Jọn 14
14
Jesu, Odẹ Ne A La Sẹ Ọghe Evbavba
1“Wa ghẹ gie ekhọe uwa lighi. Wa ya Osanobua yi. Wa vbe ya mwẹ yi ba ẹre. 2Ughugha bun vbe owa Erha mwẹ, Mẹ ra ya te ẹre ye otọ khẹ uwa. Akpawẹ ẹ i re erriọ ye, mẹ i ghẹ tama uwa vberriọ. 3Mẹ gha ghi ya te ẹre ye otọ khẹ uwa nẹ, I gha dọlegbe gha dee do viọ uwa ba egbe, ne uwa miẹn ehe na gha rre ehe ne imẹ ye. 4Wa rẹn ehe ne a la sẹ ehe ne imẹ rrie.”
5Tọmọs tama rẹn wẹẹ, “Nọyaẹnmwa, ma ma rẹn ehe ne u rrie, vbe a gha na rẹn odẹ ne a la sẹ ọe hẹẹ?”
6Jesu wanniẹn wẹẹ, “Mẹ ọrọre odẹ, mẹ ọrọre ẹmwata, mẹ ọrọre arrọọ. Ọmwa nọ gha sẹtin sẹ ehe ne Evbavba ye ẹ i rrọọ vbe ẹ i re wẹ te ọ la obọ mwẹ. 7Vbene uwa ghi na rẹn mwẹ nẹ nian, wa gha vbe rẹn Erha mwẹ bare. Ke banbanna kpao nian, wa miẹn ọẹn nẹ, wa vbe rẹn ọnrẹn nẹ.”
8Filip khama rẹn wẹẹ, “Nọyaẹnmwa ma ima Erha, emwi ne ima ghi hi gberra ọnii ẹ i ghi rrọọ.”
9Jesu wanniẹn wẹẹ, “Ne ima ke gba gha khian ke nẹkpo i mwẹẹ arria gha dee, wẹ ma he ye rẹn mwẹ Filip? Ọmwaikọmwa ne ọ miẹn mwẹ nẹ, ọ vbe miẹn Evbavba nẹ. Vbe uwẹ a ghi na kha hẹ wẹẹ, ‘Ma ima Evbavba.’ 10Wẹ ma yayi ra Filip ighẹ mẹ rre uwu Evbavba kevbe wẹ Evbavba vbe rre uwu imẹ, avbe ẹmwẹ ne I tama uwa, ẹ i re ẹmwẹ obọ mwẹ, Evbavba ne ọ rre uwu imẹ ọre ọ winna iwinna rẹn. 11Ya mwẹ yi ighẹ mẹ rre uwu Evbavba kevbe Evbavba vbe rre uwu imẹ, adeghẹ ọnii ma sẹ, wa rhunmwuda avbe iwinna nii yayi. 12Ẹmwata ọre I tama uwa, ọmwa ne ọ ya mwẹ yi, Ọ gha winna iwinna ne imẹ winnaẹn. Vbe ẹmwata ogha winna iwinna ni sẹ enena, rhunmwuda mẹ rrie ehe ne Evbavba ye. 13Emwi ne uwa a rhirhi nọ vbe eni mwẹ i ghi ruẹe, ne a miẹn ehe na la ekpa ọmọ rhie uyi Evbavba maa. 14Wa gha nọ mwẹ emwikemwi vbe eni mwẹ I gha ruẹe.
Jesu Ve Orhiọn Ne Ọ Huanrẹn
15“Deghẹ wa ho ẹmwẹ mwẹ, wa gha họn ẹmwẹ mwẹ. 16Mẹ gha nọ Evbavba, rẹn ghi vbe rhie Nọyọmwaobọ ọvbehe gie uwa. Orhiọn ẹmwata nii ne ọ gha gu wa rrọ ẹdẹdẹmwẹdẹ. 17Agbọn i sẹtin rhan obọ miẹn ẹnrẹn rhunmwuda ighẹ agbọn i sẹtin dẹghe ẹre amawẹ, ọ gha rẹn ọnrẹn. Sokpan wa rẹn ọnrẹn, rhunmwuda, ọ gu uwa ọ vbe rre uwu uwa.
18“Mẹ i ra sẹ uwa ọkpa rae, I gha dọlegbe bu uwa rre. 19Ọ ke ekherhe nian, agbọn na i ghi ra miẹn mwẹ ọvbehe, sokpan wa gha miẹn mwẹ, debare, rhunmwuda ighe mẹ rrọọ, wa gha vbe gha rrọọ. 20Ọ gha sẹ ẹdẹ ne ẹdẹrriọ, wa gha rẹn ighẹ mẹ rre uwu Erha mwẹ, kevbe wẹ wa vbe rre uwu imẹ zẹ vbene imẹ rre uwu uwa. 21Ọmwa ne ọ rhirhi rhan obọ miẹn uhi mwẹ, ọ na vbe ya ẹe gha ru emwi, rẹn ọrọre ọmwa ne ọ ho ẹmwẹ mwẹ. Ọmwa ne ọ ho ẹmwẹ mwẹ, Erha mwẹ gha vbe ho ẹmwẹ ọnrẹn. Mẹ tobọ mwẹ gha ye egbe mwẹ naẹn miẹn.”
22Judas (ẹ i re Judas Iskariọt) keghi wanniẹn wẹẹ, “Nọyaẹnmwa otọ ẹre vbo ne a gha na ya egbe ne ima miẹn vbene u i ra na ya egbe ne emwa ne agbọn miẹn?”
23Jesu wanniẹn wẹẹ, “Ọmwa ne ọ rhirhi ho ẹmwẹ mwẹ gha ru vbene I khare, Erha mwẹ gha ho ẹmwẹ ọnrẹn, kevbe imẹ kevbe Erha mwẹ ghi bu ẹre gha dee, ma ghi do di owa ẹre ya. 24Ọmwa ne ẹ i ho ẹmwẹ mwẹ, ẹ i vbe họn ẹmwẹ mẹ. Ẹmwẹ ne I tama uwa, ẹ i re ọghe obọ mwẹ, sokpan ọghe Erha ne ọ gie mwẹ ọre ọ ke rre.
25“I ta ẹmwẹ na ma uwa nian, vbene I he na gu uwa rre emwa na. 26Nọyọmwaobọ nii, Orhiọn Ne Ọ Huanrẹn ne Evbavba ye eni mwẹ gie rre gha ma uwa emwi hia, ọ ghi ye uwa ẹmwẹ ne I he tama uwa hia rre.
27“Ọfumwegbe ọre I ya we uwa, ọfumwegbe mwẹ ọre I ya we uwa, ẹ i re. Vbene agbọn ya we ọmwa ọre I ya we uwa. Wa ghẹ fian afianma, wa ghẹ gie ohan mu uwa. 28Wa họẹn vbe I tama uwa wẹẹ, ‘I ra kpao sokpan I gha vbe dọlegbe bu uwa rre.’ Adeghẹ te uwa gele ho ẹmwẹ mwẹ te uwa ghẹ gha ghọghọ wẹ mẹ bu Evbavba khian, rhunmwuda, rẹn kpọlọ sẹ mwẹ. 29I ta ẹmwẹ na hia ma uwa ne nian, vbe ọ te do sunu, ne uwa miẹn ehe na yayi vbe ọ gha ghi sunu. 30Mẹ i ra ghi gu uwa guan kpẹe sẹ ọna, rhunmwuda, ne ọ kha yan agbọn na dee. 31Ẹmwẹ asẹ ọkpa vbe egbe mwẹ, sokpan, ọ kere ne agbọn rẹn ghẹ I ho ẹmwẹ Evbavba, ọ ni ọ si ẹe ne I na vbe ru emwi ne ọ rhirhi khama mwẹ ne I ru.
“Wa kpaegbe, wa gia kpao hin emwa na rre.”
Currently Selected:
Jọn 14: EDO96
Highlight
Share
Copy
Want to have your highlights saved across all your devices? Sign up or sign in
@ The Bible Society of Nigeria, 1996
