Alawi 10
10
Mahakau gaka Nadabu na Abihu
1Nabombi Nadabu na Abihu, bana baka Aloni, bajukua kila mundu kimbani saki sukujokule mwotu, bajegala mwotu nu ubani, bumpikia Bambu Sapanga mwotu gwanga kupalika, goguwe Bambu Sapanga ngasejaalagalaki ahenga hela. 2Apalapa, Bambu Sapanga juguhulua mwotu, jwaatinia akakombu haba, bakuwa palongi jaki. 3Henu, Musa ampwagila Aloni, “Kwi lijambu ale Bambu Sapanga jugulangi kupete sindu sela sejapwaga, ‘Nalilangia kubanga nepani nusapi palongi ja bandu baabi pambipi napane. Unang'anu gwa gwibonikana palongi ja bandu boti!’” Aloni jwatumbala nuu.
4Ndienu, Musa jwaakema Mishaeli na Elisafani bana baki Uzieli, atati asoku baka Aloni, baapwagila ahika kuboa nhyega yaka alongu babu palongi ji lihema laka Sapanga nukupeleka kunza ji lihema. 5Ndienu bajukua mitui ja alongu babu nukujipeleka kunza ji lihema koni aweti ingobu yabu, ngati Musa ejalagalakia. 6Ndienu Musa ampwagila Aloni na bana baki, Eliazali na Itamali, “Mwitusana majunzu gi wala kujwendu ingobu yi nukulelaneka, ananteila hela mwitenda kuwa nu kunhenga Bambu Sapanga jwaasukila bandu boti. Lakini alongu bi yani bandu boti buku Izilaeli, awesa kulelaneka ndaba ja mwotu goguhumiki kwaka Bambu Sapanga. 7Mwiipita pandu pukujingali litanga li lihema laka Sapanga, anangahela mwitenda kuwa, ndaba mahuta gukupaka gaka Bambu Sapanga gakona panani ji.” Aloni na bana baki bahenga ngati Musa ejaalagalakiya.
Malagalaki kwa Agolu baka Sapanga
8Ndienu, Bambu Sapanga ampwagila Aloni, 9“Gwehapa na bana baku, enzingi nkati ji lihema laka Sapanga, mwiikuba nkunywiki divai wala kulobe sindu sokapi, ananhengiki hela mwiitenda kuwa. Ago gwibia unhilu wa masoba goa mwi ibeleku hi yoti. 10Ndienu kupalika kumanya kati ja majambu gajupala Sapanga na majambu gajusuki Sapanga, kati ja majambu ganga kujetakeka na Sapanga na gajujetake Sapanga. 11Kupalika mwaabola Aizilaeli mihilu joti jejuje numpwagila kupete Musa.”
12Musa ampwagila Aloni na bana baki babahigali, Eliazali na Itamali, “Nzukua pandu pi litambiku lu uwembi lelihigali kuhuma mu matambiku gaampiki Bambu Sapanga sukutinii pa mwotu, nkula pambipi ja pandu pukupiki litambiku lukutinii ndaba heji ndi jaka Sapanga. 13Mwiilelila pandu pa sapi ndaba heji ndi jaku ni kibeleku saku kuhuma mwi litambiku lebumpiki Bambu Sapanga litinika kwa mwotu hela ndi Bambu Sapanga ejanagalakia. 14Lakini kigamba na sema yejabia jutondabi kunani kulangi bumpihiki Bambu Sapanga litambiku, nhwesa kulele pandu pokapi papajetakaliwi na Bambu Sapanga. Gwikula gweapa na bana baku akanalomi na akambomba. Hindu heyi bugupeki ibiya yaku ni kibeleku saku kuhuma mu matambiku gu lukwali ga bandu buku Izilaeli. 15Kugolu kola na kigamba sa matambiku gukuhenge nginyuli yukumpiiki Bambu Sapanga bailet kipindi matambiku ga mahuta pabiipia pamotu, ili kuhenga nginyuli yu yukuiipiiki palongi jaka Bambu Sapanga. Heyi ikuba yaku na bana baku, hei yiibia hinu masoba goti ganga na mwisu ngati Bambu Sapanga ejalagalakia.”
16Enu Musa jataputa imbui jebapia kuba litambiku lukuboa mahakau gabu, ndienu jamanya babia atinii. Ndienu Musa jaayomila Eliazali na Itamali bana baka Aloni babahigali, jaalalukia, 17“Boo, ndaba ja kii ngasemwakuliki inyama jukupiki litambiku pandu paka Sapanga? Ndaba litambiku heli ndi laka Sapanga ngani na Sapanga jumpeki mwanganya inyama ji imbui heji ili kuboa kihakau sa bandu na kwaahenga ajetakika palongi jaka Bambu Sapanga. 18Ndaba mwai waki ngasemwaletiki pandu paka Sapanga, ndi mwanganya kupalika mwakakula inyama heji pandu paka Sapanga ngati enalagalakiya.” 19Aloni ampwagila Musa, “Linga, lelenu bana bangu bumpiki Bambu Sapanga litambiku labu lukuboa mahakau ni litambiku lukutiniwa palongi jaka Bambu Sapanga, hata hela majambu aga gambatiki! Boo, Bambu Sapanga lee jwakajetakiya ana nakakuliki matambiku gukuboa mahakau leleno?” 20Musa ejajogwana haga jwakotuka kuyoma.
Currently Selected:
Alawi 10: MaBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.