Jọn 5

Jizọs Obi Gwọm Bẹtẹsda Dappa Ḅụ

1Sáá ḅo ḅọ́rọ́ sáá Jizọs iwóo Jerusalem múm Juuapụ álálị ma go. 2Jerusalem bie ánáná opu ḅụ́pọ́ ma na kikia angaá, gbẹ́rẹ́ dappa imi anị sọ́nọ́a osu gbẹ́ẹ̄ asọ nyánam, Hiburu ẹ́gẹ́rẹ́ ḅụ Bẹtẹsda anịị nnị pa anị sị nyẹ. 3Mịnga ma ḅụ tọgha tọgha ikúléapụ ḅụlọlọ ḅụlọlọm Tọ́rụ́pụ́apụ, ikúléapụ na pịghị oju fịịapụ kuruarị mingi ma píiri bẹ sáá. 4Ḅẹẹ gbẹ́rẹ́ sookumuḅọ dappa ma kóróḅo kóróḅom sa ḅụ akị mú sáá láa, ine parị dosi dappa ma ḅụ sọ ḅo gonyẹ́ gonyẹ́ sookumuḅọ ma mingi ma píirima sa n ḅo ḅụ fịnị obi gonyẹ́ gonyẹ́ gwọbẹm. 5Gbẹ́rẹ́ owitụ́wọ anị ngá imii, mmẹẹ́ faá kụ́rá mmẹsi pa obikiri ḅụ fịnịmaa ḅọ. 6Jizọs ori árị sị ḅụlọlọ fịnịarị ngá pịghị nimiḅo ḅẹ́ ḅọlọmaa sáá ḅụ mịẹ owitụ́wọ ma obikiri ma ḅụ imi, Jizọs o gbilam, <<I dọghụ ị́yẹ́ oju ibii?>>

7Obi ḅọ ma pagharam, <<Nyẹ́dieḅọ, a gbẹ́rẹ́ḅọ sọ nyánágha ḅárásua ị pa dappa ma bie sua anị píirima maẹrẹ. A ḅụ́kọ́rọ́maarị sa ḅẹẹ a sọọ, jụghọ i toruku kánáma anị bie sọ́bẹm.>>

8Anịsáa Jizọs warị ọ ḅẹẹ, <<Saghị sẹ́! Ị́yẹ́ ibila iko akị sị nwángị.>> 9Anị gbẹ́rẹ́kiri owitụ́wọ ma oju ḅo ibim, ori ọrẹ ibila iko akịm sị nwángịm.

Mịnyẹ ma kiriakị éné anịị Juuapụ Ịnyọ́sárá Éné ma, 10Juuapụ ma warị oju gwọḅọ ma ḅẹ́, <<Mịị éné Ịnyọ́sárá Éné; ólóghó ma íkíkim ị́yẹ́ ibila iko so.>>

11Kụ́ma ori nnị pagharam, <<I gwọọ owitụ́wọ ma dugho i pịrịm, <Ị́yẹ́ ibila saghị akị sị nwángị.> >>

12Nnị o gbilam, <<Mị owitụ́wọ ma ọ́ tụọ ị ḅẹ́ ḅo ḅẹẹ ị́yẹ́ ibila iko akị sị nwángị?>>

13Nnị ḅụ obi gwọọ owitụ́wọ ma nimigha ọ gwọḅọ tegó Jizọs ẹmẹẹ́fámam anị ngá fịnị túminị́ kpo ma bie.

14Sáá ḅo ḅọ́rọ́ sáá Jizọs ori na donam Tamunoopuwarị ma bie sị warị ọ ḅẹ́, <<Dighi mị́sa ị́yẹ́ oju ibimam siinyẹ mịẹ kunema anịgha mịma nẹ́ngịma nyẹ i láabẹm.>> 15Owitụ́wọ ma nwángị sọm sị mú dugho Juuapụ ma pịrị ḅẹẹ Jizọs anị mịẹsị ori oju ibimaa ḅọ.

Duma Tụ́wọ Ma Ḅụ Ḅọ́rọ́

16Jizọs mịná fịrị mamgba nwángịarị gosi Ịnyọ́sárá Éné ma Juuapụ ma warị sághị ọ pa tọ́rụ́siarị ma. 17Jizọs dugho n pịrịm, <<I Daá ma ọ fịrịnwangịarị akị ḅo mị́sa ma láa, irịsọ a pa fịrịnwangịarị.>> 18Mịma gosi Juuapụ ma ịnyọsua asọ dọ́ghụm nnị ḅara warị ọ ḅáa bẹ ḅara; Ịnyọ́sárá Éné ma ólóghó ngéréghaa o kóró nyẹ, kụ́ma ọ pịghị ḅẹm Tamuno anịị ọ Daá, ọ ḅụ sághị Tamuno na gbasịarị.

19Jizọs nnị pagharam: <<A karakárányẹ ma dugho ọ pịrịm, Tụ́wọ ma ọ ḅara na ine bẹnyẹ bẹnyẹ mịẹbịgha, ọ mịẹbẹnyẹ, tegó Daḅọ ma mịẹnyẹ gonyẹ́ gonyẹ́ anịị Tụ́wọ ma sọ mịẹarịnyẹ. 20Daḅọ ma Tụ́wọ ma ḅẹ́lẹ́mam sị pịghị ọ mịẹarịnyẹ gonyẹ́ gonyẹ́ pa Tụ́wọ ma diem. Innh anị ọmịna ḅụ ḅụ́gbérépúmabẹm ḅẹẹ ọ mịma nẹ́ngịma nyẹ pa o diebẹm. 21Ḅẹẹ Daḅọ ma fịịapụ saghịmaarị ḅara sị duma pa nna pịrị, anị ḅara ma anị Tụ́wọ ma sọ duma pa ọ pịrị dọghụapụ pịrịarị ḅara. 22Daḅọ ma gbẹ́rẹ́ḅọ sịbị sọ ḅẹ́rẹ́kọgha kụ́ma ḅẹ́rẹ́kọ kụ́rọ gonyẹ́ gonyẹ́ pa Tụ́wọ ma pịrịmam. 23Kị́nị́mamgba kuu pa Tụ́wọ ma pịrị n pịghị kuu pa Daḅọ ma pịrịarị ḅara. Kuu pa Tụ́wọ ma pịrịghaḅọ pịghị kuu pa Daḅọ ma pịrịgha ọ fịrịma ḅooḅọ.

24<<A karakárányẹ ma dugho ọ pịrịm, ị́yẹ́ ẹ́gẹ́rẹ́ ma naakị sị i fịrịmaḅọ ma minini, gbámásó duma nyánam, nnị fịị ḅẹ́rẹ́pẹ́lẹ́ bieghaa n ḅọ sịbị, n ḅọ fịị saḅa ḅọ́rọ́ duma bie sọ́mam. 25A karakárányẹ ma dugho ọ pịrịm, sá ḅoarị sáá ma pịghị lámam fịịapụ ma Tamuno ma Tụ́wọ pụghọ naábẹm sị naapụ ma dumabẹm. 26Ḅẹẹ Daḅọ ma ọ ḅụbie duma nyáná ḅara, anị ọ pịghị mịẹsị Tụ́wọ ma duma nyáná o ḅụbie. 27Ọ pịghị ḅẹ́rẹ́kọ kụ́rọ pa ọ pịrịmam tegó ori anịị Tumḅọ yii Tụwọ ma.

28<<Mịma ọmịna ḅụ ḅụ́gbérépuma ma, sáá ma ḅoarị nna dupu bie fịnịapụ mamgba ọ pụghọ naábẹm 29sị págháḅo, ibi nyẹ miẹmaapụ sághị sị duma bie sọ́bẹm, sị pịghị siinyẹ miẹmaapụ saghịbẹm sị fịị ḅẹ́rẹ́pẹ́lẹ́ ḅụ sọ. 30Ị́yẹ́ kụrọ ḅụ a ine ḅẹnyẹ ḅẹnyẹ mịẹbịgha; a náaḅara anịị a ḅọ́rọ́ ḅẹ́rẹ́kọarị ḅara ị́yẹ́ ḅẹ́rẹ́kọ pịghị karakáram, ḅẹẹ a asọ dọghụgha ḅẹẹ a ịḅụ ḅẹlẹma bẹnyẹ mịẹ, kụ́ma i fịrịma ḅọ ma bieḅẹlẹma bẹnyẹ.

Jizọs Gboloma Dugho Pághámá Nyẹ

31<<A ḅọ́rọ́ ịḅụ gboloma dugho pághámá nyẹ dugho dugho, ị́yẹ́ dugho pághámá nyẹ ma ḅẹnyẹ ḅẹnyẹ ḅụ ofori. 32Jụghọ imi ị gbolomanyẹ dugho pághámaarịḅọ a pịghị nimim ḅẹẹ ị gboloma sị o dugho pághámaarị nyẹ ma karakárányẹ.

33<<Jọn anịị ọmịnị okumuuapụ fịrịma dámámuu ḅọ, ọ pịghị sẹ ẹ́gẹ́rẹ́kọọ karakárá ma pịrịm. 34Ọkọgha ḅẹẹ, a túminị́ dugho págháma nyẹ daákịm; kụ́ma a anị dughom sị ọmịnị ine dụaḅọ́rọ́ma nyáná bẹ ḅara. 35Jọn ori anịị kọrị sị pịghị biarị tọndọ ma, ọ pịghị dọghụarị ḅẹ́ kálá sáá tụwọ ḅụ ọmịnị tọndọ ma ḅẹlẹ fị́ị.

36<<A dugho págháma nyẹ nyánam ikuḅa Jọn dugho pághámá nyẹ nẹ́ngị nyẹ. Ḅẹẹ i Daá pa i pịrịmaá fịrị ma ḅẹ́ a nwángị mú sịbị láama, a pa nwángịarị gbẹ́rẹ́ fịrị ma, dugho pághámaarị ḅẹẹ Daḅọ ma i fịrịmam. 37Pịghị i fịrịma Daḅọ ma ị gbolomanyẹ dugho pághámamam. Jẹ́ éné nịị ọmịnị ọ pụghọ naagha anịgha árị ọ fịnị ḅara, 38ori ẹ́gẹ́rẹ́ so ọmịna tẹ́mẹ́bie ofori, ọ pịghị ọ fịrịmaḅọ ma ḅụ mininigha. 39Ọmịnị ịnyọsua Tọ́ndiri ma dáwọ, tegó o mininim ḅẹẹ anị ḅụ ḅọ́rọ́ ọ duma gbámásó nyánam. Mịná Tọ́ndiri ma anịị ị gbolomanyẹ dughopaghámáarị nyẹ, 40Anị so ọ pa mịnị i damaḅogha sị o duma nyáná bẹ ḅara.

41<<A túminị́ ḅarabie túminí bigha, 42kụ́ma a o nimim. A nimim ḅẹ́ Tamuno ḅẹlẹma ọmịna tẹ́mẹ́bie ofori. 43A i Daá ẹ́rẹ́ ḅụ ḅooman anịsọ ọ pa i daákịgha kụ́ma ḅọ́rọ́ jụghọ n ḅo ẹ́rẹ́ pa ḅo ọ mịnị n ḅo daákịbẹm. 44Ọ tọ́rọ pa ine minini bẹ, o jụghọ jụghọ ḅara túminí biarị sáá, kụ́ma ọ ḅẹnyẹ ḅẹnyẹ mịẹgha sị Tamuno ma ngéré ḅara ḅoo túminí nyáná?

45<<Kụ́ma ọ kóróma ma ḅẹ́ a ḅẹ́rẹ́ pa ọ sịbị sẹbẹm Daḅọ ma tórúku. Mosis anịị ḅẹ́rẹ́ pa ọ sịbị sẹ bẹḅọ. Ọ pịghị ḅụ tẹ́mẹ́ gbánáḅọ. 46Ọ ḅọ́rọ́ Mosis minini ọ pịghị i mininibẹm, ḅẹ́ ori ị gbolomanyẹ gịẹm. 47Kụ́ma ọmịnị o gịẹnyẹ ma mininigha sáá, ọ tọrọ́ pa a dughonyẹ ma minini bẹ?>>

Currently Selected:

Jọn 5: IBY

Highlight

Copy