Nau Ntơm 35
35
Y-Yakôb plơ̆ sĭt ta Bêthel
1Brah Ndu lah ma Y-Yakôb: “Hăn gơnh hao ta ƀon Bêthel jêh ri gŭ ta nây. Rdâk đŏng ta nây du nơng ƀư brah ma Brah Ndu, Nơm hŏ tâm mpơl jêh ma may rnôk may nchuăt du bơh nâu may jêng Y-Êsau.”#Ntơm 28:11-17. 2Y-Yakôb lah ma ngih păng jêh ri lĕ rngôch phung hăn ndrel ma păng: “Chalơi hom lĕ rup brah bu năch luh bơh khân may. Ƀư kloh hom khân may nơm jêh ri rgâl lơi kho ao khân may. 3He ndrăp hom hăn hao ta Bêthel. Gâp mra ndâk du nơng ƀư brah ma Brah Ndu, jêng Nơm hŏ dơn jêh nau gâp tâm nar gâp uh ah, jêh ri kâp kơl gâp tâm ăp trong gâp sak nsong.” 4Khân păng ndơ̆ ro ma Y-Yakôb lĕ rngôch rup brah bu năch ndơ khân păng hôm mât, tâm ban đŏng lĕ thek khân păng mblo ta tôr. Y-Yakôb tâp brôi lĕ ndơ nây tâm dâng tơm guyh dăch ƀon Sichem.
5Rnăk vâl Y-Yakôb hăn trong. Brah Ndu ăn nau klach ta lĕ rngôch ƀon jŭm nây, pôri mâu geh ôh du huê nuyh tâm phung nây nănh tĭng phung kon Y-Yakôb. 6Y-Yakôb jêh ri lĕ phung hăn tĭng păng tât ta Lus (jêng ƀon Bêthel), tâm n'gor Kanaan. 7Păng ndâk ta nây du mlâm nơng ƀư brah jêh ri ntơ ntŭk nây jêng Êl Bêthel,#35:7 Êl Bêthel: ntĭt jêng “Brah Ndu Bêthel”. yorlah ta nây Brah Ndu tâm mpơl jêh ma păng dôl păng nchuăt du bơh nâu păng.
8Rôk nây H'Dêbôra khĭt, bu ur nơm mpu jêh H'Rêbêka, bu tâp păng tâm dâng tơm guyh ta ƀon Bêthel. Yor ri, bu rnha tơm si nây Alôn Bakut.#35:8 Alôn Bakut: ntĭt jêng “tơm si guyh nhĭm nhhiăng”.
9Tơlah Y-Yakôb sĭt bơh Padan-aram, Brah Ndu tâm mpơl tay ma Y-Yakôb jêh ri ăn nau ueh uĭn ma păng. 10Brah Ndu lah: “Moh săk may jêng Y-Yakôb, ƀiălah may mâu dơi kuăl Y-Yakôb đŏng ôh, ƀiălah amoh may mra jêng Y-Israel.” Jêh nây Brah Ndu ntơ amoh păng Y-Israel.#Ntơm 32:28. 11Brah Ndu lah tay ma păng: “Gâp jêng Brah Ndu Geh Lĕ Nau Brah; ăn deh hom kon jêh ri bĭk rơ̆ âk râk. Du phung ƀon lan jêh ri du phung ƀon lan toyh mra luh tă bơh may, jêh ri tă bơh noi deh may mra luh phung hađăch.#Ntơm 17:4-8. 12N'gor gâp hŏ ăn jêh ma Y-Abraham jêh ri ma Y-Isăk, Gâp mra ăn đŏng ma may jêh ri ma noi deh may.”
13Jêh nây Brah Ndu hao klơ du bơh ntŭk Păng hŏ ngơi jêh ma Y-Yakôb. 14Y-Yakôb ndâk du n'gâng lŭ ta ntŭk Brah Ndu hŏ ngơi jêh đah păng, ƀư ndơ nhhơr nhêt #35:14 Mlr: Nau rƀŭn djrah ndrănh. jêh ri nkhŭt dak ngi klơ nây.#Ntơm 28:18-19. 15Pôri Y-Yakôb rnha ntŭk Brah Ndu ngơi jêh đah păng jêng Bêthel.#35:15 Bêthel: ntĭt jêng “Ngih Brah Ndu”.
H'Rachel deh Y-Benjamin jêh ri păng khĭt
16Rnăk vâl Y-Yakôb dâk hăn du luh tă bơh Bêthel. Lah khân păng hôm ngai ê tât ôh ta ƀon Êphrata, H'Rachel ntơm ji deh jêh ri deh jêr ngăn. 17Dôl păng hôm ji hô, n'hŭm lah ma păng: “Lơi klach ôh yorlah ay mra geh tay du huê kon bu klâu.” 18Tâm nôk ntơm roh n'hâm, bơi khĭt, păng ntơ amoh kon bu klâu nây jêng Y-Ben-Ôni.#35:18 Ben-Ôni: Ntơ aơ tâm nau ngơi Hêbrơ nâm ntĭt jêng “kon bu klâu nau ji gâp”. Ƀiălah mbơ̆ păng ntơ amoh păng Y-Benjamin.#35:18 Benjamin: ntĭt jêng “kon bu klâu ti ma gâp”. 19H'Rachel khĭt, bu tâp păng ta meng trong Êphrata, nây jêng ƀon Ƀêtlêhem.#35:19 Ƀêtlêhem: ntĭt jêng “ngih piăng let”. 20Y-Yakôb ndâk du plơp lŭ môch; nây jêng du plơp lŭ môch H'Rachel hôm tât nar aơ. 21Y-Israel dâk hăn jêh ri hăn rlau jêh ngih tŭm Êder, jêh ri ndâk ro ngih bok.
22Tâm rnôk Y-Israel gŭ ta n'gor nây, Y-Ruben hăn bê̆ch ndrel ma H'Bilha, ur yông mbơ̆ păng. Y-Israel tăng nau nây.#35:22 Du rnoh nau rblang ơm geh ntop: jêh ri hao nuih.#Ntơm 49:4.
Jât ma bar nuyh kon bu klâu Y-Yakôb.
23Y-Yakôb geh jât ma bar nuyh kon bu klâu. Phung kon bu klâu H'Lêa jêng Y-Ruben, kon bu klâu dak bôk ma Y-Yakôb, ri mơ tât Y-Simêôn, Y-Lêvi, Y-Yuđa, Y-Isakar, jêh ri Y-Sabulôn. 24Phung kon H'Rachel jêng Y-Yôsep jêh ri Y-Benjamin. 25Phung kon H'Bilha, bu ur kơl kan H'Rachel, jêng Y-Dan jêh ri Y-Naptali; 26jêh ri phung kon H'Silpa, bu ur kơl kan H'Lêa, jêng Y-Gat jêh ri Y-Aser. Nây jêng phung kon bu klâu bu deh Y-Yakôb ta n'gor Padan-aram.
Y-Isăk khĭt ta Mamrê
27Y-Yakôb hăn tât ntŭk Y-Isăk, mbơ̆ păng, ta Mamrê, ta ƀon Kiriat-Arba, nây jêng Hêbron. Aơ jêng ntŭk Y-Abraham jêh ri Y-Isăk hŏ gŭ jêh.#Ntơm 13:18. 28Y-Isăk dơi rêh geh du rhiăng pham jât năm. 29Y-Isăk tăch n'hâm. Păng khĭt, plơ̆ sĭt ma chô yau păng nôk lĕ ranh, hŏ maak jêh tâm nau rêh, jêh ri bar hê kon bu klâu păng jêng Y-Êsau jêh ri Y-Yakôb sâm tâp an păng.
Currently Selected:
Nau Ntơm 35: CMO2023
Highlight
Share
Copy
Want to have your highlights saved across all your devices? Sign up or sign in
© 2023 United Bible Societies. All rights reserved.
