Luk 12

Mmẹẹ́ Tọ́rụ́ Agidi Gboloma Birinụ́nụ́

(Mat 10.26,27)

1Anịsáa ma ḅụ, tọgha túminị́ ḅó kobirịarị sị pịghị jụghọ jụghọ nángáarị anịị Jizọs parị dugho ori ọḅụduaapụ pịrị nyẹ́ ḅẹẹ, <<Ọmịnị ọ́ḅụ ẹḅịị Farisiiapụ ma fịtúrú sughumaarị mịẹnyẹ ḅụ anịị dughonyẹ kịrị mịẹnyẹ kịrị. 2Túminị́ gbẹ́ẹ̄ wárịnyẹ gonyẹ́ gonyẹ́ n findibẹm ḅọghunyẹ gonyẹ́ gonyẹ́ ḅo pághábẹm. 3Anị gó ị́ kánákáná ḅụ dughonyẹ gonyẹ́ gonyẹ́ baá ḅụ nnị anị naábẹm. Wárịbie ị́ kálá pụghọ pá dughonyẹ mamgbá, wárị ósú ọ́gọ́nọ nnị anị pa ilúghubẹm.

4<<A dugho ọ pịrịm ị́yẹ́ nángwọ́apụ ḅẹẹ ọmịnị ojumẹnị ḅáapụ ma dighi ḅáláfáma, ine anị nẹ́ngị nyẹ miẹbịghaapụ anịma ḅọ́rọ́ sa. 5A pa o diebẹm o dighi ḅáláfa bẹḅọ: anịḅọ ma dighi ḅáláfa, ori ojumẹnị ma ḅáfáma sa ọ pịghị kụrọ nyánam sị o gbi pa ẹ́kpẹ́duaama bie sua. Innh, a dugho ọ pịrịm, o dighi ḅáláfaa. 6Nnị koko sọ́nọ́á ẹ́kpẹ́ngbe káláfịnị pá mmẹẹ́ pẹ́nị dẹrịarị, kụ́ma Tamuno gbẹ́rẹ́nyẹ sọ́ pá bieḅárámá ḅárámágha. 7I sịbị fịnị sịbị numo sọ nnị anị kịẹ fámam. Anị gó ḅáláfama! Ọ nyẹ́la tọgha ẹ́kpẹ́ngbe káláfịnị nẹngịm.

Krais Sịghịị Anịgha Dugho Págháma Ḅẹ Ịrị Ori Ju Imii

(Mat 10.32,33; 12.32; 10.19,20)

8<<Dighi a dugho kụ́rọ́ma ọ́ pịrị, túminị́ ogbo i dugho pághámaḅo gonyẹ́ gonyẹ́ ḅẹẹ ori i juu ímii, Tumḅọ yii Tụ́wọ pịghị Tamuno sookumuapụ fịnị ngaa anị ḅoo gbólómanyẹ dughobẹm. 9Kụ́ma túminị́ ogbo ị sịghị ḅọ́ gonyẹ́ gonyẹ́, Tumḅọ yii Tụwọ pịghị Tamuno sookumuapụ fịnị ngaa anị ḅoo sịghịbẹm. 10Tumḅọ yii Tụ́wọ ma fie íríma ḅo gonyẹ́ gonyẹ́, nnị anị warịsó n ḅọ pịribẹm, kụ́ma Tọ́ntọ́ Tẹ́mẹ́ ma fiesima ḅọ gonyẹ́ gonyẹ́ nnị sii wáriso n ḅọ pịrịbịgha.

11<<Nnị ọ́ táa pá Juuapụ kobiri yọ ma muu nḅẹḅẹ́ anịgha ḅẹ́rẹ́tọapụ ma ná ámátáapụ má ógbóo, ọ́ ḅáláfáma ọ́ tọ́rọ́ pá ḅụ fọ́nyá bẹ́ anịgha ọ́ tọrọ́ pá ẹ́gẹ́rẹ́ bẹ́, 12anịsáa ma ḅụ Tọ́ntọ́ Tẹ́mẹ́ ma ọ́ dugho bẹ́ nyẹ́ pá ọ́ pịrịbẹm.>>

Oḅorisọ Ngọ́nyánáḅọ Kaḅụ

13Gbẹ́rẹ́ owitụ́wọ warị túminị́ ma ógbo bie Jizọs ḅẹẹ, <<Nyẹ́dieḅọ, páisisi dugho ịnumboru owitụ́wọ pịrịị ḅẹẹ, wámịna daá wáriso wa pịrị ngọ sị fịị, ori anị ḅụ ị́yẹ́ diekiri pá i pịrịị.>>

14Jizọs warị ọ́ pagharaa ḅẹẹ, <<I nángwọ, tụọ kụrọ pá i pịrị ḅẹẹ a ḅó ḅẹ́rẹ́kọḅọ sọọ ọmịna ogbobie? Anịgha ngọ dieḅọ ọmịnị ogbobie.>> 15Ọ warị pịghị túminị́ ma ḅẹ́, <<Ọmịnị ọ tọ́rụ findi! Ọmịnị ọ ḅụ ẹbị ngéré fị duma pịrị, tumḅọ duma ma n pa anị mịẹnyẹ tumḅọ nyáná ngọ mamgbagha.>>

16Anịị Jizọs mịị kaḅụ ma kọọ nnị pịrịnyẹẹ: <<Gbẹ́rẹ́ ópu tumḅọ duakiri kiri tọgha fị́nyẹ suam. 17Owitụ́wọ ma warị dugho ọ ḅụ pịrị ḅẹẹ, <Sọm a mịẹbẹ ḅárá? A yọ nyánágha a dua ḅụ ḅo nyẹ warị bẹ angaá.> 18Mị́sa a nimim a mịẹbẹnyẹ ori ọkọ dugho ọ ḅụ pịrịm, <A iyẹ fị́nyẹ kokowarị ma kabẹm sị dụḅa anị nẹngịnyẹ́ namabẹm anịma bie anịị a iyẹ sịmgbọlụ mamgba koko bẹnyẹ na pịghị iyẹ jẹa ngọ. 19Anịsáa a ịḅụ ḅẹbẹm ḅẹ́: <<Í mánámāná fị́nyẹ kokowarị ị́ ḅụ pịrịmam ine tọgha kụ́rá ḅụ ị́yẹ́ akịị ḅẹnyẹ anịgo ịnyọ́sárá, saghị fị́nyẹ fị, iru ḅuu sị ḅụ tii.>> >

20<<Kụ́ma Tamuno warị ọ ḅẹẹ, <Ḅẹ́ oḅoriḅọ! Mịị dii ị́yẹ́ duma kunemabẹm. Tụwọ warị ị koko ịḅụ pịrịnyẹ mamgba nyáná bẹ?>

21<<Mịị anị fịnị ngọ koko nna ḅụ pịrịarịapụ fịnị ḅara kụ́ma Tamuno toruku n ḅẹnyẹ ḅẹnyẹ nyanagha.>>

Ḅụḅáláḅálá Pa Ḅụ Pịrị Dienyẹ

(Mat 6.25-34)

22Jizọs warị dugho ori ọḅụduaapụ pịrị ḅẹẹ, <<Ọ́ ḅụḅáláḅálá pa ọmịna duma pịrịma, ḅẹẹ a tẹ́ fị bẹ, anịgha ọmịna oju gbolomanyẹ ḅẹẹ, a tẹ́ bịtẹ sua ḅẹ́? 23Duma ma nyẹ́la fị́nyẹ nẹngịm oju ma pịghị nyẹ́la bịtẹ nẹngịm. 24O fíní ḅụ nyẹ́ dáwọ́ọ: nnị duakiri nyẹ́ dipighaa, pịghị súghúghá, nnị pịghị dua ḅụ ḅọ fị́nyẹ na jẹ́ fị́nyẹ kokowarị nyánágha kụ́ma Tamuno nnị siḅearị. Ọ kpọma nyẹ́la fíní nẹngịm! 25Tụọ ine gbẹ́rẹ́ kálá sáátụọ ḅụ amịna duma nángwọ́ma bẹ, ḅụḅáláḅálá pa n ḅọ ḅụ pịrịarị angaá. 26Ị́ ine mịị gbẹ́rẹ́ ịrụ nyẹ ma mịẹbịgha sáá, ị tẹ́ gó ḅụḅáláḅálá pá ị́ ḅụ pịrịarị jẹ́ nyẹ́ ḅụ.

27<<Ngóngó ma dighi, dighi anị sẹ́nịarị ḅara. N fịrịnwangịgha, n bịtẹ dorigha. Kụ́ma a dugho ọ́ pịrịarị ḅẹẹ Ámányáná Solomọn sọ́ nyáná ngọ mamgba ḅụ, ine ḅụ́birimaghaa gbẹ́rẹ́ ngóngó ma ḅụ́birima ḅara. 28Ḅọ́rọ́ mịị ḅara ma anịị Tamuno nụ́ngọbie fịnị osuka ma birimaarị ḅara, mịmgba ọmịnị anị arịm, ḅáā ọmịnị anị pa fịnịbie gbi suam, ọ sịgha ḅẹẹ o mịma nẹ́ngịma ḅara pa o birimabẹm. Ọmịnị minini ịrụapụ. 29Mịnị sámámgba i fịị bẹnyẹ na ị ḅuu bẹnyẹ kura kọọma. Anị ḅáláḅálá pá ị́ ḅụ pịrịma. 30Mịma anịị Tamuno nímighaapụ ḅụ ḅá pịrịarị. Kụ́ma ọmịna Daa nimim ḅẹẹ ọmịna nyẹ ma biim. 31Anịị go parị Tamuno Ásẹ́mẹ́kiri ma dọghụ, anịsáa mịnanyẹ mamgba ọmịna nyẹ soobẹm.

Sobie Ngọ

(Mat 6.19-21)

32<<Ọmịnị kálá ogbo ánáná, o ḅáláfáma Daḅọ ma, anị ọ ḅụḅẹ́lẹm ḅẹẹ ori ásẹ́mẹ́kiri ma pa ọ pịrị. 33Ọmịna nyánányẹ mamgba dẹrị sị igbii ma pa igonyiapụ pịrị, ọmịnị anị ḅụ ḅọ́rọ́ olombịgha igbii sua akpa nyáná ọ ḅụ pịrị, pịghị sobie fabịgha ngọ nyáná bẹ ḅara, furuapụ anịgha ọbịọ fị́nyẹ kikia ḅobịghaa ngaa. 34Tegó ị́yẹ́ ngọ fịnị ngá gonyẹ́ gonyẹ́ anịị ị́ kúkúbie sọ fịnị bẹ ngaa.

Asọ Kúru Ómóniapụ Kaḅụ

35<<Bịtẹ sua sị ḅụ karakáráma fịrị pịrịị sị mịẹsị ị́yẹ́ tọndọ sáá mamgba kọrị, 36sọ́ḅọ́rọ́ fịnị nna nyánáḅọ kuruarị ómóniapụ ọ yaa siri sọḅoarịị sáá o gbolo kirikiri n findi ọ pịrịbẹ ḅara. 37Anị ibi anị ómóniapụ ma pịrịbẹm ḅẹẹ nna nyánáḅọ ḅo sáá ori nnị árịbẹm ḅẹẹ, nnị ḅụ karakáráma o kuruarị. A karakárányẹ dugho ọ́ pịrịarị nna nyánáḅọ ma ọḅụ dimabẹm, n mịẹsị nnị nyẹ́fị ịkasị ọ́gọ́nọ kpọrọfịnị si ọ fị́nyẹ pa n pịrị. 38Anị kpọma ibi omoniapụ ma pịrịbẹm ḅẹẹ nna nyánáḅọ ḅọ́ sáá gonyẹ́ gonyẹ́, dii anịgha ḅáá sọ́, ori nnị árịbẹm ḅẹ́ nnị kuruarị. 39Kụ́ma mịma akanyaḅo: ḅọ́rọ́ warị nyánáḅọ nimi fúrúḅọ ma ḅo bẹ sáá ori asọ pụmabẹm sị minibịgha ori o warị fomká sị anị sọọ. 40Ọmịnị so tẹ́lẹ́mabẹm, tegó Tumḅọ yii Tụ́wọ ma ḅobẹm ọ tọ́rụ́ pa o dighigha sáá.>>

Ḅụ Tẹ́mẹ́gbáná Omoniḅọ Anịgha Ḅụ Tẹ́mẹ́gbánágha Omoniḅọ

(Mat 24.45-51)

41Pita warị ọ gbíla, <<Kị́nị́nyánáḅọ mịị kaḅụ ma, i kọọ wamịnị ngéré pịrịarị múno sị ị kọọ kị́nị́mamgba pịrịarị?>>

42Kị́nị́nyánáḅọ ma pagharam ḅẹẹ, <<Tụwọ mị́sa nyẹ pa nyẹ́sị pịghị nyẹ́nimi ọrụtọḅọ, amịna nyánáḅọ ómóniapụ ma pa ḅárásua bẹḅọ, sị anị karakárá sáá, ori n la diekiri fị́nyẹ pa n pịrị? 43Karịiḅi fịnị ómóniḅọ ma pịrịm, amịna nyánáḅọ ḅọ láa sáá ori n ḅo arịm amịna fịrị nwángịarị. 44A karakárányẹ ma dugho ọ pịrịm, ori nyánáḅọ ori nyánányẹ mamgba pa ọ ḅarabie suabẹm. 45Kụ́ma omoniḅọ ma warị dugho ọ ḅụ pị́rị́ ọkụ́ma ḅẹ, ọ nyánáḅọ álála ḅobighaa, warị sághị ọ jẹa ómóniapụ owiapụ ná ẹ́rẹ́ámáapụ ma kuu fómú, warị pịghị sághị fị́nyẹ fị pịghị iru ḅuu tọ́rụ́ḅáma, 46anịsáa ọ nyanaḅọ ma tọ́rụ́ dighigha éné ḅụ buapághá ḅara pá ḅobẹm, ómóniḅọ ma sọ́ nimibịghaa sa ḅụ. Anịsáa ma ḅụ nnị tụ́ma ḅárá pá omoniḅọ ma pẹ́lẹ́kọsịmabẹm sị diekiri pa ọ pịrị minighaapụ ma ogbobie.

47<<Nimi ómóniḅọ fịnị fịnịị ḅẹẹ mịị ọ nyánáḅọ dọghụ nyẹẹ si o mịẹ, kụ́ma ḅụ tẹ́lẹ́ma sị anị mịẹgha ḅoo, anịgha ori nyánáḅọ dọghụnyẹ mịẹgha nnị tọgha kụrọ ḅara pa anị ḅoo ma fomubẹm. 48Kụ́ma nimigha ómóniḅọ ḅẹẹ mịị ọ nyanaḅọ dọghụ nyẹẹ sị ọ mịẹ, sị pịghị fomu ḅara gbẹ́ẹnyẹ mịẹ ḅọ́ ma, nnị kálá ḅara pa ọ fomubẹm. Nnị opunyẹ pa pịrị ḅo gonyẹ́ gonyẹ́ nnị anịḅọ ḅara opunyẹ biibẹm; nnị pịghị mánámāná nyẹ pa pịrịḅọ gonyẹ́ gonyẹ́ nnị anịḅọ ḅara mánámāná nyẹ biibẹm.

Jizọs Puama Akuom, Diingha

(Mat 10.34-36)

49<<A ḅo mịị tuminikiri fịnị tọndi dọ́ghụm; anị i bieḅẹ́lẹ́mabẹm ḅọ́rọ́ anị saghị kọrịmam! 50A gbẹ́rẹ́ mingi sara nyánam a sara bẹnyẹ, anịgo a anịị pụ́nụ́ma ḅara pá akụ ma dabẹm sị anị ḅo ḅọ́rọ́! 51Ọ́ sii ḅẹẹ a diin pa tuminikiri ma ḅom. Ofori anị ọkọ fịnịghaa, kụ́ma puama anịị a pa ḅonyẹẹ. 52Mị́sa saghị bịpịmú, sọ́nọ́apụ gbẹ́rẹ́ warị bie fịnịbẹm kụ́ma nnị gbẹ́rẹ́ bịpị fiebieghaa. Tẹ́rẹ́apụ gbẹ́rẹ́ kundu fịnịbẹm sị mmẹapụ na kamụ koro mmẹapụ pịghị gbẹ́rẹ́ kundu fịnịbẹm sị tẹ́rẹ́apụ na kamụ koro. 53Puama nnị ogboku bie fịnịbẹm, daḅọ na ori owitụ́wọ, owitụ́wọ na daḅọ, nyingiḅọ na árị ndụ́ḅa, ndụ́ḅa na nyingiḅọ, nyingiḅọ na a tụwọ taa, táaḅọ na deeḅọ nyingiḅọ ma pịghị gbẹ́rẹ́ bịpị fiebieghaa.>>

Sáá Ma Nimi

(Mat 16.2,3)

54Jizọs warị pịghị dugho túminị́ ma pịrị ḅẹẹ, <<Ọ́ tọ́rụ́ saghị so tọ́rụ́ ma dighi sị anị suamaẹrẹ ịrụa ma tere koro koro angaá, ó nimim ḅẹẹ iti korobẹm anị warị pịghị korom. 55Ọḅụ tọ́rụ́ fọ́rụ ma fie maẹrẹ ọ pịghị dughom ḅẹẹ anị ofịrịbẹm anị warị pịghị ọkọ fị́nị. 56Ọ́ mini mmẹẹ́ tọ́rụ́ agidi ọmịnị ine tọ́rụ́ pa so na kiri na dighibẹm sị nimi pághá bẹnyẹ kụ́ma ọ tegó sị mị́sa págháarị nyẹ ma nimigha?

Ị́yẹ́ Iruonaḅọ Na Ḅẹ́rẹ́fáma

(Mat 5.25,26)

57<<Ọ tegó ọ ḅụ na dighigha sị karakárányẹ ma nimi? 58Ịrị ị nana ḅẹ́rẹ́ mịẹarịḅọ na ḅẹ́rẹ́kọ́wárị muarị sáá, árị ḅẹẹ, ịrị álála ọ nana ḅẹ́rẹ́fámam asọogbo, anịgha ori ị pa ḅẹ́rẹ́kọḅọ ma dámáḅobẹm, ḅẹ́rẹ́kọḅọ ma warị ị saghị ólóghó kuruḅọ ma ḅárásua, ị pa ikóliwarị ma bie gbi sua bẹḅọ. 59A dugho ị pịrịm aningáa anịị ị́ fịnị bẹnyẹ sị ị́ ọ́lọ́ sáá ma gbẹ́ẹ̄ fama.>>

Currently Selected:

Luk 12: IBY

Highlight

Copy