Nau Ntơm 33
33
Y-Yakôb jêh ri Y-Êsau tâm mâp ndrel
1Y-Yakôb n'gơr măt uănh, jêh ri saơ, Y-Êsau leo ndrel ma puăn rhiăng bunuyh hăn tât. Y-Yakôb tâm pă phung kon ma H'Lêa, H'Rachel, jêh ri ma bar hê bu ur kơl kan. 2Păng dăp phung bu ur kơl kan jêh ri phung kon khân păng hăn lor, jêh nây H'Lêa ndrel ma phung kon păng, jêh ri pakơi dŭt H'Rachel jêh ri Y-Yôsep. 3Bi păng nơm hăn lor rlet phung nây, păn ta neh pơh tơ̆, kŏ tât dăch ma nâu păng.
4Ƀiălah Y-Êsau nchuăt hăn vơt, ut ta trô ko Y-Yakôb, chŭm păng, jêh nây khân păng nhĭm. 5Y-Êsau n'gơr măt saơ phung bu ur jêh ri kon se jê̆, Y-Êsau ôp: “Mbu phung hăn ndrel ma may aơ?” Y-Yakôb plơ̆ sĭt lah: “Nây jêng phung kon Brah Ndu geh nau yô̆ hŏ ăn jêh ma oh mon may.” 6Bar hê oh mon bu ur ndrel ma phung kon khân păng văch dăch Y-Êsau jêh ri păn măt ta neh. 7Jêh nây H'Lêa jêh ri phung kon păng văch dăch, chon mon ta neh, jêh ri dăch dŭt, Y-Yôsep jêh H'Rachel văch dăch đŏng, jêh ri chon mon ta neh. 8Y-Êsau ôp: “Moh nau may ŭch ƀư ma phung mpô mpa gâp mhe mâp nây?” Y-Yakôb nsĭt lah: “Nây jêng gay may dơi yô̆ nđach an.” 9Y-Êsau lah: “Ơ oh, gâp geh âk jêh, prăp hom ma may nơm ndơ may geh.” 10Y-Yakôb lah: “Mâu, gâp dăn ma may. Tơlah gâp geh nau yô̆ tanăp măt may, ăn may sŏk dơn ndơ gâp ăn bơh ti gâp. Dơi saơ muh măt may tâm ban ma gâp saơ muh măt Brah Ndu, yorlah may hŏ dơn jêh gâp ma nau yô̆. 11Gâp dăn ma may sŏk hom ndơ gâp ăn ma may, yorlah Brah Ndu hŏ yô̆ nđach gâp, jêh ri ăn ma gâp geh rĭng ăp ndơ jêh.” Păng nchâp ngăn jêh ri Y-Êsau sŏk dơn.
12Y-Êsau lah: “Kay lŏng, ăn he hăn hom! Gâp mra hăn lor ma may.” 13Y-Yakôb lah: “Nâm bu kôranh gĭt jêh, phung kon se jêng ra ai ngăn, ƀiălah gâp mât đŏng phung biăp me jêh ri ndrôk me hôm e kon pu toh. Tơlah ntrŭt ndal khân păng hăn gơnh, nđâp lah knŏng du nar dơm, lĕ rngôch mpô mpa nây mra khĭt. 14Dăn kôranh hăn lor ma oh mon kôranh, bi gâp mra hăn mbrơi mbrơi, tĭng groi jâng mpô mpa jêh ri tĭng groi jâng phung kon se jê̆, kŏ tât gâp mâp đah kôranh gâp ta Sêir.” 15Y-Êsau lah: “Pôri gâp om bar pe nuyh tahan gâp hăn ndrel ma may yơ̆.” Y-Yakôb plơ̆ sĭt lah: “Ƀiălah moh ndơ ƀư? Gâp knŏng ŭch geh nau yô̆ tanăp măt kôranh gâp ri dơm!” 16Tâm nar nây, Y-Êsau plơ̆ sĭt ta Sêir. 17Ƀiălah Y-Yakôb hăn ta Sukôt, ndâk du mlâm ngih ma păng nơm jêh ri ƀư ndrung ma mpô mpa păng. Yor ri păng rnha ntŭk nây Sukôt.#33:17 Sukôt: Ntơ aơ tâm nau ngơi Hêbrơ nâm ntĭt jêng “ngih bok”.
18Jêh plơ̆ sĭt tă bơh n'gor Padan Aram, Y-Yakôb tât ta ƀon toyh Sichem, tâm n'gor Kanaan, ma nau đăp mpăn. Păng ndâk ntŭk rmlak tâm tham đah ƀon toyh, 19jêh ri rvăt lôk neh bơh phung kon sau Y-Hamôr, mbơ̆ Y-Sichem,#Yôs 24:32; Yôh 4:5. rnoh du rhiăng rnglay prăk, ta ntŭk păng dôl ndâk ngih bok. 20Ta aơ, Y-Yakôb ndâk du mlâm nơng ƀư brah jêh ri rnha amoh jêng Êl Êlôhê Israel.#33:20 Êl Êlôhê Israel: ntĭt jêng “Brah Ndu jêng Kôranh Brah Israel”.
Currently Selected:
Nau Ntơm 33: CMO2023
Highlight
Share
Copy
Want to have your highlights saved across all your devices? Sign up or sign in
© 2023 United Bible Societies. All rights reserved.
