Luka 4

Nau brah mhĭk ndơm

(Mathiơ 4:1-11; Markôs 1:12,13)

1Kôranh Brah Yêsu bêng ma Brah Huêng Ueh; Păng plơ̆ sĭt tă bơh dak krong Yurdan jêh ri Brah Huêng Ueh njŭn leo Păng tâm bri rdah. 2Ta nây, brah mhĭk ndơm Păng tâm puăn jât nar. Tâm lĕ nar nây, Păng mâu sông sa ôh; nôk mông nar nây lôch jêh Păng ji ngot. 3Brah mhĭk lah ma Păng: “Tơlah may jêng Kon Brah Ndu, đă hom lŭ aơ plăch jêng piăng let!” 4Brah Yêsu plơ̆ lah: “Geh nau nchih jêh: ‘Bunuyh gŭ rêh mâu di ôh knŏng bơh piăng let dơm.’ ”#Nkah 8:3. 5Brah mhĭk djôt leo Păng ta klơ, nchŏng ma Păng lĕ rngôch ƀon bri hađăch ta neh ntu tâm ƀât lât dơm, 6jêh ri lah: “Gâp mra ăn ma may lĕ rngôch nau dơi jêh ri nau chrêk rmah khân păng, yorlah bu jao jêh ma gâp jêh ri gâp ăn ma mbu nơm tĭng nau mĭn gâp ŭch. 7Pôri, tơlah may yơk mbah gâp, lĕ rngôch mra jêng ndơ may.” 8Brah Yêsu plơ̆ lah: “Geh nau nchih: ‘Ăn may yơk mbah ma Kôranh Brah, jêng Brah Ndu may, jêh ri knŏng pah kan knŏng du huê Păng dơm yơh!’ ”#Nkah 6:13. 9Brah mhĭk njŭn leo đŏng Păng tât ta ƀon Yêrusalem, n'gân Păng ta klơ chor ngih Brah jêh ri lah: “Tơlah may jêng Kon Brah Ndu, ntŭp hom may nơm hăn trŭnh; 10yorlah geh nau nchih:

‘Kôranh Brah mra ntăm ma phung tông mpăr mât njrăng may,

11Phung nây mra kơl rđâng may tâm ti, klach lah jâng may chêh ta lŭ!’ ”#Mprơ Ơm 91:11,12.

12Brah Yêsu plơ̆ lah: “Geh nau lah: ‘May lơi rlong uănh Kôranh Brah, jêng Brah Ndu may ôh.’ ”#Nkah 6:16. 13Jêh dŏng lĕ nau gay ndơm Păng, brah mhĭk du tă bơh Păng, kâp tâm mông găl nôk êng.

Nau pah kan Brah Yêsu ta n'gor Galilê

(4:14 – 9:50)

Brah Yêsu nti lah tâm ƀon Nasaret

(Mathiơ 13:53-58; Markôs 6:1-6)

14Brah Yêsu plơ̆ sĭt ta n'gor Galilê tâm nau brah Brah Huêng Ueh, jêh ri nau lư n'găr Păng lam n'gor lĕ nkual chiau meng. 15Păng ntĭm nti tâm ngih rƀŭn, lĕ rngôch bunuyh tâm rnê Păng. 16Brah Yêsu hăn tât ta ƀon Nasaret, jêng ntŭk bu mât rong Păng. Tĭng nâm nau vay, tâm nar saƀat, Păng hăn tât ta ngih rƀŭn, dâk gay răk. 17Geh bunuyh ăn ma Păng du klôt ndrom samƀŭt nơm mbơh lor Y-Êsai, Păng pơk, joi saơ ntŭk geh nau nchih:

18“Brah Huêng Ueh Brah Kôranh Brah gŭ ta klơ Gâp,

Yorlah Păng tŏ jêh dak ƀâu kah ma Gâp gay mbơh nkoch Nau Mhe Mhan Ueh ma phung o ach.

19Păng njuăl Gâp gay ma mbơh phung bu krŭng dơi luh du,

Phung chieh măt dơi saơ ang,

Phung bu tŭn jot dơi jêng kon me;

Jêh ri mbơh năm nau yô̆ Kôranh Brah.”#Êsai 61:1,2 (LXX).

20Păng klôt ndrom samƀŭt tay, mplơ̆ ma nơm kơl leo nau rƀŭn, jêh ri gŭ. Lĕ rngôch phung tâm ngih rƀŭn gŭ uănh ta Păng da dê. 21Păng ntơm lah đah khân păng: “Nar aơ Nau Brah Ndu Ngơi khân may hŏ tăng tât mbên jêh.” 22Lĕ rngôch mbơh nkoch ueh ma Păng da dê, jêh ri hih rhâl ma lĕ nau ngơi bêng nau yô̆ luh bơh bâr mbung Păng. Khân păng ôp: “Mâu di hĕ bunuyh aơ jêng kon Y-Yôsep?” 23Păng lah: “Nanê̆ khân may ŭch lah nau hôr aơ ma Gâp: ‘Hơi Kôranh dak si, ƀư bah hom may nơm! Lĕ nau hên tăng may ƀư jêh ta ƀon Kapernum, ƀư hom ta aơ, ntŭk ƀon tơm may.’ ” 24Păng lah tay: “Nanê̆, Gâp lah ma khân may, mâu geh du huê nơm mbơh lor, bu dơn ta ƀon tơm păng nơm.#Yôh 4:44. 25Nanê̆, Gâp lah ma khân may, tâm nôk Y-Êli, dôl trôk phang tâm pe năm prao khay, lĕ n'gor Israel geh nau ji ngot toyh, jêh ri tâm phung Israel geh đŏng âk bu ur ndrô.#I Hađăch 17:1. 26Ƀiălah, bu mâu njuăl Y-Êli văch ta du huê bunuyh tâm phung khân păng ôh, knŏng ma du huê bu ur ndrô gŭ ta ƀon Sêrêpta, n'gor Sidôn.#I Hađăch 17:8-16. 27Tâm nôk nơm mbơh lor Y-Êlisê, ta n'gor Israel geh đŏng âk bunuyh phŭng sa; ƀiălah mâu du huê tâm phung khân păng dơi ƀư kloh, knŏng Y-Naaman, bunuyh Siri.”#II Hađăch 5:1-14. 28Lĕ rngôch khân păng tâm ngih rƀŭn tăng lĕ nau ngơi nây, jêh ri ji nuih. 29Khân păng dâk mphâk Păng luh padih ƀon, njŭn leo Păng ta klơ n'gơn yôk, ntŭk bu ƀư ƀon, gay ma nklơ̆ ăn tŭp tâm dâng. 30Ƀiălah Păng der bơh khân păng jêh ri hăn ntŭk êng.

Brah Yêsu mprơh brah mhĭk

(Markôs 1:21-28)

31Kôranh Brah Yêsu hăn trŭnh ta ƀon Kapernum, tâm n'gor Galilê, jêh ri nti lah tâm nar saƀat. 32Lĕ rngôch bunuyh hih rhâl da dê ma nau Păng nti lah, yorlah nau Păng ngơi geh nau dơi.#Mat 7:28-29. 33Du huê bunuyh brah mhĭk ƀơ̆ lơh, geh măt tâm ngih rƀŭn, nter huy: “Hơi Yêsu gŭ ta ƀon Nasaret! 34Moh nau hên geh đah May kŏ tât May văch gay ma ƀư rai hên bơh? Gâp gĭt Kôranh Brah jêng Nơm Kloh Ueh bơh Brah Ndu!” 35Ƀiălah Brah Yêsu nduyh păng: “Gŭ rklăk hom, jêh ri luh bơh bunuyh aơ!” Brah mhĭk ƀư lơh prah bunuyh nây ta nklang phung âk, jêh nây du luh ƀiălah mâu ƀư nau mhĭk ma păng. 36Lĕ rngôch khân păng klach, ngơi ndrăng khân păng: “Moh nau ngơi kơt nây? Păng sŏk nau dơi jêh ri nau ktang gay ntrŭnh nau ntăm ma phung brah mhĭk jêh ri ăn khân păng luh du.” 37Nau lư n'găr Păng huy lam lĕ n'gor ăp tŭk.

Brah Yêsu ƀư bah po bu ur Y-Pêtrôs

(Mathiơ 8:14-17; Markôs 1:29-34)

38Brah Yêsu luh tă bơh ngih rƀŭn, lăp tâm ngih Y-Simôn. Po bu ur Y-Simôn geh nau ji kop hâu ngăn; bu dăn Brah Yêsu ƀư bah ma păng. 39Păng hăn văch nkêng Păng nơm mpeh ta păng, nduyh nau ji kop jêh ri nau ji kop du luh ro. Ƀât lât păng dâk jêh ri pah kan lĕ rngôch bunuyh.

Brah Yêsu ƀư lĕ nau mbên khlay jêh ri mbơh nkoch Nau Mhe Mhan Ueh

(Markôs 1:35-39)

40Nôk nar nhâp, bu djôt leo phung bunuyh geh âk ntil nau ji kuet tât ta Păng. Păng pah ti klơ ăp bunuyh jêh ri ƀư bah ma khân păng. 41Lĕ brah mhĭk luh du tă bơh âk bunuyh jêh ri nter huy: “May jêng Kon Brah Ndu!” Ƀiălah Păng buay jêh ri mâu ăn khân păng ngơi ôh, yorlah khân păng gĭt Păng jêng Brah Krist. 42Tât ƀhit ang ôi, Păng hăn tâm ntŭk bri rdah, phung ƀon lan hăn joi Păng; nôk hŏ mâp, khân păng nsrôih kân Păng tay, mâu ŭch ăn Păng du tă bơh khân păng. 43Ƀiălah Brah Yêsu lah ma khân păng: “Gâp mbơh Nau Mhe Mhan Ueh bơh ƀon bri hađăch Brah Ndu ma ƀon êng êng đŏng, yorlah ma nau ŭch nây yơh bu njuăl Gâp văch.” 44Pôri, Păng mbơh nkoch tâm ngih rƀŭn ta n'gor Yuđa.

Currently Selected:

Luka 4: CMO2023

Highlight

Copy