Luke 19

I Jisu Sa Gosoria I Zakia

1Ego sa kamu pa Jeriko si Jisu, ko sa rerege jola lao vei ketakoi. 2Sa korapa suvereona tugu ketakoi sa kai tinoni na isongona i Zakia. Na tinoni lavata tadira na tinoni teteku takisi, ko na tinoni isisongo sisa. 3Sa kole nyonyogua dogoria isa ai veveina si Jisu, ba na tinoni papapakana gu sisa beto ko qai mota jola sira na tinoni, ko sake boka batia si Jisu. 4Ko sa abutu momoe lao pa moena na puku tinoni ko sa soqolo kaiti kesai isa sa kai gou sikamoa ko mi boka batia si Jisu sau, ura kode ketakoi sa mina jola vei isa.

5Totonai sa kamua i Jisu sa na ia isa sa sa enga sae ko pira saunia si Zakia, <<Zakia, mu sisiqarai gore! Ura pa ngeni api sa mana lao suvere pa ruma tamu sara,>> sau sisa. 6Isa tugu sa paranga vei ina i Jisu poni sa sake ruavo tugu na gorena si Zakia, ko sa vakamu vatalea pa ona ruma si Jisu beto sa qera sisa.

7Totonai qai batia ira na tinoni sa vei inara, sa qai ququminia ira si Jisu, pira qarigu, <<Qokolo, na tinoni api sa sa lao tu suvere pa ruma tana tinoni selana!>> qarigu. 8Ba sa turu si Zakia, ko pira saunia sa na Bangara, <<Bangara, kode mana vaniria ara ira na tinoni vaivasevidi sa na kobuna na qua isisongo. Beto vei ba tekuria ara pa soana seseke sira na sakasava tana goto tinoni, sa kopira mana vani beia ara na padana ka made totoso kubo jolaniria ira qa tekuria ara tana sisa,>> sau sisa.

9Poni sa pira saunia i Jisu sisa, <<Pa rane tugu pa ngeni api sa taalo sa na tatamana api. Ura i Zakia kisa ba na bubutuna tugu i Ebarahami. 10Na Tuna na Tinoni sa sa lame ko sa nyaqoa ko sa aloa na tinoni sa muma,>> sau si Jisu.

Na Vavakato Vavapadadi na Manoga Puku Poata

(Matiu 25.14-30)

11Totonai qai korapa vainongoronia ira na tinoni sa na paranga api, sa sa ule vaniria mule isa sa kai vavakato vavapada api. Ura sa tata kamu gu pa Jerusalema si Jisu, ko qai roroqua ira sa palu sa tata sosoto gu sa na totoso mina votu tadira sa na binangara tana Tamasa qarigu. 12Ko sa pira sau sisa, <<Koleona sa kai tinoni, na bubutu bangara, sa taloa riu pa kai gugusu pa souna, ko mi lao tavatoqo bangara beto sa mina mule bangara pa nona gusu sau. 13Ba totonai sa oqoro taloa riu isa sa sa kukuria sira ka manogaputa ona nabulu, ko sa ia okoto mekaniria kai puku poata,#19.13 Pa paranga Qiriki na isongona kai puku poata api sa na <<mina>>. Na mina sa na padana na tabara kue popu. beto pira sauniria, <Mu varoitiria sinara tinganai mana mule kamu,> sauniria.

14Ego, ko sa taloa riu sisa, ba ira na tinoni pa nona gugusu sa qaike tavaraguania sisa, ko qai garunu vatuti laonia na paranga sa na bangara pa gugusu isa, pira qarigu, <Qeke nyoroguania agei sa na tinoni ina ko mina bangaranigei,> qarigu.

15Ba sa tavabangara tugu sa na tinoni isa ko totonai sa mule kamu sa sa kukuria sira na ona nabulu, ko mi dogororia sira na vuadi na poata sa ianiria sau.

16Ego ko sa tome sa na nabulu momoe, ko sa paranga, <Bangara, isa na puku poata qu vanisiu ao sa kopira sa vuania ka manogaputa puku poata mule,> sau.

17<Jongana jola na mua roiti! Na nabulu jongamu sao! Qu tarange pa kopuna kai sakasava ikete sao ko kopira mana vakopunigo ka manogaputa gugusu,> sau sa nona bangara.

18Beto sa sa tome lao mule sa na nabulu vinarua, ko pira sau, <Bangara, na puku poata qu vanisiu sa kopira sa vuania ka lima puku poata mule,> sau.

19Poni sa paranga sa na bangara, <Ao sa mana vakopunigo ka lima gugusu,> sau sisa.

20Beto isa sa sa tome mule sa kai nabulu, ko sa paranga, <Bangara, api sa na mua puku poata. Qa ude vakole palea gu ara pa kai poko ikete. 21Qa matagutunigo ara sao, ura kai tinoni tapatamu sao. Qu tekua na mua sisa quke vakolea mekamu, beto ko qu abua isa quke umania,> sau sisa.

22Poni pira sau sa na bangara, <Na nabulu ikikeremu sao! Na mua paranga mekamu mai vakilasigo sao! Beko qu tei gigilasiumua tu sa kai tinoni tapataqu sara. Qa tekua isa qake vakolea, beto qa abua isa qake umania. 23Ba ai sa vei sa quke lao vatomea gu ao pa banga sa na qua poata, ko totonai ba mule lame sa ba teku votu mule tavitinia na vuana?> sau sa nona bangara.

24Beto pira sauniria na bangara sira qai kole turu ketakoi, <Lame ko mu teku variunia sa na puku poata sa isongia na tinoni api, ko mu valao vania na nabulu sa isongia ka manogaputa puku poata,> sau sisa.

25Ba pira qarigunia ira sisa, <Koi, bangara, ba sa tei isongoriaona tu isa sa ka manogaputa puku poata!> qarigu sira.

26Poni pira sauniria na bangara, <Na tinoni sa tei poreona tu sa mina tavani tamo vakubo mutugu, goto na tinoni kepore ona sa mina tateku pale sisa iapeki sa isongia isa. 27Ego, goto kopira sa mu lao tekuria sira ka visa qaike tavaraguanisiu beto qaike nyoroguanisiu ko ba bangaraniria ara. Toni lameniria ko mu vamate betoria pa moequ ara!> sau sa na tinoni isa,>> sau si Jisu.

Sa Tome pa Jerusalema vei Kai Varene si Jisu

(Matiu 21.1-11; Maka 11.1-11; Jone 12.12-19)

28Totonai sa poja betoa i Jisu sa na vavakato vavapada api, sa qai taloa sae sira, ko sa rerege pa moedi ira na sepele sisa ko sa sae pa Jerusalema. 29Tonai sa tata kamu pa Betipezi beto pa Betani, pa Kubo pa Olive, sa sa garunu momoe laoniria isa sira karu sepele, 30pira sauniria, <<Mu lao pa gugusu pa kai karovona pa moemiu poni ko tonai muna kamu sa kode muna batia kai dongiki talova vaturu kolena isa oqoro pore kai tinoni bi tei koia mai tu sisa. Mu ruvatia ko mu toni lamenia. 31Vei mina nanasa veinigou pira kai tinoni, <Ei, ai sa vei ko qu korapa tu ruvatia sina?> minagunigou, sa pira munagunia, <Na Bangara sa nyoguania,> munagunia,>> sau si Jisu.

32Ko qai taloa lao sira karu sepele, ko qai lao tugu batiria sira vei puputa tugu sa pojaniria i Jisu ira karu. 33Ko totonai qai korapa ruvata tekua ira karu sa na tuni dongiki, sa qai lame nanasaria ira na tinoni poredia sira karu, <<Ei, ai sa vei ko qu korapa ruvatia ina?>> qarigu.

34Poni pira qarigu sira karu, <<Na Bangara sa nyoguania,>> qarigu.

35Qai toni laonia tai Jisu sa na tuna na dongiki beto qai lovasa vamakelenia pa pokotona sa na dia poko, beto qai vakoia si Jisu. 36Totonai sa korapa koi lao pa dongiki i Jisu, sa qai lovasaniria pa soana ira na tinoni sira na dia poko.

37Totonai sa tata lao kamu pa Jerusalema si Jisu, pa soana gorena na Kubo pa Olive, sa na minete sepele tana sa qai podalai vevela vatarasaea sa na Tamasa ura qai qeraniria na roiti poreveveidi qai batiria. 38Pira qarigu,

Sa tamana sa na Bangara,

isa sa lame pa isongona na Tamasa!

Na bule sa kole pa noka

beto mi tavalavata sa na Tamasa pa nulu,#Kera Vinatarasae 118.26. qarigu.

39Kaki ira na Parese pa vaikamu tinoni pira qarigunia i Jisu, <<Tinoni vaivagigalai, mu tokeria sira na mua sepele ko mai noso!>> qarigu.

40Poni sa oeria i Jisu, pira sauniria, <<Ma poja vatalenigou ara sagou: vei maike vagala sira, sa ira na patu mekadi sa kode mai vevela votu,>> sau sisa.

I Jisu sa Lukania na Gusu pa Jerusalema

41Totonai sa tata kamu pa Jerusalema si Jisu ko sa dogoro lao ko sa batia poni sa lukania. 42Pira sau sisa, <<Vei bu gigilai gu ao pa ngeni sa na sakasava qai vagore votua na bule sa bi jonga! Ba sa pae pa matamu ao! 43Jerusalema! Sa korapa lame sa na totoso mai lame na mua kana, ko mai sepo vaikamuni peso sa na vailivutaimu ko mina sae tu kamua na tobana na gugusu, beto mai suvere vailivutainigo ko muneke boka votu tome. 44Mai jegara piaria ira sa na gugusu Jerusalema, beto ko mai vamategou sagou qu suvere pa leona na tobana na gugusu, beto ko kepore sa kai patu pa miu ia mina vaitopare kole jola, ura quke isongo gigilai agou sa na totoso tonai sa lame na Tamasa ko mi alogou sau!>> sau si Jisu.

Sa Tomea i Jisu na Ruma Zelepade

(Matiu 21.12-17; Maka 11.15-19; Jone 2.13-22)

45Beto sa sa tome lao sisa pa kakabarena zelepade, ko sa adu vovotuniria sira qai korapa vavainiria na sakasava, 46beto sa parangaria isa sira, <<Pira tu sa poja vei pa Kukuti Tabuna sa na Tamasa, <Na qua ruma sa na ruma vavarana, ba qu roiti veinia na bevi tadira na tinoni raja ikikodi agou!>#Aisea 56.7. sau,>> sau sisa.

47Ego ko na vaituti rane sa sa kole vavaivagigalai pa kakabarena zelepade si Jisu. Qai kole nyaqoa ira na kuta iama, ira qai vaivagigalainia na Vavanau beto ko ira na tinoni mamata tadira na tinoni Jiu sa na soana vei beto mai vamatea sisa qarigu. 48Ba qaike boka batia sa kai soana ko bai boka roitinia, ura ira doru tinoni sa qai nyogua vivitigi ko mai nonongorodia pa paranga ti Jisu qarigu.

Currently Selected:

Luke 19: LGA

Highlight

Copy