Genesis 13
13
Abarami No Lote Kuru Aravoylaka
1Abarami sa kesini vodu ni Ijipi sa zo puka voy la Neqeve, sa koype ona quolekutae oye Serai no pisipita taba oye sa tugnene, no Lote sa koype una oye. 2Abarami sa tutupari varoka ni vaua sipi no taba siliva no qolu.
3Oye sa kesini Neqeve oye sa tae vaga te taba ngoyni sinani oye sa doka Betele, te arakaluoboroa doyru keri kumala ni Betele no Ai, ngoyni oye sa toyruni moyna ona toypaka pua 4no te ngoyni oye sa vadere ni moyna sara taboyna. No te ngoyni noyene Abarami sa keleke taritongoa Iaova.
5No Lote, oye sa koype loyluni Abarami, sa tungene vele oyra vaua sipi no bulumakao no oyra ona toypaka pua. 6Ba lua te ngoyni kuru la kue kama gaevo oyru muru vakeike kue, bati sa taba sua oyra pita pupura oyru kuru tugnene, sa taka oyru muru keike kuo. 7Oyra boysi ka mia toyke oyra pita pupura te Abarami ka vatoqa oyra boysi ka mia toyke oyra pita pupura te Lote. Te sada noyene oyra boysi ni Kenani no oyra boysi ni Perizi ka ba kuo te vodu noyene.
8Si sa voy goyti Abarami te kue Lote, <<Kama noyivo aravatuqa me kuo te arakaluboro do itu, no te arakaluboroa doyra oyra boysi jaju te re no aro, bati itu katu keike tatama. 9Be sa voy kama totongonia vo lua sa kuo te tarakenakam? Itu matu arapareria. Sada re ko vene mo zo voy te neva moyri, aro me zo voy te neva dekana; sada re ko vene mo zo voy te neva dekana, aro me zo voy te neva moyri,>> sa voy.
10No Lote sa mi vaga la, sa mia sare poyu ni Jodani sa mi kadu la Zoa sa tabae bi, sa seva barue te Iaova, no sa seva vodu ni Ijipi. (Sada goyti korovita vaupu vo Iaova kumala ni Sodomo no Qomora.) 11Si Lote sa vene totongunia sare ni Jodani no oye sa zo voy la te neva sa pukae me ngada. Oyru kuru aravoylakae: 12Abarami sa kuo te vodu ni Kenani, no Lote sa la kuo te arakaluoboroa doyra oyra kumala lata ka kuo te sare no sa vadere oyra ona toypaka pua vatanga te kumala ni Sodomo. 13Oyra boysi ni Sodomo ka boysi roka no ka zaqala varoka te kue Iaova.
14Sada Lote sa kesini soypa oye, sa voy goyti Iaova te kue Abarami, <<Mo diere te ngoyni re ko kue, mo mia la neva moyri, no neva dekana, neva sa pukae me ngada, no neva sa jolupua la ngada. 15Taba oyra vodu re ko mia Aro me koyna amo re no oyra sokutu arasumam re taba sadasada. 16Aro me vazadeve oyra sokutu arasumam re moyra seva tabae ngasonoro te vodu ni te lua, ka oye sa majala ngea beito kau, sinani oye me majala ngea beito sokutu arasumam re. 17Sinani mo zo vaga la te ngavae, no depae vodu goyti, bati aro me koyna amo re,>> sa voy.
18Si Abarami sa vanukere oyra ona toypaka pua no sa zo la me la kou vatanga te oyra azu taboyna ni Mamere te kumala ni Heboroni, ngoyni oye sa vadere ni koyna Iaova sara taboyna.
Currently Selected:
Genesis 13: BAA
Highlight
Share
Copy
Want to have your highlights saved across all your devices? Sign up or sign in
© 2024, Islands Bible Ministries. All rights reserved.
