Nau Ntơm 28
28
Y-Isăk đă Y-Yakôb hăn ta Padan Aram
1Y-Isăk kuăl Y-Yakôb văch, păng ăn nau ueh uĭn jêh ri ntĭnh ntăm: “May mâu dơi sŏk ôh ur bơh phung kon bu ur n'gor Kanaan. 2Ƀiălah may dâk gơnh hom, hăn ta n'gor Padan-aram, tât ta ngih Y-Bêthuel, mbơ̆ me may, jêh ri ta nây may nđăp tâm du huê kon bu ur va may Y-Laban ƀư ur. 3Dăn Brah Ndu Geh Lĕ Nau Brah ăn nau ueh uĭn ma may, ƀư ăn noi deh kon bĭk rơ̆ dŭt âk jêh ri dơi jêng du phung ƀon lan âk. 4Dăn Brah Ndu ăn ma may jêh ri phung noi deh may nau ueh lăng tă bơh Y-Abraham gay ma may dơi dơn n'gor may dôl gŭ, nây jêng n'gor Brah Ndu hŏ ăn jêh ma Y-Abraham!”#Ntơm 17:4-8. 5Pôri, Y-Isăk đă Y-Yakôb hăn rgăn Padan-aram, tât ta ngih Y-Laban, kon bu klâu Y-Bêthuel, bunuyh Aram, jêng nâu H'Rêbêka, me Y-Yakôb jêh ri Y-Êsau.
Y-Êsau nđăp ur đah kon bu ur Y-Ismaêl
6Y-Êsau saơ Y-Isăk hŏ ăn nau ueh uĭn jêh ma Y-Yakôb jêh ri đă hăn tât ta Padan-aram gay ma nđăp ur, jêh ri dôl ăn nau ueh uĭn, mbơ̆ păng ntĭnh ntăm: “May mâu dơi sŏk ur bơh phung kon bu ur Kanaan.” 7Y-Êsau ăt saơ Y-Yakôb tông bâr mbơ̆ me păng hăn tât ta n'gor Padan-aram. 8Pôri Y-Êsau gĭt ma phung kon ƀăn n'gor Kanaan mâu ƀư maak ôh ma Y-Isăk, mbơ̆ păng, 9yor ri nđâp lah păng hŏ geh bar hê ur jêh, Y-Êsau hăn ta ngih Y-Ismaêl nđăp tay đah H'Mahalat jêng kon bu ur Y-Ismaêl, sau Y-Abraham jêh ri oh Y-Nêbajôt.
Nau Y-Yakôb mbơi ta Bêthel
10Y-Yakôb du tă bơh Bêr-Sêba jêh ri hăn ta Charan. 11Păng tât ta du ntŭk ri jêh ri bê̆ch măng ta nây yorlah nar nhâp jêh. Păng sŏk du mlâm lŭ gay dâm bôk jêh ri lâng săk bê̆ch ta nây. 12Păng mbơi saơ geh du mlâm ntung gung thoi ntơm bơh neh tât ta trôk jêh ri phung tông mpăr Brah Ndu hăn hao, hăn trŭnh ta ntung gung nây.#Yôh 1:51. 13Ri, Brah Yêhôva dâk tanăp măt păng#28:13 Mlr: dâk ta bôk gung. jêh ri lah: “Gâp jêng Yêhôva Brah Ndu Y-Abraham, chô yau may, ăt jêng Brah Ndu Y-Isăk. Gâp mra ăn ma may jêh ri noi deh may ntŭk neh may dôl lâng săk bê̆ch.#Ntơm 13:14-15. 14Noi deh may mra âk tâm ban ma ndruyh neh, gŭ lam luh nar, nhâp nar, pa dâng, pa lơ, jêh ri lĕ rngôch phung mpôl băl bunuyh tâm neh ntu mra geh nau ueh uĭn yor bơh may jêh ri yor bơh noi deh may.#Ntơm 12:3; 22:18. 15Aơ, Gâp gŭ ndrel ma may, ăp ntŭk may hăn, Gâp mra tĭng mât mray may ta ntŭk nây, jêh ri njŭn leo may sĭt ta n'gor aơ. Gâp mâu ôh chalơi may kŏ tât Gâp ƀư rĭng lĕ moh nau Gâp hŏ ton ma may.” 16Y-Yakôb kah rngăl bê̆ch jêh ri lah: “Nanê̆ ngăn ta ntŭk aơ geh Brah Yêhôva gŭ ƀiălah gâp mâu gĭt ôh!” 17Păng klach jêh ri lah: “Ntŭk aơ di ma klach ngăn! Nanê̆, ntŭk aơ jêng ngih Brah Ndu, nây jêng mpông ƀon ueh klơ trôk!”
18Ang ôi taơ, Y-Yakôb dâk ơm ôi, păng sŏk du mlâm lŭ dâm bôk păng nơm ndâk ƀư meh jêh ri nkhŭt dak ngi ta klơ meh nây. 19Păng rnha ntŭk nây Bêthel;#28:19 Bêthel: Rplay samƀŭt aơ tâm nau ngơi Hêbrơ nâm ntĭt jêng “Ngih ƀư brah” mâu lah “Ngih Brah Ndu”. saơm ri ƀon nây bu rnha Lus. 20Y-Yakôb ƀư nau ton pô aơ: “Tơlah Brah Ndu gŭ ndrel ma gâp, mât mray gâp tâm nôk gâp hăn nsong jêh ri ăn piăng let, kho ao ma gâp nsoh, 21jêh ri ăn ma gâp geh nau đăp mpăn plơ̆ sĭt ma ngih mbơ̆ gâp, pôri Brah Yêhôva mra jêng Brah Ndu gâp. 22Lŭ gâp hŏ ndâk jêng meh gâng mra jêng ngih Brah Ndu, jêh ri gâp mra nhhơr ma May du kô̆ tâm jât bơh lĕ ntil ndơ May ăn ma gâp.”
Currently Selected:
Nau Ntơm 28: CMO2023
Highlight
Share
Copy
Want to have your highlights saved across all your devices? Sign up or sign in
© 2023 United Bible Societies. All rights reserved.
