Luka 5

Jal seng hih rhâl

(Mathiơ 4:18-22; Markôs 1:16-20)

1Du tơ̆ ri, nôk Brah Yêsu dâk ta kơh dak nglao Gênêsaret, phung ƀon lan tâm in mpet jŭm Păng gay iăt nau Brah Ndu ngơi.#Mat 13:1-2; Mark 3:9-10; 4:1. 2Păng saơ bar mlâm plŭng ta dăch kơh dak nglao; phung bunuyh seng jal du luh jêh bơh plŭng jêh ri dôl pih jal. 3Tâm bar mlâm plŭng nây Păng ncho du mlâm plŭng, nây jêng plŭng Y-Simôn, jêh ri đă păng vah plŭng luh bơh kơh ƀah djê̆; jêh nây Păng gŭ tâm plŭng nti lah ma phung ƀon lan.

4Nôk nti lah lôch jêh, Păng lah ma Y-Simôn: “Vah hom plŭng tâm dak jru, seng jal gay seng ka.” 5Y-Simôn plơ̆ lah: “Hơi Nơm Nti, phung kon seng jal jêh du măng ang, mâu geh du mlâm ka ôh, ƀiălah tông bâr Nơm Nti, kon mra seng jal.”#Yôh 21:3. 6Khân păng seng ntŭp jal jêh ri geh âk ka kŏ tât bơi hêk jal.#Yôh 21:6. 7Khân păng vơch tâm nal kuăl phung mĭt jiăng ta plŭng êng văch kơl. Phung mĭt jiăng nây hăn tât rdeng ka bêng lĕ bar mlâm plŭng, kŏ tât plŭng dăch ngâm. 8Saơ nau nây, Y-Simôn Pêtrôs chon mon ta jâng Brah Yêsu jêh ri ngơi: “Ơ Kôranh Brah, dăn du luh bơh gâp, yorlah gâp jêng bunuyh geh nau tih.” 9Yorlah Y-Simôn jêh ri lĕ rngôch phung bunuyh gŭ ta nây ndrel ma păng hih rhâl da dê yor seng jal ka nây; ndrel Y-Yakơ jêh ri Y-Yôhan kon Y-Sêƀêđê, băl Y-Simôn tâm ban pônây lĕ. 10Brah Yêsu lah ma Y-Simôn: “Lơi klach ôh, ntơm bơh aƀaơ, kon mra plơ̆ jêng nơm seng jal bunuyh.” 11Khân păng vah plŭng ta kơh, chalơi lĕ rngôch gay hăn tĭng Păng.

Brah Yêsu ƀư bah ji phŭng

(Mathiơ 8:1-4; Markôs 1:40-45)

12Dôl Brah Yêsu gŭ tâm ƀon ri, geh du huê bunuyh phŭng sa bêng săk jăn păng nơm, saơ Păng, nơm nây kŭnh muh măt ta neh vơh vơl dăn: “Hơi Kôranh Brah, tơlah May ŭch, May ƀư ăn gâp dơi kloh!” 13Brah Yêsu yơr ti pah ta bunuyh nây jêh ri lah: “Gâp ŭch, kloh hom!” Ƀât lât nau ji phŭng roh lĕ. 14Brah Yêsu ntĭnh ma păng mâu dơi ăn nkoch ma bu jêh ri đă: “Hăn tâm mpơl hom ma kôranh ƀư brah jêh ri nhhơr ndơ ƀư brah ma nau may dơi kloh, tĭng nâm nau Y-Môis ntĭm nti jêh, tâm ban du nau mbơh ma lĕ rngôch bunuyh.”#Lêvi 14:1-32. 15Bu tăng lư Păng ƀrư̆ nar lơ hâu, âk râk bunuyh rgum gay iăt nau Păng jêh ri gay dơi ƀư bah nau ji kuet. 16Ƀiălah Păng der lăp tâm ntŭk bri rdah gay mbơh sơm.

Brah Yêsu ƀư bah ji rvĕn

(Mathiơ 9:1-8; Markôs 2:1-12)

17Du nar ri, Brah Yêsu gŭ nti lah, geh phung Pharisi#5:17 Uănh rblang ta Mat 3:7. jêh ri phung nơm nti nau vay tă bơh lĕ ƀon tâm n'gor Galilê, n'gor Yuđa jêh ri tă bơh ƀon Yêrusalem văch gŭ ta nây. Nau Dơi Kôranh Brah gŭ ndrel Păng gay ƀư bah nau ji kuet. 18Ri, geh mpôl bunuyh tung du huê bunuyh rvĕn ta klơ sưng bê̆ch, dôl joi trong gay njŭn bunuyh nây dơi lăp tâm ngih jêh ri dơm tanăp Brah Yêsu. 19Yorlah âk ir bunuyh, mâu dơi djôt leo bunuyh rvĕn lăp, pôri khân păng hao ta chor ngih, plơk ƀrĭk, jêh nây yur ntrŭnh bunuyh rvĕn nđâp sưng bê̆ch tanăp Brah Yêsu, ta nklang phung âk. 20Saơ nau chroh khân păng, Brah Yêsu lah: “Hơi kon, nau tih may hŏ yô̆ an jêh!” 21Phung kôranh nchih samƀŭt jêh ri phung Pharisi ntơm geh nau mĭn êng: “Mbu nơm aơ dơi ngơi sưr rlau kơt nĕ? Knŏng du huê Brah Ndu, mbu nơm dơi yô̆ an nau tih?” 22Ƀiălah Brah Yêsu gĭt jêh nau mĭn khân păng, jêh ri lah pô aơ: “Mâm ƀư khân may mĭn êng tâm nuih n'hâm tâm ban pônây? 23Tâm bar nau ngơi: ‘Nau tih may yô̆ an jêh,’ mâu lah, lah: ‘Dâk chuat hăn hom,’ moh nau dơh lơn? 24Ƀiălah gay ma khân may gĭt pô aơ Kon Bunuyh gŭ ta neh ntu geh nau dơi yô̆ an nau tih...” Păng lah ma bunuyh rvĕn: “Gâp đă may: Dâk hom, tuy sưng bê̆ch sĭt ta ngih!” 25Ƀât lât bunuyh rvĕn dâk tanăp khân păng, tuy sưng bê̆ch păng nơm hŏ lâng, jêh ri hăn sĭt ta ngih, tâm rnê Brah Ndu. 26Lĕ rngôch hih rhâl da dê jêh ri tâm rnê Brah Ndu. Khân păng klach jêh ri lah: “Nar aơ he saơ jêh lĕ nau khlay ngăn êng ngăn.”

Brah Yêsu kuăl Y-Lêvi. – Nau ât sông sa

(Mathiơ 9:9-13; Markôs 2:13-17)

27Jêh nau nây, Brah Yêsu luh padih, saơ du huê bunuyh riu pi, amoh păng Y-Lêvi, dôl gŭ ta jrô riu pi, Păng lah ma nơm nây: “Tĭng hom Gâp!” 28Y-Lêvi chalơi lĕ rngôch, dâk hăn tĭng Păng. 29Y-Lêvi ƀư nau sông sa toyh jă Păng tâm ngih păng nơm; geh âk phung riu pi jêh ri lĕ phung êng gŭ sông sa ndrel ma Păng. 30Phung Pharisi jêh ri phung kôranh nchih samƀŭt ngơi ƀŭk dŭk suyh ma phung oh mon Păng pô aơ: “Mâm ƀư khân may gŭ sông sa nhêt ndrel ma phung riu pi jêh ri phung tih?”#Luk 15:1-2. 31Brah Yêsu plơ̆ lah: “Bunuyh ueh săk jăn mâu ŭch nai dak si ôh, ƀiălah bunuyh ji kuet. 32Gâp văch mâu di kuăl bunuyh sŏng srăng ôh, ƀiălah kuăl bunuyh geh nau tih gay rmal nau tih.” 33Khân păng lah ma Păng: “Oh mon Y-Yôhan tâm ban đŏng oh mon bunuyh Pharisi vay ât sông sa gay mbơh sơm, ƀiălah oh mon Nơm Nti sông sa jêh ri nhêt!” 34Brah Yêsu plơ̆ lah: “Dơi lĕ khân may nchâp phung bu năch râng tâm nđăp ur sai#5:34 Nrn: phung kon bu klâu ta jrô nau nhêt sông tâm nkol ur sai. ât sông sa dôl bunuyh klay hôm gŭ ndrel ma khân păng? 35Ƀiălah tât nar bunuyh klay dơi djôt leo bơh khân păng, ri mơ tâm lĕ nar nây khân păng ât sông sa.” 36Brah Yêsu nkoch bri đŏng du nau hôr ma khân păng: “Mâu bu nkhêk ôh du blah tâm ao mhe gay jĭm ndop ta ao ơm. Lah ƀư kơt nĕ, ao mhe mra hêk, jêh ri blah bok mhe mâu tâm di ôh đah ao ơm. 37Mâu lĕ mbu troch ndrănh mhe tâm nông ntâu ơm, lah troch kơt nây, ndrănh mhe mra ƀư đang nông ntâu, ndrănh troch lĕ jêh ri djơh nông. 38Ƀiălah bu nkhŭt ndrănh mhe tâm nông ntâu mhe. 39Mâu đŏng geh mbu hŏ nhêt ndrănh ơm ƀiălah hôm ŭch mhe, yorlah bunuyh nây lah pô aơ: ‘Ndrănh ơm kah rlau lơn.’ ”

Currently Selected:

Luka 5: CMO2023

Highlight

Copy