Luke 17

Na Sela, na Rarange beto na Roiti tana Nabulu

(Matiu 18.6-7, 21-22; Maka 9.42)

1Ego sa paranga laoria na ona sepele si Jisu, <<Ira na sakasava vaivatatupe sa maike koroto lame, ba mi takulangagana tu sisa sa valameria. 2Sa jongana jola sa na tinoni sa roiti vei inara sa bi lova momoenia kai patu doa lavata pa ruana, beto bi lao lupi palea pa kolo lilisina. Isa sa sa jongana jolania bi vavukelia isa na rarange tana kai tinoni sa munyala nona rarange taqu.

3Ko mu kopu mulenigou pa miu toa ko muke vukele! Bi sela na tavitimu sa mu tokea ko mu vabatinia nona sela, ko bi gabala isa sa mu taleosonia. 4Bi roiti laonia na sela tamu ka vitu totoso pa kai rane sisa, ko bi mumule lao vavaja tamu sisa ka vitu totoso tugu, bi paranga vei pira, <Qa sela sara, ko mu taleosonisiu,> biu, sa muna taleosonia tugu,>> sau si Jisu.

5Poni pira qarigunia na Bangara sira na tinoni tagarunudi, <<Bangara, mu vaneqiria na mei rarange!>> qarigu sira.

6Poni sa oeria na Bangara, <<Bi ikete pikete vei gu na kikona kai gou masitadi sa na miu rarange, ba muna boka gu paranga veinia pira agou sa na gou lavata sa bagere vakori api, <Mu tajopu tu ao, ko mu tauma mule pa ivere,> bugunia, sa kode mina nongorogou gu.

7Bi kame agou sa bi koleona kai ona pinausu sa kole varoitiria ira na manugu qai ragatia na piki pa inuma babi kole kopuniria na sipi, ko bi beto roiti sisa ko bi mule pa ruma, sa ai sa vei? Kode mina pojania isa sisa ko mi teteku mai minagunia? 8Dai, kode minake vei ke! Kode pira tu mina poja veinia mule isa sa nona nabulu isa, <Mu vatana vanisiu na qua tetekuna, mu vasaeria na poko nabulu ko muna kole turu kopunisiu totonai mana kole tetekuqua na bukugaqu ara. Liligu tu beto muna boka tetekumua sao,> kode minagunia. 9Ai sa vei sa boka paranga jongana laoa tu isa sa na pinausu ura sa vatabea sa na garunu ta ona bangara? Dai! 10Kai muqisi podeke vei gu isa sagou. Totonai tu muna vaokotoria agou sira doru roiti qu tagarununiria, sa pira gu muna paranga vei, <Agei sa na nabulu kepore veveimei. Na mei roiti gu sa qe roitinia!> munagu gu,>> sau si Jisu.

I Jisu sa Salanaria ka Manogaputa Tinoni Popoqudi

11Ego totonai sa korapa rererege sae pa Jerusalema si Jisu, sa sa rerege tutia isa sa na vaivoloso pikata gugugusu pa Sameria beto pa Qalili. 12Totonai sa korapa lao tome sisa pa kai gugusu, sa qai lao gosoria ira ka manogaputa tinoni popoqudi sisa. Qai turu pa souna sira, 13ko qai kukuku uui vei pira, <<Jisu! Bangara! Mu roroqu tokanigei!>> qarigu.

14Poni sa batiria i Jisu, ko sa pira sauniria, <<Lao, ko mai doro vilotogou ira na iama,>> sau sisa. Totonai qai korapa lalaodia ira, poni sa qai tataloso valioso gu sira.

15Totonai sa gigila kamua kame ira ka manoga sa sa tei tasalana tu sisa, sa sa mule lao tai Jisu sisa, sa vevela vatarasaea isa sa na Tamasa. 16Ko sa lao toqo sori tutungu pa nenena i Jisu sisa, ko sa paranga jongana lao tana. (Na tinoni Sameria sa na tinoni isa.)

17Poni sa paranga si Jisu, pira sau, <<Ira ka manogaputa tu sa na tinoni qa taloso valiosoria ara! Ko pai tu sira ka sia? 18Ai sa vei kepore mule sa kame sa mule lame paranga jongana tana Tamasa goto na tinoni karovona gu api?>> sau sisa. 19Beto sa pira saunia i Jisu sa na tinoni isa, <<Turu, ko mu riumua. Na mua rarange sa sa tei salanigo tu,>> sau sisa.

Na Lamena na Binangara tana Tamasa

(Matiu 24.23-28, 37-41)

20Ego kaki ira na Parese sa qai nanasania i Jisu sa na totoso mina lame na binangara tana Tamasa. Poni pira sauniria i Jisu, <<Na binangara tana Tamasa sa minake lame vei pa kaki vinagigila mai boka tabata. 21Kepore sa kai tinoni mina boka paranga vei pira, <Dotu! Pa poni gu sisa!> babi <Lani gu sisa!> biu. Ura na binangara tana Tamasa sa korapa gu pa vaikorapaimiu agou,>> sau si Jisu.

22Beto sa pira sauniria ira na ona sepele, <<Qai korapa lame sira na rane totonai kode muna nyorogua batia agou sa kai memeka rane gu tana Tuna na Tinoni, ba munake boka batia. 23Kode pira mai poja veinigou sira na tinoni, <Dotu! Pa poni sisa!> babi <Lani sisa!> marigu. Ba kita mu mulongo votu lao tutiria. 24Sa kai muqisi podeke vei na kapi sa malara pa noka podalai pa kai kalena ko sa lao pa kai kalena, kode inara mina vei sa na rane tana Tuna na Tinoni. 25Ba momoe sa mina kole gosororia soku vitigi mai tu sisa, beto mina takilu pale mai tadira na sasae tinoni kopira.

26Mina vei na rane pa totoso tai Noa sa na rane tana Tuna na Tinoni. 27Qai kole tetekudia na bukugadia sira doru tinoni, beto ira na marene na rereko sa qai vavaialava ko tinganai sa kamu na rane sa tome pa aka i Noa, ko sa gore na nyoro ko sa vamate betoria sira doru. 28Ko kode mina vei mutugu sa taroiti pa totoso ti Loti, qai kole tetekudia na bukudia, qai kole vavaidia beto qai vavainiria na dia sakasava, qai kole umumadia beto qai kole roroitidia ruma. 29Isa tugu na rane sa taloa pa Sodomo i Loti sa sa gore sa na iku beto na patu kikilavadi sa qai okoro lagere vei pa noka, ko sa vamate betoria sira doru. 30Ko mina kai muqisi podeke vei inara sa na rane bola votu lame tana Tuna na Tinoni.

31Pana rane isa sa na tinoni sa korapa pa nare ruma sa minake gore qaqiriria na ona sakasava pa leo ruma. Kai muqisi podeke vei tugu isa mina korapa pa inuma sa minake pavu gabala mule pa nona ruma. 32Mu roqu vakoititia na maqotana i Loti ko! 33Na tinoni sa rabekia na ona toa sa kode mina saivia tugu, goto na tinoni sake rabekia na ona toa sa mina taalo. 34Ma pojanigou, pa bongina tugu isa sa karu tinoni sa mai korapa kole vaikamudia pa kai lovu; kame sa mina tateku variu, kame mina taloa pale. 35Karu rereko sa mai korapa mekarai kijagadia; kame ira karu sa mina tateku variu, kame mina taloa pale. 36Karu tinoni sa mai roiti vaikamu pa inuma pa rane isa; kame ira karu sa mina tateku variu, goto kame mina taloa pale,>> sau si Jisu.

37Poni qai nanasia ira ka visa ona sepele sisa, <<Bangara, kode pai mai taroiti sira na sakasava inara?>> qarigu.

Poni sa oeria i Jisu, Ketakoi sa kole kai kokobu manugu matena sa kode mai vavaikamu ketakoi sira na nyae,#17.37 Na nyae babi kai manugu sa vei na jako ko sa boboka gagani nyabo babi na tini kokobu tinoni. sau si Jisu.

Currently Selected:

Luke 17: LGA

Highlight

Copy