Luka 7
7
Brah Yêsu ƀư bah oh mon kôranh tahan
(Mathiơ 8:5-13)
1Jêh lôch Brah Yêsu mbơh nkoch lĕ nau nây ma phung ƀon lan tăng jêh, Păng lăp ta ƀon Kapernum. 2Du huê kôranh tahan geh du huê oh mon păng rŏng ngăn, ji hâu ngăn, dăch khĭt. 3Nôk tăng nkoch Kôranh Brah Yêsu, păng njuăl ƀaƀă kôranh bu ranh tâm phung Yuđa hăn dăn ma Brah Yêsu văch gay ƀư bah oh mon păng. 4Khân păng văch ta Brah Yêsu, dăn pô aơ: “Kôranh tahan khư ngăn gay Nơm Nti kơl an 5yorlah păng rŏng ma phung ƀon lan he, jêh ri ndâk ngih rƀŭn ăn he.” 6Pôri, Brah Yêsu hăn ndrel ma khân păng. Nôk Păng dăch tât ta ngih, kôranh tahan njuăl băl păng văch gay ngơi ma Brah Yêsu: “Ơ Kôranh Brah, mâu nănh ƀư rsuak Kôranh Brah kơt nĕ, yorlah gâp mâu khư rom May lăp tâm ngih ôh. 7Gâp mĭn đŏng ma gâp nơm mâu khư hăn ta May. Knŏng dăn Kôranh Brah ngơi du tong ri mơ oh mon gâp mra dơi bah. 8Yorlah gâp nơm gŭ tâm dâng nau dơi bunuyh êng, gâp geh đŏng phung tahan tâm dâng gâp. Gâp lah ma du huê aơ: ‘Hăn hom!’ păng hăn ro; lah ma du huê êng: ‘Văch hom!’ păng văch ro; jêh ri lah ma oh mon gâp: ‘Ƀư nau aơ!’ păng ƀư ro.” 9Tăng nau ngơi nây, Brah Yêsu hih rhâl ma kôranh tahan, n'gĭl uănh đă phung bunuyh hăn tĭng Păng pô aơ: “Gâp đă ma khân may, tâm phung Israel, Gâp mâu hŏ saơ ôh nau chroh toyh tâm ban pônây.” 10Phung bunuyh kôranh tahan njuăl hăn nây plơ̆ sĭt ta ngih, saơ oh mon hŏ bah ji jêh.
Kon bu klâu bu ur ndrô ta ƀon Nain
11Nar ôi taơ, Brah Yêsu hăn tât ƀon, amoh ƀon Nain; geh âk oh mon ndrel ma phung bunuyh âk hăn ndrel ma Păng. 12Nôk Păng văch dăch ta mpông ƀon, bu mhe luh tung du huê bunuyh khĭt, jêng kon bu klâu kon dul bu ur ndrô. Geh âk bunuyh gŭ tâm ƀon nây tă bơh ƀon hăn njŭn nau khĭt ndrel bu ur nây. 13Kôranh Brah saơ jêh ri geh nuih n'hâm yô̆ nđach bu ur nây jêh ri lah: “Lơi nhĭm ôh!” 14Păng hăn dăch, pah ta băng, jêh ri phung bunuyh tung nsrŭng. Păng lah: “Hơi bu klâu ndăm, Gâp lah ma may dâk hom.” 15Bunuyh khĭt nây dâk gŭ jêh ri ntơm ngơi. Brah Yêsu jao păng ma mê̆ păng nơm. 16Lĕ rngôch bunuyh klach da dê jêh ri tâm rnê ma Brah Ndu pô aơ: “Geh Nơm mbơh lor toyh tâm mpơl jêh tâm phung he, jêh ri Brah Ndu chop khâl jêh ma phung ƀon lan Păng.” 17Nau nây gĭt lam tâm n'gor Yuđa jêh ri lĕ ăp jŭm.
Nau Y-Yôhan-Ƀaptist ôp
(Mathiơ 11:2-19)
18Oh mon Y-Yôhan nkoch tay ma păng lĕ rngôch nau nây. 19Păng kuăl bar hê oh mon jêh ri njuăl khân păng hăn ngơi ma Kôranh Brah: “Di lĕ Nơm Nti jêng Nơm tât, mâu lah hên kâp nơm êng đŏng?” 20Khân păng văch ta Brah Yêsu, ơh pô aơ: “Y-Yôhan-Ƀaptist njuăl hên văch gay ôp Nơm Nti: ‘Di lĕ Nơm Nti jêng Nơm mra văch ƀơh, mâu lah hên kâp nơm êng đŏng?’” 21Ta mông nây, Brah Yêsu ƀư bah âk bunuyh ji kuet, bunuyh lŭt jâng ti, bunuyh geh brah mhĭk lơh jêh ri ƀư ăn âk bunuyh chieh măt dơi saơ ang. 22Păng plơ̆ lah ma phung nây: “Plơ̆ sĭt nkoch tay hom ma Y-Yôhan lĕ nau khân may hŏ saơ jêh ri hŏ tăng jêh: Bunuyh chieh măt dơi saơ ang, bunuyh rvĕn dơi hăn, bunuyh phŭng sa dơi kloh, bunuyh tê̆k dơi tăng, bunuyh khĭt dơi dâk rêh tay, bunuyh o ach dơi tăng Nau Mhe Mhan Ueh.#Êsai 35:5,6; 61:1. 23Ueh maak yơh ma mbu nơm mâu chêh prah ôh yor Gâp!”
24Tơlah phung hăn mbơh Y-Yôhan hŏ sĭt jêh, Brah Yêsu ntơm ngơi ma phung ƀon lan ma Y-Yôhan pô aơ: “Moh ndơ khân may hŏ uănh tâm bri rdah? Du tơm rpho geh sial khôm n'gơ lĕ? 25Moh ndơ khân may hŏ uănh jêh? Du huê bunuyh nsoh ao dŭt ueh? Aơ, phung nsoh ao dŭt ueh jêh ri sông sa kah gŭ tâm ngih hađăch! 26Pôri, moh ndơ khân may hăn uănh? Du huê nơm mbơh lor ƀơh? Di ngăn, Gâp lah ma khân may, geh bunuyh rlau lơn ma nơm mbơh lor đŏng. 27Geh nau nchih ma bunuyh nây pô aơ:
‘Aơ, Gâp njuăl nơm mbơh Gâp hăn lor tanăp May,
Bunuyh mra nkra trong lor ma May.’#Mal 3:1.
28Gâp lah ma khân may, tâm phung bunuyh deh tă bơh bu ur, mâu geh nơm toyh lơn ma Y-Yôhan-Ƀaptist ôh; ƀiălah nơm jê̆ lơn tâm ƀon bri hađăch Brah Ndu jêng toyh lơn ma păng.” 29Phung ƀon lan jêh ri phung riu pi hŏ dơn nau ƀaptem Y-Yôhan tăng Păng mbơh nkoch, khân păng gĭt năl Brah Ndu jêng sŏng srăng.#Mat 21:32; Luk 3:12. 30Ƀiălah phung Pharisi jêh ri phung kôranh nchih samƀŭt mâu ŭch Y-Yôhan ƀư ƀaptem ma khân păng, pôri khân păng dun nau ŭch Brah Ndu prăp ma khân păng. 31“Pôri, moh ndơ Gâp mra tâm rđĭl bunuyh rnôk aƀaơ aơ, jêh ri mbu moh păng tâm ban? 32Khân păng tâm ban ma phung kon se gŭ padih ntŭk tăch drăp, kuăl ndrăng khân păng jêh ri lah: ‘Hên uh n'hôm ƀiălah khân may mâu pâl ntalơ̆ ôh, hên mprơ nau mprơ rngot ƀiălah khân may mâu nhĭm nhhiăng ôh.’ 33Yorlah Y-Yôhan-Ƀaptist văch jêh, mâu sa piăng let, mâu nhêt ndrănh, khân may lah: ‘Păng geh brah mhĭk lơh.’ 34Kon bunuyh văch jêh, sông sa jêh ri nhêt, khân may lah tay: ‘Ri, nây jêng bunuyh kơnh sa kơnh nhêt, mĭt jiăng đah phung riu pi jêh ri phung tih!’ 35Ƀiălah nau blau mĭn dơi n'gang bơh play kao#7:35 Nrn: rnơm kon sau. păng.”
Nau yô̆ ma du huê bu ur tih
36Du huê Pharisi jă Brah Yêsu sông sa ndrel ma păng. Păng lăp tâm ngih bunuyh Pharisi nây jêh ri gŭ sông sa ndrel. 37Geh du huê bu ur tih gŭ tâm ƀon nây tăng Brah Yêsu gŭ sông sa tâm ngih bunuyh Pharisi, djôt leo du mlâm rchŏk ma lŭ khlay, dơ bêng dak ƀâu kah.#Mat 26:7; Mark 14:3; Yôh 12:3. 38Păng gŭ pakơi, ta jâng Brah Yêsu jêh ri nhĭm, dak măt bĕ jâng Brah Yêsu; jêh nây jut ma sŏk păng, chŭm jâng Păng, jêh ri mhĭng ma dak ƀâu kah. 39Bunuyh Pharisi jă jêh Brah Yêsu, saơ kơt nây, mĭn êng: “Tơlah bunuyh aơ jêng nơm mbơh lor, nanê̆ ngăn gĭt năl bu ur pah ta Păng jêng mbu moh, mâm moh bunuyh, yor păng jêng bu ur tih.” 40Brah Yêsu lah ma păng: “Hơi Y-Simôn, Gâp geh nau ŭch lah ma may.” Păng ơh: “Hơi Nơm Nti, ngơi hom.” 41Păng lah: “Du huê kôranh rnon geh bar hê bunuyh iang rnon: Du huê bunuyh iang rnon prăm rhiăng đơniê,#7:41 Uănh rblang ta Mat 18:28. bunuyh ri prăm jât. 42Yorlah bar hê khân păng mâu geh moh ndơ gay mplơ̆, pôri kôranh rnon yô̆ an ma lĕ bar hê bunuyh nây, mbu nơm rŏng ma kôranh rnon âk lơn?” 43Y-Simôn ơh: “Gâp mĭn bunuyh dơi yô̆ an âk rnon lơn.” Brah Yêsu lah: “May sek uănh di ngăn.” 44Păng n'gĭl uănh ma bu ur nây jêh ri lah ma Y-Simôn: “May saơ lĕ bu ur aơ lĕ? Gâp lăp jêh tâm ngih may, ƀiălah may mâu ăn dak rao jâng; Ƀiălah bu ur nây sŏk dak măt ƀư bĕ jâng Gâp, jêh nây jut ma sŏk păng. 45May mâu chŭm Gâp, ƀiălah ntơm bơh Gâp lăp ngih may, bu ur nây âk tơ̆ chŭm jâng Gâp. 46May mâu tŏ dak ngi ôlive ta bôk Gâp, ƀiălah bu ur nây sŏk dak ƀâu kah mhĭng jâng Gâp. 47Yor nây, Gâp lah ma may, nau tih bu ur aơ âk ngăn, ƀiălah hŏ dơi yô̆ an lĕ jêh, yor ri păng rŏng âk; bi bunuyh yô̆ an djê̆ ăt rŏng djê̆.” 48Jêh nây Păng lah ma bu ur nây: “Nau tih ay dơi yô̆ an jêh.” 49Lĕ bunuyh gŭ ndrel sưng Păng tâm ngơi ndrăng khân păng nơm: “Mbu Păng aơ, dơi yô̆ an nau tih bu?” 50Ƀiălah Brah Yêsu lah ma bu ur nây: “Nau chroh ay tâm rklaih ay jêh; hăn hom đăp mpăn.”
Currently Selected:
Luka 7: CMO2023
Highlight
Share
Copy
Want to have your highlights saved across all your devices? Sign up or sign in
© 2023 United Bible Societies. All rights reserved.
