HECHOS 1
1
Jesusca: “Diospac Espirituta cachashami” nishcamanta
1C'uyashca Teófilo. Jesús imallata ruhuashpa yachachishcataca, ñami punta librollapitac callarimanta pacha quillcashpa cacharcani. 2Apunchic Jesusta Taita Dios manarac jahua pachaman pushacpimi, huillagrichun acllashcacunamanca Diospac Espíritu yuyaita cushpa, imalla ruhuana cashcata yachachirca. 3Jesús huañushca q'uipaca, pai causarishcata alli yachachunca, chuscu chunga punzhacunacamanca tauca cutinmi paicunaman ricurirca. Chashna ricurishpami, Taita Dios mandacucmanta paicunaman yachachirca.
4Paicunahuan cashparacmi, Jesusca:
—Ñuca huillashca shina, ñuca Taita cusha nishca paipac Espíritu shamungacaman, Jerusalén pueblomantaca amarac maiman rishpa, shuyacunguichiclla. 5Juanca yacullahuanmi bautizarca, ashtahuanpish asha punzhacuna q'uipaca, Taita Diosca paipac Espirituhuanmi cancunataca bautizanga— nishpami mandarca.
Jahua pachaman Jesús rishcamanta
6Chaipi tandanacushca caccunami Jesustaca:
—Apunchic Jesús, ¿cunanllatacchu Israel*f** llactataca, ñucanchicpurallatac cutin mandachun cungui?— nishpa tapurcacuna.
7Chashna nicpi Jesusca paicunataca:
—Chashna tucuchunca, ñuca Taitallami pactachinga. Cancuna ima huata, ima punzha chashna tucuna cashcata yachachunca, Taita Diosca mana saquinchu. 8Shina cacpipish, Diospac Espíritu cancunapacman shamucpimi, tucui imatapish ruhuai pudinguichic. Chaimantami Jerusalén pueblopipish, tucui Judea llactapipish, Samaria llactapipish, shinallatac mai tiyashca llactacunapipish ñucamanta huillagringuichic— nirca.
9Chashna nishca q'uipami, paicuna ricucucpi, Jesustaca jahua pachaman Taita Diosca pusharca. Chashna pushacpi, p'uyu paita pacacpica, ña mana ricurcacunachu. 10Jesús chashna ricta paicuna huichailla ricuracucpimi, ñapish ishcai yuraclla churarishca runacuna paicunapac cuchupi ricurishpaca:
11—Galilea llacta runacuna, ¿ima nishpatac huichailla chaparacunguichic? Cai cancunapacmanta jahua pachaman pushashca Jesusllatacmi, cutin shamunga. Ima shinami pai ricta ricurcanguichic, chashnallatacmi cutimunga— nircacuna.
Matiasta Judaspac randi acllashcamanta
12Chashna nicta uyashca q'uipami, Olivos urcumantaca Jerusalén puebloman cutimurcacuna. Chai urcuca Jerusalenmantaca shuc kilómetro shinapimi carca. 13Ña Jerusalenman chayashpaca, paicuna pozacushca huasi altomanmi huichicurcacuna. Chai huasiman huichicuccunaca Pedro, Jacobo, Juan, Andrés, Felipe, Tomás, Bartolomé, Mateo, Alfeopac churi Jacobo, Celote*f** nishca Simón, shinallatac Jacobopac huauqui Judaspish carcacunami. 14Tucui paicunami Jesuspac huauquicunahuanpish, paipac mama Mariahuanpish, shinallatac caishuc huarmicunahuanpish Taita Diosman mañangapac tandanacuclla carcacuna.
15Chai punzhacunapica, Jesusta criccunaca pasac ishcai chunga shinami tandanacushca carcacuna. Paicunapac ñaupapimi Pedroca shayarishpa cashna nirca: 16“Caipi tandanacushca tucui criccuna. Jesusta Judas japichina cashcataca, ñaupamanmi Diospac Espíritu yuyaita cushpa, Davidman quillcachishca. Chaica pactanami carca. 17Judasca ñucanchicpuramantami carca. Paipish Jesusmanta huillagrichun, ñucanchicta acllashca shinallatac acllashcami carca. 18Chashna cashpapish, pai millaita ruhuashcamanta chasquishca cullquihuanca allpatami randirca. Chai allpallapitacmi Judasca jahuamanta uraisinga urmashpa, huicsa tucyashpa, chunzhullicuna t'allirishpa huañurca. 19Chashna tucushcata Jerusalenpi tucui causaccuna yachashpaca, chai allpataca paicunapac quiquin rimaipimi ‘Acéldama’ shutita shutichircacuna. ‘Acéldama’ nishcaca, ‘Yahuar Allpa’ nisha ninmi. 20Salmos libropica:
‘Pai causacushca huasica
shitashca saquirichun,
chai huasipica
pipish ama causachun’ nicunmi.
Chashnallatac:
‘Pai ruhuanataca,
shuc runa ruhuachun’ nicunmi.
21Apunchic Jesús ñucanchichuan cacpirac, punzhanta ñucanchichuan puric runacunaca tiyanmi. 22Paicunaca Juan bautizacushca punzhamanta pacha, Jesús jahua pachaman ringacaman ñucanchichuan puric runacunami. Chashna cashcamanta Jesús causarishcata ñucanchichuan huillachunca, paicunapuramanta maijanta cashpapish shucta acllashunchic” nirca.
23Pedro chashna nicpica, ishcai runatami ch'icanyachircacuna. Shucca Justo nishca José Barsabasmi carca. Cutin caishucca Matíasmi carca. 24Chaimantaca: “Mandac Taita Dioslla, canmi tucui gentecunapac shunguta ricsingui. Cunanca cai ishcaicunamantaca, maijantapish can acllashcata ñucanchicman ricuchiyari. 25Maijanta can acllacpipish, ñucanchichuan canmanta huillachunmi munanchic. Judasca millaita ruhuashcamantami, canmanta huillanata saquishpa huañushpaca, llaqui tucurca” nircacuna.
26Chashna mañashpa suerteta ruhuacpica, Matiasmanmi urmarca. Chaimantami Matiasca Jesús acllashca chunga shuc huillaccunahuan tandanacurca.
Currently Selected:
HECHOS 1: QXR96
Highlight
Share
Copy
Want to have your highlights saved across all your devices? Sign up or sign in
Quichua Cañar Nuevo Testamento © United Bible Societies in Ecuador, 1996.
