Jọn 20

Idin Ne Ọ Dihoi Rua

(Matiu 28:1-8; Mak 16:1-8; Luk 24:1-12)

1Vbe owiẹ vbirrivbirri vbe Ẹdẹ Uzọla, vbe ẹdẹ ma he wan, Meri Magdalen kegha rrie idin, ọ ghi do ghe iran werriẹ okuta hin unu idin rre nẹ. 2Rẹn keghi rhulẹ bu Saimọn Pita kevbe ọrhuanegbe nọkpa nii ne Jesu ho ẹmwẹ ọnrẹn, ọ keghi ya tama rẹn wẹẹ, “Iran mu Nọyaẹnmwa hin uwu idin rre, ma ma rẹn ehe ne iran ghi muẹn yi.”

3Pita kevbe ọrhuanegbe nọkpa nii keghi kpao gha rrie idin. 4Iran eva keghi gba rhulẹ sokpan ọrhuanegbe nọkpa nii keghi rhulẹ gberra Pita, ọ keghi ka sẹ idin. 5Ọ de ghughẹ rre, ọ keghi dẹghe ukpọn eto ovbiohuẹ nọfua nii, sokpan rẹn ma la uwu ẹre. 6Saimọn Pita ne ọ lele ẹre iyeke dee keghi rre, ọ keghi wa la uwu idin ni, ọ keghi miẹn ukpọn eto ovbiohuẹ nọfua nii, vbe otọ vbe evba. 7Ukpọn ne a te ya gbalọ Jesu uhunmwu kevbe rre evba, ọ ma deba ukpọn eto ovbiohuẹ nọfua nii, sokpan a vbuẹ rẹn ọkpa ye efẹn ọkpa. 8Iyeke ọnii ọrhuanegbe nọkpa ne ọ ka gha sẹ idin keghi vbe la uwu ẹre, ọ keghi miẹn emwi na hia, ọ na yayi. 9(Iran ma he ye rẹn otọ ebe ne ọ huanrẹn ne ọ khare wẹ ẹ i mwẹ a ma huẹn ọnrẹn kpaegbe vbe idin.) 10Avbe erhuanegbe ni kegha rrie owa.

Jesu Rhie Egbe Maa Magdalen

(Matiu 28:9-10; Mak 16:9-11)

11Meri keghi mudia ye ọkpẹn idin, ọ kegha viẹ, ọ ghughẹ rre, ọ keghi ghe uwu idin. 12Rẹn keghi dẹghe avbe odibosa eva vbe evba, iran yọ ukpọn nọfua, iran tota ye ehe ne ikun Jesu te ye, ọkpa vbe odẹ uhunmwu kevbe nọkpa vbe odẹ owẹ. 13Iran nọ rẹn wẹẹ, “Okhuo na, vbe u a viẹ baa?”

14Ọ ghi guan ẹmwẹ na nẹ, ọ gbe aro ghe iyeke, ọ keghi bẹghe vbe Jesu mudia vbe evba, sokpan ọ ma rẹn ighẹ Jesu nọ. 15Jesu nọ rẹn wẹẹ, “Okhuo na vbe u a viẹ baa? De ọmwa ne u gualọ?”

Rẹn keghi te gha ro ighẹ ne ọ gbe aro ghe ogba nii nọ, ọ keghi tama rẹn wẹẹ, “Enọwanrẹn, deghẹ u muẹn hin emwa rre, tama mwẹ ehe ne u mu ẹn yi ne I ya mu.”

16Jesu tama rẹn wẹ, “Meri!”

Rẹn keghi fi egbe werriẹ ghe odẹ ne ọ ye, ọ keghi zẹ Hibru ọ wẹẹ, “Rabbọni!” (ọnii nọ wẹ “Ọmamwaemwi.”)

17Jesu tama rẹn wẹẹ, “Ghẹ zobọ lele mwẹ rhunmwuda I ma he hin odukhunmwu gha rrie ọghe Evbavba, sokpan bu avbe etẹn mwẹ, ya khama iran mẹ ighẹ ‘I hin odukhunmwu dọlegbe rrie ọghe Erha mwẹ, kevbe Erha uwa, Osanobua mwẹ, kevbe Osanobua uwa.’ ”

18Rhunmwuda ọnii, Meri Magdalen keghi ya khama avbe erhuanegbe ighẹ rẹn miẹn Jesu nẹ, kevbe wẹ rẹn ọre ọ gie irẹn uhunmwu na.

Jesu Rhie Egbe Ma Avbe Erhuanegbe Ere

(Matiu 28:16-20; Mak 16:14-18; Luk 24:36-49)

19Vbe Ẹdẹ Uzọla nii, vbe ebiebi ghi so buan nẹ vbe ota, avbe erhuanegbe khui urho ke egbe yi ye ihọkpa rhunmwuda ohan avbe Ju mu iran. Jesu rre, ọ keghi gu iran mudia, ọ wẹẹ, “Ọfumwegbe gu uwa rrọọ.” 20Ọ ghi guan ẹmwẹ na nẹ, ọ keghi mu obọ kevbe efẹn ọnrẹn ma iran. Ugbẹn vbe avbe erhuanegbe miẹn Nọyaẹnmwa, ẹko hia keghi sẹ iran ọyẹnmwẹ uan. 21Jesu keghi vbe dọlegbe tama iran wẹẹ, “Ọfumwegbe gu uwa rrọọ. zẹ vbene Evbavba gie mwẹ, erriọ mẹ vbe gie uwa.” 22Ọ ghi ta ẹmwẹ na nẹ, ọ hiọnrọn yan iran ọ wẹ, “Wa miẹn Orhiọn Ne Ọ Huanrẹn. 23Ọmwa ne uwa ya orukhọ bọ, a ya ẹe bọ ẹe, ọmwa ne uwa ma ya bọ, a ma ya ẹe bọ ẹe.”

Jesu Kevbe Tọmọs

24Ọkpa vbe uwu iran ne erhuanegbe, ne a tie ẹre Tọmọs (ne Ivin eva) i rre evba ẹghẹ ne Jesu na rre. 25Avbe erhuanegbe nekpa keghi khama rẹn wẹẹ, “Ma miẹn Nọyaẹnmwa.” Tọmọs khama iran wẹẹ, “Deghẹ ẹ i re te imẹ bẹghe ama ise vbe obọ ẹre, ne I rhie ukpẹ ihiẹn obọ mwẹ ye ehe ne avbe ise nii te gha ye, ne I vbe ya obọ mwẹ kan rẹn efẹn, I i ra yayi.”

26Uzọla ọkpa ghi gberra nẹ, avbe erhuanegbe vbe si egbe koko ye uwowa ọkpa, Tọmọs keghi gu iran rre evba. Te a khui urho, sokpan Jesu la owa, ọ keghi gu iran mudia, ọ wẹẹ, “Ọfumwegbe gu uwa rrọọ.” 27Ọ keghi khama Tọmọs wẹẹ, “Rhie ukpẹ ihiẹn obọ ruẹ ye emwa, ghe obọ mwẹ, niẹn obọ ruẹ rre ne u ya ẹe kan efẹn mwẹ. Ghẹ i ghi bọ iro eva, yayi!”

28Tọmọs wanniẹn tama rẹn wẹẹ, “Nọyaẹnmwẹ kevbe Osanobua mwẹ!” 29Jesu tama rẹn wẹẹ, “Ne u na miẹn mwẹ ọre ọ ghi zẹ ighẹ u yayi ra? a i miẹn ẹrrẹe iran ni yayi vbe iran ma he miẹn mwẹ!”

Emwi Ne O Zẹẹ Ne A Na Gbẹn Ebe Na

30Iwinna ọyunnuan ni bun ọre Jesu sirra avbe erhuanegbe ẹre ru ne a ma gbẹnnẹ ye ebe na. 31A gbẹnnẹ enena ne uwa miẹn ehe na yayi ighẹ Jesu ọrọre nene Mẹzaia ne Ovbi Osanobua, wẹ, rhunmwuda ighẹ wa ya ẹe yi, wa ghi la ekpa eni ẹnrẹn gha mwẹ arrọọ.

Currently Selected:

Jọn 20: EDO96

Highlight

Copy