Gẹnẹsis 35
35
Osanobua Fiangbe Jekọb Vbe Bẹtẹl
1Osanobua keghi tama e Jekọb wẹẹ, “Muegbe ne u gha rrie Bẹtẹl ne u ya yin evba. U ghi gba aka mẹ vbe evba, Mẹ ne Osanobua ne ọ rhie egbe ma ruẹn vbe vba ẹghẹ ne u na gha lẹ khian hin obọ Isọ ne ọtuẹn.” 2Ẹre Jekọb na do khama ẹgbẹe ọre kevbe emwa ni guẹe rre evba wẹẹ, “Wa viọ ẹbọ ẹrrẹe ne uwa mwẹ kua, wa khuẹ egbe uwa huan ne uwa viọ ukpọn nihuanrẹn ye egbe. 3Ma ra kpao vbe emwa gha rrie Bẹtẹl, ehe ne I gha na gba aka ne Osanobua ne ọ yọmwẹ obọ vbe ẹghẹ ọlọghọmwa mwẹ, kevbe ne ọ vbe yaba mwẹ vbe eheikehe ni I he la.” 4Ẹre iran na do viọ ẹbọ ẹrrẹe ne iran mwẹ hia ne Jekọb, deba emwiehọ ne iran te lo, ọ keghi tọnnọ iran ye ototọ erhan okan ne ọ rre Siẹkẹm.
5Ugbẹn vbe Jekọb kevbe ivbi ẹre ghi suẹn gha kpao, ohan nọkhua kegha mu emwa ni rre ẹvbo ni lẹga evba, iran ma khu iran. 6E Jekọb kevbe emwa rẹn keghi do sẹ Luz (ne a ghi tie ẹre Bẹtẹl) vbe otọ Kenan. 7Ọ keghi gba aka ye evba, ọ na gha tie ẹre Bẹtẹl rhunmwuda Osanobua ye egbe naẹn miẹn vbe evba vbe ẹghẹ ne ọ na gha lẹ hin ehe ne ọtiọnrẹn ye rre.
8E Dẹbora ne ọ koko e Ribẹka keghi wu, iran keghi re ẹre ye ẹzi okan vbe asefẹn odẹ ekẹn Bẹtẹl. Iran kegha tie evba nii “Okan ọghe eve.”
9E Jekọb ghi ke Mẹsopotamia rre, Osanobua keghi dọlegbe rhie egbe ma rẹn ọ na fiangbe ẹe. 10Osanobua tama rẹn wẹẹ, “E Jekọb ọre a te tie ruẹ, sokpan ke eban kpao, Izrẹl ọre a ghi gha tie ruẹ,” ẹre Osanobua na he ẹre Izrẹl. 11Osanobua keghi tama rẹn wẹẹ, “Mẹ ọrọre Osanobua Noghodua. Biẹlẹ emọ nibun. Uniẹn ivbuẹ gha bun, eso vbe uwu iran gha vbe gha re ọba, u gha mwẹ uniẹn ivbuẹ nibun sẹrriọ wẹ eso gha do khian iyaẹvbo. 12I gha mu otọ ne I mu ne Ebraham Aizik nuẹn, I gha vbe mu ẹẹn ne ivbi uniẹn ruẹn vbe iyeke ruẹ.” 13Ẹre Osanobua na sọrae ye ehe ne ọ na guẹe guan, ọ na werriegbe gha rrie ẹrinmwi. 14E Jekọb keghi mu okuta ayere ye evba nii. Ọ keghi sa emwi na wọn ya zọ ese yan rẹn, kevbe ofigbọn. 15Ọ kegha tie evba nii Bẹtẹl.
Uwu Ọghe Rekiẹl
16E Jekọb kevbe ẹgbẹe ọre iran keghi kpao vbe Bẹtẹl rre, iran ma he sikẹ Efrat hiehiere vbe ẹghẹ sẹe ne Rekiẹl gha ya biẹ, emwi ubiẹmwẹ ọnrẹn keghi wegbe ẹsẹse. 17Ugbẹn vbe obọ emwi ubiẹmwẹ ghi wa dae, okhuo ne ọ mu ẹre emwi ubiẹmwẹ keghi tama rẹn wẹẹ, “Ghẹ gie ohan muẹn, ọmọ okpia vbe nọ.” 18Te ọ ghi ra kpan udu, ugbẹn vbe ọ ghi ra wa kpan udu, ọ keghi he ovbi ẹre ọmọ okpia nii Benoni sokpan erha ẹe keghi he ẹre Bẹnjamin.
19Ugbẹn vbe Rekiẹl ghi wu nẹ, a keghi re ẹre ye odẹ ne a la ye Efrat (ne ọ ghi re Bẹtlẹhẹm na). 20E Jekọb keghi mu okuta ayere ye idin ẹnrẹn, nene “Orrẹ ọghe Rekiẹl” ye rre evba do sẹ ẹdẹnẹrẹ na. 21E Jekọb keghi si okhian, ọ keghi ya bu agọ ye iyeke nọkpa ọghe ogogoro Eda.
Ivbi e Jekọb Nikpia
(I Krọnikol 2:1-2)
22Ẹghẹ ne Jekọb na gha rre ẹvbo nii, e Riubẹn keghi gu e Bilha ne ọkpa vbe uwu egbakhian erhae ru emwi, e Jekọb ghi họn, ohu ke muẹn ẹsẹsẹmwẹse, emọ iweva ọre Jekọb biẹlẹe. 23Ọghe Lia ni rrọọ kegha re Riubẹn (ne ọre ovbi Jekọb nọdiọn), Simiọn, Livai, Juda, Isaka kevbe Zẹbulọn. 24Ivbi e Rekiẹl kegha re Josẹf kevbe Bẹnjamin. 25Ivbi e Bilha ne ọviẹn Rekiẹl, Dan kevbe Naftali. 26Ivbi e Zilpa ne ọviẹn Lia: Gad kevbe Asia. Ena ọre emọ ikpia ne Jekọb biẹlẹe vbe Mẹsopotamia.
Uwu Aizik
27E Jekọb keghi bu Aizik ne erha ẹe gha die Mamrẹ ne ọ rre ọkpẹn Hibrọn ehe ne Ebraham kevbe Aizik ka yin. 28Aizik keghi rre ukpo ugie irrọ vbe uri, 29vbe ọ wu. Ọ keghi yaba emwa rẹn ni wulo nẹ vbe ọ wa khian ọ maẹn nẹ. Isọ kevbe Jekọb ne ivbiẹre keghi re ẹre.
Currently Selected:
Gẹnẹsis 35: EDO96
Highlight
Share
Copy
Want to have your highlights saved across all your devices? Sign up or sign in
@ The Bible Society of Nigeria, 1996
