yan iran. Emwi ne a bẹghe na hia, mẹ ọ yan iran hia. Sokpan, banbanna nian, emwi ne I gha sẹtin ru ne I viọ ivbi mwẹ ẹ i rrọọ. 44Ọ maa, gie ima gba mwamwa emwi ye ihe. Okuta ne a hẹ yan egbe ghi gha ye ima ẹre rre.”
45E Jekọb keghi mu okuta ayere ye evba. 46Ọ na wẹ ne emwa irẹn si okuta koko, iran na siẹe yan egbe. Iran keghi rri evbare vbe ọkpẹn okuta nii. 47E Leban keghi he ẹre Jaga-saha-duta, e Jekọb keghi he ẹre Salid. 48E Leban keghi khama e Jekọb wẹẹ, “Okuta ne a si gbo ọ re ọ ghi gha ye imẹ vbe ruẹ ẹre rre.” Ọnii ọ siẹe ne a na tie ẹre Galid. 49E Leban keghi kha wẹẹ, “Te Nọyaẹnmwa gha a ghe ima vbe ima a ghi wannegbe nẹ.” A na vbe gha tie eni ẹnrẹn Mizpa. 50E Leban keghi rhie tẹe wẹẹ, “U gha ru ivbimwẹ khọọ, ra te u viọ okhuo ọvbehe, a deghẹ mẹ ma rẹn, yerre wẹẹ Osanobua ghe ima. 51Ghe avbe okuta ne I si gbo ye ẹkpo ima, ọna ọ vbe re okuta ayere. 52Okuta na kevbe avbe okuta ne a si gbo, ne a ya zẹ ayere nọ. Mẹ i ra gberra okuta na do guẹ gbinna, wẹ i ra vbe gberra ẹre ighẹ okuta ayere na do gun mwẹ gbinna. 53Osanobua Ebraham kevbe Osanobua e Nahọ gha bu ohiẹn imẹ vbe ruẹ.” E Jekọb keghi ya eni Osanobua ne erha ee ighẹ Aizik ga, yan eyan wẹẹ rẹn gha rhie uhi nii mwẹ. 54Ọ keghi gbe aranmwẹ ne ọ ya zọ ese vbe uhunmwu oke. Ọ keghi tie emwa irẹn ne iran do rri evbare. Ugbẹn vbe iran ghi re nẹ, iran keghi gbe asọn nii vbe uhunmwu oke nii. 55Owiẹ vbe ẹdẹ ne ọ lelẹe, e Leban keghi ya isoso unu gbe ọ khian ẹdẹ hia ne eyẹ ọre kevbe ivbi ẹre nikhuo, ọ keghi sẹ iran rae werriegbe gha rrie owa.
Currently Selected:
Gẹnẹsis 31: EDO96
Highlight
Share
Copy
Want to have your highlights saved across all your devices? Sign up or sign in
@ The Bible Society of Nigeria, 1996
