Jọn 13
13
Jesu Kpe Avbe Erhuanegbe Ẹre Owẹ
1A ghi tie ẹre akhuẹ ọrọre Emwiukpo Alagberra, Jesu rẹn nẹ wẹ ẹghẹ sẹe nẹ ne irẹn gha ya kpao vbe agbọn na ne ọ bu Evbavba gha khian. Ọ kakabọ ho ẹmwẹ iran ni re ọghọe vbe agbọn na, te ọ wa ho ẹmwẹ iran ya sẹ ufomwẹ.
2Jesu kevbe avbe erhuanegbe ẹre keghi rri evbare ota. Esu wa tae nẹ wẹẹ Judas ne ovbi e Saimọn Iskariọt ọre ọ gha rhie Jesu ma. 3Jesu rẹnrẹn ighe asẹ hia ọre Evbavba wa rhie ne irẹn, ọ rẹnrẹn ighe ehe ne Osanobua ye ọre irẹn ke gha dee, kevbe wẹ te irẹn vbe bu Osanobua khian. 4Rhunmwuda ọnii, Jesu kpaegbe vbe ehe ne iran na rri evbare, ọ kuọ agbada ẹwu ẹre mu ye efẹn ọkpa, ọ keghi rhie ukpọn ne a ya khiẹn egbe gba ẹkun. 5Ọ tue amẹ ye emwi ne a ya khuẹ, ọ keghi suẹn gha kpe avbe erhuanegbe ẹre owẹ, ọ na ya ukpọn ne ọ rhiegba ni gha khiẹn rẹn uan. 6Ọ ghi sẹ egbe Saimọn Pita, ọ nọ rẹn wẹ, “Nọyaẹnmwa, te u ra kpe mwẹ owẹ ra?”
7Jesu wanniẹn tama rẹn wẹẹ, “U i he sẹtin rẹn otọ emwi ne I ru banbanna, sokpan u gha rẹn otọ ẹre vbe okiekie.”
8Pita keghi tua unu mu ẹn wẹ, “Ẹghẹ ọkpa i rrọ ne u gha ya kpe mwẹ owẹ!”
Jesu tama rẹn wẹ, “A deghẹ, mẹ ma kpuẹ owẹ, u i sẹtin gha re ọrhuanegbe mwẹ.”
9Saimọn Pita wanniẹn wẹẹ, “Nọyaẹnmwa, a deghẹ erriọ nọ, ẹ i re owẹ mwẹ ọkpa u gha kpe, wa vbe kpe mwẹ obọ kevbe uhunmwu ba re.”
10Jesu wanniẹn wẹẹ, “Ọmwa nọkhuẹ nẹ, egbe ẹre huanrẹn, emwi ne ọ ho ọvbehe i ghi vbe rrọọ gberra ne ọ rria owẹ. Wanwan na nian, wa hia ọre egbe ẹre huanrẹn, vbe ne ọ na kẹe arhiọnkpa kẹkan.” ( 11Jesu rẹn ọmwa ne ọ ra rhie ẹre ma an nẹ, ọnii ọ zẹẹ ne ọ na kha wẹẹ, “Egbe uwa hia huanrẹn vbe ne ọ na kẹe arhiọnkpa kẹkan.”)
12Jesu ghi kpe iran owẹ fo nẹ, ọ keghi dọlegbe mu agbada ẹwu ẹre yọ, ọ na ya tota ye ihe ẹre vbe ehe ne iran na rri evbare, ọ keghi nọ avbe erhuanegbe ẹre wẹẹ, “Wa rẹn emwi ne I ru ma uwa na ra? 13Wa tie mwẹ Ọmamwaemwi kevbe Nọyaẹnmwa, ẹmwata nọ, erriọ ọre ọ gele ye. 14Mẹ ne ọ re Ọmamwaemwi kevbe Nọyaẹn uwa kpe uwa owẹ. Rhunmwuda ọnii ọ kere ne uwa vbe gha kpe egbe owẹ. 15Igiemwi ọre I rhie ne uwa, wa ghi gha ru vbene I ruẹe ma uwa na. 16Ne I ta ẹmwata ma uwa. Ọviẹn i kpọlọ sẹ enarẹn, ọmwa ne a gie ẹre uhunmwu i vbe kpọlọ sẹ ọmwa ene ọ gie ẹre uhunmwu. 17Wa rẹn ẹmwata ne ọ rrọọ nẹ nian. U miẹn vbe agbọn uwa gha rhiẹnrhiẹn hẹ deghẹ wa rhie obọ lele ẹe ya gha yin.
18“Ẹ i re uwa hia I kha. Mẹ rẹn iran ne I mẹ hannọ zẹ. sokpan ẹ i mwẹ ne ẹmwẹ ne ebe ne ọ huanrẹn khare ghẹ sẹ wẹ, ‘Ọmwa ne ọ re vbe evbare mwẹ mu aro igbinna da mwẹ.’ 19I ta ẹmwẹ na ma uwa nian vbe ọ te do sunu, a i rẹn vbe ọ gha ghi sunu ne uwa miẹn ehe na rẹn wẹ, ‘Mẹ Tobọ Mwẹ Nọ.’ 20Ẹmwata ọre I tama uwa. Ọmwa ne ọ rhirhi rhan obọ miẹn ọmwa ne imẹ gie, ọ vbe rhan obọ miẹn mwẹ. Ọmwa ne ọ rhirhi rhan obọ miẹn mwẹ vbe rhan obọ miẹn ọmwa ne ọ gie mwẹ.”
Jesu Tae Ye Otọ Ighe A Gha Rhie Irẹn Ma
(Matiu 26:20-25; Mak 14:17-21; Luk 22:21-23)
21Ugbẹn vbe Jesu ghi guan avbe ẹmwẹ na nẹ, ẹko hia keghi rriara ẹe rua, ọ keghi tae ladian wẹẹ, “Ne I ta ẹmwata ma uwa, ọkpa vbe uwu uwa gha rhie mwẹ maa.”
22Avbe erhuanegbe keghi ghe egbe aro rhunmwuda, ẹmwẹ na wa kpan iran odin, iran wẹ de ọmwa ne ọ kha. 23Ọkpa vbe uwu avbe erhuanegbe, ọmwa ne Jesu ho ẹmwẹ ọnrẹn, keghi tota diake Jesu. 24Saimọn Pita keghi ye obọ zedu ma rẹn wẹ, “Nọ rẹn ọmwa ne ọ kha.”
25Rhunmwuda ọnii, ọrhuanegbe nii sikẹ Jesu, ọ nọ rẹn wẹẹ, “Gha nọ yi Nọyaẹnmwa?”
26Jesu wanniẹn wẹẹ, “Ọmwa ne I gha rhie ebrẹd ne I ya rhanmwẹ na, rẹn nọ.” Rẹn keghi rhie ebrẹd, ọ ya ẹe rhanmwẹ, ọ keghi rhie ne Judas ne ovbi e Saimọn Iskariọt. 27Ugbẹn vbe Judas ghi wa rhie ebrẹd nii nẹ, Esu keghi la uwu ẹre. Jesu keghi tama rẹn wẹẹ, “Gie obọ gha kẹe vbe emwi ne u ra ru ni.” 28Vbene iran ya gha rri evbare nii, ọkpa nọ rẹn emwi ne Jesu ya ẹmwẹ ne ọ tama rẹn kha ẹ i rrọọ. 29Rhunmwuda ighẹ Judas ọre ọ da ẹkpo igho yi, eso vbe uwu avbe erhuanegbe keghi te ro ighẹ te Jesu wẹ ne ọ ya dẹlẹ emwi ne iran ra ya ru emwi ukpo, ra nọ rhie emwi ne avbe ivbiogue.
30Judas ghi rhie eka nii nẹ, ọ ladian, Asọn ẹre nọ.
Uhi Ọgbọn
31Judas ghi kpao nẹ, Jesu keghi wẹẹ, “Banbanna nian, a rhie uyi Ovbi Ọmwa maa, a keghi vbe la egbe ẹre rhie uyi Osanobua maa. 32A deghẹ a ghi la egbe ẹre rhie uyi Osanobua maa, Osanobua gha vbe tobọ ẹre rhie uyi Ovbi Ọmwa maa, ọ gha wa vbe ruẹe ọwarọkpa. 33Ivbi mwẹ, I gha rherhe sẹ uwa rae. Wa gha gualọ mwẹ, sokpan vbene I ka tama avbe Ju ọre I ghi vbe tama uwa na wẹ, ‘Ehe ne I rrie, wa i ra sẹtin yo?’ 34Uhi ọgbọn ne I yi ne uwa ọrọre wẹ, wa gha ho ẹmwẹ egbe. Zẹ vbene I mẹ ho ẹmwẹ uwa ọre ọ kere ne uwa vbe gha ho ẹmwẹ egbe uwa. 35A deghẹ wa ho ẹmwẹ egbe ọre emwa hia gha na rẹn wẹ erhuanegbe mwẹ ọre uwa khin.”
Jesu Tae Ye Otọ Ighe Pita Gha Siẹn Irẹn
(Matiu 26:31-35; Mak 14:27-31; Luk 22:31-34)
36Saimọn Pita nọ rẹn wẹ, “De ehe ne u rrie yi Nọyaẹnmwa?”
Jesu wanniẹn wẹẹ, “Ehe ne I rrie, wẹ i he ra sẹtin rre nian, sokpan u gha rre vbe okiekie.”
37Pita wanniẹn wẹ, “Nọyaẹnmwa, vbọzẹ ne I i ra na he sẹtin rre banbanna? Mẹ mu egbe ne I gha ya ye uhunmwu ye ẹmwẹ ruẹn!”
38Jesu wanniẹn wẹ, “Wẹ gele mu egbe ne u gha ya wu ye ẹmwẹ mwẹ? Ne I ta ẹmwata ma ruẹn, vbene ọkpa te viẹ, u gha siẹn mwẹ igba eha.
Currently Selected:
Jọn 13: EDO96
Highlight
Share
Copy
Want to have your highlights saved across all your devices? Sign up or sign in
@ The Bible Society of Nigeria, 1996
