Nau Ntơm 27
27
Y-Yakôb ntŭng nau ueh uĭn Y-Êsau
1Y-Isăk ranh jêh, măt ngo mâu hôm dơi saơ ôh. Păng kuăl Y-Êsau, kon bu klâu bôk rah, jêh ri lah: “Hơi nâu!” Y-Êsau ơh: “Gâp ta aơ.” 2Păng lah: “Aơ, gâp lĕ ranh jêh, mâu gĭt ôh nar khĭt. 3Pôri, ăn may sŏk ndơ may hăn nchron, dĭng hăr jêh ri na may, hăn tâm bri jêh ri pănh mpô mpa bri ăn ma gâp. 4Jêh nây may ƀư du ntil ndơ sa dŭt kah tĭng nâm gâp ŭch, jêh ri ndơ̆ ăn gâp sa gay ma gâp ăn nau ueh uĭn ma may êlor ma gâp khĭt.”
5Nôk Y-Isăk lah ma Y-Êsau kon bu klâu păng, H'Rêbêka tăng nau nây. Pôri, dôl Y-Êsau hăn tâm mir pănh mpa bri gay nsĭt ta ngih 6H'Rêbêka lah ma Y-Yakôb, kon bu klâu păng: “Aơ, Gâp mhe tăng mbơ̆ may ngơi ma Y-Êsau, nâu may, jêh ri ntĭnh: 7‘Djôt nsĭt hom puăch bri gâm ăn ma mbơ̆ du ntil ndơ sa dŭt kah gay ăn mbơ̆ may sa jêh ri ăn nau ueh uĭn ma may tanăp măt Brah Yêhôva êlor ma mbơ̆ may khĭt.’ 8Aƀaơ, ơ nâu, iăt hom nau gâp đă may. 9May hăn luh hom padih ta ntŭk mpôl mpô mpa rong, nhŭp ăn ma mê̆ bar mlâm be kon dŭt lay, jêh nây mê̆ mra ƀư du ntil ndơ sa dŭt kah, di tĭng nâm mbơ̆ may ŭch. 10May mra njŭn ăn ma mbơ̆ may sa gay ma păng ăn nau ueh uĭn ma may êlor păng khĭt.” 11Ƀiălah Y-Yakôb lah ma mê̆ păng: “Mê̆ uănh aơ, Y-Êsau, nâu gâp, păng geh rsau âk, bi gâp mâu geh rsau ôh. 12Nkhêp lah mbơ̆ mra bi rbôt gâp jêh ri mbơ̆ gĭt năl gâp jêng bunuyh ndơm păng. Pôri gâp yơh mra dơn nau rtăp rak, mâu di nau ueh lăng ôh.” 13Mê̆ păng lah: “Hơi kon, nau rtăp rak nây ăn mê̆ anh ma may; ăn may iăt nau mê̆, hăn nhŭp hom bar mlâm be rĭ.” 14Pôri, Y-Yakôb hăn nhŭp bar mlâm be kon njŭn ma mê̆ păng, jêh ri mê̆ păng ƀư ndơ sa kah, tâm di tĭng nâm mbơ̆ păng ŭch sa. 15H'Rêbêka sŏk kho ao dŭt ueh Y-Êsau, kon bu klâu bôk rah păng, ndơ ơm geh tâm ngih gay nsoh kho ao nây ma Y-Yakôb, kon bu klâu mpô̆t. 16Păng sŏk đŏng ntâu be kon put bar đah ti jêh ri ta trô ko Y-Yakôb. 17Jêh nây H'Rêbêka ăn ndơ sa kah jêh ri piăng let păng hŏ ƀư jêh ta ti Y-Yakôb, kon bu klâu păng.
18Y-Yakôb văch dăch ta mbơ̆ păng jêh ri lah: “Hơi mbơ̆!” Y-Isăk lah: “Gâp ta aơ, mbu moh may?” 19Y-Yakôb ơh: “Gâp jêng Y-Êsau, kon bu klâu bôk rah may aơ. Gâp hŏ ƀư jêh tĭng nâm nau may đă. Dăn may dâk hom, sa puăch gâp nchron aơ, jêh ri may nơm yơh ăn nau ueh uĭn ma gâp.” 20Y-Isăk ôp: “Mâm ƀư may nchron gơnh ngăn?” Y-Yakôb lah: “Yor Yêhôva Brah Ndu may kơl gâp dơi geh ƀŭn lap.” 21Y-Isăk lah ma Y-Yakôb: “Hơi kon, hăn dăch ta aơ gay ma gâp dơi rbot uănh may gĭt lah may di Y-Êsau, kon gâp ngăn lĕ mâu lah mâu.” 22Y-Yakôb hăn dăch mbơ̆ păng jêng Y-Isăk. Păng rbôt jêh ri lah: “Bâr ngơi nâm bu bâr ngơi Y-Yakôb, ƀiălah ti nâm bu ti Y-Êsau.” 23Y-Isăk mâu ôh gĭt năl Y-Yakôb, yorlah bar đah ti geh đŏng rsau nâm bu ti nâu păng Y-Êsau, yor ri Y-Isăk ăn nau ueh uĭn ma Y-Yakôb. 24Păng ôp tay: “May jêng Y-Êsau, kon bu klâu gâp ngăn ƀơh?” Păng ơh: “Ơ di ngăn, gâp ta aơ.” 25Jêh nây Y-Isăk đă: “Djôt ăn ma mbơ̆ puăch bri ndơ may geh nchron gay ăn mbơ̆ sa jêh ri ăn nau ueh uĭn ma may.” Y-Yakôb ndrăp ăn ma mbơ̆ păng sa jêh ri njŭn ndrănh ma mbơ̆ păng nhêt đŏng. 26Jêh nây Y-Isăk lah ma Y-Yakôb: “Hơi nâu, hăn êp ta gâp jêh ri chŭm hom mbơ̆.” 27Y-Yakôb hăn êp jêh ri chŭm mbơ̆ păng. Y-Isăk n'hơp ƀâu kah tă bơh ao kon păng, jêh ri ăn nau ueh uĭn ro. Păng lah:#Hêb 11:20.
“Aơ, ƀâu nglâm kon bu klâu gâp,
Nâm bu ƀâu nglâm bơh mir Brah Yêhôva ăn jêh nau ueh uĭn.
28Dăn ma Brah Ndu ăn ma may dak ngom tă bơh trôk,
Ăn nau geh jêng tă bơh neh,
Rmeh ler ba ƀlê jêh ri ndrănh krăk ƀâu.
29Ăn lĕ bunuyh ƀon lan pah kan ma may,#Ntơm 12:3.
Lĕ bri dak chon mon ta may!
Chiă uănh hom ma phung oh nâu may,
Phung kon bu klâu mê̆ may chon mon ma may da dê!
Mbu nơm rtăp rak kon mra dơn nau bu rtăp rak tay,
Mbu nơm dăn nau ueh uĭn ma may mra geh nau ueh uĭn tay.”
30Dôl Y-Isăk mhe pơ lôch ăn nau ueh uĭn ma Y-Yakôb jêh ri Y-Yakôb mhe du tă bơh ntŭk mbơ̆ păng jêh ri Y-Êsau, nâu păng, sĭt tă hăn nchron. 31Y-Êsau gâm đŏng du ntil ndơ sa dŭt kah jêh ri njŭn ma mbơ̆ păng. Păng lah: “Dăn mbơ̆ dâk hom jêh ri sa puăch nchron bơh kon bu klâu may, gay ma may ăn nau ueh uĭn ma gâp.” 32Y-Isăk, mbơ̆ păng lah ma Y-Êsau: “Mbu may?” Y-Êsau ơh: “Gâp jêng Y-Êsau, kon bu klâu bôk rah may yơh.” 33Y-Isăk hih rhâl, râm sâr săk jăn jêh ri ôp: “Mbu nơm hŏ njŭn jêh puăch bri tât ma gâp jêh ri ăn gâp sa? Êlor ma may sĭt, gâp hŏ sa lĕ jêh ri gâp hŏ ăn nau ueh uĭn jêh ma păng; yor nây păng ăt dơi geh nau ueh uĭn.”
34Jêh tăng nau mbơ̆ păng lah, Y-Êsau nter du tong dŭt huy jêh ri bêng ma nau rngot. Păng lah ma mbơ̆ păng: “Hơi mbơ̆! Dăn may ăn nau ueh uĭn ma gâp đŏng!” 35Ƀiălah Y-Isăk lah: “Oh may hŏ dŏng jêh nau ndơm văch tât ta gâp jêh ri sŏk rvan jêh nau ueh uĭn prăp ăn ma may.” 36Y-Êsau lah: “Di nâm kơt nĕ đŏng ƀơh kuăl săk păng Y-Yakôb,#27:36 Yakôb: Ntơ aơ geh bâr nau ngơi tâm ban rplay ngơi Hêbrơ nâm ntĭt jêng “nau mƀruh”. păng hŏ pit in lơi ntŭk gâp bar tơ̆ jêh? Păng hŏ pit lơi jêh nau gâp jêng kon bu klâu bôk rah, aƀaơ păng sŏk đŏng nau ueh lăng gâp.” Jêh nây păng lah tay: “May mâu prăp hĕ du nau ueh uĭn ma gâp?”#Ntơm 25:29-34. 37Y-Isăk lah ma Y-Êsau: “Aơ, gâp hŏ ăn njêng păng ƀư kôranh may, hŏ ăn jêh oh nâu păng ƀư jêng oh mon păng, jêh ri hŏ sâm siăm jêh ba ƀlê jêh ri ndrănh ma păng. Pôri moh ndơ gâp hôm dơi ăn ma may, hơi kon!” 38Y-Êsau ơh: “Hơi mbơ̆! May knŏng geh du nau ngơi ueh uĭn dơm? Dăn may ăn nau ueh uĭn ma gâp, hơi mbơ̆!” Jêh nây, Y-Êsau nhĭm nter.#Hêb 12:17.
39Y-Isăk, mbơ̆ Y-Êsau, plơ̆ lah:#Hêb 11:20.
“Aơ, ntŭk neh may gŭ neh mâu mra jêng ndơ,
Jêh ri dak ngom bơh trôk.
40May mra rêh yor ma đao,#Ntơm 36:8; II Hađăch 8:20.
Jêh ri jêng oh mon ma oh may.
Ƀiălah dôl may hôm rêh mblêng ta aơ ta ri,
May mra nkê̆ch lơi mâng mbăk oh may ta trô ko may.”
Y-Yakôb nchuăt du bơh Y-Êsau
41Bơh nây, Y-Êsau rmot ma Y-Yakôb yor nau mbơ̆ păng ăn nau ueh uĭn ma Y-Yakôb. Y-Êsau mĭn êng: “Mbơ̆ dăch khĭt jêh; jêh nây nkra nau tâp ma mbơ̆, gâp mra nkhĭt Y-Yakôb, oh gâp.” 42Ƀiălah nau Y-Êsau mĭn, kon bu klâu bôk rah, bu hŏ mbơh tât ma H'Rêbêka. Păng đă bu kuăl Y-Yakôb, kon bu klâu mpô̆t păng jêh ri lah: “Aơ, Y-Êsau nâu may geh nau mĭn ŭch nkhĭt may gay ma djoh nuih. 43Aƀaơ, ơ nâu, iăt hom nau gâp, dâk gơnh hom jêh ri nchuăt du ta ngih Y-Laban, va may, ta Charan. 44Ăn may gŭ ndrel ma va may jŏ djê̆ kŏ tât nau nuih nâu may bah jêh. 45Nôk nâu may bah jêh nau păng nuih ma may jêh ri chuêl jêh nau may ƀư ma păng, jêh nây gâp mra đă bu chuă vơt an may sĭt. Mâm dơi gâp ăn roh lĕ bar hê khân may tâm du nar?”
46Jêh nây, H'Rêbêka lah ma Y-Isăk: “Nau rêh gâp rngot ngăn, mâu hôm ŭch rêh đŏng ôh, yorlah phung kon ƀăn mpôl Y-Het. Tơlah Y-Yakôb sŏk du huê tâm phung kon bu ur mpôl Y-Het jêng ur, jêng du huê bu ur tâm n'gor aơ, moh ndơ jan gâp hôm rêh?”
Currently Selected:
Nau Ntơm 27: CMO2023
Highlight
Share
Copy
Want to have your highlights saved across all your devices? Sign up or sign in
© 2023 United Bible Societies. All rights reserved.
