Kuboka 14

Aizilaeli alomboka nhanga uku Shamu

1Ndienu Bambu Sapanga ampwagila Musa, 2“Waapwagila Aizilaeli akelubuka kuunyuma, abeka kambi palongi ja Pi Hahiloti, pikilanda ja musi uku Migdoli nu nhanga uku Shamu, palongi ja Baal Sefoni. Mwakabekaa kambi palongi jaki pambipi nu nhanga. 3Ndaba Falau jwiiholaliya, ‘Aizilaeli haba atenda kutangatanga koni asanganyikiwi nulukoba lutei kwaapengale biiwesa kupita.’ 4Hapa nepani nanhenga Falau kuba jwana mwoju gogunonwipi, najombi jwiitenda kunkagu nane nalipatila ulumbi panankoma jombi na alonda baki boti. Hapa ndi Misili biimanya nepani ndi na Bambu Sapanga.” Ndienu Aizilaeli biihenga ngati hebaapwagila. 5Falau pajwajowana Aizilaeli ateikutila, jombi na aka atumisi baki bang'anambua mawasu gabu, bapwaga, “Henu tutei kii, twaalekaki Azilaeli ajenda biikuba atumwa bitu kabete?” 6Ndi Falau jwaamua kuanda ligali laki lukukomane leliutwa ni inyama yebiikema Falasi na jajenda pamu na alonda baki. 7Jwajukwii magali gaki gaamboni miasita na magali goha gangi gukukomane ngondu guku Misili koni gakalonguswa na aka atumisi bukukomana ngondu. 8Bambu Sapanga anhenga Falau kuba na mwoju gogunonwipi najombi Falau jwaapwata Aizilaeli bababia abohi ku Misili kola sanga kujogopa. 9Alonda buku Misili pamu na Falasi yabu yoti na magali ga falasi gukukomane na baakwelale mafalasi haga baapwata Aizilaeli. Nabombi baakolila abei kambi pulutengu ju nhanga, pambipi na Pi Hahiloti, palongi ja Baal Sefoni. 10Aizilaeli hebalingalia nu kummbona Falau juhika na akomana ngondu baki batengalamuka nulujogopu lukolongu ngamaa ndi baamua kunndoba Bambu Sapanga ili jwaajangatia. 11Baamua kumpwagi Musa, “Boo ngasegabi le makabuli gingi ku nndema guku Misili mbaka guhamu kutuleta tuwelila kulukoba kone? Boo ndabajakii utuhengi haga kukutuboa mu nndema uku Misili? 12Boo ngasetukupwagi majambu gehaga patwabia twakona ku Misile? Tuleka tuendilia kwaatumaki Amisili. Kwakabia nambanga kwaatumaki Amisili kuliku kuwele kulukoba kone.”

13Musa jwaapwagila Aizilaeli, “Mwiijogopa nzema nganganganga! Lelenu mwiibona Bambu Sapanga hejwankombula. Ndaba Amisili haba bamwaabona lelenu ngamwaaboni kabete hata kulenga nabwaka. 14Bambu Sapanga jwiikomana badala jino, mwanganya ntulia pena.” 15Bambu Sapanga ampwagila Musa, “Ndaba jakii nndenda kunelela? Mwaapwagila Aizilaeli akokwa kulonge. 16Tondubia ndonga jaku gulangia kunani junhanga ili masi gibaganika na Aizilaeli biiwesa kulomboka pikilanda junhanga pandu pajomu. 17Nepani naahenga Amisili kuba baabi na mwoju gogunonwipi nabombi banzengalia mu nhanga. Na bandu biinumbalia panankoma Falau na akomana ngondu baki na magali gaki gu kukomane ngondu na baakwela falasi baki. 18Ndienu niilumbalika kukunhwesa kunkoma Falau na akomana ngondu baki, pamu na magali gaki na baakwela falasi baki na Amisili biimanya nepani ndi Bambu Sapanga.” 19Ndi ntumisi jukunani kwaka Bambu Sapanga jojwabi palongi ji likundi la Aizilaeli jwaboka nukutama kuunyuma jabu nu lupendi lwiliundi lola kabe lwaboka kulongi nukujema kunyuma jabu, 20nnala wiliundi watama pikilanda ja Aizilaeli na Amisili. Ikilu jela liundi lela laaletila Amisili lwii lakini laanang'anakia Aizilaeli ikilu. Henu makundi mabeli haga yani akomana ngondu baka Falau ni likundi la Aizilaeli babia ndalindali kelukelu. 21Musa jukunyosha kuboku kwaki kunani ju nhanga na Bambu Sapanga jwakanga masi gunhanga kwikimbonga kikolongu kuhuma ku mashaliki. Kimbonga hesi sapogali kelukelu nu kubagu nhanga pandu pabeli ni pikilanda kwapiti nndema nzomu. 22Aizilaeli bapeta pikilanda junhanga pandu pajomu na masi gabia ngati ukuta upandi wabu uku malele nu uku mangega. 23Amisili baapwata kupete nndema nzomu gogwabi pikilanda ju nhanga pamu na falasi yabu na magali gabu ga ngondu na akomana ngondu babu baakwelale Falasi. 24Pakwahegalia kukusa Bambu Sapanga jwalingaliya alonda buku Misili kuhuma ku nnala gwa motu gola nu nnala wiliundi gola, nabombi alonda buku Misili bajogipi ngamaa nu kuangajika mmoju. 25Jwagahenga mataili ga magali gabu gakotuka kuyongolota na gabia gajenda kwa tabu ngani. Ndienu Amisili bapwaga, “Twaatila Aizilaeli, Bambu Sapanga jwaakomane Aizilaeli.” 26Ndi Bambu Sapanga ampwagila Musa, “Nyosa kuboku kwaku panani ju nhanga ili masi gakelubuka kabee na kwaayekale Amisili pamu na magali gabu na baakwela falasi babu.” 27Ndienu, Musa jukunyosa kuboku kwaki panani junhanga na pakwakusa masi gu munhanga gakelabuki ngati egabii pa mwandi. Amisili balenga kugatila masi lakini Bambu Sapanga jwaakangila mu nhanga. 28Masi gagayekali magali pamu na baakwela falasi, akomana ngondu boka baka Falau bababiaa baajengale Aizilaeli lawelila mu nhanga. Ngase jwalamiki Mmisili hata jumu. 29Lakini Aizilaeli bapeta pikilanda junhanga pandu pajomu koni masi gagabii ngati ukuta waajemali upandi wabu uku malele nu uku mangega. 30Lisoba heli Bambu Sapanga jwaahokuya Aizilaeli kuhuma mu maboku ga Amisili. Aizilaeli bijibona mitui ja Amisili jipesangini mu lutengu ju nhanga. 31Aizilaeli babona lijambu lukusangasa lejuhengiki Bambu Sapanga kwa Amisili batenda kunndumbali na batenda kunhobale Bambu Sapanga na Musa ntumisi waki.

Currently Selected:

Kuboka 14: MaBV

Highlight

Compare

Copy