Nau Ntơm 30
30
Phung kon H'Bilha
1Tơlah H'Rachel saơ păng mâu deh ôh kon ma Y-Yakôb, păng mâu nach ma nur păng, jêh ri lah ma Y-Yakôb: “Ăn may ăn ma gâp geh kon, lah mâu gâp khĭt ro!” 2Y-Yakôb ji nuih lah ma H'Rachel: “Ơm gâp geh nau dơi ntrok Brah Ndu jêng Nơm mâu ăn ma ay deh kon hĕ?” 3H'Rachel lah: “Aơ geh H'Bilha bu ur kơl kan gâp, ăn may hăn gŭ ndrel păng, gay ma păng dơi deh kon ntrok ma gâp#30:3 Nrn: deh ta kômâk gâp. jêh ri bơh păng dĭng gâp mra geh phung kon đŏng.” 4Pôri, H'Rachel ăn H'Bilha bu ur kơl kan păng jêng ur yông Y-Yakôb, jêh ri Y-Yakôb hăn gŭ ndrel păng. 5H'Bilha ntreo jêh ri deh du huê kon bu klâu ma Y-Yakôb. 6H'Rachel lah: “Brah Ndu hŏ treng uănh ma gâp jêh, tăng jêh bâr gâp, jêh ri ăn ma gâp du huê kon bu klâu.” Yor nây, păng tâm amoh kon nây Y-Dan.#30:6 Dan: Ntơ aơ geh bâr nau ngơi tâm ban rplay ngơi Hêbrơ nâm ntĭt jêng “Păng hŏ sek uănh nau sŏng”. 7H'Bilha, bu ur kơl kan H'Rachel, ntreo tay jêh ri deh đŏng ma Y-Yakôb du huê kon bu klâu tal bar. 8H'Rachel lah: “Gâp hŏ tâm lơh ktang ngăn đah nur gâp, jêh ri gâp lĕ dơi jêh.” Yor ri, păng ntơ amoh kon nây Y-Naptali.#30:8 Naptali: Ntơ aơ geh bâr nau ngơi tâm ban rplay ngơi Hêbrơ nâm ntĭt jêng “nau tâm lơh gâp”.
Phung kon H'Silpa
9Tơlah H'Lêa saơ jêh păng rlu ntreo, păng sŏk H'Silpa jao ma Y-Yakôb jêng ur yông păng. 10H'Silpa, bu ur kơl kan H'Lêa, deh ma Y-Yakôb du huê kon bu klâu. 11H'Lêa lah: “Ƀŭn lap ngăn!” Jêh nây păng ntơ amoh kon se nây jêng Y-Gat.#30:11 Gat: Ntơ aơ tâm nau ngơi Hêbrơ nâm ntĭt jêng “ƀŭn lap”. 12H'Silpa, bu ur kơl kan H'Lêa, deh du huê kon bu klâu tal bar ma Y-Yakôb. 13H'Lêa lah: “Maak ngăn gâp! Yorlah phung bu ur mra rnha gâp nơm geh nau ueh uĭn.” Păng tâm amoh kon se nây jêng Y-Aser.#30:13 Aser: Ntơ aơ tâm nau ngơi Hêbrơ nâm ntĭt jêng “nau maak”.
Phung kon bu klâu H'Lêa êng êng
14Tâm yan kăch ba ƀlê, Y-Ruben hăn tâm mir, joi saơ play pom bri,#30:14 Du ntil play tơm si bunuyh gŭ ta ntŭk nây sĭt mĭn jêng tơlah sa păng mra geh pă ntreo; uănh Mprơ Ueh 7:13. jêh ri păng djôt play nây ăn H'Lêa me păng. H'Rachel lah ma H'Lêa: “Ăn ma gâp pă play pom bri kon ay.” 15Ƀiălah H'Lêa lah: “Ê tŏng hĕ ay pĭt sŏk jêh sai gâp? Aƀaơ ay hôm ŭch sŏk play pom bri bơh kon gâp đŏng?” H'Rachel lah: “Pôri, gâp mra ăn Y-Yakôb bê̆ch ndrel ay măng aơ gay ma gâp dơi geh play pom bri kon ay.” 16Tât kêng măng, nôk Y-Yakôb sĭt ta bơh mir, H'Lêa hăn chuă păng jêh ri lah: “May văch hom bê̆ch ndrel ma gâp, yorlah gâp lĕ rgâl jêh may ma play pom kon gâp.” Pôri, Y-Yakôb bê̆ch ndrel ma H'Lêa tâm măng nây. 17Brah Ndu dơn nau H'Lêa. Păng ntreo jêh ri deh kon bu klâu tal prăm ma Y-Yakôb. 18H'Lêa lah: “Brah Ndu nkhôm jêh ma gâp, yorlah gâp ăn jêh bu ur kơl kan gâp ma sai gâp.” Păng tâm amoh ma kon se nây Y-Isakar.#30:18 Isakar: Ntơ aơ geh bâr nau ngơi tâm ban rplay ngơi Hêbrơ nâm ntĭt jêng “prăk pah kan”. 19H'Lêa ntreo đŏng jêh ri deh kon bu klâu tal prao ma Y-Yakôb. 20H'Lêa lah: “Brah Ndu hŏ ăn du ntil ndơ khlay ngăn ma gâp. Aƀaơ sai gâp mra yơk ngăn ma gâp yorlah gâp hŏ deh ăn ma păng prao nuyh kon bu klâu.” Păng ntơ amoh Y-Sabulôn.#30:20 Sabulôn: Ntơ aơ geh bâr nau ngơi tâm ban rplay ngơi Hêbrơ nâm ntĭt jêng “yơk tông”. 21Jêh nây, păng deh du huê kon bu ur jêh ri ntơ amoh H'Dina.
H'Rachel deh Y-Yôsep
22Brah Ndu kah gĭt ma H'Rachel, dơn nau păng jêh ri ăn păng deh kon. 23Păng ntreo jêh ri deh du huê kon bu klâu. Păng lah: “Brah Ndu hŏ sŏk lơi jêh nau bêk prêng ma gâp.” 24Păng amoh kon se nây Y-Yôsep#30:24 Yôsep: Ntơ aơ geh bâr nau ngơi tâm ban rplay ngơi Hêbrơ nâm ntĭt jêng “ntop”. jêh ri lah: “Dăn Brah Ndu ntop an ma gâp du huê kon bu klâu đŏng!”
Y-Yakôb ƀư tâm rnglăp đah Y-Laban
25Jêh H'Rachel deh Y-Yôsep, Y-Yakôb lah ma Y-Laban: “Dăn may ăn gâp hăn gay gâp dơi plơ̆ sĭt ta ƀon tơm gâp, tâm n'gor gâp. 26Dăn ăn ma gâp leo bar hê ur gâp jêh ri phung kon gâp gay gâp hăn du luh. May hŏ gĭt jêh gâp yor ŭch geh khân păng, dĭng gâp pah kan jêh ma may.” 27Y-Laban lah: “Ŭch ma may geh nau yô̆ tanăp măt gâp! May gĭt Brah Yêhôva ăn jêh nau ueh uĭn ma may yor gâp.” 28Păng lah tay: “May lah hom ndah âk prăk pah kan, gâp mra nkhôm.” 29Y-Yakôb lah: “May gĭt jêh mâm nau gâp kơl may, jêh ri yor tă bơh gâp dĭng phung mpô mpa may rong hŏ bĭk rơ̆ jêh. 30Êlor gâp tât, mpô mpa may rong geh djê̆ dơm, ƀiălah aƀaơ păng bĭk jêng âk râk. Ta moh ntŭk mbang jâng gâp tât, Brah Yêhôva ăn nau ueh uĭn ma may ta ntŭk nây.#30:30 Mlr: Yorlah may Brah Yêhôva ăn nau ueh uĭn ma gâp. Pôri, ndah jŏ gâp dơi geh ndơ gay mĭn ma rnăk sa gâp nơm?” 31Y-Laban lah: “Moh ndơ gâp mra ăn ma may aơ?” Y-Yakôb ơh: “Mbơ̆ lơi ôh ăn ndơ ma gâp. Tơlah may dơn nau aơ, gâp mra chiăp rong đŏng mpô mpa ma may. 32Nar aơ, may ăn kon mât mray lĕ rngôch mpô mpa may rong jêh ri rnglah êng lĕ rngôch biăp jêh ri lĕ rngôch be geh rvanh ƀrưnh, geh ƀlak, tâm ban đŏng lĕ rngôch biăp geh krăk. Nây mra jêng ndơ nkhôm ma gâp. 33Pakơi taơ, nôk may sek uănh nau nkhôm ma gâp, nau sŏng gâp mra jêng nau tâm mbơh ma gâp. Tơlah tâm phung mpô mpa gâp mât, lĕ phung be mâu geh rvanh jêh ri ƀlak, mâu lah phung biăp kon mâu geh krăk mra kơp jêng ndơ ntŭng.” 34Y-Laban lah: “Ueh jêh! Gâp sŏk dơn nau may ngơi.” 35Ƀiălah tâm nar nây đŏng, Y-Laban tâm nkhah phung be nkuăng geh rvanh jêh ri ƀlak, phung be me rvanh jêh ri ƀlak, lĕ rngôch phung mpa geh ƀlak nglang jêh ri phung biăp kon geh rsau krăk, jêh nây păng jao ndơ nây ma phung kon bu klâu păng gay mât chiăp. 36Păng ăn Y-Yakôb gŭ ngai đah păng klăp lah tâm pe nar hăn trong. Y-Yakôb chiăp lĕ phung mpô mpa Y-Laban hôm e rong.
37Y-Yakôb joi lĕ n'gĭng ndrêh tơm si pôplar, amandê jêh ri platan, păng n'huk ntâu si tĭng trong rvanh gay mpơl ntŭk nglang tâm n'gĭng si nây. 38Păng dơm n'gĭng si lĕ n'huk ntâu jêh tâm bong ăn dak, panăp phung mpô mpa, jêng ntŭk khân păng văch tât nhêt dak. Yorlah phung mpô mpa vay tâm jơng băl dôl tât nhêt dak 39yor ri khân păng uănh lĕ n'gĭng si nây n'ho tâm gar jêh ri khân păng deh kon jêh ri deh lĕ phung mpô mpa geh mpor rvanh, geh ƀrưnh jêh ri ƀlak. 40Y-Yakôb tâm nkhah lĕ phung biăp me ăn êng jêh ri ăn khân păng rle măt mpeh let phung biăp rvanh jêh ri krăk tâm phung mpô mpa Y-Laban. Păng ƀư kơt nây gay păng geh du mpôl mpô mpa rong êng ma păng, mâu dơm nsum ôh đah mpôl mpô mpa Y-Laban. 41Ăp tơ̆ phung mpa lay dăng lơn tâm gar, Y-Yakôb dơm lĕ n'gĭng si lĕ n'huk ntâu jêh tâm bong ăn dak, tanăp măt khân păng, gay ma khân păng tâm gar tanăp lĕ n'gĭng si nây. 42Ƀiălah lĕ phung mpa rgay păng mâu dơm ôh n'gĭng si nây; pôri, lĕ phung mpa rgay jêng ndơ Y-Laban, bi ma phung mpa lay dăng lơn jêng ndơ Y-Yakôb. 43Kơt nây, Y-Yakôb lơ hao ndrŏng lơ hô jêng, geh âk phung mpô mpa rong, phung kơl kan bu ur, bu klâu, seh samô jêh ri seh bri.
Currently Selected:
Nau Ntơm 30: CMO2023
Highlight
Share
Copy
Want to have your highlights saved across all your devices? Sign up or sign in
© 2023 United Bible Societies. All rights reserved.
