Nau Ntơm 32
32
Y-Yakôb ndrăp mâp tay đah Y-Êsau
1Y-Yakôb dâk hăn tay; phung tông mpăr Brah Ndu tâm mâp đah păng. 2Nôk saơ khân păng nây, Y-Yakôb lah: “Aơ jêng ntŭk rmlak tahan Brah Ndu!” Yor ri păng rnha ntŭk nây Mahanaim.#32:2 Mahanaim: Ntơ aơ tâm nau ngơi Hêbrơ nâm ntĭt jêng “bar ntŭk rmlak tahan”.
3Y-Yakôb đă bunuyh hăn mbơh lor ma păng gay mâp Y-Êsau, nâu păng, ta n'gor Sêir tâm nkual Êđôm. 4Păng ntĭnh khân păng: “Ăn khân may lah ma Y-Êsau, kôranh gâp pô aơ Y-Yakôb, oh mon may, geh lah: ‘Gâp hŏ gŭ njưh jêh ta ngih Y-Laban jêh ri gŭ n'ho ta nây tât nar aơ. 5Gâp geh ndrôk, seh bri, be biăp, phung kơl kan bu klâu jêh ri phung kơl kan bu ur. Gâp đă bunuyh hăn ngơi lor ma may gay may dơi maak vơt dơn gâp.’”
6Phung mbơh plơ̆ sĭt lah ma Y-Yakôb: “Hên hŏ hăn tâm mâp jêh đah nâu may Y-Êsau. Aƀaơ păng hăn vơt may ndrel ma puăn rhiăng nuyh.” 7Y-Yakôb klach dŭt n'hâm jêh ri rvê ngăn. Păng tâm pă phung bunuyh ndrel păng nđâp ma phung be biăp, ndrôk, seh samô jêng bar phung. 8Păng mĭn: “Tơlah Y-Êsau hăn tât jêh ri rduh lơh phung aơ jêh ri phung ri mra nchuăt klaih.”
9Y-Yakôb mbơh sơm: “Ơ Brah Ndu Y-Abraham, chô yau gâp! Brah Ndu Y-Isăk, mbơ̆ gâp! Ơ Brah Yêhôva, Nơm hŏ lah jêh ma gâp pô aơ: ‘Sĭt hom ma ƀon tơm may jêh ri ma phung mpôl băl may. Gâp mra ƀư ueh ma may.’ 10Gâp mâu khư ôh đah nau rŏng jêh ri nau răp jăp May hŏ prăp jêh ma oh mon May. Nôk gâp rgăn dak krong Y-Yurdan gâp geh knŏng mâng jra dơm, ƀiălah nar aơ gâp hŏ geh bar phung bunuyh jêh ri drăp ndơ aơ. 11Ơ Brah Ndu, dăn rklaih an kon bơh ti Y-Êsau, nâu gâp, yorlah gâp klach păng mra văch nkhĭt gâp nđâp ma ur jêh ri phung kon gâp đŏng. 12Ƀiălah May nơm hŏ ton jêh ma gâp: ‘Nanê̆ May mra ƀư ueh ma gâp jêh ri ƀư ma noi deh gâp âk tâm ban ma choih dak mƀŭt, bu mâu dơi kơp ôh yor dŭt âk.’”#Ntơm 22:17.
13Păng bê̆ch măng ta nây, jêh nây săch tâm lĕ ntil ndơ păng geh gay ƀư ndơ ăn ma Y-Êsau, nâu păng. 14Ndơ ăn geh: Bar rhiăng be me jêh ri bar jât be nkuăng; bar rhiăng biăp me jêh ri bar jât biăp nkuăng; 15pe jât seh samô me jêh ri phung kon hôm pu; puăn jât ndrôk me jêh ri jât ndrôk nkuăng; bar jât seh bri me, jêh ri jât seh bri nkuăng. 16Jêh nây păng jao tâm ti phung kơl kan păng ăp phung êng êng jêh ri ntĭnh khân păng: “Hăn hom khân may hăn lor ma gâp jêh ri kah gĭt hăn tâm ƀah phung mpô mpa aơ đah phung mpô mpa ri.” 17Păng ntĭnh ma nơm hăn lor: “Nôk Y-Êsau, nâu gâp, mâp đah may jêh ri ôp: ‘Mbu kôranh may? Mbah ntŭk may hăn? Mbu moh mpô mpa hăn tanăp may nĕ?’ 18Ăn may nsĭt lah: ‘Phung mpô mpa aơ jêng ndơ oh mon may Y-Yakôb. Aơ jêng ndơ păng njuăl ăn ma Y-Êsau kôranh gâp; jêh ri aơ, nđâp ma păng lĕ hăn pakơi hên.’” 19Y-Yakôb ntĭnh đŏng ma phung tal bar, tal pe jêh ri lĕ rngôch ma phung tĭng mât mpô mpa nây pô aơ: “Ăn khân may ngơi kơt nây ma Y-Êsau, lah khân may tâm mâp đah păng, 20jêh ri lah: ‘Ri, oh mon may Y-Yakôb, hăn pakơi hên.’” Yorlah Y-Yakôb mĭn êng: “Gâp njuăl lĕ ndơ ăn nây hăn lor ma gâp gay ƀư ma Y-Êsau bah ji nuih, jêh nây dĭng mâp muh măt; klăp lah păng mra vơt dơn gâp ueh.” 21Pôri, ndơ njuăl ăn hăn lor, bi Y-Yakôb bê̆ch măng nĕ tâm ntŭk rmlak păng.
22Tâm măng nây Y-Yakôb dâk bê̆ch, leo bar hê ur păng, bar hê bu ur kơl kan jêh ri jât nguay kon păng hăn rgăn ta ntŭk thơl dak krong Jabôk. 23Păng njŭn phung nây nđâp drăp ndơ păng hăn rgăn dak.
Y-Yakôb tâm nhăt đah tông mpăr ta yôk Pêniêl
24Tâm nôk Y-Yakôb gŭ êng păng geh du huê bunuyh tâm nhăt đah păng kŏ tât phit ang.#Ôsê 12:3-4. 25Nôk tâm nhăt, bunuyh nây saơ păng mâu dơi lơh rĭ dĭng păng lơh Y-Yakôb ta nting gang bŭt, ƀư ma nting gang bŭt păng tât glet. 26Bunuyh nây lah: “Trôk lĕ ang jêh, ăn gâp hăn hom.” Ƀiălah Y-Yakôb lah: “Gâp mâu ăn ôh may hăn, tơlah may mâu ăn nau ueh uĭn ma gâp.” 27Bunuyh nây ôp: “Mâm moh săk may?” Păng nsĭt lah: “Amoh gâp Y-Yakôb.” 28Bunuyh nây lah: “Săk may mâu hôm mra jêng Y-Yakôb ôh, ƀiălah jêng Y-Israel,#32:28 Israel: Ntơ aơ geh bâr nau ngơi tâm ban rplay ngơi Hêbrơ nâm ntĭt jêng “bunuyh nhăt đah Brah Ndu”. yorlah may hŏ tâm nhăt jêh đah Brah Ndu jêh ri đah bu, jêh ri may dơi da dê.”#Ntơm 35:10. 29Y-Yakôb ôp: “Dăn ăn gâp gĭt amoh May.” Bunuyh nây ơh: “Mâm ƀư may ôp amoh gâp?” Jêh nĕ bunuyh nây ăn nau ueh uĭn ma Y-Yakôb ta nây ro.#Phat Dôih 13:17-18. 30Y-Yakôb ntơ ntŭk nây Pêniêl,#32:30 Pêniêl: Ntơ aơ geh bâr nau ngơi tâm ban rplay ngơi Hêbrơ nâm ntĭt jêng “măt Brah Ndu”. jêh ri păng rblang: “Yorlah gâp lĕ saơ jêh Brah Ndu măt đah măt ƀiălah nau rêh gâp ăt geh nau đăp mpăn.” 31Nôk păng hăn rgăn Pênuel, nar luh jêh, jâng păng chuat hăn tĭl dĭt yorlah glet nting gang bŭt. 32Yor nây, tât nar aơ phung Israel mâu sa ôh suan gang bŭt, ta ntŭk plăch nting gang bŭt, yorlah bunuyh nây lơh jêh ta nting gang bŭt Y-Yakôb, ntŭk suan gang bŭt.
Currently Selected:
Nau Ntơm 32: CMO2023
Highlight
Share
Copy
Want to have your highlights saved across all your devices? Sign up or sign in
© 2023 United Bible Societies. All rights reserved.
