Jọn 9
9
Jesu Sinmwi Okpia Ne A Biẹ Ẹre Arhuaro
1Ugbẹn vbe Jesu ghi khian, ọ keghi bẹghe okpia ọkpa ne a biẹ ọre arhuaro. 2Avbe erhuanegbe ẹre wanniẹn wẹẹ, “Ọmamwaemwi, de orukhọ ọmwa ne ọ si ẹe ne a na biẹ okpia na arhuaro? Orukhọ ọghọe ra ọghe evbibiẹ ọe?”
3Jesu wanniẹn tama iran wẹẹ, “Ne ọna rhu aro ma dekan ẹmwẹ orukhọ ọghọe ra ọghe evbibiẹ ọe. Ọ rhu aro ne a miẹn ehe na rhie ẹtin Osanobua ma vbe iwinna ne egbe ẹre. 4Te imẹ gha winna iwinna ọmwa ne ọ gie mwẹ vbe ẹdẹ ma he mu, ebiebi gha he so vbe nẹ ọmwaikọmwa i ghi ra na sẹtin winna. 5Avbe ẹghẹ ne I ya rre agbọn, mẹ ọrọre uwanmwẹ agbọn.”
6Jesu ghi guan avbe ẹmwẹ na nẹ, ọ keghi tu asẹn ye otọ ya fuẹn ekẹn kugbe, ọ na ya ekẹn ni papa okpia ni aro. 7Ọ tama rẹn wẹẹ, “Ya kpe aro ruẹ vbe ọghọdọ Siloam.” (Emwi ne a ya ọnii kha ọrọre, “Gie.”) Okpia ni keghi gele gha khian, ọ kpe aro ẹre, ọ keghi werriegbe gha dee vbene ọ ghi na bẹghe.
8Emwa ẹdogbo ẹre, kevbe iran ni ka miẹn ọẹn yi vbe ehe ne ọ na vbu evbare re kegha nọ wẹẹ, “Ọna i re oko ni ne ọ te tota vbu evbare re?”
9Eso wẹ, “Rẹn nọ.” Eso vbe wẹẹ, “Ẹn o, ẹ i re irẹn, te ọ khọe.” Rhunmwuda ọnii okpia ni keghi tobọ ẹre kha wẹẹ, “Mẹ nọ.”
10Iran nọ rẹn wẹẹ, “Vbe aro ruẹ ya rhan hẹ yi?”
11Ọ wanniẹn tama iran wẹẹ, “Okpia ọkpa ne a tie ẹre Jesu ọre ọ fuẹn ekẹn ya papa mwẹ aro, ọ na tama mwẹ wẹẹ, ‘Ya khue vbe Ọghọdọ Siloam’ ọre I na gele gha khian. I ghi wa khue nẹ vbe ọwarọkpa, I keghi sẹtin gha bẹghe.”
12Iran nọ rẹn wẹẹ, “Rẹn ghi vbo nian?”
Rẹn keghi wanniẹn wẹẹ, “I ma rẹn.”
Avbe Farisi Gualọ Otọ Imuegberran Na
13Iran keghi rhie ọmwa ne a mu ẹre egbe rran ni bu avbe Farisi. 14Ẹdẹ Ikẹtin ọre Jesu na fuẹn ekẹn ya papa okpia ni aro. 15Avbe Farisi keghi dọlegbe nọ okpia ni vbene ọ do ya gha bẹghe hẹẹ. Ọ tama iran wẹẹ, “Ọ ye ekẹn papa mwẹ aro, I keghi ya kpe aro. Banbanna nian te I ghi bẹghe.”
16Eso vbe uwu avbe Farisi keghi kha wẹẹ, “Ọmwa ne ọ ru emwi na i sẹtin gha re ọmwa ne ọ ke ehe ne Osanobua ye gha dee, rhunmwuda ọ ma da ne uhi Ẹdẹ Ikẹtin.” Eso vbọ kevbe kha wẹẹ, “Vbe ọmwa ne ọre ọmwa orukhọ ra ya sẹtin winna iwinna ọyunnuan vbenian hẹ yi?” Iwannegbe kegha rre ẹkpo iran.
17Avbe Farisi keghi dọlegbe nọ okpia ni wẹẹ, “U wẹ rẹn ọre ọ rhan ruẹn aro, vbe uwẹ a ghi kha hẹ vbe ekpa ẹre nian?” Rẹn wanniẹn wẹẹ, “Akhasẹ nọ.”
18Avbe Ju ma ho ne iran yayi wẹ te ọ te ka rhu aro, wẹ, te ọ ghi bẹghe na rhinrin iran to do ya gie ne a tie evbibiẹ ọe. 19Iran nọ iran wẹẹ, “Ovbi uwa ọna khin ra? Wa wẹ te a biẹ ọre arhuaro? Ẹn hẹn, vbe ọ ghi do ya gha bẹghe hẹ na?”
20Avbe evbibiẹ ọe keghi wanniẹn wẹẹ, “Ma rẹnrẹn ighe ovbi ima ọ na khin kevbe wẹ te a biẹ ọre arhuaro. 21Sokpan ma ma rẹn vbene ọ ghi do ya gha bẹghe odẹ hẹ, ma ma rẹn ọmwa ne ọ rhan ẹre aro. Wa nọ rẹn ighe ọ wan nẹ, ọ gha sẹtin zẹ ne unu ẹnrẹn.” 22Avbe evbibiẹ ọe kha vberriọ rhunmwuda ighe ohan avbe Ju mu iran, rhunmwuda avbe Ju wa tae nẹ wẹẹ deghẹ ọmwaikọmwa tae ladian ighe Jesu ọrọre nene Mẹzaia, iran gha khu ẹe hin Ọgua ediọn rre. 23Ọnii ọ si ẹe ne evbibiẹ ọe na kha wẹ, “Ọwan nẹ ne uwa nọ rẹn.”
24Iran keghi dọlegbe tie ọmwa na biẹ ọre arhuaro ni ukpogieva, iran tama rẹn wẹẹ, “Yan vbe odaro Osanobua ighe ẹmwata ọre u khian ta. Ma rẹnrẹn ighe ọmwa orukhọ ọre oko na khin.”
25Okpia ni keghi wanniẹn wẹẹ, “Deghẹ ọmwa orukhọ nọ ra ẹ i re ọmwa orukhọ ọ ma gun mwẹ rẹn, emwi ọkpa ne imẹ rẹnrẹn ọrọre wẹẹ, te i te ka rhu aro, banbanna nian, te I ghi bẹghe.”
26Iran nọ rẹn wẹ, “Vbọ ruẹ hẹ yi, vbe ọ ya rhan ruẹn aro hẹẹ?”
27Rẹn keghi wanniẹn wẹ, “I ka tama uwa nẹ, wa ma danmwehọ, vbọzẹ ne uwa na ho ne uwa dọlegbe họẹn yi? Te uwa ho ne uwa gha re erhuanegbe ẹre ra?”
28Iran keghi ya ihẹn yan rẹn wẹẹ, “Wẹ ọrọre ọrhuanegbe oko nii, erhuanegbe Mosis ma khin. 29Ma rẹnrẹn ighe Osanobua gu e Mosis guan. Sokpan ma ma kue rẹn ehe ne oko na ke rre.”
30Okpia ni keghi wanniẹn wẹẹ, “Ogie emwi ọ na khin. Wa ma rẹn ehe ne ọ kere, sokpan ọ rhan mwẹ aro! 31Ma rẹnrẹn wẹ Osanobua i zẹ ye ọmwa orukhọ ẹre, sokpan ọ zẹ ye avbe emwa ni daa nẹ re, ni vbe ru emwi ne ọ ho ne iran gha ru. 32Ke ne a ya bu agbọn gha dee, a ma he họẹn ẹdẹ ighẹ orhunmwu ọkpa rhan aro ọmwa ne a biẹ ọre arhuaro. 33Akpawẹ ẹ i re ehe ne Osanobua ye ọre okpia na ke rre, ẹtin ẹnrẹn i ghẹ sẹ emwi rhọkpa.”
34Iran wanniẹn tama rẹn wẹẹ, “Wẹ ne a biẹe ne avbe koko wan vbe uwu orukhọ, wẹ ọre ọ ghi ra vbe gha ma ima emwi ra?” Iran keghi suare hin Ọgua ediọn rre.
Irhuaro Ọghe Orhiọn
35Jesu keghi họn ighẹ iran sua ẹre fua, ugbẹn vbe ọ ghi miẹn ọẹn, ọ tama rẹn wẹẹ, “Wẹ ya Ovbi Ọmwa yi ra?”
36Okpia ni wanniẹn wẹẹ, “Enọwanrẹn, tama mwẹ ọmwa ne ọ khin ne I miẹn ehe na yae yi.”
37Jesu khama rẹn wẹẹ, “Wa miẹn ọẹn nẹ, ọmwa ne ọ guẹe guan na, rẹn nọ.”
38Okpia ni keghi kha wẹẹ, “I yayi Nọyaẹnmwa.” Ọ keghi diguẹ ne Jesu.
39Jesu khama rẹn wẹẹ, “Rhunmwuda ibuohiẹn, ọre I na gha die agbọn na. Ne iran ni rhu aro sẹtin gha bẹghe, kevbe ne iran ni bẹghe khian eni rhu aro.”
40Eso vbe avbe Farisi ni rre evba ghi họn vbe ọ ta ẹmwẹ na, iran nọ rẹn wẹẹ, “Te ima ghi vbe rhu aro ra?”
41Jesu wanniẹn wẹẹ, “Akpawẹ te uwa rhu aro, wa ghẹ rria abe hiehie re, sokpan rhunmwuda ighẹ wa khare wẹẹ, ‘Ma bẹghe!’ irriabe nọkhua ọre uwa mwẹ.”
Currently Selected:
Jọn 9: EDO96
Highlight
Share
Copy
Want to have your highlights saved across all your devices? Sign up or sign in
@ The Bible Society of Nigeria, 1996
