Luk 13
13
Ọmịnị Ọmịna Sii Ḅụ Pịghịị Anịgha Ọ Fịị
1Anịsáa ma ḅụ, jẹa túminị́ anị ngaa ma ḅụ imi dugho Jizọs pịrịapụ, Paileti ḅáa Galiliapụ, nnị agbaa mịẹ Tamuno pịrịarị sáá. 2Jizọs warị n pagharaa ḅẹẹ, <<Nnị ọkọ ḅọ́rọ́ Galiliapụ ma ḅám gosi, ọ sị ḅẹẹ nna sii jẹ́ Galiliapụ nẹ́ngị? 3Anị ọkọ fịnịgha! A pịghị dugho ọ pịrịm ḅẹẹ ḅọ́rọ́ ọmịnị ọmịna sii ḅụ pịghịgha pịghịgha ọmịnị ọmịna sii ḅụ fị́ị́bẹm, nnị sọ nna sii ḅụ fị́ị́ ḅara ma. 4Isi mmẹẹ́ faá sikim Siloam ḅụ fịnịapụ sóghóló ḅáa osu ma sóórókoro pụ́nụ́ma sị ḅáapụ, ọ sị ḅẹ́ mịnaapụ ma sii dụḅa Jerusalem ḅụ fịnịapụ ma sii nẹ́ngị? 5Anị ọkọfị́nị́gha. A pa dugho ọ pịrịm ḅẹẹ, ọmịnị ọmịna sii ḅụ pịghịgha pịghịgha, ọmịnị n fị́ị́ ḅara ma ḅụ ḅọ́rọ́ fị́ị́bẹm.>>
Ine Mgbọ́lụ Suagha Sịmgbọ́lụ Kaḅụ
6Jizọs warị mị kaḅụ ma kọọ n pịrị ḅẹẹ, <<Gbẹ́rẹ́sa biri gbẹ́rẹ́ owitụ́wọ imi fịgị sịịmgbọlụ nyánáḅọ sẹnịarị nyẹ ori vainị duakiri ḅụ, sámamgba ọ mú sịmgbọlụ dọ́ghụm anị ọ́gọ́nọ kụ́ma gbẹ́rẹ́nyẹ sọ arịgha. 7Ọ warị ọrẹ dụatẹlẹmaḅọ ma ḅẹ́, ḅẹẹ, <Dighi mị tẹ́rẹ́ a kụ́rá a ḅo mị fịgị sị ma ḅụ sịịmgbọlụ dọghụmam kụ́ma a gbẹ́rẹ́nyẹ sọ arịgha. Anị pẹ́lẹ́ gbii! Anị tegósi pa kiri ma ibi fị́fámaarị?> 8Kụ́ma dụatẹlẹmaḅọ ma pagharam ḅẹẹ, <Inyanaḅọ pa anị wáriso mị gbẹ́rẹ́ kụ́rá ma ḅụ; a anị sughu ikelekelebẹm sị fọ́rụ anị bie sọọ, sị lịka pa anị pịrị. 9Anị ḅọ́rọ́ fịgị sịịmgbọlụ sua sua jẹ́ kụ́rá anịma kọkọ ibi bẹ, anị ine nyẹ suagha suagha i ine anị pẹ́lẹ́gbibẹm!> >>
Jizọs Ikúlá Ọ́rụ́ḅọ Gwọm Ịnyọ́sárá Éné
10Gbẹ́rẹ́ Juuapụ Ịnyọsára Éné, Jizọs nyẹ́diearị Juuapụ kobiri yọ ma bie, 11gbẹ́rẹ́ ọ́rụ́ḅọ imi sitẹ́mẹ́ ḅụḅáláḅálá pa pị́rị́máaḅọ mị mmẹẹ́ faá sị kụ́rá ḅụ, anị mịẹmam sị árị ikoo sị ine tụ́ghụ́ sẹgha. 12Jizọs árị arịị sáá, o warị a sị ọ ḅụ pịrị sị ḅẹẹ, <<Ọ́rụ́ḅọ, ị́yẹ́ ọlọ obi ị warisomam.>> 13Ọ warị ọ ḅara pa árị ọ́gọ́nọ gbánā, anị gbẹ́rẹ́kiri anịị a tụ́ghụ́ sẹ nyẹ sị túminí pa Tamuno pị́rị́. 14Kobiri yọ ma ḅụ sịbịdáḅọ saghị iganim ḅẹẹ Jizọs obi gwọm Juuapụ Ịnyọsára Éné ma ḅụ ọ warị pụghọ saghị ẹ́gẹ́rẹ́ túminị́ ma pị́rị́ ḅẹẹ, <<Suéné a dii imi wamịnị ine fịrịnwangị bẹnyẹ: anịgo, o ḅoo mịná suene dii ma ḅụ, sị nnị ọmịna obi gwọọ, kụ́ma Ịnyọsára Éné ma ḅụghaa.>>
15Kị́nị́nyánáḅọ warị ọ pagharaa ḅẹẹ, <<Ọmịnị mmẹẹ́ a tọ́rụ́ agidi, ọmịna bie gbẹ́rẹ́ḅọ amịna kọ́rọ́náma anịgha ikúnyẹ dighi ásụ nama fiima fimagha nnị anị kpọ angaá sị mú mingi pa anị pị́rị́ Ịnyọ́sárá Éné ma ḅụ? 16Mị́sa, mịị Ebraham furo tụwọ ẹ́kpẹ́dua mị mmẹẹ́ faá si kụ́rá ḅụ pa ịkóli bie suamaa ḅo, a tẹ́ go a pághámá ḅobịgha Ịnyọ́sárá Éné ma ḅụ?>> 17Ọ pagharaa ḅara ma warị ḅụ́gịrịrị pa ori iruonaapụ tọ́rụ́ sua, túminị́ ma warị bieḅẹlẹ ọ mịẹ ḅụ́gbérépuma fịrị mamgba ḅụ.
Mọstad Sịmgbọlụ Kaḅụ
(Mat 13.31-32; Mak 4.30-32)
18Jizọs warị gbíla, <<Tamuno Ásẹ́mẹ́kiri ma anị tẹ́ kịka? A tẹ́ pa anị na tọ́ma bẹ? 19Mịị anị fị́nị́ ḅara, gbẹ́rẹ́ owitụ́wọ mọstad sịmgbọlụ akịm sị mú ori duakiri bie dipi. Sịịmgbọlụ ma sẹnị pághám sị ḅo opu sị dighi, fíní warị ḅo saghị anị warị nama anị ọ́gọ́nọ.>>
Yisti Gboloma Kaḅụ
(Mat 13.33)
20Jizọs pịghị sima gbilam, <<Tamuno Ásẹ́mẹ́kiri ma a tẹ́ pa anị na tọ́ma bẹ? 21Anị fịnị ḅara anịị yisti akị sị pa mánámāná filawa na gwaa gboloma ḅo, akị wárii nyẹ gonyẹ́ gonyẹ́ ḅo sughu sáá láa.>>
Kpápụ́ Ḅụ́pọ́
(Mat 7.13,14,21-23)
22Anịsáa Jizọs warị opu ama na káláama ḅụ ḅọ́rọ́, nyẹ́diearị ọ ḅọ́rọ́ ḅọ́rọ́ Jerusalem muarị sáá. 23Gbẹ́rẹ́ḅọ warị o gbíla, <<Kị́nị́nyánáḅọ, boghaapụ ngéré anịị dụaḅọ́rọ́ma nyáná bẹapụ?>>
Ori n pagharam, 24<<Ị́yẹ́ ịnyọ láa ḅara mịẹsị kpápụ́ ḅụ́pọ́ ma ḅụ ḅọ́rọ́ tegó tọghaapụ asọ dọghụ sị kpápụ́ ḅụ́pọ́ ma ḅụ ḅọ́rọ́bẹm kụ́ma inebịgha. 25Wárị nyánáḅọ ma saghị sị ḅụ́pọ́ ma gbẹ́ẹ̄ gbẹ́rẹ́kirikiri ị nụ́ngọbie fịnị ḅụ́pọ́ ma gbolo sị tẹ́ghẹ̄bẹm, <Ḅụ́pọ́ findi wa pịrị, Wányánáḅọ!>
<<Kụ́ma ọ paghrabẹm, <A nimigha ọ saghị ḅo angaá.>
26<<Anịsáa, ọmịnị ọ pagharabẹm, <Wamịnị i duafịm pịghị i dua ḅụ, ị pịghị wamịna ama bie nyẹ́diem.>
27<<Kụ́ma ọ pagharabẹm, <A o nimigha anịgha ọ saghị ḅo angaá. Ọmịnị a fị́nị́ angaá soo ọmịnị siiamịẹnyẹapụ!>
28<<Anị angaá owu na ákáturu kiriakịbẹm ọmịnị Ebraham, Aizik, Jekọpụ na ikiakoroapụ ma árị bẹ sáá Tamuno Ásẹ́mẹ́kiri ma ḅụ, kụ́ma ọmịnị n warị o gbi págháma. 29Túminị́ ịrụa saghị saghị angaá na anị tere tere angaá saghị ḅobẹm, túminị́ ẹ́rẹ́ḅara na amaḅara angaá saghị ḅobẹm sị nna kiriakị fị́ na ḅụ ma ḅụ Tamuno Ásẹ́mẹ́kiri. 30Anịsáa, mị́sa ọḅụju kụ́nẹ́maapụ ḅo tórúku tárịapụ sọbẹm, anịsáa mị́sa tórúku ḅụ fịnịapụ ḅo ọḅụju kụ́nẹ́maapụ sọ́bẹm.>>
Jizọs Kụrụrụ Jerusalem Pịrịm
(Mat 23.37-39)
31Anịsáa ma ḅụ jẹa Farisiiapụ Jizọs damaḅom sị dugho ọ pị́rị́ ḅẹẹ, <<Mịnga ma wáriso si jẹ́ angaá muu, tegó, Hẹrọd i ḅá dọ́ghụm.>>
32Ọ pagharam, <<Mú dugho pụ́nụ́ma pịrị, ḅẹẹ, <Mịmgba na ḅáa éné a sitẹ́mẹ́ deesibẹm, obiapụ gwọọ, tẹ́rẹ́ kárámá éné a ị́yẹ́ fịrị nwángịfámábẹm.> 33Anịsọ, mịmgba, ḅá na bẹ éné bẹ éné a a muarịnyẹ mubẹm, tegó gbẹ́rẹ́ ikiakoroḅọ sọ jẹ́ angaá fịbịghaa, Jerusalem sima.
34<<Jerusalem Jerusalem! Ọmịnị ikiakoroapụ ma ḅám, Tamuno pa ọ fịrịma oku muapụ ma ọmịnị mgbọ́lụ pa nna gbim, tọgha sáá a dọghụmam a ọmịna túminị́ taa kubiri ọbịọ amịna awọ taa kubiri biri ḅara anị pamba bie, kụ́ma ọmịnị asọ pa i pịrịgha! 35Anịgo ọmịna Tamuno warị ma anị bie tẹ́ghẹ̄ bẹapụ nyánábịgha. A dugho kụrọma ọ pịrịm, ọ mịnị jẹ́ pa ị́yẹ́ arịbịgha akị mú o dugho bẹ sáá ḅẹẹ, <Karịiḅi fịnị Kị́nị́nyánáḅọ ẹ́rẹ ma ḅụ ḅoarịḅọ ma pịrị.> >>
Currently Selected:
Luk 13: IBY
Highlight
Share
Copy
Want to have your highlights saved across all your devices? Sign up or sign in
©2024 Luke Initiative for Scripture Translation
