Nau Ntơm 37
37
Y-Yôsep jêh ri phung nâu păng
1Y-Yakôb gŭ tâm n'gor Kanaan jêng n'gor mbơ̆ păng hŏ gŭ jêh. 2Aơ nau nkoch bri ma noi deh Y-Yakôb.
Rnôk nây Y-Yôsep geh jât mpơh năm, vay hăn chiăp biăp ndrel ma phung nâu păng. Păng ƀư băl đah phung kon bu klâu H'Bilha jêh ri H'Silpa, phung ur mbơ̆ păng, Y-Yôsep nkoch ma mbơ̆ khân păng lĕ nau mâu ueh khân păng ƀư. 3Y-Israel rŏng Y-Yôsep âk lơn ma lĕ rngôch kon păng ƀaƀă, yorlah păng jêng kon nglĕ dŭt mbơ̆ păng, rĭ dĭng păng jĭm ma kon păng du blah ao jâr jong ti âk ntil bok. 4Nôk phung nâu păng saơ mbơ̆ khân păng rŏng ma Y-Yôsep âk lơn, khân păng tâm rmot, jêh ri mâu dơi ngơi ueh ôh đah Y-Yôsep.
Nau mbơi Y-Yôsep
5Tâm du măng ri, Y-Yôsep geh nau mbơi jêh ri nkoch bri nau nây ma phung nâu păng, khân păng tâm rmot ma Y-Yôsep âk lơn. 6Y-Yôsep lah: “Dăn iăt gâp nkoch nau mbơi gâp hŏ saơ jêh: 7Nôk he dôl gŭ kât nchăp ba tâm mir, nchăp ba gâp dâk, dâk sŏng, bi lĕ nchăp ba khân may rƀŭn ndrel jŭm păng da dê jêh ri chon mon tanăp nchăp ba gâp.” 8Phung nâu păng lah: “Pôri may ŭch mĭn chiă uănh hên ƀơh? May mra ŭch jêng kôranh hên ngăn lah?” Khân păng tâm rmot ma Y-Yôsep âk lơn yor nau mbơi jêh ri nau păng ngơi.
9Du tơ̆ êng đŏng, Y-Yôsep geh tay nau mbơi jêh ri nkoch bri nau nây ma phung oh nâu păng. Păng lah: “Gâp hôm geh du nau mbơi đŏng. Gâp saơ nar, khay jêh ri jât ma nguay mănh mbing chon mon tanăp măt gâp.” 10Nôk păng nkoch tay nau mbơi nây ma mbơ̆ păng jêh ri ma phung oh nâu păng, mbơ̆ păng nduyh păng jêh ri lah: “Moh nau mbơi may geh kơt nây? Lah ndrĭ ngăn mâu nđâp ma gâp, me may, jêh ri phung oh nâu may mra văch chon mon tanăp măt may ƀơh?” 11Phung nâu tâm rmot ma păng, bi mbơ̆ păng kah gĭt nau ngơi nây.#Kan 7:9.
Phung nâu păng nklăch Y-Yôsep tâm ntu
12Du nar, phung nâu Y-Yôsep hăn chiăp phung mpô mpa mbơ̆ khân păng ta Sichem. 13Y-Israel lah ma Y-Yôsep: “Phung nâu may dôl chiăp mpô mpa ta Sichem ri ƀơh? Văch hom ta aơ gay gâp njuăl may hăn tât ma phung nâu may.” Y-Yôsep ơh: “Gâp ta aơ.” 14Y-Israel lah: “Ăn may hăn uănh phung nâu may, jêh ri phung mpô mpa mâm păng geh nau ueh, jêh nây sĭt mbơh ma gâp.” Păng njuăl Y-Yôsep hăn bơh rlŭng Hêbron.
Lah Y-Yôsep tât ta Sichem, 15geh du huê bunuyh tâm mâp đah păng dôl păng hăn nhhơt tâm mir, jêh ri ôp: “Mbu may joi?” 16Păng ơh: “Gâp hăn joi phung nâu gâp. Dăn may ntĭm an ma gâp mbah ntŭk khân păng chiăp.” 17Bunuyh nây lah: “Khân păng du jêh bơh aơ, yorlah gâp tăng khân păng lah: ‘He hăn trơn hom ta Dôthan.’” Pôri, Y-Yôsep hăn joi phung nâu păng jêh ri mâp khân păng ta Dôthan.
18Lĕ ơm saơ Y-Yôsep bơh ngai jêh ri êlor păng văch dăch, phung nâu păng hŏ mĭn ŭch nkhĭt păng jêh. 19Khân păng tâm lah ndrăng khân păng: “Ri bunuyh bê̆ch mbơi! 20Kay lŏng ăn he nkhĭt păng, klŭp nklăch păng tâm ntu dak, jêh ri lah pô aơ: ‘Du mlâm mpa bri janh sa jêh păng, jêh nây uănh moh nau mra tât ma nau mbơi păng!’ ” 21Ƀiălah tơlah Y-Ruben tăng nau nây, păng joi trong gay rklaih Y-Yôsep bơh ti phung nâu păng. Păng lah: “Lơi he nkhĭt ôh păng. 22He lơi ƀư ôh nau nkhŭt mham. Nklăch hom păng tâm ntu ri ntu tâm bri rdah, ƀiălah lơi ƀư ôh nau mhĭk ma păng.” Y-Ruben lah kơt nây yorlah păng ŭch rklaih Y-Yôsep bơh ti phung nâu păng gay leo păng sĭt ma mbơ̆. 23Nôk Y-Yôsep mhe tât ntŭk phung nâu păng, khân păng doh ao jâr, jêng ao âk ntil bok păng dôl nsoh ta săk, 24jêh nây khân păng nhŭp Y-Yôsep nklăch tâm ntu. Ƀiălah ntu nây sơh, mâu ôh geh dak.
Phung nâu tăch Y-Yôsep ƀư dĭk
25Nôk phung nâu Y-Yôsep dôl hôm gŭ sông sa, khân păng n'gơr măt uănh jêh ri saơ du phung tăch drăp Ismaêl văch tă bơh Gilêat. Seh samô khân păng rdeng bêng ndơ ƀâu kah, dak si ƀâu kah jêh ri dak si tăng trŭnh let Êjipt. 26Y-Yuđa lah ma phung oh nâu păng: “Moh khlay ntil ndơ ma he lah he nkhĭt lơi păng jêh ri pôn mham păng? 27Găp hôm, he tăch păng ma phung Ismaêl jêh ri lơi ƀư ôh nau mhĭk ma păng, yorlah păng jêng oh he, jêng noi deh du mham đah he.” Phung oh nâu păng dơn da dê. 28Nôk phung tăch drăp Madian#37:28 Geh đŏng rnha jêng phung tăch drăp Ismaêl. hăn rgăn ta nây, Phung nâu mphâk Y-Yôsep tă bơh ntu dak jêh nây tăch păng ma phung Madian#37:28 Nrn: phung Ismaêl. ma rnoh bar jât rnglay prăk. Phung nây djôt Y-Yôsep leo ta Êjipt.#Kan 7:9.
29Nôk Y-Ruben plơ̆ tay ta ntu nây, mâu saơ ôh Y-Yôsep gŭ tâm dâng nây, pôri păng nkhêk ao păng nơm, 30nchuăt tât ntŭk phung oh păng jêh ri lah: “Nơm jê̆ mâu hôm saơ roh jêh? Bi gâp, mbah ntŭk gâp mra hăn aƀaơ!”
31Phung nâu Y-Yôsep nkhĭt du mlâm be nkuăng, jêh nây sŏk ao jâr Y-Yôsep trăm ao nây tâm mham. 32Khân păng djôt ao jâr jong ti nây sĭt ma mbơ̆ păng jêh ri lah: “Hên hŏ joi saơ jêh ao aơ. Dăn mbơ̆ uănh hom, gĭt lah jêng ao kon bu klâu may?” 33Y-Yakôb gĭt năl ro ao nây jêh ri lah: “Aơ jêng ao kon bu klâu gâp ngăn! Du mlâm mpa bri janh lĕ sa jêh săk păng! Nanê̆ ngăn, Y-Yôsep hŏ hêk săk jăn luh tĭng rngơl jêh!” 34Y-Yakôb nkhêk kho ao, sŏk bok ƀau mbăn ta bŭt jêh ri rngot klâng ma kon păng jŏ nar. 35Lĕ rngôch phung kon bu klâu jêh ri kon bu ur hăn văch bonh leng păng da dê, ƀiălah păng dun lĕ nau bonh leng. Păng lah: “Gâp rngot klâng kŏ tât trŭnh tâm ƀon phung khĭt n'hanh kon gâp!” Pôri, mbơ̆ păng nhĭm ndăng yor klâng ma Y-Yôsep.
36Phung tăch drăp Madian djôt leo Y-Yôsep tât ta Êjipt, tăch ma Y-Pôtipar, kôranh mât gai tahan gak ma Pharaôn.
Currently Selected:
Nau Ntơm 37: CMO2023
Highlight
Share
Copy
Want to have your highlights saved across all your devices? Sign up or sign in
© 2023 United Bible Societies. All rights reserved.
