Luk 11

Jizọs Dienyẹ Tẹ́ghẹ̄ Ḅụ

(Mat 6.9-13; 7.7-11)

1Gbẹ́rẹ́ éné Jizọs tẹ́ghẹ́arị gbẹ́rẹ́ ngaa. O tẹ́ghẹ̄ faáma sáá, ori ọḅụdua gbẹ́rẹ́ḅọ warị ọ ḅẹẹ, <<Kị́nị́nyánáḅọ, wa die, wa tẹ́ghẹ̄, Jọn sọ pa ori ọḅụduaapụ die ḅara.>>

2Jizọs warị ḅẹẹ, <<Ọ tẹ́ghẹ̄ bẹ sáá, mị ḅara ḅẹẹ,

<< <Daa, Ị́yẹ́ Ẹ́rẹ Tọ́ntọ́ ḅụ fịnị,

Ị́yẹ́ ásẹ́mẹ́kiri ḅoo.

3Éné, éné ḅụ wa bi

fị́nyẹ pa wa pịrị.

4Wamịna sii ḅụ ḅárási wa pịrị.

Wamịnị sọ siiḅụḅarasi siinyẹ pa

wa mịẹapụ pịrịarị ḅara.

Wa daa pa daádighi bie suama.> >>

5Jizọs warị ori ọḅụduaapụ ḅẹẹ, <<Ḅọ́rọ́ ḅẹẹ ọmịna ḅụ gbẹ́rẹ́ḅọ amịna nángwọ warị múm dii ogbo warị ḅẹẹ i nángwọ, <A ị ḅara tẹ́rẹ́ a fịtúrú kpo ḅọlọ, 6ḅẹ i nángwọ gbẹ́rẹ́ḅọ nyẹ muuḅọ i wárị ḅom a pịghị gbẹ́rẹ́ fị́nyẹ mgbọ́lụ nyanagha a pa ọ pịrịbẹnyẹ.> 7Ḅọ́rọ́ ị nángwọ ma biebẹ saghị ị pagharaa ọkụ́ma ḅẹẹ, <Ḅụḅáláḅálá pa ị pịrịma. Ḅụ́pọ́ ikasịmam, ịrị na ị́yẹ́ awọ sọ wa múnonyẹ ọ́gọ́nọ tándịmam. A ine saghị sị ḅẹnyẹ ḅẹnyẹ pa ị pịrịbịgha.> 8A dugho ị pịrịm, karakárányẹ ḅẹẹ, ọ mini saghị sị ḅẹnyẹ ḅẹnyẹ pa ọ pịrịbịgha ḅẹẹ nnị mmẹapụ ọ nángwọ́apụ gosi, kụ́ma ọ saghị sị o binyẹ mamgba pa ọ pịrịbẹm, tegó ọ ḅụgịrịrịgha o gbíla, pịghị o gbíla ḅarị gbíla ma ḅụ.

9<<Anịgosi a i ḅẹm: gbíla, ị pịghị nyánáḅobẹm; dọghụ, ị pịghị dọghụḅobẹm; gbolo, ḅụ́pọ́ ma findi ị pịrịbẹm. 10Gbilaḅọ nyánáḅobẹm; dọghụḅọ pịghị dọghụḅobẹm; ḅụ́pọ́ ma pịghị findi gboloḅọ gonyẹ́ gonyẹ́ pịrịbẹm.

11<<Ọmịna bie gbẹ́rẹ́ Daḅọ imii ododó pa amịna tụwọ pịrịbẹḅọ tụwọ ma nji bi ngaa? 12Anịgha ododobiriḅọ pa ọ pịrị ori anyị bi ngaa. 13Ḅọ́rọ́ ọmịnị sii láa ḅara pa siiapụ nimim ọ mịnị ibinyẹ pa ọmịnị awọ pịrị ḅara, ọmịna sobie Daḅọ ma anịị ori Tọ́ntọ́ Tẹ́mẹ́ pa ọ ḅara biapụ pịrịbịgha ḅọ?>>

Túminị́ Dughom Ḅẹẹ Jizọs Belizibọlụ Kụ́rọ Pa Fịrịnwangịm

(Mat 12.22-30; Mak 3.20-27)

14Gbẹ́rẹ́ sáá, Jizọs oḅuu sitẹ́mẹ́ deesim gbẹ́rẹ́ owitụ́wọ ḅụ, sitẹ́mẹ́ ma ọ ḅụ soo sáá, ọ warị saghị ẹ́gẹ́rẹ́. Anị warị ḅo túminị́ kpo ma ḅụ́gbérépuma. 15Kụ́ma jẹ́apụ ḅẹm ḅẹẹ, <<Bẹlizibọlụ, sitẹ́mẹ́ sịbịdáḅọ anịị kụrọ́ ma pa ọ pịrị sị ori ine pa sitẹ́mẹ́ deesiarị nyẹ.>> 16Jẹ́apụ ọ daádighim sị o gbíla ḅẹẹ, o sobie saghị ḅo ilíghíma pa n die.

17Kụ́ma Jizọs nimim n koromáarịnyẹ, ọ warị n ḅẹ́ ḅẹẹ, <<Puama nyáná sẹ́kiri ine sẹbịgha, puama fịnị wárịbie bịghịkoro korobẹm. 18Anịgo ḅọ́rọ́ Satanị amadakiri ma puama nyánam, anị tọ́rọ́pa sẹ bẹ? A mịma dughom tegó ọ ḅẹm ḅẹẹ, Bẹlizibọlụ kụ́rọ anị a pa sitẹ́mẹ́ deesiarị nyẹ. 19Mị́sa a ḅọ́rọ́ Bẹlizibọlụ kụ́rọ pa sitẹ́mẹ́ deesiarị, ọmịna ọḅụduaapụ n tụwọ pa anị deesiarị? Anịgo nnị ọmịna ḅẹ́rẹ́kọapụ sọ́bẹm. 20Kụ́ma ḅọ́rọ́ Tamuno kụ́rọ anịị a pa sitẹ́mẹ́ deesiarị nyẹ, mịma pịghị dugho ọ pịrịarị ḅẹ́ Tamuno Ásẹ́mẹ́kiri ma ḅoo ọ fịnịnga lámam.

21<<Kụ́rọ tumḅọ ori ọmụ́nányẹ mamgba pa ọ warị kúru sáá ori ngọ kokobẹm. 22Kụ́ma kụrọ ọ nẹngịḅọ ḅọ owu pa ọ pághámá sị o sọḅamaẹrẹ ori obie kụ́rọ́máarị ọmụ́nányẹ mamgba taaki sọ́bẹm, sị ori ngọ akị sị anị die gálágáláma.

23<<Iju ḅụ oforighaḅọ ọ́ ị́yẹ́ iruonaḅọ; ḅárásua i pịrị sị kubirighaḅọ, n ḅọ karakáráma gálágaláarị.

Sitẹ́mẹ́ Pịghịma Ḅoo

(Mat 12.43-45)

24<<Sitẹ́mẹ́ kị́nị́ ḅụ warịsomaẹrẹ anị sámụ́nọ́ ngá ḅụ ikelekelebẹm ịnyọ́sárá angaá dọghụ. Anị ine dọghụḅogha ḅogha, anị anị ḅụ ḅẹbẹm, <A sima sọọ a sághị ḅọ warị muubẹm.> 25Anị ḅo sáá, anị warị ma árịbẹm nnị anị ọfị fiafiama ḅara pịghị nyẹ gonyẹ́ gonyẹ́ tẹ́lẹ́ma warị. 26Anị anịsáa soobẹm sị muu jẹ́ sọ́nọ́ma sitẹ́mẹ́ akị anị ḅụ suabẹm, sịbịkụ́rọ anị nẹngịnyẹ́, nnị ḅo anịḅọ ma bie ngáabẹm, nyẹ gonyẹ́ gonyẹ́ ḅọ́rọ́ so sa, tumḅọ ma fịnị ḅara mị́sa siḅa parị ma nẹ́ngịbẹm.>>

27Jizọs mịma dugho sáá, anịị gbẹ́rẹ́ ọ́rụ́ḅọ túminị́ kpo ma bie ilúghú págháma nyẹ ḅẹẹ, <<Karịiḅi fịnị i yii sị pịghị ndo pa ị pịrị nyingiḅọ pịrị.>> 28Jizọs pagharam ḅẹẹ, <<Tụ́ma Karịiḅi fịnị Tamuno ẹ́gẹ́rẹ ma náa sị pịghị anị dughonyẹ mịẹapụ pịrị.>>

Jizọs Mini Ilíghíma Pịrịgha

(Mat 12.38-42)

29Túminị́ kpo ma Jizọs gbiriikélékele ḅara, ọ warị ḅo saghị dugho ḅẹẹ, <<Dighi mị ḅụ́ọ́apụ ma sii ḅara, n ḅụ́gbérépuma ilíghíma nyẹ bim, kụ́ma n gbẹ́rẹ́nyẹ sọ pa n pịrịbịgha, tụ́ma Jona ilíghíma nyẹ anịị n nyáná bẹnyẹ. 30Jona ilíghíma sọọ Niniveapụ pịrị ḅara anịị Tumḅọ yii Tụwọ ma pịghị ilíghíma sọọ mịị ḅụ́ọ́apụ pịrịbẹ ḅara. 31Ḅẹ́rẹ́kọ éné ma, Seba Ámányáná ọ́rụ́ḅọ saghịbẹm sị onyẹ́sẹ mị ḅụ́ọ́apụ ma pịrịbẹm, sị pịghị ḅẹ́rẹ́ pa nna ḅarasima, tegó árị árẹ ama opuma ḅọlọanga ḅụ saghịḅom, ḅẹẹ a ḅo Solomọn níminyẹ ma pughu. A dugho ọ pịrịm mịnga Solomọn nẹngịḅọ imii. 32Ḅẹ́rẹ́kọ éné ma ḅụ Niniveapụ saghịbẹm sị onyẹsẹ́ mị ḅụ́ọ́apụ ma pịrịbẹm, sị pịghị ḅẹ́rẹ́ pa nna ḅarasima, tegó, nnị n Jona dugho págháma Tamunoẹ́gẹ́rẹ́ ma náa sáá nnị nna sii ḅụ pighim, kụ́ma a kụ́rọ́ma dugho ọ pịrịarị ḅẹ́ mịnga Jona nẹngịḅọ imii.>>

Oju Ma Tọndọ

(Mat 5.15; 6.22,23)

33<<Gbẹ́rẹ́ḅọ sọ tọndọ tọndi tọ́ndigha sị anị pa ḅọghu angaá warị anịgha anị pa bọlị sughubie warị, tụ́ma n pa tọndọ gbana gbananyẹ ọ́gọ́nọ gbánabẹm sị túminị́ anị árị bẹ ḅara n somumaẹrẹ. 34Ọmịna tọ́rụ́ anịị ọmịna oju ma tọndọ, ị tọ́rụ ḅuruḅurugha nḅẹḅẹ́ ị́yẹ́ oju gbọrụ baá anị ḅụ bim, kụ́ma, ḅọ́rọ́ ị tọ́rụ́ ḅuruḅuru nḅẹḅẹ́ ị́yẹ́ oju gbọ́rụ́ kánákáná ḅụ fịnịbẹm. 35Árị ḅẹẹ ị́yẹ́ oju fịnị baá ma kánákáná sọgha. 36Ḅọ́rọ́ baá ị́yẹ́ oju gbọrụ ḅụ bim, sị gbẹ́rẹ́ ngaa sọ kánákáná ḅụ ofori, anịsáa baá biabẹm ngámámgba ḅụ, n tọndọ tọndi sị anị baá pa ngámámgba pịrị pịrị ḅara ị́yẹ́ oju gbọrụ ḅụ.>>

Jizọs Ḅẹ́rẹ́ Pa Farisii Na Ólóghó Nyẹ́dieapụ Ḅara Simam

(Mat 23.1-36; Mak 12.38-40)

37Jizọs ẹ́gẹ́rẹ́kọọ fama sa gbẹ́rẹ́kiri, Farisiiḅọ ọ sịm ḅẹ́ o ḅo ọ wárị nyẹ́fị, o warị somuu kpọrọfịnị sị nyẹ́fịdọghum. 38Farisiiḅọ ma anị ọ ḅụ́gbérépumam ḅẹẹ Jizọs na ḅara sịrịgha pa nyẹ́fịdọghum.

39Kị́nị́nyánáḅọ warị ọ ḅẹẹ, <<Mị́sa ọ mịnị Farisiiapụ ọmịna mingi ḅụ ọmọngọ kuku na nyẹ́fị ẹ́fẹ́rẹ́ kuku sịrịbẹm kụ́ma ọmịna bie opu tọ́rụ na siiamịẹnyẹ anịị bii nyẹ. 40Oḅoriapụ! Kuku ma tẹ́mẹ́ Tamuno ori sọ pịghị bie ma tẹ́mẹ́gha? 41Kụ́ma ị́yẹ́ ọmọngọ na ị́yẹ́ Ẹ́fẹ́rẹ́ bie fịnịnyẹ pa igonyiapụ pịrị, anịsa nyẹ gonyẹ́ gonyẹ́ Tamuno toruku fíafía ọ pịrịbẹm.

42<<Anị siḅaá ọ pịrịbẹm, ọmịnị Farisiiapụ, ọ pa Tamuno pịrịm oyia ngaa die, gbẹ́rẹ́ angaá ọ pa fụlọ sọ ḅẹ́lẹ́maarị pẹdiri, minti na pịghị rue na pịghị tọ́rụ́kịrịkị́rị́ pẹdiri, kụ́ma ọ karakárá ḅẹ́rẹ́kọọ dighi tọ́rụ́sim, na pịghị Tamun ḅẹlẹma, anịmanakaragha ọ karakárá ḅẹ́rẹ́kọọ, Tamuno ḅẹlẹma, ọ nyánányẹ pa oyia ngaa die gbẹ́rẹ́ angaá pa Tamuno pịrị.

43<<Anị siḅaá ọ pịrịbẹm Farisiiapụ! Ọ toruku n warị ịkasị ma ḅẹ́lẹ́mam Juuapụ kobiri yọ ma ḅụ, pịghị dọghụ ḅẹ́ nnị osigha ḅara pa o kule fẹ́siri ḅụ. 44Anị siḅaá ọ pịrịbẹm, ilíghíma suagha dupu fịnị ḅara anịị ọ fịnị ḅara túminị́ nimigha pa nánga ḅọ́rọ́arị.>>

45Gbẹ́rẹ́ ólóghó Nyẹ́dieḅọ, warị ọ ḅẹẹ, <<Nyẹ́dieḅọ ị mịma dugho sa i wamịnị sọ wọlọarị.>>

46Jizọs ọ pagharam, ḅẹẹ, <<Anị siḅáá ọ pịrịbẹm ólóghó ma diearịapụ. O nyẹ pa túminị́ kuku gbánāarị, opuma iku sị nnị ine dighibịgha nyẹ, kụma ọmịnị ọ gbẹ́rẹ́ ḅara tụmgbọlụ sọ pámáḅobịgha sị pa ḅárásua n pịrị.

47<<Anị si ḅá ọ pịrịbẹm, o fíafía dupu mịẹ ikiakoroapụ ma pịrịm ọmịna tádọ́apụ ḅá gbẹ́rẹ́ ikiakoroapụ ma. 48Mị ḅara ma, ọmịnị sọ kọkọ miniakị ḅẹẹ ọmịna tádọ́apụ mịẹnyẹ ma anị ọ ḅụ ḅẹlẹm; nnị ikiakoroapụ ma ḅám, ọ warị dupu tẹ́mẹ́ n pịrị. 49Mịma go Tamuno ori níminyẹ ḅụ dughom ḅẹẹ, <A ikiakoroapụ na nfịrịmaapụ pa n nfịrịmabẹm, n jẹ́apụ ḅaabẹm pịghị jẹ́apụ pa tọ́rụ́siarịma.> 50Anịgo ọmịnị mị́sa ḅụ́ọ́apụ ma ikiakoroapụ ma ọmbịnyẹ́ nnị ọsụụ nyẹ ma tuminikiri saghị sáá éné éné ḅoo mịmgba éné láa, n pa ọmịna sịbị sẹ́bẹm. 51Ebẹl n ḅáḅọ akị muu Zakaraya láa, n ḅáḅọ agba mịẹ yọ ma na Tọ́ntọ́ yọ ma ogboku. Innh, a dugho ọ pịrịm, mịsaapụ ma anị tọ́rụ́siarị mamgba árịbẹm.

52<<Anị siḅaá ọ pịrịbẹm, ọmịnị ólóghó ma dieapụ, o níminyẹ wárị ḅụ́pọ́ igodo findinyẹ ma ọlọm, kụ́ma ọmịna ḅụgbọrụ o somubịgha, ọ pịghị sọbiapụ daa sẹ́mam.>>

53Jizọs anị angaá ma warị so sáá, ólóghó nyẹ́dieapụ na Farisiiapụ warị saghị bieakụ ḅara pa ọ daa pághám, warị tọ́rụ́kịrịkị́rị́ nyẹ pa o gbíla, 54si pa diatughu ọ pịrị si okóró, si nnị anịma pa ḅara ọlọ ḅẹẹ, mịị o dugho irima nyẹ.

Currently Selected:

Luk 11: IBY

Highlight

Copy