Luke 20

Na Nanasana na Neqi ti Jisu

(Matiu 21.23-27; Maka 11.27-33)

1Kai rane totonai sa korapa vaivagigalai beto sa taraenia na nongoro jongana tadira na tinoni pa kakabarena zelepade si Jisu, sa qai lao tana sira na kuta iama, ira qai vaivagigalainia na Vavanau, beto ira kaki tinoni mamata, 2ko pira qarigu, <<Mu ule vanigei moko. Pa neqi sa, beto i sei sa vanigo na neqi sa qu roitiniria ao sira na sakasava aipira?>> qarigunia.

3Poni sa oeria, pira sauniria, <<Ara ba ma nanasanigou mai tugu vei kai nanasa ropi. Mu pojanisiu moko: 4i sei sa vania na neqi si Jone beto sa papaputaiso tinoni? Na Tamasa pa noka ba ira gu na tinoni?>> sau sisa.

5Poni qai kole vaigonania mekadi sa na rorove, <<Na sa tanagu sa? Vei tana paranga, <Tana Tamasa pa noka,> tanagu, sa kode pira minagunigita, <Ba ai sa vei ko quke vasosotoa?> minagunigita. 6Ba vei tana paranga, <Tadira na tinoni gu,> tanagu, sa kode mai buti tavurunigita na patu ira na minete tinoni pira. Ura ira doru sa qai vasosotoa sa kai tinoni kokorotai tugu tana Tamasa si Jone,>> qarigu.

7Ko qai lao oe veinia gu pira, <<Qeke gigilai,>> qarigu.

8Poni sa pira sauniria i Jisu sira, <<Ego, ko ara ba maneke ule vanigou tugu sa na veveina na neqi sa qa isongia beto qa roitiniria ara na sakasava pira,>> sau si Jisu.

Na Vavakato Vavapadadi ira na Tinoni Roiti pa Inuma Qurepi

(Matiu 21.33-46; Maka 12.1-12)

9Beto sa pojaniria mule i Jisu ira na tinoni sa na vavakato vavapada api: <<Koleona sa kai tinoni sa umai na ona inuma qurepi, beto sa vakopuniria kaki tinoni umuma ko mai varoitia sau, beto sa sa taloa riu ko sa suvere vasovai tu pa kai gugusu karovona pa souna sisa. 10Totonai sa kamua na totoso papaduku, sa sa garunu laonia tadira sa kai ona nabulu ko mi teku vania na iana na vuadi pa inuma qurepi sau. Ba qai mamajai ira na tinoni umuma sa na nabulu api, beto qai iju vamule gagale palea gu. 11Poni sa garunu laonia mule isa sa kai ona nabulu, ba isa ba qai mamaja vakekea palea mutugu ira na tinoni umuma, beto qai iju vamule gagale palea. 12Ba sa garunu laonia mule isa sa na nabulu vinaue. Ego isa sa qai raja vapalekai mutugu ira na tinoni umuma, beto qai gona votu palenia pa peguruna na inuma qurepi.

13Pa liguna sa vei inara sa sa kole rorove sa na tinoni poreona inuma ko pira sau, <Na sa beka sa mana roitinia ara? Ego jongana, ma garunu laonia gu ara sa na tuqu marene isa qa roroqua. Palu isa sa kode mai pangagania,> sau sisa, ko sa valaoa.

14Ba totonai qai batia ira na tinoni umuma sa na tuna marene isa, poni sa pira qai kole vaingodo vei mekadi, <Api sa na tinoni kode mina teku vakarovoria na isisongo tana tamana sapi! Ariagada ko ta vai pale, ko na isisongo tana tamana sa tana teku vakarovoria noda,> qarigu. 15Ko qai lao gona votu lao palenia pa peguruna na inuma, ko qai vamatea sisa,>> sau si Jisu.

<<Ko qu roroqua agou sa ai kode mina roiti veiniria na tinoni poreona inuma sira ka visa tinoni umuma aipira? 16Kode kamu vamate beto paleria isa sira doru tinoni qai kopunia na inuma, beto mina vakarovo lao vaniria tu ira na tinoni gotodi tu sa na inuma!>> sau si Jisu.

Totonai qai nongoria ira na tinoni sa poja vei inara isa sa pira qarigu sira, <<Dai ko dai! Minake isongo vamalumia na Tamasa sisa!>> qarigu sira.

17Poni sa do tari vatotogasaria i Jisu sira, beto pira sau, <<Na sa ropi na ginuana sa na Kukuti Tabuna, isa pira sau,

<Na patu qai kilu palea

ira na tinoni vavaturu ruma,

sa isa tugu sa na kuta patu viviso.>#Kera Vinatarasae 118.22.?

18Isa sa vukelenia pa patu isa sa mina paleka talolomoto tugu, beto isa mina vukele takoa na patu isa sa mina muja vaavavuru veinia na kavu,>> sau si Jisu.

Na Veveina na Tabara Takisi

(Matiu 22.15-22; Maka 12.13-17)

19Ira na kuta iama beto ira qai vaivagigalainia na Vavanau sa qai popodeke ko mai aru tamania si Jisu pa totoso tugu isa qarigu, ura qai gigilai ira sa na vavakato vavapada api sa sa jutu lamegei gu agei qarigu. Ba qaike boka aru tamania ira sisa, ura qai matagutuniria na tinoni. 20Ko qai kole doro kopunia sa ai totoso ira mai boka tekua kai totoso jongana. Qai garunu golomoria ira sira kaki tinoni, ko mai lao paranga seseke kale mai vei na tinoni tuvisidi qarigu, beto mai podeke vagonai si Jisu pa kaki nanasa sesekedi ko mai boka teku valaoa sisa pa neqi tana qavuna ko mi tajutu qarigu. 21Qai lao paranga vei pira sira na tinoni pira tai Jisu, <<Tinoni vaivagigalai, qe gigilaimei agei sa isa qu pojai beto qu vaivagigalainia ao sa na tuvisina. Isa na sosotona beto na soana tana Tamasa sa qu vaivagigalainia ao, beto ko kepore veveidi tamu sira na tuturuna tadira na tinoni. 22Ai vei? Sa tavamalumu tugu pana Vavanau sa agei mene tabara lao takisi ti Siza, ba dai?>> qarigu.

23Ba sa tei dogoro pururia tu i Jisu sa na dia nyonyorava ko pira sauniria sira, 24Vabatinisiu moko sa kai poata? I sei na isumatana beto na isongona sa sa kole pa poata ina? sau sisa.

<<Na bangara Siza,>> qarigu.

25Poni sa pira sauniria i Jisu sira, <<Ego jongana, mu valaoa vania i Siza sira ti Siza, beto mu valao vania na Tamasa sira tana Tamasa!>> sau sisa. 26Qai gabara jolania ira sa nona oe ko qaike vaqeu, beto ko qaike boka vavukelenia ira pa dia seseke sisa pa moedi ira na tinoni.

Na Veveina na Turumule pa Mate

(Matiu 22.23-33; Maka 12.18-27)

27Ego qai lame tana sira kaki Sadusisi, ira qaike vasosotoa sa na veveina ira na tinoni matedi mai turu mule, ko pira qarigu, 28<<Tinoni vaivagigalai, pira sau sa sa kuti vanigita i Mosese, <Bi mate loai kai tinoni sa na maqotana ko bi kepore tuna, sa kode na tasina marene tugu mina alavia sa na nabokona isa, ko mina vapore vania na tuna vuana sa na tugana sa tei mate tu poni,>#Vavanau 25.5. sau. 29Ego ko koledia sira ka vitu tamatasi marene. Na tugadi moa sa sa alavia kai rereko ba oqoro pore tuna beto sa mate. 30Ko sa alava beia mutugu isa sa tuti tana pa moa sa na naboko isa, ba sa vei mutugu. 31Poni sa teku beia mutugu na vinaue, ba sa vei mutugu. Ko qai okoto betodi tu sira ka vitu tamatasi, ba kepore beto tugu na tudia. 32Pa liligu tu beto sa mate sa na rereko nanaboko. 33Ego, ko pa rane mai turu mule ira qai mate sa kode i sei ira ka vitu aipira na maqotana sa na rereko api? Ura ira ka vitu doru sa qai alavia sisa!>> qarigu.

34Poni sa pira sauniria i Jisu sira, <<Na vaialava sa tadira gu na tinoni pa toa pa totoso api, 35goto ira na tinoni qai pada ko mai kamua na totoso sa korapa lame beto mai turu mule pa mate sa maike vaialava. 36Ura totonai sa maike boka mate sira, goto kode mai suvere vei gu ira na mateana sira, maike mate. Ira sa na koburu tana Tamasa, ura na tavatoa muledi pa mate sira. 37Goto na veveina ira na tinoni mai turu mule pa mate sa i Mosese ba sa tei vakabere vanigita tu. Ura pa vavakatona na iku sa vuvurungu memea pa mumuqu sa sa pojai i Mosese sa, <Na Tamasa ti Ebarahami, na Tamasa ti Aisake, beto na Tamasa ti Jekopi,>#Votu 3.6, 15, 16. sau sisa. 38Ko na Tamasa tadira na tinoni toadi sisa, nake tadira na tinoni matedi. Ura tana Tamasa sa ira doru sa na toadi beto,>> sau si Jisu.

39Poni qai oe sira kaki qai vaivagigalainia na Vavanau, pira qarigu, <<Tinoni vaivagigalai, sa jongana jola sa na mua oe!>> qarigu sira. 40Ego pa liguna isa sa qai pangagania ko qaike tuma nanasa ligu mulea ira na tinoni sisa.

Na Veveina na Karisito

(Matiu 22.41-46; Maka 12.35-37)

41Ego pira sauniria i Jisu sira, <<Ai sa vei ko qai paranga tu sira na tinoni, <Na Karisito sa na Tuna i Devita,> qarigu? 42Ba i Devita tugu mekana sa sa paranga vei pira pa buka Kera Vinatarasae,

<Pira sau tana qua Bangara sa na Tamasa:

mu toqo keta pa kale matuaqu,

43tinganai mana veiniria na mua tetetena na nenemu

sira na mua kana,>#Kera Vinatarasae 110.1. sau.

44Ego sa kukunia na Bangara i Devita sa na Karisito, ba ai sa vei ko mina boka na tuna tu i Devita sisa?>> sau si Jisu.

Na Vabalau ti Jisu na Veveidi ira qai Vaivagigalainia na Vavanau

(Matiu 23.1-36; Maka 12.38-40; Luke 11.37-54)

45Totonai qai korapa vainongoro ira doru tinoni poni sa pira sauniria i Jisu sira nona sepele, 46<<Muna balauniria sira qai vaivagigalainia na Vavanau. Qai popoko vakakakasa, beto qai lelekogo sira. Qai nyoguania bai gosoro qeqeraniria ira na tinoni pa ia mamaketina qarigu. Beto qai vivileria na totoqona tadira na tinoni poreveveidi pa leo ruma vavaikamuna beto pa vavolo. 47Qai raragata tekuria na isisongo tadira na nanaboko, beto qai vavara vakakakasa ko mai tadogoro tadira na tinoni qarigu. Ba na dia vinakilasa sa mina ikerena jola!>> sau si Jisu.

Currently Selected:

Luke 20: LGA

Highlight

Copy