Luke 18

Na Naboko beto na Tinoni Vaipitu Ikikerena

1Ego beto sa sa pojai mule i Jisu tadira na ona sepele sa kai vavakato vavapada ko mi vagigalairia ko maike munyala pa vavara goto mai vavara laodia gu sau. Ko pira sauniria, 2<<Pana kai gusu sa koleona sa kai tinoni vaipitu sake pangagania na Tamasa beto sake doro vaporeveveinaria ira na tinoni. 3Ko na suverena tugu pa gusu isa sa kai rereko nanaboko, sa lao tepa milimulea na tuvisi tana tinoni vaipitu api, pira sau, <Mu vile vanisiu na tuvisi qa talenia na qua kana,> sau.

4Na sovaina jola sa sa daiona sa na tinoni vaipitu api. Ba liligu tu beto sa sa roroqu mekana sa na tinoni vaipitu api, pira sau, <Sosoto tugu sa qake pangagania ara sa na Tamasa, beto ko qake doro vaporeveveinaria tugu ara sira na tinoni, 5ba sa kamu vaduvili gojosiu ara sa na naboko api. Ko jongana ma roiti vania tu ropi na vaituti isa sa nyoguania isa. Ura vei maneke roiti vei ara sa kode mina manoga milimulesiu tugu, ko mina vapavusiu!> sau sa na tino vaipitu,>> sau si Jisu.

6Beto pira sau sa na Bangara, <<Mu nongoria tu sisa vei sa pojai na tinoni vaipitu ikikerena api ko! 7Ba ai sa vei? Qu roroqua agou sa minake vaituti vaniria na Tamasa sira na ona tinoni qai kiu alili laoa isa na rane na bongi? Ai vei, kode minake oqani tokaniria tugu na Tamasa sira? 8Dai! Ma pojanigou minake ruavo tugu vaituti vaniria isa sira. Goto ai sa vei, tonai mina mule lame na Tuna na Tinoni sa kode mina batiriaona tu sira kaki tinoni rarange pa peso?>> sau si Jisu.

Na Vavakato Vavapadadi na Parese beto na Tinoni Teteku Takisi

9Beto sa pojaniria mule i Jisu ira kaki qai range muleniria na dia toa tuvisidi beto qai dodoro vagoreria ira na goto tinoni sa na vavakato vavapada api, 10pira sau, <<Koledia sa karu tinoni qai sae vavara pa kakabarena zelepade, kame sa na Parese goto kame na tinoni teteku takisi. 11Na Parese sa sa turu vakaloi mekana beto pira sa vavara lao vei tana mekana, <Tamasa, qa paranga jongana sara tamu, ura qake vei ira doru goto tinoni sara. Qake ikiko, nake tinoni ikikerequ, beto qake babarata, beto qake vevei na tinoni teteku takisi pa kai kalequ poni sara. 12Ara sa karu totoso pa kai vuiki qa gigila tatabu gagani, beto qa valao vanigo kame pa manoga pa dorudi na qua sakasava qa tekuria,> sau sisa.

13Goto na tinoni teteku takisi sa sa turu pa souna tu ko sa pangaga enga sae pa noka, goto sa kole popoaria pa ona takulanga sa na raraqona, beto pira sa vavara vei, <Tamasa, mu roroqusiu beto mu taleosonisiu, ura ara sa na tinoni sela!> sau sisa.

14Ma pojanigou ara: na tino teteku takisi tu api, nake Parese, sa sa taleoso ko sa tuvisi pa dodoro tana Tamasa beto sa sa mule laona pa ona ruma sisa. Ura na tinoni sa vavalavata mulenia mekana sa mina tavagore, ba na tinoni sa vaikete mulenia mekana sa mina tavalavata,>> sau si Jisu.

I Jisu sa Mananiria ira na Koburu Ikikete

(Matiu 19.13-15; Maka 10.13-16)

15Ego qai toni laoniria tana na tudia ikikete sira kaki tinoni, ko mi vaoponiria na limana isa ko mi mananiria qarigu. Tonai qai batiria ira na sepele qai roiti vei inara sa qai tokeria sira. 16Ba sa kuku tekuria i Jisu sira na koburu ikikete ko sa parangaria, <<Mu vamalumu lameria taqu sira na koburu ikikete, muke suquturia. Ura na binangara tana Tamasa sa tadira tugu qai vevei ira na koburu pira. 17Ma poja sosotonigou ara sagou: na tinoni sake toa vei na koburu ikete pa tekuna na binangara tana Tamasa, sa minake boka sosoto tomea isa sa na binangara tana Tamasa,>> sau si Jisu.

Na Tinoni Isisongo sa Nyoguania na Toa Jola

(Matiu 19.16-30; Maka 10.17-31)

18Ego sa lame tai Jisu sa kai tinoni mamata tadira na Jiu, ko sa nanasa vei pira, <<Tinoni vaivagigalai jongamu, na sa sa mana roitinia ara beto mana teku isongia sa na toa jola?>> sau.

19Poni sa pira saunia i Jisu sisa, <<Ai sa vei ko na jongamu qugunisiu tu ara sao? Kepore sa kame sa jongana, goto na Tamasa gu mekana. 20Qu gigilariamua ao sira na garunu: <Muke babarata, muke varivai, muke iko, muke vaijutu seseke, beto mu valavataria na tinamu na tamamu,> #Votu 20.12; Vavanau 5.16-20.qarigu,>> sau si Jisu.

21Poni pira sau sa na tinoni api, <<Qa tei tuti betoria tu ara podalai na iketequ tu sira na garunu ira,>> sau.

22Tonai sa nongoria i Jisu inara sa paranga vei isa sa sa parangia sa na tinoni isa, <<Kai sakasava gu sa qu oqoro roitinia ao. Mu lao vavainiria sira doruna mua sakasava ko na poatadi sa mu ianiria ira qai vaivasevi, beto sa muna isongoria ao sira na isisongo pa noka. Pa liguna isa sa muna lame ko muna tutisiu ara,>> sau sisa.

23Totonai sa nongoro veinia isa inara sa sa takulanga sisa, ura na tinoni isisongo sisa ko sa rabekeria nona isisongo. 24Totonai sa dogoria i Jisu sa takulanga sa na tinoni isa sa sa paranga sisa, <<Sa tapata vivitigia na tinoni isisongo sa mina tomea na binangara tana Tamasa. 25E, sosoto tugu, sa tapata jola sa na kameli mina sulingi tomea sa na lubogona nila; ba mina tapata jolania mutugu isa sa na tomena na tinoni isisongo pa binangara tana Tamasa,>> sau sisa.

26Ira na tinoni qai nongoria sa vei inara sa qai nanasia sisa, <<Qokolo, ko vei sa, i sei gu sa mina boka taalo?>> qarigu.

27Poni sa pira sauniria i Jisu, <<Isa sa tapata jola tana tinoni sa sake tapata tana Tamasa,>> sau.

28Beto pira sau si Pita, <<Doria ko! Agei sa qe tei loa betoria tu sira doru mei sakasava ko qe tutigomei ao,>> sau sisa.

29Poni sa pira sauniria i Jisu, <<Ma poja sosotonigou ara sagou: na tinoni sa loa palea na ona ruma, na maqotana, ira na tasina marene, na tinana na tamana, babi ira na tuna na vei, ko bi nabulunia na binangara tana Tamasa, 30sa mina tavani vamota kopira, beto pa totoso sa korapa lame sa mina tekua na toa jola sisa,>> sau si Jisu.

Na Vinaue Totoso sa Pojai i Jisu sa na ona Mate

(Matiu 20.17-19; Maka 10.32-34)

31Ego sa toni kaleniria i Jisu sira na ona sepele beto sa pira sauniria, <<Mu vainongoro lame! Taqe korapa sae pa Jerusalema sa gita, ko kode ketakoi tu sa mai gore votu beto sa doru sakasava qai kokorotoniria ira na tinoni kokorotai pa Kukuti Tabuna, isa na veveina na Tuna na Tinoni. 32Kode mina tavalao pa limadi ira na tinoni karovodi sisa, ko mai valedenia, mai komiti vivikeria, beto mai tue taria. 33Mai majani vavaipiqolona, ko mai vamatea ira sisa. Ba pa rane vinaue sa mina toa mule pa mate sisa,>> sau si Jisu.

34Ba qaike boka vakaberia ira na sepele sira doru ginugua pira. Ura sa tavapae tadira sa na ginuadi ira na ona paranga pira, ko qaike gigilai sisa vei sa pojai i Jisu.

I Jisu sa Salania kai Tinoni Leqana

(Matiu 20.29-34; Maka 10.46-52)

35Ego totonai sa tata lao kamu pa Jeriko si Jisu, sa sa korapa toqo tetepaona pa kekete soana sa kai tinoni leleqana. 36Ko totonai sa nongororia na rerege joladi ira na minete tinoni poni sa sa nanasaria na savagana beka sa podo api sau.

37Poni qai ule vania, <<I Jisu pa Nazareti sa sa korapa rerege jola pa soana,>> qarigunia.

38Ura ko sa kuku vevela sisa, <<Jisu, Tuna i Devita! Mu roroqu tokanisiu!>> sau.

39Ba qai paranga susuqutia na vanogotia ira na tinoni qai momoe sisa. Ba tonai sa sa vavivai mutu iapeki sa na kuku, <<Tuna i Devita! Mu roroqu tokanisiu!>> sau.

40Poni sa turu noso si Jisu, sa pojaniria ko mai toni lamenia tana sa na tinoni leqana sau. Ko totonai sa tata lao tana sa sa nanasia i Jisu sisa, 41<<Na sa sa qu nyoguania ao ko mana roiti vanigo ara?>> saunia.

Poni sa pira sau sa na tinoni leleqana, <<Bangara, ara sa qa nyoguania ko bi babata na mataqu qau,>> sau.

42Poni sa pira saunia i Jisu sisa, <<Jongana, mu babata tu ao kopira! Na mua rarange sa sa tei salanigo tu!>> sau si Jisu. 43Poni sake ruavo tugu babata sa na tinoni isa, ko sa rerege tututiona ti Jisu beto sa kole paranga jongana na vatarasaea na Tamasa sisa. Ko ira na minete tinoni qai batia sa vei inara sa qai vatarasaea ira doru sa na Tamasa.

Currently Selected:

Luke 18: LGA

Highlight

Copy