Jọn 6

Jizọs Oyi Mmẹẹ́ Ndẹ́ẹ Na Oyia Si Sibẹm

(Mat 14.13-21; Mak 6.30-44; Luk 9.10-17)

1Mịnanyẹ ma ḅọ́rọ́ sa, Jizọs Galili tọ́rụ ma saḅa koro jẹ́ posie aka múm (anịị Tiberios tọ́rụ ma). 2Tọgha túminị́ kpo pịghị o duam tegó nnị ori obiapụ ḅụ nwángị ḅụ́gbérépuma fịrị arịm. 3Jizọs warị tụ́ndụ tándị sị anị ngá ori ọḅụduaapụ na kpọrọfịnị. 4Juuapụ Saḅaḅọ́rọ́ Álálị ma kikiamam.

5Jizọs tọ́rụ sághị ọgọnọ dighi sáá sị tọgha túminị́ kpo árị ọ damaḅoarị, ọ dugho Filipụ pịrịm, <<Wa tẹ́ anga fịtúrú fẹ mịnaapụ ma pịrịbẹ sị n fị́ị?>> 6Ọ mịma gbilam pa ọ daá dighi, ọ nimiwarịmam ọ tẹ́mẹ́bie ọ mịẹbẹnyẹ.

7Filipụ ọ pagharam ḅẹẹ, <<Inine akalụ́ igbii karabịgha sị pa fịtúrú fẹ́ sị kálá mpara ọ́rụ́ḅọ ọ́rụ́ḅọ bịpị láa!>>

8Ori ọḅụdua jụghọ, Anduru, Saimọn Pita numboru dughom, 9<<Mịnga gbẹ́rẹ́ kálá owitụ́wọ imi sọ́nọ́ baali fịtúrú kpo na kálá mmẹẹ́ nji ọlọ ḅo, kụ́ma mịma tẹ́ ngá láa bẹ tọgha túminị́ ogbo?>>

10Jizọs dughom, <<Mịẹsị túminị́ ma kpọrọfịnị.>> Tọgha osuka anị ngá ma ḅụ imi, túminị́ ma pịghị kpọrọfịnịm túminị́ oyi mmẹẹ́ a ndẹ́ẹ na oyia si. 11Jizọs warị fịtúrú ma saghị akị, ịmịẹḅam pa Tamuno ḅẹẹ sị anị die pa kpọrọfịnịapụ mamgba pịrị n fị dọghụ ḅara. Anị ḅara ma anị ọ pịghị nji ma die ḅara.

12Nnị kị́nị́mamgba fị furo bima sáá, ori ọrẹ ọḅụduaapụ ḅẹm, <<Kọọ mpara mpara ma gbálā kubiri. Gbẹ́rẹ́nyẹ sọ guluguluma.>> 13Nnị warị mpara mpara baali fịtúrú ma gbalam oyi mmẹẹ́ nkana bima anịị nnị fịkọma nyẹ ma ḅụ.

14Túminị́ ma Jizọs nwángị ḅụ́gbérépuma fịrị árị sáá, n warị saghị dugho ḅẹẹ, <<Karakáráma, mịị anịị tuminikiri ḅoo dọghụ ikiakoroḅọ ma.>> 15Jizọs nimi warị ḅara ma ḅẹẹ n kụ́rọ ḅara pa ámányánáḅọ pa ọ mịẹbẹm, ori ọ ḅụ si akịm sị sima tụ́ndụ ma tándịm.

Jizọs Mingi Ọgọnọ Nwángịm

(Mat 14.22-33; Mak 6.45-52)

16Éné ḅupiri sáá, Jizọs ọḅụduaapụ teré tọ́rụ ma korom, 17nnị árụ́ ḅụlọ ngá sị sima tọ́rụ ma sáḅá koro Kapanọm muu ngá. Mị́sa biri ma éné kánákánámam, Jizọs na pa ḅo n fịnịnga laagha. 18Kụ́rọ fọ́rụ fiearị dinọngu warị tọ́rụ ma sọ. 19Nnị ine árụ́ ma dọghụ tẹ́rẹ́ a maili na mpara láa sáá, n Jizọs arịm árụ́ ma dámáḅoarị mingi ma ọ́gọ́nọ nwángịarị, ḅáláfaa warị nna ḅụ sọọ. 20Kuma ori n ḅẹm, <<Ọ́ irị, ọ ḅáláfama.>> 21Anịsáa anịị n tẹ́mẹ́ ḅoo diin nyẹ ḅẹẹ, ori árụ́ ma ḅụlọ anị gbẹ́rẹ́kiri árụ́ ma anị muarị kiri bịpị lam.

22Jẹ́ éné ḅáa tọ́rụ́ ma na dama dama ngá ma ḅụ fịnị túminị́ kpo ma arịḅom ḅẹẹ gbẹ́rẹ́ árụ́ ngéré anịị anị ngá fịnịnyẹ. Nnị nimiḅom ḅẹẹ Jizọs na ori ọḅụduaapụ árụ́ ma ḅụlọgha, kụ́ma nnị nnị nnị ngéré sọm. 23Anịsáa jẹ́ jẹ́ árụ́ Tiberios ḅụ saghị dọ́ghusọm, Kị́nị́nyánáḅọ imiẹḅa ḅẹ́ fama sị fịtúrú pa túminị́ ma pịrị sị n fị anga ma na kikia ngá. 24Túminị́ kpo nimi ḅoo sáá ḅẹẹ Jizọs anịgha ori ọḅụduaapụ anị ngá imi, n sima árụ́ ma ḅụlọm sị so Kapanọm muu Jizọs dọghụarị.

Jizọs Anịị Duma Fịturu Ma

25Nnị o dọghụ pághámaḅo sáá isi párángáa tọ́rụ́ ma ḅụ, nnị o gbilam, <<Nyẹ́dieḅọ, i tẹ́ sáá ḅo mịnga láa?>>

26Jizọs pagharam, <<A karakárányẹ ma dugho ọ pịrịm, ọ mịnị i dọghụarị ọmịnị árị ḅụ́gbérépuma ilíghíma ma gosigha, kụ́ma ọ fị furo bima fịtúrú ma gosi. 27Fịrịnwangị síi bẹ fị́nyẹ ma pịrịma kụ́ma fịrịnwangị fịnị muu gbámásó duma láa bẹnyẹ pịrị, Tumḅọ yii Tụwọ ma pa ọ pịrịbẹnyẹ, tegó ori ma anịị Tamuno Daḅọ ma ḅara pụnụ pịrịmaá ḅọ pa die ḅẹ́ ori anịị kụ́rọ pa ọ pịrịḅọ.>>

28Anịsáa nnị warị o gbíla, <<Wa tẹ́ mịẹbẹ sị ine Tamuno bi sị wa nwángị na ibifịrị nwángị?>>

29Jizọs pagharam, <<Mịị Tamuno fịrị ma: anịị ọ fịrịmaḅọ ma ḅụ minini.>>

30Nnị warị o gbíla, <<Anịsáa i tẹ́ ḅụ́gbérépuma ilíghíma pa wa pịrịbẹ wamịnị árị sị ị́ minini? I tẹ́ mịẹbẹ? 31Wámịna tádọ́apụ mana pa sị fị́nyẹ ma fịm elesiri ḅụ; n gịẹ kóróma ḅara: <O sobie sághị ḅo fịtúrú pa nnị pịrịm sị nnị fịị.> >>

32Jizọs dugho n pịrịm, <<A karakárányẹ dugho ọ pịrịm, mosisgha sobie sághị ḅo fịtúrú ma pa ọ pịrịḅọ, kụ́ma i Daá ma anịị sobie sághị ḅo karakárá fịtúrú ma pa ọ pịrịḅọ. 33Ḅẹẹ Tamuno fịtúrú ma anịị ori sobie sághị ḅoḅọ ma sị duma pa tuminikiri ma pịrị.>>

34Nnị warị ḅẹẹ, <<Nyẹ́dieḅọ, mị́sa sághị bịpị muu mị fịtúrú ma pa wa pịrị.>>

35Jizọs warị anịsáa dugho nnị pịrịbẹ, <<Ịrị anịị duma fịtúrú ma. I damaḅoo ḅọ jẹ́ éné jẹ́ éné ḅuru n ḅo ḅábịgha, pịghị i ḅụ mininiḅọ gonyẹ́ gonyẹ́ jẹ́ éné jẹ́ éné n ḅọ pụghọ sámụ́nọbịgha. 36Kụ́ma a dugho ọ pịrị ḅara ma, ọ mịnị ị́yẹ́ árịmam anịsọ ọ pa mininigha. 37I Daá ma pa i pịrịnyẹ gonyẹ́ gonyẹ́ i dámáḅobẹm, i damaḅo ḅọ gonyẹ́ gonyẹ́ a pịghị jẹ́ éné jẹ́ éné n ḅo deebịgha. 38Ḅẹẹ a sobie kóróḅomam, irị binyẹ mịẹ ḅugha kụ́ma i fịrịmaḅọ ma binyẹ. 39Mịma anịị i fịrịmaḅọ ma pịghị binyẹ, ḅẹẹ ọ pa i pịrịmáapụ ma gonyẹ́ gonyẹ́ a gbẹ́rẹ́ḅọ sọ ḅuumama. Kụ́ma nnị saghịma duma bie sua kunema éné ma ḅụ. 40Ḅẹẹ Daḅọ ma binyẹ anịị tọ́rụ pa Tụ́wọ ma dighiḅọ gonyẹ́ gonyẹ́ sị ọ minini duma gbámásó nyánábẹm, a pịghị n ḅọ saghịmabẹm kunema éné ma ḅụ.>>

41Mịma ḅụ ḅọ́rọ́ Juuapụ ma warị saghị gunugunu ọ pịrị tegó o dughom ḅẹẹ, <<Ịrị anịị sobie sághị ḅo duma fịtúrú ma.>> 42N dughom, <<Mịị ḅọ ma Jizọsigha, Josẹf tụwọ wa o yii nyingiḅọ na daḅọ nimiḅọ? Ọ tọ́rọ pa mị́sa dughoarị ḅẹ́, <A sobie sághị kóróḅom?> >>

43Jizọs warị n pagharaa, <<Ọmịnị gụnụgụnụ ma ọmịna ogbobie.>> 44<<Gbẹ́rẹ́ḅọ so ine i dámáḅobịgha ḅọ́rọ́ i fịrịma Daḅọ ma n ḅọ nụnụ i pịrịgha, a pịghị n ḅo saghịmabẹm kunema éné ma. 45Nnị gịẹ kórómam ikiakoroapụ diri ma bie ḅẹẹ, <Tamuno nyẹ pa kị́nị́mamgba diebẹm,> Daḅọ ma naaḅọ gonyẹ́ gonyẹ́ sị o ḅarabie nyẹ dáwọ i dámáḅobẹm. 46Gbẹ́rẹ́ḅọ sọ na Daḅọ ma arịgha, Tamuno ma ḅara saghị ḅoḅọ sima; ori ma ngéré anịị Daḅọ ma arịmáa ḅọ. 47A karakárányẹ ma dugho ọ pịrịm, mininiḅọ gonyẹ́ gonyẹ́ dúmagbámásó nyánam. 48Ịrị anịị dúma fịtúrú ma. 49Ọmịna tádọ́apụ manna pa sị fị́nyẹ ma fịm elesiri ḅụ, anịsọ n pa fịịm. 50Kụ́ma mịnga anịị sobie sághị kóróḅo fịtúrú ma, tumḅọ ine fị sị mịnị fịbịghaa. 51Irị anị sobie sághị kóróḅo dúmafịnị fịtúrú ma. Mịị fịtúrú ma fị ḅọ gonyẹ́ gonyẹ́, duma gbámásóbẹm. Mịị fịtúrú ma anịị ị́yẹ́ ojumẹnị, a pịrị sị tuminikiri gbọrụ duma bẹnyẹ.>>

52Anịsáa igani na opu nụná warị Juuapụ ma ogbobie kóró, <<Mịị owitụ́wọ ma ọ tọ́rọ pa ori ojumẹnị pa wa pịrị sị fị bẹ?>>

53Jizọs nnị ḅẹm, <<A karakárányẹ ma dugho ọ pịrịm, ọ Tumḅọ yii Tụwọ ma ojumẹnị pẹẹ́gha sị pịghị ori ọmbịnyẹ́ ḅugha, ọ duma nyánágha ọmịna ḅụbie. 54Ị́yẹ́ ojumẹnị pẹẹ́ ḅọ gonyẹ́ gonyẹ́ pịghị ị́yẹ́ ọmbịnyẹ́ ḅuu duma gbámásó nyánam, a pịghị n ḅọ saghịmabẹm kunema éné ma ḅụ. 55Ḅẹẹ ị́yẹ́ ojumẹnị ma anịị tụ́ma fị́nyẹ, ị́yẹ́ ọmbịnyẹ́ pịghị tụ́ma iru. 56Ị́yẹ́ ojumẹnị pẹẹ́ ḅọ gonyẹ́ gonyẹ́ pịghị ị́yẹ́ ọmbịnyẹ́ ḅuu iḅụbie fịnị fịnịm, irịsọ n ḅo ḅụbie fịnị.

57<<Dumafịnị daḅọ ma i fịrịma ḅara ma, a pịghị dumam Daḅọ ma gosi. Anịma gosi i fị ḅọ gonyẹ́ gonyẹ́ n ḅọ ma dumabẹm irị gosi. 58Mịị sobie sághị kóróḅo fịtúrú ma. Ọmịna tádọ́apụ mana pa sị fị́nyẹ ma fịm sị fịị, kụ́ma mịị fịtúrú ma fị ḅọ duma gbámásóbẹm.>> 59Ọ mịma dughom ori nna kobiri yọ ma ḅụ nyẹ́diearị sáá Kapanọm ḅụ.

Tọgha Ọḅụduaapụ Jizọs Warịsom

60Nnị anị náa sáá, ori ọḅụdua tọghaapụ dughom ḅẹẹ, <<Mịị kụ́rọ dienyẹ. Tụọ ine anị daakị bẹ?>>

61O nimitẹ́lẹ́ma sáá ḅẹẹ ori ọḅụduaapụ gụ́nụ́gụ́nụ́arị anịgosi, Jizọs n ḅẹ́m, <<Mịma anị ọmịnị igani ma? 62Tẹ́ nyẹ, ḅọ́rọ́ ọ Tumḅọ yii Tụ́wọ ma árị iwo ọ saghị ḅo angaá muarị! 63Tẹ́mẹ́ ma duma pịrịm; ojumẹnị ma sọnyẹ pịrịgha. A kọọ ọ pịrịmaá ẹ́gẹ́rẹ́ ma anịma anịị tẹ́mẹ́ nnị pịghị duma. 64Anịsọ, ọmịna ḅụ jẹ́apụ imim mininighaapụ.>> Ḅẹẹ Jizọs nimimam parị sáá éné éné nna ḅụ mininighaḅọ na pịghị ọ dẹrịfị bẹḅọ. 65Jizọs warị ẹ́gẹ́rẹ́ ma ḅarị, ḅẹẹ, <<Mịị anị a go dugho ọ pịrịnyẹ ḅẹẹ gbẹ́rẹ́ḅọ sọ ine i dámáḅobịgha ḅọ́rọ́ Daḅọ ma ịnyọ pa n ḅo pịrịgha.>>

66Mị́sa sághị bịpị muu ori tọgha ọḅụduaapụ ọḅụdam sị mịnị o duagha.

67Jizọs warị ori oyi mmẹapụ findi ma gbíla, ọmịnị ma sọ, o so dọghụ?

68Saimọn Pita ọ pagharam, <<Kị́nị́nyánáḅọ wa soo tụọ dama mú bẹ? Ịrị koko duma pịrị ẹ́gẹ́rẹ́ ma nyáná. 69Wa mininim pịghị nimi ḅẹẹ ịrị anị Tamuno Tọ́ntọ́ Tumḅọ ma.>>

70Anịsáa Jizọs warị pagharaa, <<A ọmịnị oyi mmẹapụ sẹlẹakịgha? Anịsọ ọmịna ḅụ gbẹ́rẹ́ḅọ ori ẹ́kpẹ́dua!>> 71(O ḅẹ́arịḅọ anịị Judas, Saimọn Isịkarọtị tụwọ karakárányẹ ḅẹẹ ori oyi mmẹapụ findi ma ḅụ gbẹ́rẹ́ḅọ kunema ọ dẹrịfị bẹḅọ.)

Currently Selected:

Jọn 6: IBY

Highlight

Copy