Jọn 7

Jizọs Na Ori Amịna Owiapụ

1Mịma ḅọ́rọ́ sáá, Jizọs nwángị Galili ikelemam o nimitẹ́lẹ́mam sị mịnị Judiya sọgha tegó anị ngá fịnị Juuapụ ma kúruarị nnị ọ ḅáa bẹ ḅara. 2Kụ́ma Juuapụ ákáinyi wárị Álálị ma kikia sáá, 3Jizọs numboru owiapụ ọ ḅẹ́m, <<Ị mịnga wáriso sị Judiya muu na ibim, sị ị́yẹ́ ọḅụduaapụ ị nwángịarị ḅụ́gbérépuma fịrị ma arịị. 4Dọghụ ḅo ḅẹẹ túminị́ ibima n ḅọ nimi anị tumḅọ ma n ḅo mịẹarịnyẹ ḅoghumabiegha. Ị mịnanyẹ ma mịẹarị ḅara ma, ịḅụ pa tuminikiri gbọrụ die.>> 5Ori amịna owiapụ ma mịma dughom nnị sọ ọ ḅụ mininigha gosi.

6Jizọs anịgo dugho nnị pịrịm ḅẹẹ, <<Tamuno tọ i pịrị sáá ma na laagha; ọmịnị sámámgba karakárá ọ pịrịm. 7Tuminikiriapụ ma ine ọ tarịghaapụ sọbịgha, kụ́ma nnị i tarịgha tegó a dugho págháma n pịrịarị ḅẹẹ nnị mịẹarịnyẹ ma siinyẹ. 8Ọmịnị álálị ma muu; ịrị a mị́sa álálị ma mubịgha tegó irị ị́yẹ́ sáá ma karakárá na laagha.>> 9Ọ mịnanyẹ ma dugho n pịrị fama sáá, ọ warị Galili ḅụ fịnị.

10Kụ́ma, ori amịna owiapụ álálị ma mú famamaá sáá, ori sọ múm, túminị́ mamgba nimi bẹ ḅaragha kụ́ma ḅọghu ḅara ḅụ. 11Mị́sa Álálị ma ḅụ, Juuapụ ma ọ dọghụarị pịghị gbilaarị, <<Anị owitụ́wọ ma o tẹ́ anga imii?>>

12Túminị́ kpo ma ogbobie, túminị́ pụghọ terema ẹ́gẹ́rẹ́arị ori gosi. Jẹ́apụ dughom ḅẹẹ, <<Ori ibi tumḅọ.>> Jẹ́apụ pagharam, <<Enrrh enrrh, ori oḅori pa túminị́ ma sịarị.>> 13Kụ́ma gbẹ́rẹ́ḅọ sọ ine túminị́ ogbo ma ḅụ ọ gbolomanyẹ dugho pághámagha, Juuapụ ma ḅáláfa go.

Jizọs Nyẹ́diem Ákáinyi Álálị Ma Ḅụ

14Álálị ma muu ogbo biri láa sáá, Jizọs saghị Tamunoopuwárị ẹpẹlẹ́ ma sọm sị nyẹ die. 15Juuapụ ma anị nna ḅụ ḅụ́gbérépumam nnị warị gbíla, <<Mịị owitụ́wọ ma ọ tọ́rọ pa mịnanyẹ mamgba nimii, nyẹ́ dawọgha pa?>>

16Jizọs pagharam, <<A diearịnyẹ ma i nyẹ́gha. Anị i fịrịmaḅọ ma ḅara saghịḅom. 17Ḅọ́rọ́ Tamuno binyẹ mịẹ dọghụḅọ fịnịfịnị n dọghụ pághámaḅobẹm ḅọ́rọ́ ị́yẹ́ dienyẹ ma Tamun ḅara saghị ḅo anịgha a ị́yẹ́ kụ́rọ pa anị diearị. 18Amịna kụ́rọ ḅụ ẹ́gẹ́rẹ́kọarịḅọ gonyẹ́ gonyẹ́ ori boma dọghụarị, kụ́ma ọ fịrịmaḅọ ma boma dọghụarị ḅo gonyẹ́ gonyẹ́ anị tumḅọ ma anị karakárá ẹ́gẹ́rẹ́kọarịḅọ, iruonyẹ ọ ḅụ ofori. 19Mosis na ori ologho ma pa ọ pịrịgha? Anịsọ ọmịna ḅụ gbẹ́rẹ́ḅọ sọ ologho ma warị warịgha ọ tẹ́ go i ḅa dọghụ?>>

20Túminị́ kpo ma pagharam, <<Sitẹ́mẹ́ ị kórómam, tụọ ị ḅa dọghụ?>>

21Jizọs n ḅẹm, <<A gbẹ́rẹ́ ḅụ́gbérépuma fịrị nwángịm ọ ḅụ warị gbérépu. 22Mosis tọ́ọ ọ pịrịmam ḅẹẹ ọmịnị ọmịna owiapụ áwọ tọ́ngọ̄ pẹ́lẹ́, anịgo Ịnyọ́sárá Éné ma ḅụ ọmịnị ọmịna owiapụ awọ tọ́ngọ̄ pẹ́lẹm (karakárányẹ ḅẹẹ anị Mosis ḅara saghị ḅogha kụ́ma ọmịna tádọ́apụ ḅara). 23Mị́sa ḅọ́rọ́ nnị ine kálátụwọ tọ́ngọ̄ pẹ́lẹ́bẹm Ịnyọ́sárá Éné ma ḅụ sị nnị Mosis ologho ma kóróbịgha ḅara, o tegó bieoḅu i pịrịarị ḅẹẹ a owitụ́wọ ḅụgbọrụ gwọm Ịnyọ́sárá Éné ma? 24Ọmịnị tọ́rụ pa árịnyẹ ḅụ ḅọ́rọ́ ḅẹ́rẹ́kọ ma, kụ́ma ọ karakárá ḅẹ́rẹ́kọọ.>>

Jizọs Ori Anịị Krais Ma

25Anịsáa ma ḅụ jẹa Jerusalemapụ saghị gbilam, <<Mịị n ḅa dọghụ owitụ́wọ magha? 26Mịị ori túminị́ mamgba tórúku fịnị ẹ́gẹ́rẹ́kọarị, n pịghị ine gbẹ́rẹ́ ẹ́gẹ́rẹ́ sọ pa o ḅẹgha. Sịbịdáapụ ma nnị ibima dugho pẹ́lẹ́ma ḅẹẹ ori anịị Krais ma? 27Kụ́ma wánimim mịị owitụ́wọ ma saghị ḅo ngá; Krais ma ḅo bẹ sáá, gbẹ́rẹ́ḅọ sọ nimibịghaa ọ sághị ḅo bẹ ngá.>>

28Anịsáa ma ḅụ Jizọs pa nyẹ́diearị sáá Tamunoopuwarị ẹpẹlẹ ma bie, ọ kụrọ pụghọ pa ilúghú pághámam, <<Innh, ọmịnị ị nimim ọ pịghị nimim a saghị ḅo ngá. Kụ́ma a ị́yẹ́ kụ́rọ pa mịnga fịnịgha, i fịrịmaḅọ ma ori anịị karakárányẹ mịẹmịẹ ḅọ. Ọmịnị o nimigha, 29kụ́ma ịrị o nimim, tegó a ọ ḅara saghịḅom. Ori pịghị i fịrịmam.>>

30Nnị warị asọ dọghụ nnị oku bẹ ḅara, kụ́ma gbẹ́rẹ́ḅọ sọ ine ḅara pa ọ lamagha tegó ori sáá na laagha. 31Anịsọ, tọghaapụ túminị́ kpo ma ḅụ nna minini pa ọ ḅụ gbánām. Nnị dughom ḅẹẹ, <<Krais ma ḅo sáá, o ḅụ́gbérépuma fịrị nwángị mịị owitụ́wọ ma nẹ́ngị bẹ?>>

32Farisiiapụ ma túminị́ kpo ma nam n tere pụghọ pa Krais gbolomanyẹ dughoarị sáá. Anịsáa igwagwaalaapụ ma na Farisiiapụ warị Tamunoopuwarị kúrúapụ fịrịma ḅẹẹ nnị o kuu.

33Jizọs dughom, <<Kálá sáá tụwọ anịị a pa ọmịnị na fịnị bẹnyẹ, anịsáa a so i fịrịmaḅọ ma dámámubẹm. 34Ọmịnị i dọghụbẹm, kụ́ma ọmịnị ị́yẹ́ arịbịgha; a pịghị fịnị angaá ọmịnị ine ḅobịgha.>>

35Juuapụ ma jụghọ jụghọ ḅẹm, <<Mịị owitụ́wọ ma ọ tẹ́ angaá muu dọghụ, wamịnị ine ori arịbịghaa ngaa? O Giriki opu ama muu bẹ wámịna túminị́ ngá angaá sị nyẹ pa Girikiapụ ma die? 36Ọ tẹ́ dughoarị ọ ḅẹẹ sáá ḅẹẹ, <Ọmịnị i dọghụbẹm kụ́ma ọmịnị ị́yẹ́ arịbịgha,> ḅẹẹ, a fịnịnga ọ pịghị ine ḅobịgha?>>

37Álálị ma kunema éné pịghị dụḅaḅá éné ma, Jizọs sẹ́fịnịm sị opu pụghọ pa ẹ́gẹ́rẹ́m, <<Pụghọ sámụ́nọ ḅo gonyẹ́ gonyẹ́, i damaḅo sị ḅuu. 38Ịḅụ minini ḅo gonyẹ́ gonyẹ́ tọ́ndiri ma dugho maá ḅara ma, o ḅụbie ḅọ́rọ́ anịị duma pịrị okolo mingi saghị sara págháḅo bẹnyẹ.>> 39Tẹ́mẹ́ ma anịị ọ ḅẹarị nyẹ ọ ḅụ mininiapụ ma nyáná ḅo bẹnyẹ ọḅụkụ́nọma. Akị ḅo anịsáa ma láa Tamuno na ori Tẹ́mẹ́ ma pịrịgha tegó Jizọs na ori ipine bie sọgha.

40Nnị ori ẹ́gẹ́rẹ́ náa sáá, túminị́ ma ḅụ jẹ́apụ dughom ḅẹ́, <<Karakárányẹ mịị owitụ́wọ ma ori anịị wa tọ́rụ́dighiarị ikiakoroḅọ ma.>>

41Jẹ́apụ ḅẹm, <<Ori anịị Krais ma.>>

Jẹ́apụ pịghị pa gbilam, <<Krais ma ọ tọ́rọ pa Galili ḅụ saghị ḅo bẹ? 42Tọ́ntọ́ diri ma anị dughogha mọ ḅẹẹ, Krais ma Deviti furo Bẹtịlịhẹm ḅụ anịị ọ saghị ḅo bẹnyẹ, Deviti ngá ama ama ḅụ.>> 43Puama warị ḅo túminị́ ma ogbobie sọ Jizọs gosi. 44Jẹ́apụ dọ́ghụm nnị oku, kuma gbẹ́rẹ́ḅọ sọ ḅara pa ọ lamagha.

Juu Sịbịdaapụ Ma Krais Ḅụ Mininigha

45Kunema Tamunoopuwárị ma kúrúapụ pịghịma igwagwaalaapụ ma na Farisiiapụ ma dámámuu, n gbilaapụ ḅẹẹ, <<O tegó ori akuoo ḅogha?>>

46Tamunoopuwárị kúrúapụ ma warị dugho págháma, <<Gbẹ́rẹ́ḅọ sọ jẹ́ éné na ẹ́gẹ́rẹ́kogha mị owitụ́wọ ma ẹ́gẹ́rẹ́kọ ḅara.>>

47Farisiiapụ ma warị sima nnị gbíla, <<Ọmịnị ma ọ pịghị oḅori pa ọ sima?>> 48Jẹ́ éné ọmịnị árị ma gbẹ́rẹ́ Farisiiḅọ anịgha táarịapụ ma ḅụ gbẹ́rẹ́ḅọ ọḅụ mịnị máaḅọ? 49Errnh Errnh! Kụ́ma mịị túminị́ kpo ma ḅẹnyẹ ḅẹnyẹ nímighaapụ Mosis ologho ma ḅụ si fị́lā nna sịbị gbánām. 50Nikodimọs ori Farisiiapụ ma ḅụ gbẹ́rẹ́ḅọ, parị sáá Jizọs dámámuu máaḅọ, n ḅẹm. 51<<Wámịna ologho anị kị́nị́ sịbị ḅẹ́rẹ́pẹ́lẹ́ bẹ na anị tarị n ḅọ bịpị naagha pa sị nimi ḅoo tumḅọ ma mịẹnyẹ?>>

52Nnị ọ pagharam, <<Ịrịsọ ị Galili ḅụ saghị ḅoo? Tọ́ndiri ma bie dighi ị pịghị dọghụ pághámaḅobẹm ḅẹẹ ikiakoroḅọ Galili ḅụ saghị págháḅobịgha.#7.52 Áyá sáapụ parị gịẹnyẹ ma, Jọn 7.53--8.1 anị bie ofori.>>

53Anịsáa ọ́rụ́ḅọ ọ́rụ́ḅọ wáriso nna wárị muu.

Currently Selected:

Jọn 7: IBY

Highlight

Copy