Jọn 21
21
Jesu Rhie Egbe Maa Erhuanegbe Ihinrọn
1Vbe iyeke ọnọna, Jesu rhie egbe maa avbe erhuanegbe ẹre vbe ọkpẹn odighi ne a tie ẹre Taiberias. Vbene ọ ya sunu hẹ ọre ọna khin. 2Saimọn Pita, Tọmọs, (ne Ivin eva), Nataniẹl (ne ovbi e Kana ne Galili), avbe ivbi Zẹbede kevbe eva ọvbehe vbe uwu avbe erhuanegbe Jesu kegha rre ihe ọkpa. 3Saimọn Pita tama iran nekpa wẹẹ, “I ra ya gbe ehẹn.”
Iran wanniẹn tama rẹn wẹẹ, “Ma gha lele uẹ yo.” Iran hia keghi gba la okọ, sokpan, asọn ni rhurhuurhu, iran ma gbe emwi rhọkpa. 4Ugbẹn vbe ovẹn ghi yan rre dee, Jesu mudia ye ikpogho ẹzẹ, sokpan avbe erhuanegbe ma rẹn ighẹ Jesu nọ. 5Rẹn keghi tama iran wẹẹ, “Ivbi ikpia, obọ uwa vba emwi ra?”
Iran wanniẹn wẹẹ, “Hiehie re.”
6Rẹn keghi tama iran wẹẹ, “Wa fi ọga fi obọ erha ọmwa okọ, obọ uwa gha vba eso.” Iran keghi gele fi ọga nii, ehẹn ne ọ mu keghi bun sẹrriọ wẹ iran ma ghi sẹtin si ẹe ladian.
7Ọrhuanegbe nii ne Jesu ho ẹmwẹ ọnrẹn keghi tama Pita wẹ, “Nọyaẹnmwa nọ!” Ugbẹn vbe Saimọn Pita ghi họn ighẹ Nọyaẹnmwa nọ ọ keghi mu agbada ẹwu ẹre rhuan (rhunmwuda ighẹ te ọ te bannọ ukpọn ye otọ,) ọ keghi san fi uwu amẹ. 8Avbe erhuanegbe ni dekẹe keghi la okọ, iran keghi si ọga ne ehẹn vuọẹn nii gha die oke. Iran ma mobọ la uwu odin, omwa akhuẹn obọ iyisẹn nọ ke otọ gha khian. 9Iran ghi hin oke, iran keghi do vba erhẹn ẹyin vbe evba, a viọ ebrẹd kevbe ehẹn yọ. 10Jesu khama iran wẹẹ, “Wa viọ rre vbe ehẹn ne uwa da gbe wan.”
11Saimọn Pita keghi la okọ, ọ keghi ya si ọga ni la oke, ehẹn gidigidi keghi wa vuọẹn, omwa iwera yan iki ọkhọe (153). Vbene ọ rhe bun sẹ ni, ọga ma sọọ. 12Jesu tama iran wẹẹ, “Wa do rri emwi.” A ma miẹn ọkpa ne ohan gi ẹe nọ rẹn vbe uwu avbe erhuanegbe ẹre wẹ, “De ọmwa ne uwẹ khin?” Rhunmwuda iran rẹnrẹn wẹ Nọyaẹnmwa nọ. 13Jesu kegha khian, ọ rhie ebrẹd ni, ọ keghi rhie ne iran, erriọ ọre ọ vbe ru ehẹn.
14Ọna ọrọre ukpogieha ne Jesu he rhie egbe maa avbe erhuanegbe ẹre, iyeke vbe ọ rhiọrre nẹ vbe orinmwi.
Jesu Kevbe Pita
15Iran ghi rri evbare nẹ, Jesu tama Saimọn Pita wẹẹ, “Saimọn ne ovbi e Jọn, wẹ ho ẹmwẹ mwẹ sẹ avbe emwi na ra?”
Rẹn wanniẹn wẹẹ, “Ẹsẹse Nọyaẹnmwa, U rẹnrẹn ighẹ I ho ẹmwẹ ruẹn.” Jesu tama rẹn wẹ, “Gha gbe aro ghe ivbi ohuan mwẹ.” 16Ukpogieva, Jesu vbe tama rẹn wẹ, “Saimọn ne ovbi e Jọn, wẹ ho ẹmwẹ mwẹ ra?”
Rẹn wanniẹn wẹẹ, “Ẹsẹse Nọyaẹnmwa, wẹ rẹnrẹn ighẹ I ho ẹmwẹ ruẹn.” Jesu tama rẹn wẹ, “Gha gbe aro ghe ohuan mwẹ.” 17Ukpogieha, Jesu vbe kha wẹẹ, “Saimọn ne ovbi e Jọn, wẹ ho ẹmwẹ mwẹ?”
Ẹko ma ghi rhiẹnrhiẹn e Pita ye ne Jesu na nọ rẹn ukpogieha wẹẹ, “wẹ ho ẹmwẹ mwẹ ra?” Rẹn tama rẹn wẹẹ, “Nọyaẹnmwa, wẹ rẹn emwi hia, wẹ rẹnrẹn ighẹ I ho ẹmwẹ ruẹn.”
Jesu khama rẹn wẹ, “Gha gbe aro ghe avbe ohuan mwẹ. 18Ne I te ẹmwata ma ruẹn, ẹghẹ ne u na gha rre igbama, wẹ ọre ọ te tobọ ruẹ rhie ugbẹkun gba, u ghi gha rrie ehe ne ọ khọn ruẹn. Sokpan, u gha ghi khian ọmaẹn nẹ, u ghi nien obọ ruẹ ladian, ọmwa ọvbehe ghi gba ẹe, ọ ghi siọ gha rrie ehe ne ọ ma te khọn ruẹn.” 19(Jesu ta ẹmwẹ na, ne ọ ya rhie maa vbene Pita gha ya wu hẹ, ne ọ ya rhie uyi ne Osanobua) Jesu keghi tama rẹn wẹẹ, “Lele mwẹ!”
Jesu Kevbe Erhuanegbe Nekpa
20Pita ghi gbe aro ghe iyeke, ọ bẹghe ọrhuanegbe nọkpa ni ne Jesu ho ẹmwẹ ọnrẹn, ne ọ ye egbe gọ yan Jesu vbe iran rri evbare, ọ na nọ rẹn wẹ, “De ọmwa nọ ra rhie ruẹ ma an yi?” 21Ugbẹn vbe Pita ghi bẹghe ẹre, ọ nọ Jesu wẹẹ, “Nọyaẹnmwa, ọghe okpia na vbo o?”
22Jesu wanniẹn tama rẹn wẹẹ, “Deghẹ te I wẹ ne ọ gha rre agbọn I te do rre, de ne ọ kan ruẹn vbọ? Lele mwẹ.”
23Iran keghi wa rhunmwuda ọnii gha ta ẹe khian vbe uwu ẹbu avbe erhuanegbe wẹ rẹn i ra wu: Sokpan Jesu ma kha ighẹ ẹ i ra wu, emwi ne ọ khare ọre wẹ, “Deghẹ I ho ne ọ gha rre agbọn I te do rre, de ne ọ kan ruẹn vbọ?”
24Ọrhuanegbe ni ọre ọ ta avbe ẹmwẹ na, rẹn ọre ọ vbe gbẹnnẹ ọẹn ye otọ, ma rẹnrẹn wẹ ẹmwẹ ne ọ tae, ẹmwata nọ.
Ufomwẹ Ọnrẹn
25Emwi ọvbehe wa ye bun ne Jesu ru. Akpawẹ te a gbẹnnẹ ehia ye otọ ọkpọkpa, mẹ ma yayi ighẹ agbọn na hia gha gua ebe ne a gbẹnnẹ ọẹn yi.
Currently Selected:
Jọn 21: EDO96
Highlight
Share
Copy
Want to have your highlights saved across all your devices? Sign up or sign in
@ The Bible Society of Nigeria, 1996
