Jọn 12

A Tue Ori Yan Jesu Vbe Bẹtani

(Matiu 26:6-13; Mak 14:3-9)

1A ghi tie ẹre ẹdẹ ehan re ọ ghi re Alagberra, Jesu kegha rrie Bẹtani ne ọ re ẹvbo Lazarọs ne Jesu huẹn kpaegbe vbe idin. 2Iran keghi le evbare ota ya mu ọghọ ye ọre egbe, Mata kegha gu iran viọ nene evbare rre vbene Lazarọs na tota ba Jesu vbe eteburu gha rri evbare. 3Meri keghi wa mu ohoho ọgọ ori ighobioye ne ọ winhin ne a ya nadi ru, ọ keghi tue ẹre ye Jesu owẹ, ọ keghi ya eto ne uhunmwu ẹnrẹn khiẹn rẹ n. Uwinhinmwẹ ọnrẹn keghi gba owa nii hia. 4Ọkpa vbe uwu avbe erhuanegbe. Jesu, Judas Iskariọt, ọmwa ne ọ ra rhie ẹre maa keghi kha wẹẹ, 5“Vbọzẹ ne a ma na khiẹn ori na enaira iyeha yi ne a ghae ẹre ne avbe ivbiogue?” 6Ọ ta ẹmwẹ na ẹ i re rhunmwuda ighẹ ọ mwẹ ẹnina ivbiogue vbe ekhọe, sokpan rhunmwuda ighẹ oyi nọ, rẹn ọ mu ẹkpo igho mwẹ, ọ ghi gha duẹe hẹ ya ru enegbe ẹre.

7Sokpan Jesu wanniẹn wẹẹ, “Wa heko sẹ ọe rae! Wa gie ẹe ya ẹe gba khua khẹ ẹghẹ ne a gha na re orinmwi mwẹ. 8Avbe ivbiogue gu uwa rrọọ ve ẹghẹ hia, mẹ i ra gu uwa gha rrọ ẹghẹ hia.”

Iran Ko Iko Lazarọs

9Ni bun vbe uwu avbe Ju keghi họn ighẹ Jesu rre Bẹtani, iran kegha khian, sokpan ẹ i re rhunmwuda Jesu ọkpa, sokpan iran ho ne iran miẹn e Lazarọs ne Jesu huẹn kpaegbe vbe idin. 10Avbe igie ohẹn keghi vbe rhunmwuda ọnii si uma ne iran vbe gbe Lazarọs. 11Rhunmwuda wẹ, rhunmwuda ẹre ọre avbe Ju ni bun na gha sẹ arowa iran rae do gha ye Jesu yi.

Ọ Si Ọbọbọ I Ru Nẹ La Jerusalẹm

(Matiu 21:1-11; Mak 11:1-11; Luk 19:28-40)

12Ẹdẹ ghi gbe, ni bun vbe uwu avbe emwa ni rrie Emwiukpo Alagberra keghi họn ighẹ Jesu die Jerusalẹm. 13Rhunmwuda ọnii, iran keghi viọ ewanmwẹ mwẹ obọ ya khian vba ẹre, iran kegha wee bọọ wẹẹ, “Wa rhie urhomwẹ ne Osanobua. Afiangbe Osanobua nọ ne ọmwa ne ọ dee vbe eni Nọyaẹnmwa. Afiangbe Osanobua nọ ne Ọba Izrẹl.”

14Jesu miẹn ovbi ekẹtẹkẹtẹ ọkpa, ọ keghi hin ẹnrẹn zẹ vbene ebe ne ọ huanrẹn tae:

15“Ghẹ mu ohan Zaiọn ne okpẹvbo,

ghe ighẹ Ọba ruẹ bu ruẹ dee,

ọ hin ovbi ekẹtẹkẹtẹ ne sọguọsọguọ.”

16Avbe erhuanegbe ẹre ma te rẹn emwi ne a ya ọna kha, sokpan ugbẹn vbe a ghi huẹn Jesu kpaegbe la uwu uyi nẹ, iran keghi do yerre wẹ ebe tae ye otọ nẹ, kevbe wẹ iran ruẹe naẹn nẹ.

17Emwa ni gbe ẹbu ye ehe ne Jesu na huẹn Lazarọs kpao vbe idin keghi na iyẹn emwi ne ọ sunu. 18Ọnii ọre ọ si ẹe ne emwa ni bun na khian bu ẹre sẹ odẹ, rhunmwuda ighẹ iran họn iwinna nọkhua na ne ọ winnaẹn. 19Avbe Farisi keghi rhunmwuda ọnii kha wẹẹ, “Wa ma miẹn ighẹ emwi rhọkpa ma fo mwa hiehiere. Agbọn vbe ẹrinmwi wa kpee lele ẹe khian.”

Emwa Grik Eso Do Gualọ Jesu

20Emwa Grik eso keghi rre usun ni do ru ugamwẹ emwiukpo. 21Iran keghi bu Filip gha dee (ovbi ẹ Bẹtsaida ne Galili ọre irẹn khin,) iran tama rẹn wẹẹ, “Enọwanrẹn, ma ho ne ima miẹn Jesu.”

22Filip keghi ya tama Andru, iran eva keghi gba ya tama Jesu. 23Jesu wanniẹn tama iran wẹẹ, “Ẹghẹ sẹ ne nian ne a gha ya rhie uyi nọkhua ne Ovbi Ọmwa. 24Ẹmwata I tama uwa, ikpe ọka ọkpa ma gberra ikpẹ ọka ọkpa a deghẹ i re te ọ de fi otọ ne ọ wu, a deghẹ ọ wu, ẹghẹ nii ọ ghi mọ ọmọ ni bun ẹsẹse. 25Ọmwa ne ọ rhirhi ho ẹmwẹ ẹdẹ agbọn rẹn, gha muẹn fua, ọmwa ne ọ khuiwu ẹdẹ agbọn rẹn vbe agbọn na gha dae yi ya sẹ arrọọ ne ẹ i mwẹ ọfo. 26Ọmwa ne ọ ho ne ọ gha ga mwẹ, ọ kere ne ogha lele mwẹ, ọnii nọ wẹẹ, ehe ne imẹ ye ọre ọguọmwadia mwẹ gha vbe gha ye. Erha mwẹ gha ye ọghọ ne ọmwa ne ọ rhirhi ga mwẹ.

Jesu Guan Kan Ẹmwẹ Uwu Ẹre

27“Ekhọe mwẹ wa rhia nian, vbe i a ra miẹn ta yi, te I ghẹ ghi kha wẹẹ, ‘Erha mwẹ ghẹ gie emwi na rruan mwẹ?’ Sokpan, rhunmwuda ọnii ọre I na rre ne I miẹn ehe na do ya egbe miẹn oya na. 28Evbavba, rhie uyi ne eni ruẹn!” Ẹghẹ nii ọre urhu ọkpa na ke ẹrinmwi guan rre wẹẹ, “I ka rhie uyi naẹn nẹ, I gha ye vbe dọlegbe rhie uyi ne ẹn.”

29Emwa ni gbe ẹbu ye evba ghi họn, iran wẹ, “Avan ne ukhunmwu vaẹn!” Emwa ọvbehe vbe wẹẹ, “Odibosa ọre ọ gu ẹe guan.”

30Sokpan Jesu tama iran wẹẹ, “Ẹ i re rhunmwuda mwẹ ọre urhu na na guan, sokpan rhunmwuda uwa. 31Eban ọre ọse ẹghẹ ne a gha ya bu ohiẹn agbọn na nian, eban nian, a ra ya ọre owẹ ye otọ ighe nọkhaemwisẹ yan agbọn na. 32A gha tọn mwẹ mu hin otọe rre nẹ, I gha silo emwa hia rri egbe mwẹ.” 33(Ẹmwẹ ne ọ tae na, te ọ yae yi ama uwu ne irẹn ra rri oya ẹre.)

34Emwa ni gbe ẹbu ye evba wanniẹn tama rẹn wẹẹ, “Uhi ima tae ighe te nene Mẹzaia gha rre agbọn ẹdẹdẹmwẹdẹ, vbe uwẹ a ghi na kha hẹ wẹẹ, a gha tọn Ovbi Ọmwa mu hin otọe rre? De ọmwa ne ọ re nene Ovbi Ọmwa na yi?”

35Jesu tama iran wẹẹ, “Uwanmwẹ gha ye gu uwa mudia kpẹe kherhe. Wa yin uyinmwẹ ẹdẹ agbọn uwa vbene uwa na mwẹ uwanmwẹ, ne ebiebi ighe do hẹ rhu uwa rhunmwuda, ọmwa ne ọ khian vbe ebiebi ma rẹn ehe ne ọ rrie. 36Wa ya uwanmwẹ yi nian vbene ọ na he gu uwa rrọọ, ne uwa miẹn ehe na gha re ivbi uwanmwẹ.”

Avbe Ju Ma Yayi

Jesu ghi ta ẹmwẹ na nẹ, ọ keghi kpao sẹ iran rae, ọ keghi ya lẹre ne iran. 37Ọ rhe winna avbe iwinna ọrhẹnrhẹn na ye iran aro, iran ma ya ẹe yi. 38Ne ẹmwẹ ne Aizaia ne akhasẹ tae miẹn ehe na sẹ wẹẹ,

“Nọyaẹnmwa gha ọ ya iyẹn ne ima naẹn yi?

De ọmwa ne Nọyaẹnmwa rhie ẹtin ẹnrẹn ma?”

39Ọna ọre ọ zẹẹ ne iran ma na sẹtin yayi, rhunmwuda Aizaia vbe tae wẹẹ,

40“Osanobua rhu iran aro nẹ,

ọ vbe gbe iran ekhọe ẹwaẹn ruan nẹ,

ne aro iran ghẹ miẹn ehe na bẹghe odẹ,

ne ọ ghẹ miẹn ehe na la iran ekhọe,

ne iran ghẹ ya bu mwẹ rre

ne imẹ mu iran egbe rran.”

41Te Aizaia ta ẹmwẹ na rhunmwuda ighẹ ọ miẹn uyi Jesu, ọ na mu go. 42Ọ rhe ye vberriọ, eso vbe uwu avbe olotu avbe Ju ye ya Jesu yi, sokpan rhunmwuda avbe Farisi, ohan ma gie iran tae vbe azagba, ne a ghẹ ya khulo iran hin uwu ọgua ediọn re. 43Rhunmwuda utianmwẹ emwa ne agbọn ọre ọ yẹ iran sẹ utianmwẹ Osanobua.

Ibuohiẹn Ẹmwẹ Jesu

44Jesu keghi da van wẹẹ, “Ọmwa ne ọ rhirhi ya mwẹ yi, ẹ i re mẹ ọkpa ọre ọ yayi sokpan ke ọmwa ne ọ gie mwẹ ba ẹrẹ nọ. 45Ọmwa ne ọ miẹn mwẹ ne vbe miẹn ọmwa ne ọ gie mwẹ nẹ. 46Te imẹ rrie agbọn zẹ vbe uwanmwẹ, ne ọmwaikọmwa ne ọ ya mwẹ yi ghẹ gha rre ebiebi. 47Ọmwa ne ọ họn ẹmwẹ mwẹ ighẹ ọma vbe ya ẹe ru emwi, mẹ i ra bu ohiẹn ọnrẹn. Mẹ ma rre do bu ohiẹn agbọn, sokpan te I do miẹn rẹn fan. 48Ọmwa ne ọ ma rhan obọ miẹn mwẹ kevbe ne ọ ma vbe ya ẹmwẹ mwẹ yi, ọmwa ne ọ gha bu ohiẹn ọnrẹn rrọọ. Ẹmwẹ ne I guanrẹn ọre ọ ra bu ohiẹn ọnrẹn vbe ẹdẹ okiekie. 49Erriọ nọ, rhunmwuda ẹmwẹ ne imẹ guan, mẹ ma zẹ ọe ta, sokpan erha mwẹ ne ọ gie mwẹ ọre ọ ta ma mwẹ ẹmwẹ ne I gha guan kevbe ne I gha ta. 50Mẹ rẹnrẹn wẹ arrọọ etẹbitẹ ọre ẹmwẹ ọnrẹn rhie rre. Rhunmwuda ọnii, ẹmwẹ ne I guan, Erha mwẹ, ọre ọ gie mwẹ ne I kha vberriọ.”

Currently Selected:

Jọn 12: EDO96

Highlight

Copy