Luke 1

Na Tinoni sa Takuti Vania na Buka

1Ego tei motadi tu sira na tinoni qai popodeke ko qai kuti vaitututiniria sira na vavakatodi na roiti qai gore votu tamigei. 2Ko na roiti aipira sa na veveidi tugu qai tei ule vakarovo vanigei tu agei ira qai batini matadi sosoto podalai tu pa popodalaina beto ko ira qai nabulu kopunia na nongoro jongana isa. 3Bangara Tiopilasi, ko inara sa vei sa pa liguna tu qa tuti vikivokotoria na totoso kakasana sa doru roiti ira, poni qa rove vaporeveveinai sa ara ma kuti vaituti vatale vanigo sao qau. 4Qa korapa roiti vei pira sara ko vei ko mu gigila vataleria ao sa na sosotodi tugu sira na sakasava qai tei ule vanigo tu ao ira na tinoni qau.

Na Podona i Jone Paputaiso za Takoroto Vakole

5Ego na totoso sa korapa suvere bangara si Herodi pa ia pikata gugusu pa Jiudia, sa sa suvereona tugu ketakoi sa kai iama, na isongona i Zakarae, ko na puku iama tuti lame veina ti Abija sisa. Ko i Elizabeti na maqotana ba kai bubutu iama lame veina tugu ti Eroni. 6Ko na tinoni tuvisidi pa dodogoro tana Tamasa sira karu, qai tuti vataleria ira karu sira doru garunu beto na uana tuvisidi tana Bangara ko sa kepore na dia pake pa toa. 7Ba sa kepore na tudia sira karu ura i Elizabeti sa na egoro beto ko ira karu doru sa qai tei baragoso na qoele beto tugu.

8Ego kai rane totonai sa kamua sa na totoso tadira na puku iama sa somania i Zakarae, poni sa kole roitinia na roiti tana iama pa moena na Tamasa si Zakarae. 9Ko pa tutina vei beto qai tavile tonai qai gonania na patu vivile sira na iama qai roiti, sa sa tauduku si Zakarae ko isa sa mina lao roitinia sa na vavakukuvu umumanga jonga pa zelepade madina. 10Ko totonai sa korapa vavakukuvu sisa, sa ira na minete tinoni sa qai korapa vavara pa peguruna.

11Ko pa totoso tugu isa sa sa votu sa na mateana tana Bangara, ko sa kole turuona pa kale matuana na ia vavakukuvuna na sakasava umumanga jonga. 12Ko totonai sa batia sa sa vakamunia na matagutu si Zakarae. 13Ba sa paranga lao tana sa na mateana, pira sau, <<Zakarae, muke matagutu! Ura sa tei nongoria tu na Tamasa sa na mua vavara. Ko kode mina vaporea na maqotamu i Elizabeti sa kai tumu marene, beto ko muna vakukunia i Jone sisa. 14Ko kode muna qeqera jola sao beto ko ira na kubo tinoni sa kode mai qera tugu tonai mina podo isa. 15Ura kode mina kai tinoni poreveveina pa moena na Bangara sisa. Minake isongo buku vaini babi na buku neqina sisa, beto na Gagala Tabuna sa mina kole tana podalai tu tonai mina korapa pa iapana na tinana sisa. 16Kode isa mina vagabala mule laoria tana Bangara na dia Tamasa sira na motadi na tinoni Izireli. 17Isa sa mina lao momoenia na Bangara. Kode mina lao pa neqi tana Gagalana na Tamasa kai muqisi podeke vei i Elaija, ko mina vagabalaria na bulodi sira na tamadi ko mai roroquria na tudia. Beto mina vagabalaria sira na tinoni ikikeredi ko mai isongia na tavagigala tadira na tinoni tuvisidi. Kode mina roiti vei inara sisa ko mina vatana vakole vania na Bangara sira na tinoni,>> sau sa na mateana.

18Poni sa paranga lao tana mateana si Zakarae, pira sau, <<Ai vei beto mana boka gigilai ara na sosotona sa sa vei isa? Ura ara sa qa tei baragoso tu beto ko na maqotaqu ba sa tei qoele tu,>> sau.

19Poni sa oe lao tana sa na mateana, <<Ara Qebereli sapi! Ara sa qa turu pa moena na Tamasa. Ko ara tugu sa sa garunusiu isa ko qa parangigo beto qa ule vanigo sa na nongoro jongana aipira. 20Ko doro! Na nongoro qa ule vanigo ara sa kode mina gore votu tugu pa totoso tavilena tana Tamasa. Ba quke vasosoto sao, ko kopira muna poka ko munake boka paranga sao tinganai mina kamua na rane mai gore votu sira na sakasava aipira,>> sau sa na mateana.

21Ego ira na tinoni sa qai kole verania si Zakarae sa qai kole rurania sa na veveina sa tei sovainia tu pa zelepade madina sisa ba sake oqani votu lame. 22Totonai sa votu lame ko sake boka parangaria, poni sa qai gigilai sa batia kai dodogoro pa zelepade madina sisa qarigu. Ko sake boka paranga ko sa kole popodeke pokaria gu sira na tinoni.

23Totonai sa beto ko sa okoto sira na rane nabulu sa sa mule laona pa nona ruma si Zakarae. 24Pa liguna sa vei isa beto sa bogata gu si Elizabeti na maqotana, ko sa kole gu suvere ovona sake kanoko pa ruma ka lima popu. Aipira sa paranga vei sisa, 25<<Kopira na Bangara sa tokanisiu sara ko qa vei pira. Sa doro kopunisiu ko na qua kea pa moedi ira na tinoni sa sa varijo palea isa,>> sau sisa.

Na Podona i Jisu sa Takoroto

26Ego totonai sa vonomo si Elizabeti, sa sa garunia na Tamasa sa na mateana i Qebereli ko sa lao pa kai gugusu pa Qalili, na isongona pa Nazareti. 27Ko sa lao sa tana kai rereko koregana, isa sa tei tavaiviva vakolena tu ko mina alavia kai marene na isongona i Josepa, kai tinoni sa podo lame vei pa tutina i Devita na bangara. Ko na isongona na rereko koregana isa si Mere. 28Ko sa lao sa na mateana ko sa parangia, <<Na mana mi kole tamu! Qu tamana sao! Na Bangara mi somana tamu!>> saunia.

29Ba tonai sa nongoria sa na paranga api sa sa matagutu vivitigi si Mere, ko sa kole roroqu nyanyaqoa isa sa ai beka pararanga vaigosoro veveina sapi sau. 30Ba sa paranga lao tana sa na mateana, <<Mere, muke matagutu! Ura sa qeranigo na Tamasa sao. 31Ko doro! Kode muna bogata sao ko muna vaporea sa kai tumu marene ko muna vakukunia i Jisu ao sisa. 32Kode mina poreveveina sisa beto mina tagigala na Tuna na Tamasa ululuna jola, beto na Tamasa isa na Bangara sa mina vania na binangara ti Devita isa na ona tite pa moa. 33Ko mina bangaraniria isa sira na bubutuna i Jekopi kamua na kamua beto ko na ona binangara sa mina kepore na vinabetona,>> sau sa na mateana.

34Poni sa oe lao tana mateana si Mere, <<Ai sa vei mina boka gore votu sa vei qu pojai ao, ura qa oqoro laoa kai marene sara?>> sau.

35Poni sa oe laoa na mateana sisa, pira saunia, <<Na Gagala Tabuna mina lagere tamu ko mina ongugo sao. Ko sa vei isa sa na koburu mina podo sa mina tagigala na liosona beto na Tuna na Tamasa. 36Doro! I Elizabeti na tavitimu sa tei qoele tu sisa ba kopira sa tei korapa tu bogatania isa sa kai koburu marene. Sa egoro qarigunia na tinoni sisa ba kopira sa tei vonomo tu sisa. 37Ura kepore sa kai sakasava sa tapatia na Tamasa,>> sau sa na mateana.

38Poni pira sau si Mere, <<Api sara na nabulu tana Bangara. Mi gore votu tu taqu sisa na paranga qu pojai ao,>> sau. Ego beto sa sa taloa tana sa na mateana.

I Mere Sa Lao Ovikia Si Elizabeti

39Ego ko pa totoso isa sa sa qaqiri gu si Mere ko sa sisiqarai taloa sae pa kubo pa ia pa Jiudia. 40Ko totonai sa kamu sa sa lao tome pa ruma ti Zakarae, ko sa lao gosoro qeqerania si Elizabeti. 41Tonai sa nongoro tekua i Elizabeti sa na vaigosoro qeqera ti Mere, sa sa kanoko sa na koburu pa iapana, beto sa tavapugelenia na Gagala Tabuna si Elizabeti, 42ko pira sau, <<Na tamanamu jolaniria ira doru rereko sao, ko mina tamana mutugu sa na koburu sa korapa pa iapamu. 43I sei sara ko na tinana na qua Bangara sa lame tu ovikisiu? 44Ura api! Isa tugu qa nongoria na vaisogoro qeqeramu ao, poni sa kanoko gu sa na koburu pa iapaqu ura sa qeqera. 45Muna tamana jola sao Mere, ura qu vasosotoa ao sisa vei sa pojanigo na Bangara sa kode mina gore votu!>> sau sisa.

Na Kera Vinatarasae Ti Mere

46Beto pira sau si Mere,

<<Na buloqu sa sa valavatia na Bangara,

47beto na gagalaqu sa qerania na Tamasa

isa na qua inaalo.

48Ura sake doro palesiu sara

kai ona nabulu kepore veveiqu.

Doro! Kopira ko mi lao mai gigalanisiu

na rereko tamanana ira doru sasae tinoni sara,

49ura na Tamasa neqina jola

sa roitiniria taqu na roiti vaivagabaradi.

Isa sa na liosona na isongona.

50Sa vabatiniria na ona vairoqu vaitokai

sira na okokoto sasae tinoni,

ira qai pangagania sisa.

51Na limana sa roitiniria na roiti neqidi jola,

sa vanyanyalaniria neqa

sira qai roroqu valavata muleniria mekadi.

52Sa vagore paleria isa pa dia totoqona bangara

sira na mamata neqidi,

beto sa valavataria isa sira na tinoni kepore veveidi.

53Sa vapugele vaniria na sakasava jongadi

sira qai burana,

goto ira qai isisongo

sa sa iju variu gagale paleria.

54Sa tei tokania tu isa sa nona nabulu i Izireli,

sake mumania isa sa nona vairoqu vaitokai.

55Isa tugu mina vei sau sa sa taringungutinia isa

tadira tamada pa moa,

tai Ebarahami beto tana tutina i Ebarahami

kamua na kamua,>>

sau si Mere.

56Ego ko sa suvere mai tu tai Elizabeti kue popu si Mere, beto sa sa mule pa nona gugusu.

Na Podona i Jone Paputaiso

57Ego sa kamua na ona popu okotona si Elizabeti, ko sa vapodoa isa sa kai koburu marene. 58Ko totonai qai nongoronia ira qai suvere pa vailivutaina beto ira na turana sa vei sa roroqu toka veinia na Bangara isa, sa qai somana qeqera tavitia isa sira.

59Ego beto sa totonai sa vesu ranena sa na koburu, sa qai lame somanania na pobena na koburu beto ko mai visongo tutinia i Zakarae na isongona na tamana qarigu. 60Ba sa paranga tu sa na tinana, <<Dai! I Jone tu sa na isongona,>> sauniria.

61Poni pira qarigu sira na tinoni tana, <<Ba kepore kai turamu ao sa bi tei tavaisongonia mai tu sa na isongo isa,>> qarigu.

62Beto sa qai popodeke poka laoa ira sa na tamana na koburu, ko qai nanasia i sei beka bi vaisongonia isa sa na koburu qarigunia. 63Poni sa tepai i Zakarae sa kai patu ketakoi mina kutia na isongo, beto sa pira sau sa sa kutia, <<Na isongona sa i Jone,>> sau. Poni sa qai gabara beto sira.

64Ego pa totoso tugu isa sa revanga sa na mangana beto sa munyala sa na meana, ko sa paranga vatarasaea isa sa na Tamasa. 65Ko ira doru qai suvere ketakoi sa qai matagutu beto. Sa tapiara lekogo pa doru gugugusu pa kubo Jiudia sa na nongoro aipira. 66Ko ira doru tinoni vei qai nongoria sa qai kole roroquria pa bulodi sa aipira, ko qai paranga sira, <<Ai beka kode mina koburu veveina sa na koburu api?>> qarigu. Ura sa tabata vakabere gu tana sa na neqi tana Bangara.

Na Kera Vinatarasae tai Zakarae

67Ego sa tavapugelenia na Gagala Tabuna si Zakarae ko sa ulule votunia, pira sau,

68<<Sa pada mina tavatarasae sa na Bangara

na Tamasa tadira na tinoni Izireli,

ura isa sa lame ovikiria

beto sa ruvataria sira na ona tinoni.

69Beto ko sa tei vanigita tu isa

sa kai inaalo varenena

pa tutina i Devita na ona nabulu.

70Isa vei sa tei taringungutinia tu isa

tadira na ona tinoni kokorotai madidi pa moa,

71sa isa mina vasaregita tadira na oda kana

beto pa neqi tadira doru qaike tavaraguanigita sau.

72Ko na Tamasa sa sa vabatiniria

na vairoqu vaitokai sira na oda tite,

beto sake mumania isa

sa nona taringunguti madina.

73Isa sa na taringunguti sa maulunia ti Ebarahami

ko mina vanigita sau:

74sa taringunguti vakolenia isa

sa isa mina vasaregita tadira na oda kana,

ko taneke matagutu nabulunia gita sisa sau.

75Ko gita tana nabulunia sisa pa uana liosona

beto na tuvisina pa moena isa

doru rane pa noda toa sau.

76Ko ao, na tuqu, sa muna tagigala

na tinoni kokorotai tana Tamasa ululuna jola.

Ura muna lao momoeni na Bangara sao,

ko muna vatana vakole vania na soana,

77ko muna vagigalainiria ira na ona tinoni

na veveina mai taalo sira

tonai mina taleoso na dia sela.

78Isa mina roroqu tokaniria

ura na oda Tamasa sa isongia na bulo vairoqu.

Kode mina valamea isa tadagita

sa na kabere vuvugei jonga

sa koko vei pa nulu vavagalo.

79Ko mina vagonaniria na kabere

sira qai suvere pa rorodomona

beto ira qai matagutunia na mate,

ko mina gaitia na oda vakasa

lao pa soana bule,>>

sau si Zakarae.

80Ko sa lavata sae ko sa neqi pa ona toa gagala sa na koburu. Sa suvere pa qega sisa tinganai tu sa kamua na totoso tonai sa votu vakabere tadira na tinoni Izireli.

Currently Selected:

Luke 1: LGA

Highlight

Compare

Copy