Nau Ntơm 29
29
Y-Yakôb gŭ ta ngih Y-Laban
1Y-Yakôb dâk hăn tât ta n'gor phung ƀon lan mpeh Lur Nar. 2Păng uănh saơ du ntu dak tâm mir, kêng pĭt nây geh pe phung biăp gŭ rlu kuen, yorlah ta aơ jêng ntŭk phung mpô mpa nhêt dak. Geh du mlâm lŭ toyh rdâl bâr ntu dak. 3Tơlah phung mpô mpa sĭt ta nây rĭng jêh, bu rlă lơi lŭ luh rdâl bâr ntu dak jêh ri ăn biăp nhêt, jêh nây rlă lŭ plơ̆ tay ta ntŭk ơm, rdâl tay ntu dak.
4Y-Yakôb lup jô̆ khâl phung rmăk biăp: “Hơi phung nâu! Mbah tă khân may văch?” Khân păng ơh: “Hên văch tă bơh Charan.” 5Păng ôp: “Khân may gĭt năl lĕ Y-Laban, kon bu klâu Y-Nahôr?” Khân păng lah: “Hên gĭt đŏng.” 6Y-Yakôb ôp tay: “Păng ngăch săk jăn lĕ?” Khân păng ơh: “Păng ăt ngăch prăl đŏng. Ri H'Rachel kon bu ur păng dôl leo biăp văch ta aơ.” 7Y-Yakôb lah: “Aơ, nar hôm e ang, ê hŏ tât ôh mông rgum phung mpô mpa sĭt. Mâm ƀư khân may mâu ăn mpô mpa nhêt dak jêh ri mƀơk ăn khân păng sa tay?” 8Khân păng ơh: “Hên mâu dơi ôh ƀư kơt nây ƀiălah kâp phung mpô mpa sĭt ăn rĭng lĕ rngôch, jêh nây mơ rlă lŭ ta klơ bâr ntu dak gay ăn khân păng nhêt.”
9Dôl Y-Yakôb hôm ngơi đah phung rmăk biăp, H'Rachel veng phung biăp mbơ̆ păng tât, yorlah păng ăt jêng bunuyh rmăk biăp. 10Tơlah Y-Yakôb saơ jêh H'Rachel, kon bu ur Y-Laban, va păng, Y-Yakôb hăn êp ro gay rlă an lŭ bơh bâr ntu dak, jêh ri ăn mpôl phung biăp Y-Laban va păng, nhêt dak. 11Y-Yakôb chŭm H'Rachel jêh ri nter nhĭm, 12jêh ri Y-Yakôb nkoch ăn ma H'Rachel gĭt păng jêng phung mpôl băl đah mbơ̆ păng, jêng kon bu klâu H'Rêbêka. H'Rachel nchuăt sĭt mbơh nau nây ma mbơ̆ păng.
13Tơlah Y-Laban tăng nau nkoch bri tât ma Y-Yakôb, kon bu klâu oh bu ur păng, păng nchuăt ran tâm mâp, ut chŭm păng, jêh ri njŭn leo sĭt ta ngih păng. Y-Yakôb nkoch bri ma Y-Laban lĕ nau tât. 14Y-Laban lah: “Di ngăn mon jêng noi deh du mham đah gâp.” Y-Yakôb gŭ ndrel ma păng du khay.
Y-Yakôb nđăp đah H'Lêa jêh ri H'Rachel
15Geh du nar Y-Laban ngơi đah Y-Yakôb: “Nđâp lah may jêng ndŭl mpôl gâp, mâm may pah kan dơm dam ma gâp? May ăn ma gâp gĭt ndah âk prăk nkhôm pah kan?” 16Rnôk nây, Y-Laban geh bar hê kon bu ur: nur amoh H'Lêa, oh păng amoh H'Rachel. 17H'Lêa geh măt ra ai, bi muh măt nđâp ma săk jăn H'Rachel ueh ngăn. 18Y-Yakôb rŏng ma H'Rachel jêh ri ngơi đah Y-Laban: “Gâp dăn pah kan ma may pơh năm, yor H'Rachel, kon bu ur mpô̆t may.” 19Y-Laban plơng lah: “Ueh lơn gâp ăn păng ma may, đah gâp ăn păng ma bu klâu êng. Gŭ hom ndrel ma gâp.” 20Yorlah H'Rachel, Y-Yakôb hŏ kơl pah kan tâm pơh năm jêh. Ƀiălah yor rŏng H'Rachel, Y-Yakôb uănh pơh năm aơ nâm bu bar pe nar.
21Jêh nây, Y-Yakôb nkah ma Y-Laban: “Gâp hŏ pah kan lôch năm jêh, dăn va jao ur ma gâp gay ma gâp dơi gŭ ndrel ma păng.” 22Y-Laban nkra du nau nhêt sa jêh ri jă lĕ rngôch bunuyh ta ntŭk nây tât râng ndrel. 23Ƀiălah tâm măng nây păng njŭn H'Lêa, kon bu ur păng, tât ma Y-Yakôb, jêh nây Y-Yakôb gŭ ndrel H'Lêa. 24Y-Laban ăn đŏng H'Silpa jêng bu ur kơl kan hăn tĭng H'Lêa, kon bu ur păng. 25Ang ôi taơ rĭ mơ Y-Yakôb gĭt nây jêng H'Lêa. Păng ôp Y-Laban: “Moh nau may hŏ ƀư ma gâp kơt aơ? Mâu di hĕ gâp pah kan ma ngih may gay geh H'Rachel? Mâm ƀư may ndơm gâp?” 26Y-Laban ơh: “Ta n'gor aơ mâu vay ôh ăn oh lor đah ăn nur. 27Ăn may gŭ ndrel ma H'Lêa lôch du pơh tâm nđăp aơ, jêh nây gâp mra ăn đŏng H'Rachel ma may; ƀiălah may gŭ pah kan ntop tay pơh năm ma gâp đŏng.” 28Y-Yakôb ƀư tĭng nau ngơi nây, gŭ ndrel ma H'Lêa lôch du pơh tâm nđăp nây, jêh nây Y-Laban ăn đŏng H'Rachel, kon bu ur păng, jêng ur Y-Yakôb. 29Y-Laban ăn đŏng H'Bilha hăn tĭng H'Rachel gay kơl kan, kon bu ur păng. 30Y-Yakôb hăn gŭ ndrel ma H'Rachel, jêh ri rŏng ma H'Rachel âk lơn ma H'Lêa. Pôri, Y-Yakôb pah kan tay ma Y-Laban pơh năm.
Phung kon Y-Yakôb jêh ri H'Lêa
31Brah Yêhôva saơ Y-Yakôb mâu lăng rŏng ôh ma H'Lêa, yor ri Păng dơi ăn H'Lêa deh kon, bi H'Rachel jêng bu ur mâu bă kon. 32H'Lêa ntreo jêh ri deh du huê kon bu klâu, amoh păng Y-Ruben#29:32 Ruben: Ntơ aơ geh bâr nau ngơi tâm ban rplay ngơi Hêbrơ nâm ntĭt jêng “Uănh ri, du huê bu klâu!”. jêh ri lah: “Brah Yêhôva uănh jêh ma nau rngot gâp, aƀaơ sai gâp mra rŏng ma gâp.” 33Păng ntreo đŏng jêh ri deh du huê kon bu klâu, amoh păng Y-Simêôn#29:33 Simêôn: Ntơ aơ geh bâr nau ngơi tâm ban rplay ngơi Hêbrơ nâm ntĭt jêng “iăt”. jêh ri lah: “Brah Yêhôva tăng jêh bu mâu lăng rŏng ôh ma gâp, Păng ăn tay kon bu klâu aơ ma gâp.” 34Păng ntreo jêh ri deh đŏng ma du huê kon bu klâu. Păng lah: “Aƀaơ aơ, sai gâp mra tâm krêp đah gâp, yorlah gâp hŏ deh ăn ma păng pe nuyh kon bu klâu.” Yor ri, bu tâm amoh păng Y-Lêvi.#29:34 Lêvi: Ntơ aơ geh bâr nau ngơi tâm ban rplay ngơi Hêbrơ nâm ntĭt jêng “tâm krêp”. 35Păng ntreo jêh ri deh đŏng ma du huê kon bu klâu. Păng lah: “Tơ̆ aơ gâp tâm rnê ma Brah Yêhôva.” Yor ri, păng tâm amoh kon nây Y-Yuđa.#29:35 Y-Yuđa: Ntơ aơ geh bâr nau ngơi tâm ban rplay ngơi Hêbrơ nâm ntĭt jêng “tâm rnê”. Jêh nây, păng rlu deh kon.
Currently Selected:
Nau Ntơm 29: CMO2023
Highlight
Share
Copy
Want to have your highlights saved across all your devices? Sign up or sign in
© 2023 United Bible Societies. All rights reserved.
