Luka 8

Phung oh mon bu ur

1Pakơi nây, Brah Yêsu hăn ntơm bơh ƀon aơ tât ta ƀon ri, ƀon jê̆ aơ tât ta ƀon jê̆ jê̆ êng, jêh ri mbơh nkoch Nau Mhe Mhan Ueh ma ƀon bri hađăch Brah Ndu. Jât ma bar kôranh oh mon hăn ndrel ma Păng. 2Geh đŏng bu ur ƀaƀă hăn tĭng Păng, jêng phung bunuyh hŏ dơi bah tă bơh brah djơh jêh ri nau ji kuet: H'Mari rnha jêng Mađala, jêng bunuyh dơi Kôranh Brah kơl rklaih bơh pơh brah djơh;#Mat 27:55-56; Mark 15:40-41; Luk 23:49. 3H'Yôana ur Y-Kusa, kôranh chiă uănh ngih hađăch Hêrôt; H'Susan jêh ri âk bunuyh êng hŏ sŏk drăp ndơ khân păng gay kơl ma Kôranh Brah jêh ri phung oh mon Păng.

Nau hôr ma bunuyh nsrih ntil grăp

(Mathiơ 13:1-23; Markôs 4:1-20)

4Tơlah phung bunuyh âk rgum ndrel, jêh ri âk bunuyh tă bơh lĕ ƀon văch ta Păng ri mơ Păng sŏk nau hôr gay lah ma khân păng: 5“Geh du huê bunuyh srih grăp. Dôl păng srih grăp, ƀaƀă grăp tŭp rŏ trong, bu jot lơi jêh ri phung sĭm trôk chôk lĕ ƀhiau; 6ƀaƀă tŭp ta lŭ, nôk mhe chăt hon, kro klêu ro, yorlah mâu geh nau nđik; 7ƀaƀă êng tŭp ta nklang pŭm lok, hon ndrel ma lok jêh ri lok ƀư in nu; 8geh ƀaƀă êng đŏng tŭp ta neh ueh, păng hon, geh play âk lơn du rhiăng tơ̆.” Nôk lah lĕ nau ngơi nây, Brah Yêsu lah huy ktang: “Mbu nơm geh tôr gay tăng, iăt hom!”

Rblang nau hôr

9Phung oh mon ôp Păng ma nau rblang nau hôr nây. 10Păng plơ̆ lah: “Khân may hŏ dơi ăn nau gĭt rbăng nau khlay ndâp ƀon bri hađăch Brah Ndu; ƀiălah ma phung êng ri mơ Gâp sŏk nau hôr gay lah ma khân păng

Uănh ƀiălah mâu saơ ôh,

Tăng ƀiălah mâu gĭt rbăng ôh.#Êsai 6:9.

11Nau hôr nây geh rblang kơt aơ: Grăp ntil jêng nau chroh ma Kôranh Brah. 12Lĕ grăp tŭp rŏ trong jêng phung bunuyh hŏ tăng jêh nau chroh, ƀiălah pakơi phung brah mhĭk văch sŏk pit lơi nau chroh nây tă bơh nuih n'hâm khân păng, klach khân păng nsing jêh ri geh nau rklaih. 13Lĕ grăp tŭp ta klơ lŭ jêng phung iăt nau Brah Ndu ngơi ma nau maak sŏk dơn ro, ƀiălah mâu geh reh ôh, chroh nsing knŏng ƀât lât, rĭ dĭng nôk geh nau rlong uănh khân păng tŭp. 14Lĕ grăp tŭp ta nklang pŭm lok jêng phung iăt, ƀiălah geh nau rvê, nau ndrŏng, nau maak bơh nau rêh aơ ƀư in nu rĭ dĭng mâu dơi văch ma toyh. 15Ƀiălah lĕ grăp tŭp tâm neh ueh jêng phung bunuyh tăng djôt prăp nau Brah Ndu Ngơi nuih n'hâm nanê̆ jêh ri mĭn ueh, bơh nau nsrôih dơi geh play.

16Mâu geh ôh bunuyh jêh mpoh ŭnh kađen jêh ri sŏk thŭng kŭp lơi mâu lah n'gân tâm dâng sưng bê̆ch, ƀiălah n'gân ta klơ jâng kađen, gay ăn ma mbu lăp tâm ngih dơi saơ nau ang.#Mat 5:15; Luk 11:33. 17Yorlah mâu geh ôh moh ndơ pôn mo mra bu mâu dơi saơ, mâu geh ôh moh ndơ mâu ăn gĭt mra bu gĭt lĕ rngôch jêh ri mpơl tâm nau ang.#Mat 10:26; Luk 12:2. 18Pôri, rjăp hom ma nau khân may iăt jêh. Yorlah nơm geh jêh, mra ăn ntop; bi mbu mâu geh bu mra sŏk lơi nau khân păng mĭn jêng khân păng geh.”#Mat 25:29; Luk 19:26.

Mê̆ jêh ri phung oh Brah Yêsu

(Mathiơ 12:46-50; Markôs 3:31-35)

19Mê̆ jêh ri phung oh Brah Yêsu hăn gay joi Păng, ƀiălah khân păng mâu tât ma Păng ôh yorlah bunuyh âk. 20Geh bunuyh mbơh ma Păng: “Mê̆ jêh ri oh Nơm Nti gŭ padih ŭch tâm mâp đah Nơm Nti.” 21Ƀiălah Păng plơ̆ lah: “Mê̆ jêh ri phung oh Gâp jêng phung bunuyh tăng jêh ri ƀư tĭng nau Brah Ndu.”

Brah Yêsu buay phŭt sial

(Mathiơ 8:23-27; Markôs 4:35-41)

22Du nar, Brah Yêsu ncho plŭng ndrel ma phung oh mon jêh ri đă: “He hăn rgăn hom kơh tê̆ dak nglao.” Pôri, khân păng vah plŭng hăn. 23Dôl khân păng vah plŭng Brah Yêsu gŭ bê̆ch. Geh phŭt chuănh tâm dak nglao, dak lăp bêng plŭng, jêh ri khân păng gŭ tâm mâp nau glăm. 24Phung oh mon văch rlay Păng jêh ri lah: “Hơi Nơm Nti, hơi Nơm Nti, he khĭt ngăn aơ taơ!” Păng kah rngăl, buay sial jêh ri rbuh dak, khân păng nsrŭng ro jêh ri rngân njup. 25Păng lah ma phung oh mon: “Ta ntŭk nau chroh phung kon?” Khân păng klach jêh ri hih rhâl ôp ndrăng khân păng: “Mbu nơm Păng aơ buay sial nđâp ma dak tông bâr nau Păng ntrŭnh da dê?”

Brah Yêsu ƀư bah bunuyh brah mhĭk lơh ta Yêrasê

(Mathiơ 8:28-34; Markôs 5:1-20)

26Păng ndrel ma phung oh mon vah plŭng tât ta n'gor Yêrasê, tâm tra đah n'gor Galilê.#8:26 Ƀaƀă nau rblang ntơm saơm nchih jêng: Gađara mâu lah Gerasenes. 27Tơlah Brah Yêsu hao klơ kơh, geh du huê bunuyh geh brah mhĭk lơh gŭ ta ƀon nây văch tâm mâp Păng. Hŏ jŏ nar jêh păng mâu nsoh kho ao, mâu gŭ tâm ngih ƀiălah gŭ tâm môch. 28Jêh saơ Brah Yêsu, păng nter, chon mon tanăp Păng jêh ri lah huy: “Ơ Brah Yêsu, Kon Brah Ndu Dŭt Prêh, moh nau gâp geh đah May? Gâp vơh dăn May lơi ƀư rêh ni ma gâp.” 29Yorlah Brah Yêsu mprơh brah ƀơ̆ ƀơch luh du tă bơh bunuyh nây. Hŏ âk tơ̆ brah mhĭk lăp tâm păng; nđâp tơlah bu mât uănh păng bu kât, nkông jêh ri njrăng uănh; păng ăt nkê̆ch rse rvăk doh nkông jêh ri phung brah mhĭk njŭn păng lăp tâm bri rdah. 30Brah Yêsu ôp: “Mâm moh săk may?” Păng ơh: “Mpôl tahan”#8:30 Uănh rblang ta Mark 5:9. yorlah âk brah mhĭk lăp jêh tâm păng. 31Phung brah mhĭk vơh dăn Brah Yêsu mprơh khân păng jŭr brŏng jru. 32Nôk nây, geh du phung sŭr âk ngăn gŭ sa ta klơ yôk. Phung brah mhĭk dăn Brah Yêsu ăn khân păng lăp tâm phung sŭr nây; Brah Yêsu ăn. 33Kơt nây, phung brah mhĭk luh tă bơh bunuyh nây jêh ri lăp tâm phung sŭr. Phung sŭr tă bơh lơ sop nsăt jŭr tâm dak nglao jêh ri khĭt ngâm. 34Phung bunuyh chiăp sŭr saơ kơt nây, nchuăt du jêh ri mbơh nau mhe mhan nây tâm lam ƀon toyh, ƀon jê̆. 35Lĕ rngôch bunuyh hăn uănh nau mhe tât geh. Nôk khân păng văch ta nây saơ Brah Yêsu, saơ bunuyh klaih jêh tă bơh phung brah mhĭk lăp, gŭ ta jâng Brah Yêsu, nsoh kho ao, nau mĭn kah gĭt rah vah pôri khân păng klach hâu ngăn. 36Phung bunuyh saơ jêh nau tât nây nkoch bri ma lĕ rngôch bunuyh ma nau bunuyh geh brah mhĭk lơh dơi ƀư bah jêh. 37Lĕ rngôch phung ƀon lan jŭm n'gor Yêrasê dăn ăn Brah Yêsu du luh bơh khân păng yorlah khân păng klach krit ngăn. Pôri, Brah Yêsu ncho plŭng plơ̆ sĭt. 38Bunuyh dơi Brah Yêsu mprơh brah mhĭk, dăn gŭ ndrel ma Păng, ƀiălah Păng ăn ma păng plơ̆ sĭt jêh ri đă: 39“Sĭt hom ma ngih may, nkoch bri lĕ nau khlay toyh Brah Ndu ƀư jêh ma may.” Pôri, păng hăn, nkoch mbơh lam ƀon lĕ nau khlay toyh Brah Yêsu ƀư jêh ma păng nơm.

Kon bu ur Y-Jairus jêh ri bu ur ji rih

(Mathiơ 9:18-26; Markôs 5:21-43)

40Nôk Brah Yêsu plơ̆ sĭt, phung bunuyh chuă vơt Păng, yorlah lĕ rngôch bunuyh gŭ kâp gân Păng da dê. 41Geh du huê kôranh mât uănh ngih rƀŭn amoh Y-Jairus văch chon mon ta jâng Brah Yêsu jêh ri dăn Păng lăp tâm ngih păng, 42yorlah păng geh knŏng du huê kon bu ur jât ma bar năm ji dăch khĭt.

Dôl Brah Yêsu hăn, phung ƀon lan mpet Păng puăn mpeh. 43Geh du huê bu ur ji rih hŏ jât ma bar năm jêh; nđâp tơlah hŏ huach lĕ jêh prăk jêh ri drăp ndơ ma phung kôranh dak si, ƀiălah mâu geh du huê dơi ƀư bah ma păng. 44Păng văch pakơi jêh ri pah ta chiăng ao Păng, ƀât lât mham suăt ro. 45Jêh ri Brah Yêsu lah: “Mbu moh pah Gâp?” Lĕ rngôch bunuyh lah mâu gĭt, rĭ dĭng Y-Pêtrôs jêh ri phung băl păng#8:45 Ƀaƀă nau rblang ntơm saơm mâu geh lĕ rplay samƀŭt: “jêh ri mĭt jiăng”. lah: “Hơi Nơm Nti, phung bunuyh gŭ jŭm jêh ri mpet in Nơm Nti!” 46Brah Yêsu lah: “Mbu moh pah jêh ta Gâp, yorlah Gâp gĭt năl nau ktang luh jêh bơh Gâp.” 47Dôl gĭt mâu dơi pôn ôh, bu ur nây klach râm sâr hăn tât chon mon tanăp Păng jêh ri mpơl ngăn tanăp măt phung ƀon lan mâm nau păng pah Brah Yêsu jêh ri mâm dơi păng hŏ bah ndal ro. 48Brah Yêsu lah ma păng: “Hơi kon bu ur Gâp, nau chroh ay yơh ƀư bah ay; hăn hom đăp mpăn!” 49Dôl Păng gŭ ngơi, geh du huê tă bơh kôranh mât uănh ngih rƀŭn hăn tât mbơh: “Kon bu ur may khĭt jêh; lơi hôm ƀư rsuak Nơm Nti đŏng.” 50Brah Yêsu tăng kơt nây, Păng lah ma Jairus: “Lơi klach ôh, knŏng chroh jêh ri păng mra dơi nau rêh.” 51Lah tât ta ngih, Păng mâu ăn bu hăn lăp ndrel ma Păng ôh knŏng Y-Pêtrôs, Y-Yakơ, Y-Yôhan, jêh ri mê̆ mbơ̆ kon se nây. 52Lĕ rngôch bunuyh nhĭm nhhiăng klâng rngot ma păng; ƀiălah Brah Yêsu lah: “Lơi nhĭm, păng mâu geh khĭt ôh ƀiălah păng bê̆ch.” 53Khân păng mưch gơm ma Păng yorlah gĭt păng hŏ khĭt ngăn jêh. 54Brah Yêsu kuăn ta ti bu ur jê̆ kuăl huy: “Hơi kon, dâk hom!” 55Huêng păng plơ̆ sĭt ta păng nơm, ƀât lât păng dâk ro, jêh ri Brah Yêsu đă ăn păng sông sa. 56Mê̆ mbơ̆ bu ur jê̆ nây hih rhâl ngăn, ƀiălah Brah Yêsu ntăm ma khân păng mâu dơi nkoch ma bu ôh nau tât aơ.

Currently Selected:

Luka 8: CMO2023

Highlight

Copy