Luka 19

Zakeyo

1Erhi ajà omu Yeriko, ahulukana omu lugo. 2Hanaciyisha mulume muguma, mpu ye Zakeyo; àli mukulu w’abavurhîsa, anali mugale. 3Alonza okulolakwo Yezu n’okumumanya, ci ayabirwa erhi ngabo nyinji erhuma, bulya ali mmofi. 4Okubundi anacikanyiriza, ashokola, aj’ishigira oku muhumbahumba, mpu amubone, bulya yo yali njira yâge. 5Erhi Yezu ahahika, agalamira enyanya, amubwîra, erhi: «Zakeyo we, shonôka duba, bulya ene aha mwâwe najà». 6Anacishonôka bimbirirnbiri, amuyankirira aha mwâge n’omwîshingo. 7Ngasi bantu babonaga, bakacîduduma boshi n’okuderha, mpu: «Ahanzire aha mw’omunya-byâha!» 8Zakeyo ayimanga, abwîra Nyakasane, erhi: «Waliha, ebirugu byâni nâbigabamwo kabiri, mpè abakenyi cigabi ciguma; n’akabà hali oyu nalenganyize oku byâge, nâmugalulira kâni». 9Yezu anacimubwîra, erhi: «Ene obucire bwajîre mw’eno nyumpa, bulya oyu naye ali mwâna w’Abrahamu. 10Bulya Mwene-omuntu ayishiraga okulonza n’okuciza ngasi càli cahezire».

Omugani gw’amarhale

(Mat 25, 14-30)

11Erhi olubaga lubà ludwîrhe lwayumvirhiza ebyo binwa, ashub’ibatwa omugani, bulya ali hôfi n’e Yeruzalemu, nabo erhi badwîrhe bacikêbwa mpu Obwâmi bwa Nyamuzinda bwâyirukira bwaboneka caligumiza#19, 11 Enyigîrizo n’ebisômerîne bya Mwâmi Yezu byàli bimanyisize abantu oku ye Masiha. Co cirhumire bâli balangâlire mpu nkaba akola arhondêra Obwâmi bwâge. Ogu mugani guli gwa kumanyîsa oku buciri kulî. 12Anaciderha, erhi: «Muluzi muguma anacilîkûla, abalamira omu cihugo c’ihanga, mpu aj’irhôlayo obwâmi, ashub’inagaluka. 13“Ahamagala bambali ikumi, abahà marhale ikumi ga magerha, ababwîra, erhi”: “Mukârhimbûla kuhika ngaluke”». 14Ci abashi bâge erhi bamushomba; bamukulikiza entumwa zaj’iderha, mpu: «Rhurhalonza rhumushige». 15Okubundi erhi agaluka anacîyankiraga bulya bwâmi, arhumiza balya Bashi ahâga amagerha gâge, mpu alole bunguke buci ngasi muguma ayungusire. 16Omurhanzi ayisha, erhi: «Waliha, irhale lyâwe lyayungusire marhale ikumi». 17Amubwîra, erhi: «Kwokwo, mushizi mwinjà bulya wabîre mwîkubagirwa oku kantu kasungunu, okolaga walagira bishagala ikumi». 18Owa kabiri ayisha, erhi: «Waliha, irhale lyâwe lyayungusire marhale arhanu». 19Anacimubwîra naye, erhi: «Warhegeka nâwe bishagala birhanu». 20Owundi ayisha, erhi: «Waliha, irhale lyâwe eri nal’imbîsire libohe omu irhù. 21Bulya nal’inkuyôbohire, kulya kubà orhahimwa kukaliha: onabîkûle eci orhabîkaga, onasârûle eci orhahingaga». 22Anacimubwîra, erhi: «Oku kanwa kâwe wênene nâkutwîra, wâni mushizi mubî! Wali omanyire oku ndi muntu mukali, obîkûla eci arhabîkaga n’osârûla eci arhahingaga! 23Carhumirage amagerha gâni orhagahêka omu mbîko? K’erhi nyisha ntakabwinekwo obunguke?» 24Okubundi abwîra abambali, erhi: «Mumuyanke irhale lyâge, mulihe nna-marhale ikumi». 25Nabo, mpu: «Waliha, ci agwêrhe marhale ikumi!». 26«Ka mmubwîre: ngasi ogwêrhe ye wayish’ihâbwa, acibêre mugale; naye orhagwêrhi, n’ebinyi agwêrhe bamunyagusâbyo. 27Nabo abashombanyi bâni bàlahiraga mpu ntabè nnawâbo, mubandêrhere, munabanigire omu malanga gâni».

V. Enyigîrizo za Yezu omu Yeruzalemu

Yezu ajà omu Yeruzalemu

(Mat 21, 1-11; Mrk 11, 1-11; Ywn 12, 12-16)

28Erhi ayûs’iganîra ntyo, anacishokola, ayinamukira e Yeruzalemu. 29Erhi akola ahika e Betifaje n’e Betaniya, hôfi n’entondo y’Emizêti, arhuma babiri omu baganda bâge, erhi: 30«Jimwo cira cishagala cirhuyêrekire; hano muhikamwo, mwâshimâna omucukà gw’endogomi gurhasâg’igendwakwo na muntu guli mushwêke. Mugushwêkûle munagulêrhe. 31“Na hakabà owammudôsa, mpu”: “Cici mugushwêkûlîre?” “Munamubwîre, mpu”: “Nyakasane wagulonza”». 32Banacilîkûla, bashimâna nka kulya anababwîraga. 33N’erhi babà bakola badwîrhe bashwêkûla gulya mucûkà gw’endogomi, bênego bababwîra, mpu: «Cici mwashwêkûlira ogwo mucûkà gw’endogomi?» 34Nabo bashuza, mpu: «Nyakasane agulonza». 35Okubundi balêrhera Yezu gulya mucûkà gw’e ndogomi. Banacigubambakwo ebishûli byâbo, bashonezakwo Yezu. 36N’erhi abà akola adwîrhe agenda, abantu bakabamba ebishûli byâbo omu njira. 37Eerhi ahika oku mwandagalo gw’entondo y’Emizêti, omu bushagaluke, engabo y’abaganda bâge yoshi yarhondêra okukuza Nyamuzinda n’izù linene oku bisômerîne byoshi babwîne, mpu: 38«Agayirwe oyu Mwâmi oyishire oku izîno lya Nyakasane! Omurhûla omu irunga n’irenge enyanya bwenêne!»

Yezu ayêmêra obukuze bw’abaganda bâge (Ml 21, 14-16)

39Obwo baguma omu Bafarizeyi bâli omu lubaga bamubwîra, mpu: «Mwigîriza, hulisa abaganda bâwe». 40Naye abashuza, erhi: «Mmubwîzire oku erhi bankahulika, amabuye ganayâma».

Yezu àlakira Yeruzalemu

41Erhi akola ahika omu cishagala, arhondêra okucilakira, erhi: 42«Ocimanyage nâwe olusiku lw’ene ebyakulerhera omurhûla! Ci buno bifulisirwe omu masù gâwe. 43Bulya ensiku zâcikuyishira, abashombanyi bâwe bâkugorhe banakuzonge enyunda zoshi, 44bâkushekenye oku idaho we n’abâna bâwe bakulimwo#19, 44 Bulya barhayankiriraga Mwâmi Yezu wal’ibalêrhera enshôkano n’obuzigire bw’Îshe Nyamuzinda. Obwo bulêbi buyêrekîre okushâbwa kwa Yeruzalemu omu mwâka gwa kali 70 enyuma za Kristu.. Ciru barhakakulekerakwo ibuye oku lindi, kulya kubà orhamanyaga amango wal’irhandûlwa».

Yezu àhulusa abakâg’iguliza omu ka-Nyamuzinda

(Mat 21, 12-13; Mrk 11, 15-17; Ywn 2, 14-16)

45Anacijà omu ka-Nyamuzinda, arhondêra okuhulusa abakâg’iguliza n’okuguliramwo. 46Ababwîra, erhi: «Kuyandisirwe oku: Enyumpa yâni eri nyumpa ya kushengeramwo. Mwêhe mwayijizirage ishubûkiro lya bishungu»#19, 46 Lolà Iz 56, 7; Yer 7, 11..

Enyigîrizo za Yezu omu ka-Nyamuzinda

(Mat 11, 18)

47Akayigîriza ngasi lusiku omu ka-Nyamuzinda. Abajinji b’abadâhwa n’abashamuka b’ihano n’abarhambo b’olubaga bakâlonza oku bamuyîrhamwo, 48ci bakubula, bulya olubaga lwoshi lwàli lumurhegîre omu kuyumvîrhiza enyigîrizo zâge.

Currently Selected:

Luka 19: MKB

Highlight

Copy