Kuboka 37
37
Kulenganake Lisanduku li Lilaganu
Kuboka 25:10-22
1Bezaleli jalenganakiya Lisanduku li Lilaganu kwi imbau yumu mshita. Ulasu waki wabiya mita mia jimu na komi, upana waki sentimita sitini na sita nu ulasu waki kujenda kunani sentimita sitini na sita. 2Japakia zahabu ja sapi nkati na kunza nukulenganake upegu kuba wa zahabu pandi yoti. 3Ndipala jalenganakiya peti nnsesi ya zahabu yukutotule, jiibeka nkona yaki kila kona peti jimu. 4Jalenganakiya mikongu jukutotule kuhuma mu nkongu gu mshita nu kupaki zahabu. 5Mapanda mabeli gala jagapetisa mu peti ibeli yela i Lisanduku ili kulitotule. 6Jalenganakiya kipuniku sa zahabu sapi liina lengi li kipuniku sehesi ndi kipuniku si ikia, ulasu waki mita mia jimu na komi nu upana waki mita sitini na sita. 7Kabee jalenganakiya iumbi yeibii mapapati ibeli sukuhugati zahabu muupandi wa mwisu gongo nu upandi wa mwisu gongi gola wiipuniku yene, 8jalenganakiya kiumbisimu sekibii na mapapati mu mwisu gu upandi gongo na mwisu gu upandi gongi, jaalenganakiya kuba sindu simu ni kikobake hesi mu mwishu wa pandi ibeli hei. 9Iumbi hei yabia itenda kulingalani na mapapati gabu gabii gaambatuliwi kuyekale si Lisanduku pamiu jabu pabia palingalani kujenda mu kipuniku si Lisanduku.
Mesa ja mabumunda kwa ndaba jaka Bambu
Kuboka 25:23-30
10Kabee jalenganakiya mesa ju nkongu mshita jejibii nu ulasu wa sentimita semanini na nani nu upana waki sentimita alubaini nu nnsesi nu ulasu waki kujenda kunani sentimita sitini na sita. 11Japakia zahabu ja sapi nukulenganake ubegu wa zahabu. 12Jayongulakiya kimbilingu su ubau sekibii nu upana wa sendimita saba na nusu nukugulenganake ubegu wa zahabu. 13Jalenganakiya peti nnsesi ya zahabu nukuibeka mu kona nsesi yaki pandu papajomuki magolu. 14Peti heyi yukukamulaki mapanda gukutotule lisanduku li lilaganu yabekwa pambipi ni kimbilingu siki kibau. 15Jalenganakiya mapanda mabeli gukutotule kuhuma mu nkongu mshita, nukupaki zahabu. 16Jalenganakiya yombu ya zahabu sapi yukubeka panani ja mesa, sahani yaki ni isahani kwa ndaba ju ubani na lijagi laki na bakuli kwa ndaba ji litambiku la kunywa.
Kulenganake sindu sukubeke taa
Kuboka 25:31-40
17Ndienu Bezaleli jalenganakiya kabee sindu sukubeke taa kwa zahabu sapi. Kitamiku saki nu lupendi lwaki pamu ni ikombi, na mahundu gaki na mambandi gaki balenganakiya pamu. 18Sindu sukubekee taa hesi sakabii na mambandi sita, mambandi matatu upandi gongo na mambandi matatu upandi gongi. 19Kila mulimbandi labii ni ikombi itatu yi lilenganu la maua gu mlozi, kila simu ni liua laki, na kila simu ni ingonyu yaki ni liua laki. 20Panani ja sindu sehesi yabii ikombi nnsesi yeibii ngati maua gu mlozi gabii na ingonyu na maua gaki. 21Pandu jepala papitila mahundu matatu ga mambandi, pai ja kila lihundu kwabii ni sindu simu sukubeke taa. 22Mahundu haga na mambandi yabii sindu simu ni sindu sukubekee taa salenganakiwi soti kwa zahabu ja sapi. 23Jalenganakiya taa saba na koleu yaki ni isahani yaki kwa zahabu ja sapi. 24Jatumia kilu selasini nu nhwanu ya madini ga zahabu kulenganake sindu hesi.
Kulenganake mesa jukupogale ubani
Kuboka 30:1-5
25Bezaleli jalenganakiya mesa jukupogale ubani kwi imbau i mishita. Mesa jukupogapiki litambiku heji jabiya nu pandi yaki yoti yabia ilengini ulasu nu upana waki yoti yabia sentimita alubaini nu nhwanu nu ulasu waki kujenda kunani sentimita tisini. Manyelu gehaga gagabii kila kona gakabii sindu simu na mesa jukupiki litambiku jibiya sindu simu. 26Joti japakia zahabu sapi, upandi waki ukunani, pandi yaki yoa yu muluteta na manyelu gaki, kabee jijilenganakia papi ja zahabu. 27Jalenganakiya peti ibeli ya zahabu pai ju upegu wa pandi ibeli yeihegalene. Peti yeheyi yatumika kukamulaki mipanda jukutotule mesa jukupogale ubani. 28Jalenganakia mipanda mibeli ji mishita nukujipaki zahabu.
Kulenganake mahuta gakahimika bandu na hindu
Kuboka 30:22-38
29Bezaleli jalenganakia mahuta ga kwaahimika bandu na hindu kwaka Bambu Sapanga, nu ubani wasapi gogunungi sapi goahangangini na indu yeinungi ngani.
Currently Selected:
Kuboka 37: MaBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.
