Jọn 10
10
1“Ẹmwata ọre I tama uwa, ọmwa nọ ma la onurho la ogba ohuan, ighẹ ọ la odẹ ọvbehe hin odukhunmwu la rọ, oyi nọ, izigan nọ. 2Ọmwa nọ la onurho la ogba ọrọre ne ọ su avbe ohuan nii. 3Ukọ onurho ghi kie nẹ, avbe ohuan rẹn ghi họn urhu ẹre vbe ọ gha tie iran, ọ ghi viọ iran ladian. 4Ọ gha ghi viọ iran ladian nẹ, ọ ghi ke odaro ne iran, avbe ohuan ghi lele ẹe rhunmwuda iran rẹn urhu ẹre. 5Iran i ra lele ẹrrẹ, te iran lẹ nẹẹn, rhunmwuda iran ma rẹn urhu ẹre.”
6Jesu kpa itan na ma iran, sokpan iran ma rẹn otọ emwi ne ọta ma iran.
Jesu Ne Ọsuohuan Ne Ọ Maa
7Rhunmwuda ọnii Jesu dọlegbe tama iran wẹẹ, “Ẹmwata I tama uwa, mẹ ọrọre ọsuohuan ne ọ maa. 8Iran hia ni ka rre khẹ mwẹ oyi kevbe izigan iran khin, sokpan avbe ohuan ma zẹ ye iran re. 9Mẹ ọrọre onurho. Ọmwa ne ọ la ehe ne i ye la owa, a gha miẹn rẹn fan. Ọ gha la owa, ọ ghi vbe ladian, ọ gha vbe miẹn irunmwu. 10Oyi gha rre, te ọ do rha, te ọ do gbe ua kevbe ne ọ do murhia. Sokpan mẹ rrọ ne iran miẹn ehe na gha rre agbọn, ne iran gha rrọọ vbe ne emwi hia na gba ne iran.
11“Mẹ ọrọre ọsuohuan ne ọ maa, ọsuohuan ne ọ maa mu egbe ne ọ ya ye uhunmwu ye ẹmwẹ avbe ohuan. 12Ọmwa ne a rhie vbe iwinna, ne ẹ i re ne ọ su ohuan, ọ ma vbe yan ohuan, ọ ghi sẹ iran rae, ọ ghi lẹ fua vbe ọ gha miẹn ighẹ oduma dee, ẹghẹ nii oduma ghi gua ohuan rhie, ọ ghi duẹ ehia a. 13Ọmwa ne a rhie vbe iwinna lẹ fua rhunmwuda ighẹ te a rhie ẹre vbe iwinna kẹkan, ẹ i vbe si osi ye ẹmwẹ avbe ohuan. 14Mẹ ọrọre ọsuohuan ne ọ maa. 15Zẹ vbene Evbavba rẹn mwẹ, ne imẹ na vbe rẹn Evbavba, erriọ zẹẹ mẹ rẹn avbe ohuan mwẹ, iran vbe rẹn mwẹ, mẹ vbe mu egbe ne I ya wu ba ẹmwẹ iran. 16I ye vbe mwẹ avbe ohuan ọvbehe ne ẹ i re oghẹn na. I gha vbe viọ iran rre, iran gha họn urhu mwẹ, ẹghẹ nii, iran ghi do gha re oghẹn ohuan ọkpa, ọsuohuan ọkpa.
17“Evbavba ho ẹmwẹ mwẹ, rhunmwuda, mẹ mu egbe vbe ẹghẹ hia ne I ya rhie orhiọn mwẹ ye otọ, ne I miẹn ehe na vbe dọlegbe rhie ẹre werriegbe. 18Ọmwa rhọkpa ma gbe mwẹ miẹn mwẹ orhiọn mwẹ, ekhọe obọ mwẹ ọre I ya rhie ẹre ye otọ. I mwẹ ẹtin ne I ya rhie ẹre ye otọ, I vbe mwẹ ẹtin ne I ya dọlegbe rhie ẹre werriegbe. Erha mwẹ ọre ọ ya wẹ mwẹ vberriọ.”
19Ẹmwẹ na keghi vbe dọlegbe si iwannegbe ye ẹkpo avbe Ju. 20Ni bun vbe uwu iran kegha kha wẹẹ, “Ọ mwẹ orhiọn esu, te ọ mwẹmwẹ, vbọzẹ ne uwa na rhie ehọ nẹ ẹn gha ta yi?”
21Sokpan iran eso ọvbehe vbe kha wẹẹ, “Ọmwa ne ọ mwẹ orhiọn esu i sẹtin guan vbe nian. Vbe orhiọn esu a ra sẹtin rhan ọmwa ne aro ẹre rhu hẹ yi?”
Avbe Ju Ma Rhan Obọ Miẹn Jesu
22Ẹghẹ keghi sẹ ne a ya ru emwiukpo Ayafiohan vbe Jerusalẹm, ẹghẹ okhuakhua nọ. 23Jesu keghi la ugha Solomọn ne ọ rre ọgua Osa khian. 24Avbe Ju keghi do lẹga ẹre, iran wẹẹ, “Vbe u a gha gie ima rhie aro ye odẹ kpẹe sẹ hẹ? Wa ta ẹmwata ne ọ rrọọ ma ima. Wẹ ọ gele re Mẹzaia ra?”
25Jesu wanniẹn wẹẹ, “I tae ma uwa nẹ sokpan wa ma ya mwẹ yi. Avbe iwinna ne I ya ẹtin Erha mwẹ winna ọre ọ sẹ osẹe mwẹ. 26Sokpan wa ma yayi rhunmwuda wa i re ohuan mwẹ. 27Avbe ohuan mwẹ danmwehọ urhu mwẹ. Mẹ rẹn iran, iran vbe lele mwẹ. 28Mẹ rhie arrọọ etẹbitẹ ne iran nẹ, iran i ghi wu ẹdẹ, ọmwa ne ọ gha sẹtin sanmwẹ iran rhie vbe obọ mwẹ i rrọọ. 29Erha mwẹ ne ọ viọ iran mẹ sẹ iran hia, ọmwa ne ọ gha sẹtin sanmwẹ iran hin ehe ne Erha mwẹ ne ọ gbe aro ghe iran ye rre, ẹ i rrọọ. 30Ọkpa ọ re Mẹ vbe Erha khin.”
31Avbe Ju keghi vbe dọlegbe viọ okuta ne iran filo gbe ẹe. 32Jesu tama iran wẹẹ, “Iwinna esiesi ni bun ne Erha viọ mẹ winna ọre I he sirra uwa winna, de ne uwa ra rhunmwuda ẹre filo okuta gbe mwẹ vbọ?”
33Avbe Ju zẹ wanniẹn ọẹn wẹẹ, “Ẹ i re rhunmwuda iwinna esi ọre ima ra na filo okuta gbe ua a, sokpan rhunmwuda ne u na kpa unu ghe Osanobua, wẹ ne ọmwa kẹkan, te u ghi ho ne u ya egbe uẹ khian Osanobua!”
34Jesu wanniẹn wẹẹ, “A gbẹn ọẹn ye Uhi uwa wẹẹ, Osanobua khare wẹẹ, ‘Osanobua wa khin?’ 35Ma rẹnrẹn wẹ ẹmwẹ ne ebe ne ọ huanrẹn tae, ẹmwata ẹtẹbitẹghori ọre nọ. Osanobua tie iran ne a rhie ẹmwẹ ọnrẹn na, Osanobua. 36Zẹ vbe ọghomwẹ, Evbavba ọre ọ zẹ mwẹ, ọ na gie mwẹ gha die agbọn. Vbe uwa a ghi na tama mwẹ hẹ ighe te I kpa unu ghe Osanobua vbe I khare wẹẹ Ovbi Osanobua ọre I khin? 37Adeghẹ ẹ i re iwinna Erha mwẹ ọre I winna, wa ghẹ ya mwẹ yi. 38Sokpan deghẹ iwinna nii ọre I winna, deghẹ wa ma rhe ya mwẹ yi, wa ye avbe iwinna ni yi, ne uwa miẹn ehe na rẹn vbe ne a i ghi na gbe agbanmwẹ wẹ Evbavba rre uwu imẹ, mẹ vbe rre uwu Evbavba.”
39Iran keghi te vbe dọlegbe gha ho ne iran mu ẹn sokpan iran keghi ye obọ khuọre fe.
40Jesu keghi dọlegbe fian ẹzẹ Jọdan rra gha rrie ehe ne Jọn na gha sa amẹ ne emwa, ọ keghi ya di evba ya. 41Emwa ni bun kegha vẹ bu ẹre rre. Iran wẹẹ, “Iwinna ọyunnuan ni bun ọre Jọn winnaẹn sokpan ẹmwata ọre ẹmwẹ hia ne ọ tae vbekpa okpia na wa khin.” 42Emwa ni bun keghi ya ẹ yi vbe evba.
Currently Selected:
Jọn 10: EDO96
Highlight
Share
Copy
Want to have your highlights saved across all your devices? Sign up or sign in
@ The Bible Society of Nigeria, 1996
