Luk 17
17
Orukhọ
(Matiu 18:6-7, 21-22; Mak 9:42)
1Jesu tama avbe erhuanegbe ẹre wẹẹ, “Ẹ i mwẹ ne emwi ne ọ ya ọmwa ru orukhọ ghẹ sunu, sokpan ọ sọ re ighe ọmwa ne a gha lẹ ọre ginna re obọ! 2Ne a de olọ ẹrẹkhẹrẹ ye ọre urhu mu fi uwu okun ọre ọ maa sẹ ne ọ si ọkpa vbe uwu iran ne giẹrẹ na la orukhọ. 3Wa khẹ yegbe! Ọtuẹn gha ruẹ emwi khọọ, guee gui, ọ gha fi ekhọe werriẹ, ya bọ ẹe. 4Ọ gha ru emwi khọ igba ihi-nrọn vbe ẹdẹ, ọ na vbe rre igba ihinrọn ni do rinmwian, ghẹ mwẹ u ma ya bọ ẹe.”
Iyayi
5Avbe ukọ tama Nọyaẹnmwa wẹẹ, “Fiangbe iyayi mwa.” 6Nọyaẹnmwa wanniẹn wẹẹ, “Deghẹ wa mwẹ iyayi ne ọ kpọlọ sẹ vbe ikpẹ itaba, wa gha sẹtin khama okperhan na wẹ, ‘Si vbọ ne u ya de zọ ye uwu okun!’ ọ ghi gele họn ẹmwẹ.
Iwinna Ọguọmwadia
7“Gie a kha ighe ọkpa vbe uwu uwa mwẹ ọguọmwadia ne ọ yo egua ra ne ọ ya su ohuan. Ọ gha ke ugbo rre, wa vbe tama rẹn ra wẹẹ, ‘Giẹgiẹ, ya rri evbare?’ 8Hiehie re. Emwi ne u ra tama rẹn ọrọre wẹ, ‘Ya le evbare ota mẹ, gba ukugba ne u do mudia gha viọ emwi ne I ho mẹ I te re I te da fo. Iyeke ọnii uke ya re ne u vbe da.’ 9Te avbe kpọnmwẹ ọguọmwadia rhunmwuda ighẹ ọ ru emwi ne a wẹ ne ọ ru ra? 10Erriọ ọre ọghe uwa ye. Wa ghẹ ghi ru emwi ne a wẹ ne uwa ru hia nẹ, wa ghi kha wẹẹ, ‘Ọguọmwadia ma khin, iwinna ne ọ kan ima ọre ima winnaẹn!’ ”
Jesu Sinmwi Ekhọnmwoti Igbe
11Eke ne Jesu na khian rrie Jerusalẹm nii, ọ keghi la ẹkpo Sameria kevbe Galili gberra. 12Ọ ghi ra la uwu igue ọkpa ekhọnmwoti igbe bu ẹre rre. Iran keghi mudia ye urria. 13Iran datu wẹẹ, “Jesu, Arowa, Tohan mwa.”
14Jesu keghi ghe iran, ọ tama iran wẹẹ, “Wa bu ohẹn ne ọ ghe uwa egbe ghe.” Iran ghi khian, egbe keghi rran iran. 15Ọkpa vbe uwu iran ghi miẹn ighe egbe rran irẹn, ọ werriegbe, ọ na gha go wan Osanobua. 16Ọ keghi de gbe otọ vbe akharha Jesu, ọ na kpọnmwẹ ọẹn. Ovbi Sameria ọre nọ. 17Jesu keghi kha wẹẹ, “Arhin igbe ọre a sinmwi, ihinrin ni dekẹe ghi vboo? 18Vbe a na miẹn hẹ ighe orhunmwuyẹn na ọkpa ọre ọ ghi dọlegbe rre do kpọnmwẹ Osanobua?” 19Jesu keghi tama rẹn wẹ, “Kpaegbe ne u gha khian, iyayi ruẹ mu ẹn egbe rran nẹ.”
Urremwẹ Arriọba
(Matiu 24:23-28, 37-41)
20Avbe Farisi eso na nọ Jesu ẹghẹ ne Arriọba gha ya rre. Rẹn wanniẹn tama iran wẹẹ, “Ariọba Osanobua i rre ne a do gha kpe ghe ẹre vbe ọ gha rre. 21A i vbe tama ọmwa wẹ, ‘Do ghe ẹre vbe eran!’ ra ọ ‘Rre odọọ!’ Rhunmwuda Arriọba Osanobua rre uwu uwa.”
22Ẹkpo nii ọre ọ na kha ma avbe erhuanegbe ẹre wẹẹ, “Ẹghẹ dee ne uwa gha na gha ho ne uwa miẹn ẹdẹ ọkpa ne ọ ye vbe ẹghẹ ọghe Ovbi Ọmwa, sokpan wa i ra miẹn ọẹn. 23Emwa eso ghi do khama uwa wẹẹ, ‘Ya ghe ẹre vbe odọọ,’ ra ‘Ghe ẹre vbe edinran.’ Sokpan wa ghẹ yo ya gha gualọ ẹe khian. 24Zẹ vbene ayan yan gba aro iso khinkhian ne ọ na viọ asan rẹn ladian ke obọ ọkpa ya sẹ obọ nọkpa, erriọ ọre Ovbi Ọmwa gha ye vbe ẹghẹ ọre a rre. 25Sokpan ọ gha ka rrioya nẹ, emwa orre na ghi hẹe. 26Vbene ọ gha ye vbe ẹghẹ Noa, erriọ ọre ọ gha vbe gha ye vbe ẹghẹ Ovbi Ọmwa. 27Emwa kegha re, iran na gha da, iran na gha rọnmwẹ egbe rhinrin ya sẹ ẹdẹ ne Noa la okọ. Uromwẹ amẹ keghi rre, ọ na fuẹn iran hia ua. 28Ọ gha vbe gha ye vbe ẹghẹ Lọt. Emwa kegha re, iran na gha da, iran na gha dẹ, iran na gha khiẹn, iran kegha mu ugbo, iran na gha bọlọ owa. 29Ẹdẹ ne Lọt kpao vbe Sọdom zẹẹ, erhẹn vbe odan keghi rhọ ke ẹrinmwi rre, ọ na fuẹn iran hia ua. 30Erriọ ọ gha ye ẹdẹ ne Ovbi Ọmwa gha ye egbe ladian.
31“Ẹdẹ nẹ dọ, wẹ ne ọmwa ne ọ rre ẹrhunrhun owa ghẹ tuorre ya viọ emwi ẹnrẹn ni rre uwu owa. Erriọ zẹẹ ọmwa ne ọ rre ugbo, wẹ ne ọ ghẹ gha di owa hiehie. 32Ye amwẹ Lọt rre. 33Ọmwa ne ọ wẹ rẹn ra sinmwi orhiọn rẹn gha mu ẹn fua, ọmwa ne ọ mu orhiọn rẹn fua gha miẹn ọẹn rhie. 34Ne I tama uwa, vbe asọn ẹdẹ ni, ikpia eva gha gba lovbiẹ ye ukpo, a ghi rhie ọkpa, a ghi sẹ nọkpa rae. 35Ikhuo eva gha koko gha lọ ẹhiẹn vbe olọ, a ghi rhie ọkpa, a ghi sẹ nọkpa rae. [ 36Ikpia eva gha gba rre Ugbo, a gha rhie ọkpa, a ghi sẹ nọkpa rae.]”
37Avbe erhuanegbe keghi nọ rẹn wẹẹ, “Nọyaẹnmwa de ehe ne ọ khin.” Jesu wanniẹn wẹẹ, “Ehe ne emwa ni wulo ye, ọre avbe ugu si koko yi.”
Currently Selected:
Luk 17: EDO96
Highlight
Share
Copy
Want to have your highlights saved across all your devices? Sign up or sign in
@ The Bible Society of Nigeria, 1996
