Maka 16
16
Na Turumulena i Jisu
(Matiu 28.1-8; Luke 24.1-12; Jone 20.1-10)
1Ego totonai sa jola na rane Minere, sa qai vai vakole oela umumanga jonga sira Mere Magadalene, i Salome, beto i Mere na tinana i Jekopi, ko mai lao lumunia na kokobu tinina i Jisu qarigu. 2Ko pa vuvugei jonga pa rane momoe pa vuiki isa tugu sa bola sagere na tapo sa qai lao pa bevi sira. 3Totonai qai korapa rerege lalaodia sa qai kole vavainanasa mekadi, pira qarigu, <<I sei mina bokili varijo vanigita sa na patu lavata pa mangana na bevi?>> qarigu. 4Ura nake patu qeqerana sisa. Ba beto mai dogoro vatale lao qarigu, sa sa tei tabokili varijo tu sa na patu. 5Ko tonai qai tome lao pa leo bevi, sa qai batia sa kai tinoni kokoregana sa vasaea na poko keala gojo doruru, beto sa korapa toqona keta pa kale matuadi. Ko qai gabara na matagutu sira.
6Ba sa paranga sa na tinoni isa, <<Muke matagutu na gabara! I Jisu pa Nazareti isa sa tavamate pa korosi sa qu korapa nyaqoa agou! Sa tei turu mule tu! Kepore lani sisa! Doro! Lani tugu sa na ia ketakoi qai vakolenia isa. 7Goto agou mu lao ko mu vavakato vaniria sira na ona sepele beto i Pita, pira muguniria, <Sa tei lao momoe tu pa Qalili sisa. Ko ketakoi tu sa kode muna batinia sisa, vei sa tei pojanigou tu perangana,> muguniria,>> sauniria.
8Ko qai abutu votu ko qai uku loa pale sa na bevi, ura qai matagutu beto qai gabara vivikereniria. Ko qaike isongo vavakato vania tugu kai tinoni, ura qai matagutu.
Sa Bola ti Mere na Rereko Magadalene i Jisu
(Matiu 28.9-10; Jone 20.11-18)
9(Ego pa liguna sa turu mule na vuvugei jonga pa rane momoe pa vuiki si Jisu, sa sa bola votu momoe tai Mere Magadalene sisa. Tana tugu na rereko api sa qi iju votuniria ka vitu tomate ikikeredi i Jisu perangana. 10Ko sa lao ko sa pojaniria isa sira ka visa qai tututia i Jisu, tonai qai korapa lukana takulanga. 11Totonai qai nongoronia sa i Jisu sa tei toa mule tu beto ko i Mere ba sa batiaona tu sauniria, ba qaike vasosoto tu sira.
Sa Bola Tadira Karu Sepele i Jisu
(Luke 24.13-35)
12Pana liguna isa sa i Jisu sa bola vagoto tadira karu sepele tonai qai korapa rerege lao pa kai gugusu. 13Ko ira karu qai gabala mule vavakato vaniria sira doru sepele, ba qaike vasosotoria tugu.
Sa Bola Tadira ka Manogameka i Jisu
(Matiu 28.16-20; Luke 24.36-40; Jone 20.19-23; Roiti 1.6-8)
14Pa liligu tu sa sa bola votu tadira ka manogameka sepele totonai qai korapa teteku. Ko sa tokeria, ura kepore na dia vinasosoto beto sa patu na bulodi ko qaike vasosotoria sira qai batia pa liguna sa turu mule isa.
15Beto pira sauniria, <<Mu votu lao pa doru eqa pa kasia gusu, ko mu taraenia na nongoro jongana tadira doru vinapodaka. 16Na tinoni mina vasosoto ko mina tapaputaiso sa mina taalo. Goto isa minake vasosoto sa mina tavakilasa tugu. 17Beto na vinagigila pira sa mai tuti kakataparia sira mai vasosoto: pa isongoqu ara sa kode mai ijiju pale tomate ikikeredi, beto mai paranganiria na goto parangadi. 18Bai aru dole ba bai buku sakasava vaivamatedi tugu sira, ba kepore tugu kame sa mina apuluria. Kode mai vaoponiria na limadi sira na tinoni qai mo, poni sa kode mai jongadia gu,>> sau si Jisu.
Sa Tateku Sae pa Noka si Jisu
(Luke 24.50-53; Roiti 1.9-11)
19Ego ko totonai sa beto parangaria i Jisu na Bangara sira nona sepele sa sa tateku sae pa noka, ko sa toqo pa kale matuana na Tamasa. 20Beto qai riu tarae doru eqa sira na sepele, ko na Bangara sa roiti tavitiria ko sa vaneqiniria ira na vinagigila vaivagabaradi sa na dia paranga. Agua.)#16.20 Na kobu paparanga pa 16.9-20 sa liligu gu qai vaparonia na kukuti ti Maka, goto sake kole pa soku kukuti kokoleidi.
Currently Selected:
Maka 16: LGA
Highlight
Share
Compare
Copy
Want to have your highlights saved across all your devices? Sign up or sign in
© 2024, Islands Bible Ministries. All rights reserved.
