Genesis 14
14
Abarami sa vakavele Lote
1Te sada noyene Amoyrapeli buoe lata ni Sina, no Arioki buoe lata ni Elasa, Kidolaoma, buoe lata ni Elama, no Tidali, buoe lata ni Qoima soy, 2oyra ka la aratara te kue, Bera buoe lata ni Sodomo, Boysa buoe lata ni Qomora, Sinabi buoe lata ni Adema, Semeba buoe lata ni Zeboimu, no buoe lata ni Bela (Zoa). 3Oyra buoe lata goyti ka kuritini doyra vato no ka aratubini oyra doyra vai te malaku ni Sidimu (lukapota keno). 4Manokeri ave oyra ka kuo te sarajuoloa karapota te Kidolaoma, ba te vamanotulua ave oyra ka pejae doyra vauteve ona vato.
5Te vamanovatia ave, Kidolaoma, no oyra buoe lata ka saete oye ka koype me oyra doyra vai, no ka vangale oyra vai ni Repemu te vodu ni Aseteroti Kanemu, ka vangale oyra vai ni Zuzimu te vodu ni Amu, ka vangale oyra vai ni Emimu te sare lata ni Kiriatamu 6no oyra vai ni Horimu te vodu supu ni Seo, doka Ele- Parani, vatanga te kadalesana. 7Sinani oyra ka leiboro tavele ka la Eni Misipati (ngoyni ka keleke ni Kadese), ka vangale totongonia vodu te oyra boysi ni Ameliki, oyra ka vangale vele oyra boysi ni Amori oyra ka kuo Hazazoni-Tama.
8Sinani buoe lata ni Sodomo, buoe lata ni Qomora, buoe lata ni Adama, buoe lata ni Zeboimu no buoe lata ni Bela (ngoyni ka kelekeni Zoa) ka joulo kesini doyra kumala ka la vanama oyra doyra vai te aratara te malaku ni Sidimu 9no ka aratara te kue Kidoloama buoe lata ni Elamu, Tidolo buoe lata ni Qoimu, Amoyrapeli buoe lata ni Sina, no Arioki buoe lata ni Elasa- vati oyra buoe lata ka aratara te kue oyra loyma buoe lata. 10Malaku ni Sidimu sa pudae quara Taa, no sada oyra buoe lata ni Sodomo no Qomora ka paki, kavia oyra doyra boysi ka suru la te quara sa kue Taa no oyra ka kuosua ka paki la te oyra supu. 11Oyra vati buoe lata ka vaere taba pisipita ka kuo te kumala ni Sodomo no Qomora no ka vaere taba pitanaki; sinani oyra ka zo. 12Oyra ka pale vele Lote, toytu lata Abarami no taba pisipita oye sa tungene, bati oye sa kuo Sodomo.
13Ba keike boysi sa lopasa sa me no sa soynani Abarami boysi ni Iburu. Abarami sa kou vatanga te oyra azu taboyna te Mamere boysi ni Amori, likae doyru Esikolo no Ana, oyra taratulu goyti no Abarami ka vadere vato- arapokitini moyra arasasaoto napua tana doyra te sadae aratara. 14Sada Abarami sa ase torae oye ka koype vaseka, oye sa keleike araququni ni 318 oyra boysi palata ka puodo me te ona taotao no ka koyle rokisini oyra doka Dani. 15Te kose noyene Abarami sa ota oyra ona boysi voy moyra voye vapulese oyra no oye sa vangale oyra, sa koyle oyra doka Hoba, te neva moyria kumala ni Damasikasi. 16Oye sa pale velini taba oyra pita kala vaere moyna, no sa koype vavelini torae oye Lote no oyra ona tutupari, no oyra quole no oyra boysi ka vaseka vele oyra soy.
17Rokusua Abarami sa seipele me sada oye sa vangale soypa Kidolaoma no oyra buoe lata vele ka koype una oye, buoe lata ni Sodomo sa juolo me sa me tepere oye te malaku ni Seve (ka kelikini malaku te Buoe lata).
18No Melekizideki buoe lata ni Salemu, oye sa boysi sisiama te Bangara Zaka sua, sa iro me bereti no vaini, 19no oye sa manani Abarami, sa voy goyti,
<<Bangara Zaka sua me manani Abarami,
Bangara sa joyjuni moyna rani no vodu ni te lua
20Vazaka Bangara Zaka sua,
Oye sa toyro me oyra mo kana te sarajouloa koyrisim re.>>
No Abarami sa koyna Melekizideki keike manoa tabae oyra pita oye sa vaere.
21Sinani buoe lata ni Sodomo sa soynani Abarami, <<Re mo vavelini me oyra boysi, no mo sute oyra vavaoro re ko pale,>> sa voy.
22Ba sa voy goyti Abarami te kue buoe lata ni Sodomo, <<Aro ko maulu no ko pale poka koyrisi qu te tarakenakae Iaova, Bangara Zaka sua, oye sa joyjuni rani no vodu ni te lua, 23aro kama voyqo pale keike mene tutupari te re, kama voyqo pale keike mene tereti ba poykae vulivuli, soy re kama majala mo soyna, <Aro ko vatutupari Abarami>. 24Aro kama voyqo pale ka pita, ba aro me pale to pita ka oyke oyra qo vai, no me pale kenae doyra oyra ka zo una aqo- Ana, Esikolo no Mamere moyra pale kenae doyra,>> sa voy.
Currently Selected:
Genesis 14: BAA
Highlight
Share
Copy
Want to have your highlights saved across all your devices? Sign up or sign in
© 2024, Islands Bible Ministries. All rights reserved.
