Alawi 13
13
Malagalaki kupete ugonzu wa ngosi
1Bambu Sapanga jwaapwagila Musa na Aloni, 2“Ana mundu jokapi jibia juimbiki au jubii ni ikwanda au libanga langa kulama mu nhyega jaki, nukumanyikana jubii nu ugonzu wa ngosi, ndienu, bampelika kwaka Aloni nngolu waka Sapanga au kwa jumu kati ja bana baki jojubi nngolu waka Sapanga. 3Nngolu waka Sapanga jwikagula pandu papabi nu ugonzu na ana majunzu ga pandu pe hapa gang'anambwiki kuba mahuu nu ugonzu gwe anagubonikini ni kinyuli sekitei kuembeka ndienu mwiimanya goniogu ndi ugonzu wa ngosi gogujambuki. Nngolu waka Sapanga ejijomula kukagu, henu jwitangasa kuba mundu we hoju ngasejujetakeka kunndumbali Sapanga. 4Ana libanga laki libii lihuu, hata ngati ngasekiembiki nkati jangosi ngani na wala majunzu ga pandu pe hapa ngase pang'anambwiki kuba pahuu, ndienu nngolu waka Sapanga antenga mundu hoju kwa masoba saba. 5Lisoba la saba, nngolu waka Sapanga andinga kabee mundu hoju, ana kubi kinyuli kibii ahelahe na anajubweni ngasekiheni mu ngosi jaki, nngolu waka Sapanga antenga kabee mundu hoju jutama kutali na bandu kwa masoba saba gangi.”
6“Nngolu waka Sapanga jwaankagula kabe mundu hoju lisoba la saba. Ana kinyuli kilamiki na ngasekieni mu ngosi, nngolu waka Sapanga jwaalandila bandu kubanga mundu hoju jujetakiki kunndumbali Bambu Sapanga. Mundu we hoju jwisapa ingobu yaki, najombi jwibia jujetakeka kunndumbali Bambu Sapanga. 7Lakini ana kinyuli hesi kieni kabee munnyega, toka lisoba lela nngolu waka Sapanga pajwajomula kunkagu na kwaapwagi bandu kubanga jujetakeka kunndumbali bambu Sapanga, henu mundu jola jupalika jujenda kabee kuka nngolu waka Sapanga. 8Nngolu waka Sapanga jwandinga kabee, ana kinyuli hesi anakieni nngosi ndienu nngolu waka Sapanga antangasa mundu hoju kubanga ngasejujetakeka kunndumbali Bambu Sapanga, hogu ndi ugonzu wa ngosi.”
9“Ana mundu jokapi jupatiki ugonzu wa ngosi, banndeta kuku nngolu waka Sapanga. 10Nngolu waka Sapanga andinga, ana ambweni juimbiki uhimbi uhuu nukugahenga majunzu gaki gabia mahuu nu kuimba hoku kung'anambwiki kuba kilonda kibei, 11hogu ndi ugonzu wa ngosi wa masoba gingi. Nngolu waka Sapanga jantangasa kwa bandu kubanga mundu we hoju kubanga ngasejujetakeka kunndumbali Bambu Sapanga. Ngasekupalika kuendale kunndingalaki mundu hoju ndaba ngasejujetakeka kunndumbali Bambu Sapanga. 12Ana ugonzu wa ngosi hogu gukamwi nu kujagani nhyega joti, kuhuma pulutoto mbaka kulwaji ngati ejibona nngolu waka Sapanga, 13nngolu waka Sapanga andinga kabee. Nngolu waka Sapanga anajugubweni ugonzu wa ngosi hogu gueni nhyega joti, ndienu antangasa mundu hoju kuba sapi ndaba ja nhyega jing'anambwiki kuba huu na hela mundu hoju jujetakeka kunndumbali Bambu Sapanga. 14Lakini nhyega jaka mundu hoju ana kilonda sakona kibei, enu, mundu hoju jwiendaliya kuba ngasejujetakeka kunndumbali Bambu Sapanga. 15Nngolu waka Sapanga jwakilingalia kilonda pajwakibona kibii nu uwila antangasa kubanga ngasejujetakeka kunndumbali Bambu Sapanga ndaba jubii nu ugonzu wa ngosi. 16Lakini kilonda hesi anaking'anambwiki kabee kuba kihuu, mundu hoju jwikelubuka kuku nngolu waka Sapanga. 17Nngolu waka Sapanga jwilinga anajibona kuba king'anambwiki kuba kihuu, enu, jwaatangasia bandu kubanga mundu we hoju jujetakeka kunndumbali Bambu Sapanga.”
18“Ana mundu lukamwi liputi nalombi lilamiki, 19lakini pandu pala sabii kinyuli patei kuimba nakuba pahuu au kuba pakeli lakini pahuu kidogu, ndi kupalika jikililangia kuku nngolu waka Sapanga. 20Nngolu waka Sapanga andinga mundu hoju, anajwiibona pikinyuli je pala libii libomba na majunzu ga pandu pe pala gang'anambwiki kuba pahuu, enu, nngolu waka Sapanga jwaatangasia bandu kubanga mundu we hoju kuba ngasejujetakeka kunndumbali Bambu Sapanga na hogu ndi ugonzu wa ngosi goguhumiki mu liputi. 21Lakini ngati nngolu waka Sapanga anajundingiki mundu hoju nukubona majunzu ga pandu je hapa nga mahuu na wala nga ngakuba libomba ila patumbuli kulama, ndienu, jwantenga mundu hoju kwa masoba saba. 22Ana kinyuli sehesi kienia nhyega joti, ndienu, nngolu waka Sapanga jwaatangasia bandu kubanga mundu hoju ngasejujetakeka kunndumbali Bambu Sapanga ndaba pandu pala pabii nu ugonzu wa ngosi. 23Lakini ana liputi ngaseling'anambwiki au kuenea, ndi libanga libonikana ngati kinyuli pena. Nngolu waka Sapanga jwatangasa bandu kubanga mundu we hoju kubanga jujetakeka kunndumbali Bambu Sapanga.”
24“Ana mundu jukupiki pa ngosi jaki nukupitii kilonda sekibii kikeli ni kihuu, au libanga lihuu libonikini pi kilonda kibei papakupiki pala, 25nngolu waka Sapanga jwitenda kupalingali. Ana jagabweni majunzu gang'anambwiki kuba mahuu na pabi ni libomba, enu hogu ndi ugonzu wa ngosi. Ugonzu wa ngosi hogu gupitii ndaba ja pandu papabii ni libanga pala. Nngolu waka Sapanga jwatangasia bandu kubanga mundu hoju ngasejujetakeka kunndumbali Bambu Sapanga, ndaba jubi nu ugonzu wa ngosi. 26Lakini nngolu waka Sapanga anajuga bweni majunzu ga pandu hapa nga mahuu na ngasepabii ni libomba na patumbuli kulama, ndienu nngolu waka Sapanga jwambeka kutali mundu hoju kwa masoba saba. 27Lisoba la saba nngolu waka Sapanga jwandinga. Ngati na guenii nngosi, enu nngolu waka Sapanga jwatangasia bandu kubanga mundu we hoju kuba ngasejujetakeka kunndumbali Bambu Sapanga, ndaba jubi nu ugonzu wa ngosi. 28Lakini, ngati libanga lela ngaselienii, ila jutumbuli kulama, kuhimba hoku kuikiki kupete libanga pee, enu nngolu waka Sapanga jwatangasa bandu kubanga mundu hoju kuba jujetakeka kunndumbali Bambu Sapanga, ndaba lenieli libanga leliikiki kupete kukupa.”
29“Ngati mundu jwokapi mwanalomi au mmbomba, jubii ni kilonda mu kimutu au mu kileu, 30nngolu waka Sapanga jwakilingaliya kilonda hesi. Ana nngolu waka Sapanga jwiibona kitei kuembeka na majunzu ga njanu nagapepandiki, ndienu antangasa mundu we hoju kuba ngasejujetakeka palongi jaka Sapanga ndaba hogu ndi upeli na ndi uleleku wi kimutu au kileu. 31Lakini nngolu waka Sapanga anajukibweni kilonda ngasekihembiki na majunzu ngasegabii majilu, ndienu nngolu waka Sapanga atenga mundu hoju kwa masoba saba. 32Lisoba la saba nngolu waka Sapanga jwakilinga kilonda sela. Ana kilonda sehesi ngasekienii na ngakuba majunzu ga langi ja njanu wala ngakuba ikwanda yokapi pandu je hapa, ndienu, 33mundu we hoju jiimoga majunzu gaki au indeu yaki. Lakini pandu paibii ikwanda jwiimoga. Ndienu nngolu waka Sapanga jwantenga mundu hoju kwa masoba saba gangi. 34Lisoba la saba, nngolu waka Sapanga jwailinga ikwanda yela. Ana nngolu waka Sapanga jwaibona ikwanda yela ngaseienii nngosi wala kuhembeka, enu, jwantangasa mundu hoju jujetakiki palongi Bambu Sapanga. Mundu hoju jwisapa ingobu yaki, najombi jwiwesa kujetakeka palongi jaka Bambu Sapanga. 35Lakini ana ikwanda heyi ienii baada jukuntangasa jujetakaliwi palongi jaka Sapanga, 36nngolu waka Sapanga andinga mundu hoju ana ikwanda ienii mu ngosi, ana jubii na majunzu gagabi langi ja njanu, ndaba mundu hoju ngasejujetakeka kwaka Bambu Sapanga. 37Lakini nngolu waka Sapanga anajwiibweni ikwanda heyi ilamiki na majunzu majilu gamei pandu je hapa, enu, ilonda heyi ilamiki, henu, mundu hoju ndi jujetakeka kwaka Sapanga. Nngolu waka Sapanga jwantangasa mundu hoju kuba jujetakeka kwaka Bambu Sapanga.”
38“Mundu jokapi, jukubi mwanalomi au mmbomba, anajubi na madoa manhuu nhyega jaki, 39nngolu waka Sapanga jwandinga mundu hoju. Ana nngolu waka Sapanga anajwalibona libanga lihuu kidogu, hei ndi ikwanda ya kawaida, mundu hoju ndi jujetakeka kwaka Sapanga.”
40“Ana mwanalomi jupatiki lupanza, jombi ndi jojujetakeka kwaka Bambu Sapanga ndaba jubii nu lupanza pee. 41Ana lupanza holu lutumbuli kukiogu mbaka pikibongi mundu hoju jujetakeka kwaka Sapanga ndaba jubi nu lupanza pee. 42Lakini ana jubii ni kilonda kuhuu ni kikeli pu lupanza au pikibongi palubi lupanza hogu ndi ugonzu wa ngosi gogupiti mu lupanza lwaki mu kimutu au mu kibongi saki. 43Nngolu waka Sapanga andinga. Ana kilonda sekihimbiki panani ju umutu waki au pikibongi kibii kikeli au kihuu ngati ugonzu wa ngosi ukujambuki, 44henu, mundu hoju ngonzu najombi ngasejujetakeka kwaka Sapanga. Nngolu waka Sapanga jaatangasia bandu kubanga mundu hoju ngasejujetakeka kwaka Bambu Sapanga, ndaba ji kilonda mu kimutu saki.”
45“Mundu jokapi jojubii nu ugonzu wa ngosi gogujambuki jupalika kuwata ingobu yeijendwiki, majunzu gaki ngajiikebu, jiyekaliya pandu pa pai papamiu jaki nukujamali kupwaaga, ‘Nepani ngasenyetakeka kwaka Bambu Sapanga, nepani ngasenyetakeka kwaka Bambu Sapanga!’ 46Mundu hoju ngajijetakeka kwaka Bambu Sapanga masoba goti gu ugonzu waki. Jombi ndi ngasejujetakeka kwaka Bambu Sapanga, najombi jiitama kajika kunza ji likambi.”
Nhilu gogulandi ingobu yeibii kobi
47“Ana kupiti madoa ga langi kijani au ikeli mwi ingobu ikubi yealenganaki kwa mangoma ga makondoo au ingobu jealenaki ni kitambaa kihuu, 48Ingobu jeheji jibiya alenganake kwi kitambaa kihuu au nyusi au litonzi au ingobu ja ngosi ja aina jokapi jela, 49Ana kobi heji jibii na langi ji kijani au ngeli mwi ingobu heji, henu ingobu heji jilangi lilapu lu ugonzu wa ngosi. Ndienu kupalika kundangi nngolu waka Sapanga. 50Nngolu waka Sapanga jwilinga ingobu heji jejibii na kobi na jajibeka pakajika ingobu heji kwa masoba saba. 51Lisoba la saba nngolu waka Sapanga jwiilinga kobi heji. Ana kobi heji kuenii mwi ingobu heji, jikubi ndi jeasoniki au kuloka au la ngosi ja aina jokapi jela, ingobu jejibii na kobi heji ndi lilapuli lu ugonzu wa ngosi gogujambuki, enu ingobu heji ngajijetakeka kwaka Bambu Sapanga. 52Nngolu waka Sapanga jwiijosa mwotu ingobu heji ndaba jibii na kobi jejikoma.”
53“Nngolu anajugukubweni kobi heyi ienii mwi ingobu, 54ndienu jwilagalakia, mundu jwini ingobu heji jusapa nukwiibeka pakajika kwa masoba saba gangi. 55Nngolu waka Sapanga anajujibweni kobi heji ngasejing'anambwiki langi jaki wala ngasejineei, ndienu ingobu heji ngajijetakeka palongi jaka Bambu Sapanga. Ingobu heji jwiijosa mwotu, hata ngati kobi heji jibii upandi gu munyuma au palongo wi ingobu heji.”
56“Ana nngolu waka Sapanga jwiibona kobi jela jiitumbuli kuboka baada jukusapa, henu jijendula pandu papabii na kobi pala. 57Ndienu, ana kobi heji jibonikana kabee mwenikatai mwi ingobu jeasoniki au jealokiki au mwa sindu sokapi sa ngosi, ndienu kobi jibia jienii. Hapa ingobu heji gwijosa mwotu. 58Ingobu au sindu sokapi sealokiki au kusona au sindu sokapi sa ngosi sesuse atei kukisapisa nukuboa kobi ndi kupalika kukigolo kabee, nasombi kibiya kijetakiki kwaka Sapanga.”
59Jenze ndi minhilu jejilongale kobi yeipitii mwi ingobu ya nyusi yealenganaki na mangoma gi makondoo ni ingobu nhuu yealokiki ni ingobu yeasoniki au ingobu ya ngosi. Sukupwata mihilu jenze mwiiwesa kumanya kati ji ingobu yeijetakeka palongi jaka Bambu Sapanga na yanga kujetakeka palongi jaka Bambu Sapanga.
Currently Selected:
Alawi 13: MaBV
Highlight
Copy
Compare
Share
Want to have your highlights saved across all your devices? Sign up or sign in
The New Testament in Matengo Language ©The Word for the World International and Matengo Language Translation, 2020. All rights reserved.