Luka 6

Ƀư kan tâm nar saƀat

(Mathiơ 12:1-8; Markôs 2:23-28)

1Tâm nar saƀat, Kôranh Brah Yêsu hăn rgăn mir ba ƀlê, phung oh mon Păng tôch nkong ba đê̆ đă, tro tâm mpang ti jêh ri sa.#Nkah 23:25. 2Geh ƀaƀă phung Pharisi lah: “Mâm ƀư khân may ƀư nau mâu dơi vay ƀư tâm nar saƀat?” 3Brah Yêsu plơ̆ lah: “Khân may ê hŏ rŏ ma nau Y-Đavit ƀư jêh tơlah păng ndrel ma lĕ phung hăn tĭng păng ji ngot.#I Sa 21:1-6. 4Păng lăp tâm ngih Brah Ndu sŏk piăng let nhhơr sa jêh ri ăn ma phung bunuyh hăn tĭng sa đŏng, nđâp tơlah piăng let nây knŏng phung kôranh ƀư brah dơi vay sa.”#Lêvi 24:9. 5Jêh nây Păng lah ma khân păng: “Kon Bunuyh jêng Kôranh ma nar saƀat.”

Brah Yêsu ƀư bah tâm nar saƀat

(Mathiơ 12:9-14; Markôs 3:1-6)

6Du nar saƀat êng, Brah Yêsu lăp tâm ngih rƀŭn phung ntĭm nti. Ta nây, geh du huê bunuyh siăr ti pa ma. 7Phung kôranh nchih samƀŭt jêh ri phung Pharisi kâp uănh ma Păng geh ƀư bah tâm nar saƀat mâu lah mâu, gay joi nau phong Păng. 8Brah Yêsu gĭt nau mĭn khân păng jêh ri lah ma bunuyh siăr ti pô aơ: “Dâk hom ta nklang aơ.” Păng dâk jêh ri văch tât ta nây. 9Brah Yêsu lah ma khân păng: “Gâp ôp ma khân may: Tâm nar saƀat, dơi vay ƀư nau ueh mâu lah nau mhĭk, rklaih bunuyh mâu lah nkhĭt bunuyh?” 10Jêh uănh lĕ rngôch bunuyh, Păng lah ma bunuyh siăr ti: “Yơr hom ti.” Nơm nây yơr ti jêh ri ti păng dơi bah. 11Ƀiălah khân păng ji nuih hâu ngăn jêh ri tâm nchră băl gay klăp lah ƀư moh nau ma Brah Yêsu.

Brah Yêsu săch jât ma bar kôranh oh mon

(Mathiơ 10:1-4; Markôs 3:13-19)

12Tâm lĕ nar nây, Brah Yêsu hăn hao klơ yôk gay mbơh sơm; Păng rngeh lĕ du măng gay mbơh sơm ma Brah Ndu. 13Tât ang nar pakơi, Brah Yêsu kuăl phung oh mon văch jêh ri săch jât ma bar nuyh tâm phung nây, rnha kôranh oh mon: 14Y-Simôn Păng tâm amoh Y-Pêtrôs, jêh ri Y-Andrê oh Y-Pêtrôs; Y-Yakơ jêh ri Y-Yôhan; Y-Philip jêh ri Y-Ƀartôlômi; 15Y-Mathiơ jêh ri Y-Thômas; Y-Yakơ, kon Y-Alphê, jêh ri Y-Simôn rnha jêng Sêlôt; 16Y-Yuđa, kon Y-Yakơ, jêh ri Y-Yuđas Iskariôt, pakơi nkhơng jêng nơm rlăng Păng.

Lĕ nau ntĭm nti êng

17Păng hăn jŭr ndrel ma phung kôranh oh mon jêh ri dâk ta ntŭk neh lâng. Geh âk phung oh mon Păng ndrel ma phung bunuyh âk ngăn bơh lam n'gor Yuđa, bơh ƀon Yêrusalem, jêh ri tă bơh n'gor kơh dak mƀŭt ƀon Tyre, ƀon Sidôn văch gay iăt Brah Yêsu ntĭm nti jêh ri gay dơi ƀư bah nau ji kuet. 18Phung bunuyh geh brah ƀơ̆ ƀơch ƀư rkhŭk dơi bah da dê. 19Lĕ rngôch phung bunuyh joi ma pah Păng, yor nau brah luh tă bơh Păng jêh ri ƀư bah lĕ rngôch bunuyh.

Nau ueh maak jêh ri nau mhĭk

(Mathiơ 5:1-12,38-48; 7:12a)

20Brah Yêsu n'gơr măt uănh ma phung oh mon jêh ri lah:

“Ueh maak ngăn ma phung kon jêng phung bunuyh o ach,

Yorlah ƀon bri hađăch Brah Ndu prăp ăn ma phung kon

21Ueh maak ngăn ma phung kon jêng phung bunuyh aƀaơ aơ dôl nau ji ngot,

Yorlah mra dơi hơm tŏng.

Ueh maak ngăn ma phung kon jêng phung bunuyh aƀaơ aơ gŭ tâm nau nhhiăng nhĭm,

Yorlah mra dơi maak gơm.

22Ueh maak yơh ma phung kon tơlah yor ma Kon Bunuyh bu tâm rmot, mprơh, ngơi mhĭk, mƀăr lơi amoh khân may tâm ban nơm djơh mhĭk.#I Pê 4:14. 23Tâm nar nây, khân may răm maak mpât rhơn hom, yorlah ri, nau nkhôm ma khân may ta klơ trôk jêng toyh ngăn; yorlah chô yau khân păng tă ƀư jêh ma phung nơm mbơh lor kơt nây.#II Rêh Jêng 36:16; Kan 7:52.

24Ƀiălah rêh ni yơh ma phung nơm jêng phung ndrŏng geh,

Yorlah hŏ geh bonh leng jêh!

25Rêh ni yơh ma khân may jêng phung bunuyh aƀaơ aơ dôl hơm,

Yorlah mra ji ngot!

Rêh ni yơh ma khân may jêng phung aƀaơ aơ dôl gơm,

Yorlah mra klâng rvê jêh ri nhĭm nhhiăng!

26Rêh ni yơh ma khân may, tơlah lĕ rngôch bunuyh rnê,

Yorlah chô yau khân păng hŏ ƀư jêh ma phung nơm mbơh lor nklă tâm ban pônây!

27Ƀiălah Gâp lah ma khân may jêng phung iăt nau Gâp: Rŏng hom ma phung rlăng đah khân may, ƀư ueh ma phung tâm rmot ma he nơm, 28ăn nau ueh uĭn ma nơm rak rtăp he nơm, jêh ri mbơh sơm ma nơm ƀư bêk prêng he nơm. 29Mbu tap khân may ta bom đah aơ, ăn hom bom đah tê̆ ma khân păng; bi tơlah mbu sŏk ao padih khân may, mâu đŏng buay ôh khân păng sŏk đŏng ao tâm trôm. 30Mbu nơm dăn, ăn hom; mbu pit sŏk drăp ndơ khân may, lơi sŏk tay. 31Moh nau khân may ŭch bu ƀư ma khân may, ƀư hom ma bu nâm pônây.#Mat 7:12. 32Tơlah khân may rŏng kơnh ma phung rŏng kơnh ma khân may, moh nau ueh bu kah gĭt tôr ma khân may? Nđâp phung tih đŏng rŏng kơnh ma phung rŏng kơnh ma khân păng. 33Tơlah khân may ƀư ueh ma phung ƀư ueh ma khân may, moh nau ueh bu mra kah gĭt tôr ma khân may? Nđâp ma nơm ƀư tih tâm ban pônây. 34Tơlah khân may ăn mbu chan ƀiălah kâp gân khân păng mplơ̆ tay, moh nau ueh bu mra kah gĭt tôr ma khân may? Nđâp phung tih đŏng ăn ma phung tih chan, gay sŏk dơn tay nŭm rnoh. 35Ƀiălah ăn khân may rŏng phung rlăng khân păng nơm, ƀư hom nau ueh, jêh ri ăn chan hom ƀiălah lơi kâp mplơ̆ tay. Kơt nây, nau nkhôm khân may mra jêng toyh, jêh ri khân may mra jêng kon Nơm Dŭt Prêh, yorlah Păng sŏk nuih n'hâm ueh ma phung mâu gĭt nau yô̆ jêh ri ma phung janh ƀai. 36Yô̆ nđach hom tâm ban ma Mbơ̆ khân may yô̆ nđach. 37Lơi phat dôih bu gay khân may mâu mra geh nau phat dôih. Lơi phong bu gay khân may mâu mra geh nau tâm rmal. Yô̆ an hom ri mơ khân may mra dơi yô̆ an. 38Ăn hom, khân may mra dơi ăn tay; bu mra sŏk thŭng toyh veh bêng, mpet jŭr, rgu kŏ tât nôk bêng ler, jêh nây nkhŭt tâm ntôr ao khân may; yorlah mâm nau khân may veh ma bu, pôri khân may mra dơn tay veh kơt nây.”

39Păng ngơi đŏng du nau hôr aơ ma khân păng: “Dơi lĕ bunuyh chieh măt têk bunuyh chieh măt? Mâu di lĕ bar hê khân păng cha lôt jêh ta trôm ntu?#Mat 15:14. 40Oh mon mâu rlau lơn ma nơm nti ôh, ƀiălah tơlah oh mon dơi nti bêng tŏng, ri mơ mra tâm ban ma nơm nti păng.#Mat 10:24-25; Yôh 13:16; 15:20. 41Mâm ƀư may saơ ndruyh tâm trôm măt oh nâu may ƀiălah mâu saơ ôh mâng ntur tâm trôm măt may nơm? 42Mâm ƀư may lah ma oh nâu may pô aơ: ‘Hơi oh nâu, ăn gâp sŏk lơi ndruyh tâm trôm măt may,’ bi may, mâu dơi saơ mâng ntur tâm trôm măt may nơm? Hơi bunuyh nuih n'hâm nklă, lor lơn sŏk hom mâng ntur tă bơh tâm trôm măt may, jêh nây may saơ rah vah gay sŏk ndruyh tă bơh trôm măt oh nâu. 43Mâu geh ôh tơm si ueh geh play khih; mâu lĕ geh tơm si khih geh play ueh; 44yorlah uănh play ri mơ gĭt tơm si. Mâu mbu pĕ ôh play rvi ta pŭm lok, mâu lah pĕ play krăk ƀâu tâm pŭm rtau lok.#Mat 12:33. 45Bunuyh ueh yor nuih n'hâm prăp nau ueh ngluh nau ueh; bunuyh mhĭk yor nuih n'hâm prăp nau mhĭk ngluh nau mhĭk; yorlah bêng tâm nuih n'hâm rĭ dĭng mbung ngơi luh.#Mat 12:34. 46Mâm ƀư khân may kuăl Gâp: ‘Kôranh Brah, Kôranh Brah!’ ƀiălah mâu ƀư tĭng nâm nau Gâp lah? 47Gâp mra ntĭm ma khân may gĭt mbu nơm văch ta Gâp, iăt nau Gâp jêh ri ƀư tĭng tâm ban ma mbu nơm. 48Bunuyh nây tâm ban ma du huê bunuyh ri ƀư ngih, kuyh neh ăn jru jêh ri n'gân mbon ta klơ lŭ toyh. Tât dak lip hao prêh, n'hor dak hoch thăng nklơ̆ ta ngih nây mâu dơi mpât n'gơ ôh, yorlah ngih hŏ ndâk nâp ngăn. 49Ƀiălah mbu tăng nau Gâp mâu ƀư tĭng, tâm ban ma du huê bunuyh ri ƀư ngih ta klơ neh mâu geh mbon. Nôk n'hor dak hoch thăng nklơ̆, ngih nây rlâm ro jêh ri geh nau mhĭk jâk jêr.”

Currently Selected:

Luka 6: CMO2023

Highlight

Copy