Kuboka 10
10
Lilapuli la nani halwa
1Bambu Sapanga ampwagila Musa, “Gujenda kwaka Falau. Nenunhengiki jubia na mwoju gogunonwipi na aka atumisi baki ili nhwesa kuhenga nginyulii yenze kwabu, 2ili mwanganya nhwesa kwaalandi bana binu na aka asoko bii, namuna he naapoiki lihamu Amisili kukuhenga nginyuli hei kwaabu. Henu mwiimanya nepani ndi na Bambu Sapanga.”
3Ndienu Musa na Aloni bunzendila Falau nukumpwagi, “Bambu Sapanga jwa Ahebulania jupwaga ana, ‘Wiikana kulihulu kwangu nepani mbaka lile? Waaleka bandu bangu aboka ili awesa kunumbali. 4Lakini ana gukaniki kwaalekake bandu bangu, ndienu kilabu niileta halwa mu nndema jaku. 5Halwa yehei ienia nndema joti juku Misili jiibia lwii ndaba ja halwa hei. Giikula kila sindu sekiigali baada jukuika iyula ja malibu jela, kabee nga biikotoki sokapi panani ji mikongu jejimela mu migonda. 6Halwa hei hiitwelila mu manyumba gaku nu mu nyumba yaka atumisi babugujangati mu nyumba ya Amisili boka halwa hei giibia gigingi gaguge hata haseja binu ngaseawaiki kugabona toka kusaliwa mbaka lelenu.’” Ndienu Musa jwapita kwaka Falau.
7Aka atumisi babunzangati Falau bunndalukia, “Boo, Mundu hajo jwatusumbua mbaka lile? Waaleka bandu haba ajenda bukunumbaliya Bambu Sapanga wabo. Boo, ngasegubona lee nndema guku Misili jitenda kuwa?”
8Ndi Musa na Aloni baaleta kwaka Falau, najombi jwapwagila, “Nzenda mukundumbaliya Bambu Sapanga wino. Lakini naluki ana, akanya biijenda pamu na mwanganya?”. 9Musa anzibua, “Twiiboka na akaakombu na aseja bitu na bana bitu akanalomi na aka mbomba. Kabee twiiboka na makondo ni imbui yiitu na ng'ombi yiitu ndaba kupalika unhengila tipati Bambu Sapanga.” 10Falau jwaapwagila, “Napa kwaka Bambu Sapanga nga nunndekake mwaajukua aka mbomba bii na bana bii. Kulangi hotuhotu mmbii na mawasu gilia mu mioju jii. 11Ngahela! Aka nalomi pena ndi babiijenda kunndumbali Bambu Sapanga, ndaba hesi ndi semukipala.” Pala ndi Musa na Aloni batenda kwaabenga palongi jaka Falau.
12Bambu Sapanga ampwagila Musa, “Langiya kuboku kwaku mu nndema juku Misili ili halwa ipitila na kula mimea goka mu nndema na yoka yeihigali baada ji iyula ja malibu.” 13Ndienu Musa jwanyosha ndonga jaki panani ja nndema uku Misili. Bambu Sapanga jwaleta kimbonga kuhuma ku Mashaliki wapoga panani ja ndema joti pipipipi ni ikilu kelukelu. Pakwakusa pee kimbonga sela saleta halwa. 14Halwa hei yaenia kila pandu ku nndema juku Misili nukutola panani nndema joha juku misili. Halwa hei yabia likundi likolongu gaguge ngase gawahiki kupiiti wala ngagipitii kabe halwa ngati haga. 15Halwa hei yayekalia nndema woti guku Misili, mbaka nndema woti wabiya lwii tiii. Bakula mimea yoti na matunda goti gagaigali kipindi si iyula ja malibu jela. Nga linyoi limu lelaigali punndema. Nga linya lelaigali panani ji mikongo wala mimea pokapi mu nndema juku Misili.
16Ndi Falau jwaakema Musa na Aloni nyatanyata na kwaapwagi, “Nunntendi mahakau Bambu Sapanga, Sapanga winu na mwanganya kabee. 17Henu nunndoba mu nekakia mahakau gangu, sapwali jenze kabee nukunobe kwaka Bambu Sapanga, Sapanga winu jumokila lilapuli lende lelileta kuwa.”
18Ndienu Musa jwaboka kwaka Falau, jwajenda kunndoba Bambu Sapanga. 19Najombi Bambu Sapanga jwaleta kimbonga kikali kuhuma ku magalibi gwaagaboa halwa yela na kugakangi ku nhanga uku Shamu. Nga halwa hata jimu jejaigali pandu poa mu nndema juku Misili. 20Lakini Bambu Sapanga anhenga Falau kuba jwini ing'omu, najombi ngasejwaalekaki Aizilaeli kuboka.
Lilapuli la tisa lwii
21Ndienu, Bambu Sapanga ampwagila Musa, “Nyoosha kuboku waku kunani ili lwii tikitiki lupitila mu nndema juku Misili, lwii tikitiki lolulwe nga mundu jojiwesa kujenda sanga kupapa.” 22Ndienu, Musa jwanyosha kuboku kwaki kunani na kwatweli lwii tikitiki nndema Misili kwoti masoba ga tatu. 23Amisili ngasebawesa kubonana na ngamundu jojwaboka kunyumba jaki masoba gegala. Lakini pandu pababiya atama Aizilaeli pabiya nu unang'anu. 24Falau ankema Musa nukumpwagi, “Nzendania muku ngungamalia Bambu Sapanga winu, hata aka mbomba bii na bana bii awesape kujenda na mwanganya. Lakini makondoo gii ni imbui yii na ng'ombi yii mwiileka apamba.” 25Musa jwajibua, “Kupalika utulekakia tujukua inyama yitu ili twakapia matambiku ga nhupi na matambiku gu kusinza kwaka Bambu Sapanga, Sapanga witu. 26Twiijenda ni inyama itu, nga kinyama hata simu setwakileka. Ndaba kuhuma mu mipugu jitu twabeti tukunndumbaliya Bambu Sapanga, Sapanga witu. Twabeti ngasetumanya kinyama boo se twampiikia Bambu Sapanga matambiku mbaka patwiika hoku.”
27Lakini Bambu Sapanga anhenga Falau jubia na mwoju gogunonwipi, najombi ngasejwapai kwaalekake Aizilaeli kuboka. 28Falau ampwagila Musa, “Boka palongi jangu. Wiika kumona kabee ndaba lisoba lewiika kubonana na nepani wiitenda kuwa!” 29Musa ampwagila, “Hena ngati hegupwagiki nganhiki kabee kugubona.”
Currently Selected:
Kuboka 10: MaBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
