Gẹnẹsis 34
34
Iran Mu E Dina Yagha
1E Dina ne ọmọ okhuo e Jekọb kevbe Lia keghi ya khian ẹlẹ tuẹ ikhuo e Kenan eso vbe ẹvbo nii ẹdẹ ọkpa. 2Ugbẹn vbe Siẹkẹm ne ovbi Hamọ ne ọmwa Hivi, ne ọre enogie otọe nii ghi bẹghe ẹre, ọ na siẹe ọ na ya ẹtin guẹ ẹe ru emwi ọdọ vbe amwẹ. 3Sokpan ẹmwẹ ọmọ okhuo na keghi yẹ ọre, rhunmwuda ose ẹre, ọ keghi suẹn gha ho ne ọ wa rhie ẹre rọnmwẹ. 4Ọ keghi ya nọ erha irẹn wẹẹ, “Rhie ọmọ na mẹ rhie rọnmwẹ.” 5E Jekọb keghi họn wẹ iran yagha ovbi ẹre ne okhuo, sokpan, rhunmwuda ighẹ ivbiẹre rre uwu oha vbe ehe ne iran na gbearoghe ẹmila ẹre, ọ ma ru emwi rhọkpa iran te rre. 6E Hamọ ne erha Siẹkẹm keghi ladian ya gu e Jekọb guan, 7vbe uwu ẹghẹ ne ivbiẹre na ke uwu oha rre zẹẹ. Ugbẹn vbe iran họn ẹmwẹ na, udu iran si vbọ, ohu ke mu iran ẹsẹse wẹ Siẹkẹm ru emwi ohan vberriọ, ọ na fi unu gie ivbi Izrẹl hia vbekpa ne ọ na ya ẹtin gu ovbi e Jekọb ru emwi. 8Hamọ, keghi khama iran wẹẹ, “E Siẹkẹm ne ovbi mwẹ ho ne ọ rhie ovbuẹ nokhuo rọnmwẹ; lahọ, wa giẹe rọnmwẹ ọẹn. 9Wa gie ima viọ obọ gie egbe vbekpa orọnmwẹ, ma ghi viọ ivbi uwa rọnmwẹ, wa ghi vbe gha viọ ọghe ima rọnmwẹ. 10Wa sẹtin gu ima yin ẹvbo ima na. Wa sẹtin di ehe ne ọ khọn ruẹn vbọ ya, wa ghi do ẹki vbene a i na mwẹ idobo, wa ghi vbe họọn emwi obọ uwa.”
11Ẹre Siẹkẹm na tama erha Dina kevbe etiọnrẹn wẹẹ, “Wa ghi ru ẹse na mẹ, emwi ne uwa a rhirhi nọ mwẹ re, I gha rhie ne uwa. 12Wa tama mwẹ emwi ne I gha rhie ne uwa, wa vbe fian inu igho ne ọ khọn uwa mẹ ne I gha mu ye egbe ẹre, I gha rhie emwi ne uwa a rhirhi gha ho ne uwa sokpan ne uwa gunmwẹ rhie ẹre rọnmwẹ.”
13Ivbi e Jekọb keghi rhie ewanniẹn ne ọ gha gbe iran ekhọe ẹwaẹn rua ne Siẹkẹm kevbe Hamọ ne erha ẹe rhunmwuda te Siẹkẹm fa Dina ne ọtẹn iran an. 14Iran keghi kha wẹẹ, “Ma i kue ne ọtẹn ima rọnmwẹ ọmwa nọ ma rhuẹ, efaa ọnii ra gha khin ima re. 15Emwi ọkpa ne ọ gha ye ima kue yọ ọrọre ne uwa do gha ye vbene ima ye vbekpa ne uwa gha na gha rhuẹ ikpia uwa hia. 16Ẹghẹ nii, ma gha kue ne uwa rhie ivbi ima, ma ghi vbe gha rhie ọghe uwa. Ma ghi yin ehe ne uwa ye, ma hia ghi do gba gha re ọkpa. 17Sokpan, deghẹ wa ma rhie ne ima tae, ne uwa rhuẹ, ma gha rhie ẹre ne ima kpao.”
18Vbene iran tae na ke wa la Hamọ ke Siẹkẹm ne ovbi ẹre aro. 19Ọvbokhan na ma vbe yae rhọ eghẹrẹ, ọ keghi wa gha ru vbene iran khare rhunmwuda ẹmwẹ ovbi e Jekọb nokhuo la ẹre aro. Okpia na ọre ọ vbe re ne ọ ru ọmwa kpataki sẹ vbe ẹgbẹe ọre.
20E Hamọ kevbe Siẹkẹm ne ovbi ẹre kegha rrie ehe ne a na do iko vbe ehe ne a la la ẹvbo nii iran keghi ya gu emwa ẹvbo nii ne iho iran guan wẹẹ, 21“Emwa ni mwẹ ahoẹmwọmwa emwa na khin; gie iran gu ima yin ẹvbo na, ne iran vbe gha khian yo ehe ne ọkhọn iran; otọ na kpọlọ sẹ ne ọ gha vbe gua iran. Wa gie ima gha viọ ivbi iran nikhuo rọnmwẹ ne ima vbe gha viọ ọghe ima ne iran rọnmwẹ. 22Sokpan emwi ne ọ gha ya iran yin ẹvbo ima ne ima gha re ọkpa ọrọre wẹ ne ima gha rhuẹ emọ ikpia ima zẹ vbene iran vbe rhuẹ. 23Emwirri iran, emwiewe iran kevbe ẹmila iran ghi do gha re ọghọmwa. Rhunmwuda ọnii, wa gie ima kue yọ ne iran gu ima yin ẹvbo.” 24Emwa ẹvbo ni hia keghi rhie iro ne Hamọ kevbe Siẹkẹm zẹẹ. Iran keghi rhuẹ ikpia ni rrọọ hia, 25ọ ghi rre ikpẹdẹ eha, vbene arhuẹ iran ma na he rrie, ivbi e Jekọb eva, e Simiọn kevbe Livai, etẹn Dina nikpia, na hẹ umozo iran, iran keghi la ore ẹvbo nii vbe ne ọmwaikọmwa i na vbe mu idandan, iran keghi gbele ikpia ni rrọọ hia a. 26Iran keghi gbele Hamọ kevbe Siẹkẹm ne ovbi ẹre, iran na rhie Dina hin owa Siẹkẹm rre, iran na kpao. 27Ivbie Jekọh nekpa na deyan iran ne a kuanrẹn nii, iran keghi viọ emwi hia ni mwẹ emwi ne ọ gia ya ru vbe ẹvbo nii, rhunmwuda wẹ, a fa ọtẹn iran an. 28Iran keghi viọ avbe ohuan, ẹmila, ekẹtẹkẹtẹ kevbe emwi ọvbehe hia ni rre owa kevbe odẹ. 29Iran keghi viọ ẹfe ni rrọọ hia. Iran na munọ ikhuo kevbe ibiẹka, iran na viọ emwi hia ni rre iran owa gha rrie.
30E Jekọb keghi khama Simiọn vbe Livai wẹẹ, “Wa si mwẹ fi uwu ẹmwẹ nẹ, banbanna nian, emwa ẹvbo na hia, emwa Kenan, Pẹriz, iran hia khọ ẹko mwẹ. Ikpia ne I mwẹ i bun; iran gha ku obọ gbe mu igbinna gunmwẹ, ke imẹ kevbe ẹgbẹe mwẹ hia, te iran ra miẹn ima uhunmwu.” 31Sokpan iran wanniẹn wẹẹ, “Ma i ra kue ne a ru ọtẹn ima emwi oya.”
Currently Selected:
Gẹnẹsis 34: EDO96
Highlight
Share
Copy
Want to have your highlights saved across all your devices? Sign up or sign in
@ The Bible Society of Nigeria, 1996
