Jọn 15

Jesu Ne Azara Ẹmwata

1“Mẹ ọrọre azara ne azara, Erha mwẹ ọrọre ne ọ gbe aro ghe ugbo. 2Abọ ne ọma mọ vbọ, ọ ghi fiaẹn mu fua, abọ ne ovbe mọ, ọ ghi kpannọ igẹngẹn ọnrẹn kua ne ọ miẹn ehe na fanmwegbua, nọ miẹn ehe na gha mọ ẹse. 3Ẹmwẹ ne I do tama uwa ya uwa hia khian ni huanrẹn nẹ. 4Wa ya egbe ba mwẹ ne imẹ miẹn ehe na vbe ya egbe ba uwa. Vbe ẹ i re te uwa di uwu imẹ ya, wa i sẹtin mọ, zẹ vbe ne abọ i sẹtin mọ deghẹ ọ ma sikan mu erhan azara.

5“Mẹ ọrọre erhan azara, wa ọrọre abọ. Ọmwa ne ọ rhirhi di uwu imẹ ya, mẹ na vbe di uwu ẹre ya, gha mọ ẹsẹse, rhunmwuda vbe ne imẹ i na rre evba, emwi ọkpa ne uwa gha sẹtin ru i rrọọ. 6Ọmwa ne ọ ma di uwu imẹ ya, a gha mu ẹn fi fua zẹ vbe abọ, ọ ghi vbe kaka, a gha si egbe abọ vberriọ koko, a ghi hẹ ku erhẹn, a ghi giẹn ọnrẹn uan. 7A deghẹ wa di uwu imẹ ya, ighẹ ẹmwẹ mwẹ vbe rre uwu uwa, ẹghẹ ni, wa gha nọ emwi ne ọ rhirhi khọn uwa, ọ gha sẹ uwa obọ. 8Odẹ vberriọ ọre a ya rhie uyi Erha mwẹ maa, wa ghi kakabọ mọ, wa ghi do gha re erhuanegbe mwẹ. 9Zẹ vbene Erha ho ẹmwẹ mwẹ, erriọ zẹẹ mẹ vbe ho ẹmwẹ uwa, wa ghi mudia vbe ahoẹmwọmwa mwẹ. 10Wa gha da uhi mwẹ yi, wa ghi gha rre uwu ahoẹmwọmwa mwẹ zẹ vbene imẹ da uhi Erha mwẹ yi ne imẹ na vbe gha rre uwu ahoẹmwọmwa rẹn.

11“Te I ta ẹmwẹ na ma uwa ne ọyẹnmwẹ mwẹ miẹn ehe na gha rre uwu uwa kevbe ne ọyẹnmwẹ ne ọ rre uwu uwa gha re ne ọ sẹ otọ ẹko. 12Uhi ne imẹ yi ọna khin: Wa gha ho ẹmwẹ egbe zẹ vbene imẹ ho ẹmwẹ uwa. 13Ahoẹmwọmwa ne ọ ghi kpọlọ sẹ, ne ọmwa gha sẹtin mwẹ ghe avbe esiọre ọrọre ne ọ wu ba ẹmwẹ iran. 14Erriọ nọ, ose mwẹ wa khin deghẹ wa da uhi mwẹ yi. 15I ma ghi tie uwa eguọmwadia nian rhunmwuda ọguọmwadia i rẹn emwi ne arowa ẹre ru. Ọse mwẹ ọre I ghi tie uwa ẹre rhunmwuda emwi hia ne I họẹn vbe unu Erha mwẹ, I vbe talọ ehia ma uwa. 16Ẹ i re uwa ọre ọ hannọ mwẹ zẹ, mẹ ọre ọ hannọ uwa zẹ, I na vbe wẹ ne uwa ya kakabọ gha mọ, ọmọ ne ẹ i khuọn kua. Emwi ne uwa a rhirhi nọ Erha re vbe eni mwẹ, ọ gha rhie ẹre ne uwa. 17Rhunmwuda ọnii, iyi ne I yi ne uwa ọrọre wẹ ne uwa gha ho ẹmwẹ egbe.

Ikhọẹko Emwa Ne Agbọn

18“Deghẹ te agbọn ghi khuiwu uwa, wa yerre ighe mẹ ọre iran ka khuiwu ẹre. 19Akpawẹ ọghe agbọn na uwa khin, agbọn na gha ho ẹmwẹ uwa zẹ vbe ọghe ẹe. Sokpan mẹ hannọ uwa zẹ hin uwu agbọn na rre nẹ, wa i ghi vbe re ọghe ẹe ọvbehe, ọnii ọ zẹẹ ne agbọn na khuiwu uwa. 20Wa ye ẹmwẹ ne I tama uwa rre, ‘Ọviẹn i sẹ enarẹn,’ Deghẹ iran zẹ mwẹ owẹ, iran gha vbe zẹ uwa owẹ. Adeghẹ iran miẹn ẹmwẹ mwẹ ye ehọ, iran gha vbe miẹn ọghe uwa ye ehọ. 21Sokpan iran gha ru uwa avbe emwi na hia rhunmwuda ighe uwa re ogho mwẹ, rhunmwuda iran ma rẹn ọmwa ne ọ gie mwẹ. 22Iran ghẹ i rri abe emwi rhọkpa akpawẹ mẹ ma rre do gu iran guan, vbene ọ ghi ye na nian, iran i ghi miẹn emwi mu ẹmwẹ orukhọ iran na. 23Ọmwa ne ọ khuiwu mwẹ, ọ vbe khuiwu Erha mwẹ ba ẹre. 24Iran i ghẹ rri abe orukhọ rhọkpa akpawẹ mẹ ma sirra iran winna iwinna ne a ma he miẹn ọmwa ne ọ ka ru egbe ọre yi, vbe banbanna nian, iran miẹn iwinna ne I winnaẹn nẹ, iran na gha khọ ẹko Erha mwẹ bare. 25Ẹ i mwẹ ọ ma gha ye vberriọ, ne emwi ne a gbẹn ye uwu Uhi iran miẹn ehe na sẹ wẹẹ, ‘Iran kegha khọ ẹko mwẹ ọghe edanmwidan!’

26“Ne ọ yọ ọmwa obọ gha rre — Orhiọn Ẹmwata ne ọ ke ehe ne Evbavba ye gha dee, I gha giee ke ọghe Evbavba gha dee, ọ gha ta ẹmwẹ mwẹ. 27Wa ne arẹngbe gha vbe ta ẹmwẹ mwẹ rhunmwuda ma hia ọ gba gha khian ke otọ gha dee.”

Currently Selected:

Jọn 15: EDO96

Highlight

Copy