Luk 18

Itan Ẹgbẹe Kevbe Enọbuohiẹn

1Jesu keghi kpa itan na ma iran ne ọ ya ma iran ẹre wẹ ne iran ghẹ gie egbe erhunmwu ne a na wọ iran. 2“Nọbuohiẹn ọkpa kegha re ẹvbo ọkpa, ẹ i mu ohan Osanobua, ẹ i vbe da ne ọmwa rhọkpa. 3Okhuo ne ọ dẹgbẹ ọkpa keghi vbe gha rre ẹvbo nii, ọ na do gha rinmwian ẹn ne ọ miẹn ekhae sẹ ne irẹn wẹẹ, ‘Ran mwẹ vbe obọ oghian mwẹ.’ 4Vbe ẹghẹ ne ọ taẹn vbe otọ, nọbuohiẹn nii ma zẹyọ, sokpan vbe okiekie, ọ keghi tae vbe ekhọe ẹre wẹẹ, ‘A gha rhe miẹn ighẹ mẹ i muohan Osanobua, I i vbe da ne ọmwa rhọkpa, 5vbe ne okhuo na ghi kpokpo mwẹ sẹ, I gha ruẹe ne ọmwa rhọkpa ghẹ ye ohọ yẹn ọre urhu, deghẹ ẹ i re erriọ, vbe nian ọre ọ khian gha rre, ẹ i gie aro gbannọ mwẹ.’ ”

6Nọyaẹnmwa keghi kha wẹẹ, “Wa ma họn ẹmwẹ ne nọbuohiẹn ne ẹrhia na khare. 7Wa ma yayi ighẹ Osanobua gha buohiẹn ne avbe emwa rẹn ni kpe tie ẹre asọn kevbe avan? Wa yayi ighẹ ọ gha yae rhẹghẹrẹ? 8Ne I tama uwa, ọ gha zẹgiẹ do buohiẹn ne iran. Sokpan Ovbi Ọmwa gha rre, ọ gha miẹn iyayi vbe agbọn?”

Itan Farisi Kevbe Ne Ọ Koko Igho Uhunmwu

9Jesu keghi kpa itan na ma iran ni wẹ ọ khuiae ne iran, iran ghi gha zan emwa ọvbehe. 10“Ikpia eva keghi ya na erhunmwu vbe Ọgua Osa. Ọkpa kegha re Farisi, nọkpa kegha re ne ọ koko igho uhunmwu, 11E Farisi ne ọ rrọọ keghi mudia, ọ keghi na erhunmwu vbe nian: ‘Osanobua, I kpọnmwẹ ọn ighẹ mẹ i zuan, I i ru ero, I ma sakaan vbe ne emwa ọvbehe ye, I kpọnmwẹ ọn ighẹ I i ye vbe ne ọ koko igho uhunmwu nii. 12Ikpẹdẹ eva ọre I ya yo aguẹ vbe uzọla ọkpa. Emwi ne I mwẹ hia, I gha gha ẹre ye ihe igbe, I ghi viọ obọkpa vbọ guẹ.’ 13Ne ọ koko igho uhunmwu na ya mudia vbe urria, ohan ma gi ẹe tọn aro mu ghe odukhunmwu, sokpan ọ keghi gba obọ ginna ẹwẹe, ọ wẹẹ, ‘Osanobua tohan mwẹ, mẹ ne ọmwa orukhọ.’ ” 14Jesu keghi khama iran wẹẹ, “Ne I tama uwa, okpia na ọre ọ miẹn orhue rhie gha rrie vbe obọ Osanobua ighẹ ẹ i re nọkpa. Rhunmwuda, ọmwaikọmwa ne ọ tọn egbe ẹre mu, a gha mu ẹn rriotọ, ọmwa ne ọ mu egbe ẹre rriotọ, a gha tọn ẹn mu.”

Jesu Fiangbe Emọ Negiẹrẹ

(Matiu 19:13-15; Mak 10:13-16)

15Emwa eso keghi viọ ivbi iran negiẹrẹ bu Jesu gha dee ne ọ viọ obọ ẹre yan iran. Sokpan ugbẹn vbe avbe erhuanegbe ẹre miẹn iran, iran kegha gu iran gui. 16Sokpan Jesu keghi tie emọ ni rri egbe, ọ wẹẹ, “Wa gie ibiẹka nii bu mwẹ gha dee! Wa ghe da iran yi rhunmwuda egbe avbe iran ọre ọ yan Arriọba Osanobua. 17Wa ghi yerre, ọmwa ne ọ ma rhan obọ miẹn Arriọba Osanobua zẹ vbe ọvbokhan kherhe, ẹ i sẹtin la uwu ẹre.”

Okpia Ne O Fe

(Matiu 19:16-30; Mak 10:17-31)

18Ọkaolotu avbe Ju ọkpa keghi nọ rẹn wẹẹ, “Ọmamwaemwi ne ọ maa, Vbe i a gha ru ne ẹfe nẹi fo gha na sẹ mwẹ obọ?”

19Jesu keghi nọ rẹn wẹẹ, “Vbọzẹ ne u na tie mwẹ ne ọ maa yi? Ọmwa ne ọ maa ọkpa i rrọ gberra Osanobua ọkpa. 20Deghẹ u rẹn avbe Uhi: ‘Ghẹ ghẹ, ghẹ de izigha, ghẹ rhaa, ghẹ ta ohoghe, ya ọghọ ne erha a kevbe iye uẹ.’ ”

21Okpia ni wanniẹn wẹẹ, “Avbe uhi na mẹ wa lele khian, ke ẹghẹ ọvbokhan mwẹ gha dee.”

22Jesu ghi họn ẹmwẹ na, ọ tama rẹn wẹẹ, “Emwi ọkpa ọre ọ ghi kẹe nuẹn, ya khiẹn emwi ruẹn hia, viọ igho ẹre ne avbe ivbiogue, u gha mwẹ ẹfe vbe ẹrinmwi, u ghi gha dee ne u do gha lele mwẹ khian.” 23Sokpan, ugbẹn vbe okpia na họn ẹmwẹ na, ẹko ẹre keghi wa rhia rhunmwuda ọ mwẹ emwi ẹsẹse.

24Jesu keghi miẹn wẹ ẹko ma rhiẹnrhiẹn ọẹn, ọ keghi wẹẹ, “Ọ gha ba so emwa ni fe iran ke do la Arriọba Osanobua. 25Ne ọmwa ne ọ fe lao Arriọba Osanobua ọre ọ lọghọ sẹ ne uhunmwu ẹmila la uvun olodẹ gberra.” 26Emwa ni họn ẹn keghi kha wẹẹ, “Gha ọ gha miẹn imiẹnfan khekherriọ?”

27Jesu wanniẹn wẹẹ, “Emwa ne agbọn ọre ọna lọghọ na, ẹ i lọghọ ne Osanobua.”

28Pita wanniẹn tama rẹn wẹẹ, “Ghe, ma sẹ owa rae, ma lele uẹ khian.”

29Jesu tama iran wẹẹ, “Ne I tama uwa: Ọmwaikọmwa ne ọ sẹ owa rae, ra amwẹ, ra etẹn ne ikpia, ra evbibiẹ ọe, ra emọ rhunmwuda Arriọba Osanobua, 30gha mwẹ ni bun sẹ ọnii ẹsẹse vbe agbọn na. Ọ ghi vbe gha mwẹ ẹfe ne ẹ i mwẹ ọfo vbe agbọn ne ọ dee.”

Jesu Ya Unu Kan Ẹmwẹ Uwu Ẹre Ukpogieha

(Matiu 20:17-19; Mak 10:32-34)

31Jesu keghi viọ iran ne erhuanegbe iweva ghe efẹn ọkpa, ọ tama iran wẹẹ, “Wa danmwehọ, ma rrie Jerusalẹm, emwi hia ne avbe akhasẹ tae vbekpa Ovbi Ọmwa, a gha mu ẹn sẹ. 32A gha si ẹe gie avbe iran ne ẹ i re Ju, iran gha yae ghe ogiẹ, iran gha ya ukpẹ sakan ẹn, iran gha tu asẹn ku ọre. 33Iran gha gbe ẹre asan, iran ghi gbe ẹe rua, vbe ikpẹdẹ ne ọ gieha, a gha huẹn ọnrẹn kpaegbe vbe orinmwi.”

34Avbe erhuanegbe ẹre ma rẹn emwi ne a ya emwi na rhọkpa kha, a keghi rhie otọe ẹmwẹ nii lẹre ne iran, iran ma rẹn otọ ẹmwẹ ne Jesu guan yan.

Jesu Sinmwi Arhuaro Ne Ọ Vbu Evbare Re

(Matiu 20:29-34; Mak 10:46-52)

35Jesu ghi sẹ ọkpẹn Jẹriko, arhuaro ọkpa keghi tota ye ọkpẹn odẹ ọ gha vbu evbare re. 36Ọ ghi họn vbe ẹvbo bi gberra khian, ọ keghi nọ iran wẹẹ, “Vbe ọ sunu na?”

37Iran tama rẹn wẹẹ, “Jesu ne ovbi e Nazarẹt ọre ọ gberra khian.”

38Rẹn keghi datu, “Jesu Ovbi e Devid, tohan mwẹ!”

39Iran ni ke odaro kegha gu ẹe gui, iran wẹ ne ọ gue unu ẹnrẹn. Sokpan rẹn keghi dọlegbe kakabọ davan: “Ovbi e Devid, tohan mwẹ!”

40Jesu keghi de mudia, ọ na wẹ ne a rhie arhuaro nii bu irẹn gha dee. Ọ ghi sẹ ehe ne ọ ye, Jesu nọ rẹn wẹẹ, 41“Vbe u a wẹ ne I ru nuẹn?” Rẹn wanniẹn wẹẹ, “Enọwanrẹn, I ho ne I dọlegbe gha dẹghe.”

42Jesu wanniẹn tama rẹn wẹẹ, “Gha dẹghe! Iyayi ruẹ mu ẹn egbe rran.” 43Vbe ọwarọkpa nii, ọ kegha dẹghe, ọ keghi lele Jesu, ọ na gha rho Osanobua vbe uyi.

Currently Selected:

Luk 18: EDO96

Highlight

Copy