Kuboka 22

Malagalaki gu kundepesa nnzaku

1“Ana mundu jujibiki ngombi au likondoo nu kulisinza au kulilombesa banndepisa ng'ombi nhwanu kwa kila ng'ombi jejujibiki na makondo nsesi kwa kila likondoo lejujibiki. 2Mwii ana bunkamwi jubombo nyumba jaka mundu na ana bunndapwi mbaka kunkoma joankomiki ngajukubi ni likosa lukukoma. 3Lakini mwii wehoju ana bunkamwi kipindi liyoba lipitiki nukunkoma, joankomiki jwiikuba na kosa lukukoma.

“Mwii hoju jwiipalika kulepa. Lakini ana ngasejubi na sindu sukulepa ndi mweni jwiitenda kulombeswa ili kulepe wii waki. 4Ana kinyama sebikijibiki kiipatikini somi kwaka mwiii hoju, nala mwii jwiilepa mala pabeli jikubi ng'ombi au liponda au likondoo.”

5Ana mundu jwiileiki inyama yaki mu litui li mizabibu au kukilekake kinyama saki kula mu litui luku nnzaki, jwiilepa asala heji mu ilebi yaamboni kuhuma mulitui laki au litui laki li mizabibu.

6“Ana mundu jupambaki mwotu mu litui laki, nagombi mwotu guhombiki mbaka kulitui luku nzaki nukutini ilebi yaki yanga kuhuswa au litui loti, mundu jojupambaki motu hoju kupalika kulepa asala ja ilebi hei.”

7“Ana munndu anndeki nzaki lupija au mali jengi antunzila, hei yoti ana ajibiki mu nyumba jaki, ana jupatikini mwii kupalika julepa mala pabeli. 8Lakini mwii ana ngase jupatikini, jojubii na nyumba jela jwiijenda pandu pu kunndumbali Bambu Sapanga ili jukalangia ngasejuhusiki na wii wa mali gukunzaki.

9“Ana kwiikuba nu kubisana kupete ng'ombi au liponda au likondoo au ingobu au sindu sokapi sekihobiki sesuse kila abeli aba kila jumu jupwaga saki baausika biiletwa pandu pukunndumbali Bambu Sapanga. Mundu jojwiibonikana juteii kukose anndepa nzaki mala pabeli.

10“Ana mundu ankabisi nzaki liponda au ng'ombi au likondoo au kinyama sengi sokapi jutunza ni kinyama hesi ana kiwii au kitei kuumiswa au kijukuliwi bila munndu jokapi kubona, 11mundu hoju jujenda pandu pukunndumbali Sapanga nukulapa, kulapa hoku kwiiamula kati jabu, kulangi jojutunza hoju ngase jujibiki mali juku nzaki. Jojubii nikinyama hesi jwiijetakia kulapa hoku nu nnzaki hoju nga jwiilepi sokapi. 12Lakini ana kinyama hesi bikijiba kwaki kupalika anndepa mwana saki. 13Ana kinyama hesi sakomwa niinyama ikali yu mukiholi mundu jo bunkabisi hoju kupalika juleta inyama jejiigali ili kila mundu jubona. Najombi ngajwiilepi malepo gokapi nda kinyama sehesi kikomikiki ni inyama yu mwikiholi hesi.

14“Mundu ana jujaiki kinyama kuku nnzaki na ana kinyama sehesi ana kiumiswi au kuwa kipindi mweni ngasejubii, henu jojujaiki kinyama sehesi kupalika julepa. 15Lakini ana kiumii au kuwa kipindi mweni jubii nala jojujaiki nga julepi sokapi. Ana kinyama hesi sabi kinyama se bikikodisi jojubii ni kinyama sehesi jwiijukua pe lupija lukukodisi.

Malagalaki gukutama sapi na bandu

16“Mundu ana ankolwi kamwali jwanga kuwai kugone na mwanalomi na jwanga kunsumba, ana jugoni naku kupalika julepa mali nu kunnzuku mmbomba wehoju kuba nhwanu waki. 17Lakini ana atati baka kamwali we hoju akaniki kundeke anzukua kamwali hoju, mundu hoju jwiilepa mali gagapalika kulepwa kwaka kamwali jwanga kuwai kugone na mwanalomi.

18“Waanndeka mmbomba nhwabi juendalia kutama. 19Jojugone ni kinyama kupalika kunkoma.

20“Jojupia litambiku kwaka kisapanga sengi badala jukupia kwaka Bambu Sapanga kupalika kunkoma.

21“Mwantende majambu gilia wala kung'alisa nngeni, ndaba hata mwanganya mwabii mwaageni ku nndema uku Misili. 22Mwang'alisa munndu joawii alomi baki wala nkeba. 23Ana ntei hela nabombi ana aneli sakaka nepani naajowana kulela kwabu, 24nane niitenda kuyoma ngamaa nanepani nankoma kungondu na akaahanu biinu biibia akambomba baawi alomi babu na bana binu biibia akeba.

25“Ana ukopisi lupija mundu jokapi kati ja bandu bangu baabi aka kapuku, wiimpala jugulepa kupeta seunkopisi. 26Ana ujukwi ingobu yuku nzaku yukuliyekale ngati poni kupalika unkelabukia kabula jukujingi lioba, 27ndaba ingobu heji jibii jeje pee najombi jupalika kuliyekale. Au ukita jwaaliyeka kike? Ana juneli niitenda kunzowane ndaba nepani mi niikia.

28“Waantonndo Sapanga wala kunndigi mbamba kilongosi wa bandu baku.

29“Wiikotoka kumbiiki pandu pangu kuhuma muilebi yaku na divai jaku. Mwiimbekia asaliwa bii buutumbuli analomi. 30Mwiihenga ahelahela kwa ng'ombi yeitumbuli kusaliwa yanalomi na makondo ginu kabee. Mwanndeka kila nsaliwa jojutumbuli kubelekwa na anyongo baki kwa masoba saba ni lisoba la nani mwiimbekia nepani. 31Mwanganya mwiibia mwabandu bangu babaabekiki kwa ndaba jangu. Henu nga mwiikuli inyama jikinyama sekikomikiki ni kinyama sengi sumwikioli. Inyama jeheji mwajipekia imbwa.

Currently Selected:

Kuboka 22: MaBV

Highlight

Compare

Copy